Re na le dibio tše nne tšeo re di dirišago go kgothaletša batho go ithuta Beibele ge re le tšhemong. Ke ka baka la’ng di dirilwe?

• Bidio ya Ke ka Baka la Eng o Swanetše go Ithuta Beibele?—Bidio Yeo e Feletšego e diretšwe go thuša batho gore ba nyake go ithuta Beibele go sa šetšwe bodumedi bja bona. E kgothaletša batho go diriša Beibele gore ba hwetše dikarabo tša dipotšišo tše bohlokwa bophelong. E bile e araba e nngwe ya dipotšišo tšeo batho ba ipotšišago tšona. Le gona e hlalosa gore o ka kgopela thuto ya Beibele bjang.

• Bidio ya Ke ka Baka la Eng o Swanetše go Ithuta Beibele? (e kopana) e swana le bidio e feletšego eupša yona ke e kopana. E ka thuša kudu mafelong ao batho ba gona ba se nago nako.

• Bidio ya Ke Eng Seo se Diregago Thutong ya Beibele? e diretšwe go thuša motho gore a nyake go swarelwa thuto ya mahala ya Beibele, e bile e hlalosa gore thuto yeo e swarwa bjang le gore o ka e kgopela bjang.

• Bidio ya Re a go Amogela Thutong ya Gago ya Beibele e diretšwe batho bao re ithutago le bona Beibele. Le ge bidio ye e tšwelela feela go letlakala 2 la puku ya Thabela Bophelo go ya go Ile! o ka e bontšha motho yo o balago le yena poroutšha ya Thabela Bophelo go ya go Ile! Bidio ye e hlalosa gore puku ye e dirišwa bjang le go thuša morutwana go tseba gore thuto e tlo swarwa bjang.

Bidio e nngwe le e nngwe e dirilwe ka lebaka le itšego. Lega go le bjalo, dibidio tše re ka di bontšha batho goba ra ba romela tšona ge e ba go hlokega. Bagoeledi ba kgothaletšwa gore ba tsebe dibidio tše gabotse gore ba kgone go di diriša gabotse ge ba le tšhemong.