Go diriša dilo tšeo motho a di bonago ge o mo ruta, go dira gore a kwešiše seo o mo rutago sona le gore a se lebale selo seo. Jehofa, Mohlahli wa rena yo Mogolo, o be a diriša dilo tšeo batho ba di bonago ge a be a ba ruta dithuto tše bohlokwa. (Ge 15:5; Jer 18:1-6) Jesu e lego Morutiši yo Mogolo, le yena o be a di diriša. (Mat 18:2-6; 22:19-21) Go bonagala matšatši a dibidio e le tše dingwe tša dilo tšeo di thušago batho go kwešiša ge re ba ruta Beibele. Na ge o ruta barutwana ba gago ba Beibele o diriša dibidio gabotse?

Ka poroutšheng ya Ditaba tše Dibotse tše di Tšwago go Modimo!, go lokišeleditšwego dibidio tše 10 tšeo di tlago go re thuša go ruta barutwana ba rena ba Beibele. Gantši sehlogo sa bidio e nngwe le e nngwe se sepedišana le e nngwe ya dipotšišo tšeo di ngwadilwego ka bokoto tšeo di lego ka poroutšheng ye. Poroutšha ya Ditaba tše Dibotse yeo e lego go jw.org/nso, e na le dilinki tša dibidio tšeo di re gopotšago gore re bontšhe morutwana bidio e itšego neng. Go oketša moo, go Teaching Toolbox go na le dibidio tše dingwe tšeo di sepedišanago le dikgatišo tše dingwe tšeo re ithutago Beibele le batho ka tšona.

Na o boledišana le morutwana wa gago ka taba e theilwego Beibeleng yeo a thatafalelwago ke go e kwešiša? Goba na morutwana wa gago o lebeletšane le teko e itšego? Tsena wepesaeteng ya jw.org/nso goba o ye go Kgašo ya JW gomme o nyake bidio yeo e ka mo thušago. Mohlomongwe o ka bogela bidio yeo gotee le morutwana wa gago gomme la boledišana ka yona.

Kgwedi e nngwe le e nngwe, go lokollwa dibidio. Ge o dutše o bogetše dibidio tšeo, nagana kamoo o ka di dirišago ka gona ge o ruta batho tšhemong.