KE KA BAKA LA ENG GO LE BOHLOKWA: Ka baka la gore batho ba bantši bao ba sa bonego, ga ba lokologe ge ba bolela le batho bao ba sa ba tsebego. Ka gona go nyakega gore re diriše bohlale ge re ba nea bohlatse. Jehofa o tloga a rata batho bao ba sa bonego. (Le 19:14) Le rena re ka mo ekiša ka go thuša batho bao ba sa bonego gore e be bagwera ba gagwe.

RE KA DIRA SEO BJANG?

• ‘Nyaka’ batho bao ba sa bonego. (Mat 10:11) Na go na le motho yo o mo tsebago yoo ka gabo go nago le motho yoo a sa bonego? Na tšhemong ya gabo lena go na le dikolo, mafelo ao go hlokomelwago batšofadi goba mafelo a mangwe moo go ka hwetšwago batho ba go se bone? Na batho bao ba ka thabela dikgatišo tša rena tšeo di diretšwego batho ba go se bone? Na o ka kgona go yo nea bohlatse lefelong la batho bao ba sa bonego, leo le lego kgauswi le ga geno, ge go e na le tiragalo e itšego?

• Ba bontšhe gore o na le taba le bona. Ge ba ka bona gore o na le taba le bona, ba tla lokologa ge ba na le wena. Leka go thoma poledišano ka dilo tše di diregago lefelong leo

• Ba nee dikgatišo tšeo di ka ba thušago gore ba tsebe ka Jehofa. Mokgatlo wa Jehofa o tšweleditše dikgatišo tša mongwalo wa difofu ka mehuta ya go fapafapana e le go thuša bao ba sa bonego goba bao ba sa bonego gabotse. Ge eba motho yo a sa bonego a kgopetše kgatišo ya mongwalo wa difofu, mmotšiše gore o nyaka ya mohuta mang. Molebeledi wa tirelo o swanetše go kgonthišetša gore ngwanabo rena yoo a šomago ka dikgatišo tša phuthego, o tlatša fomo ya go dira kgopelo ya kgatišo gabotse.