Matšatši’a dikotsi tša tlhago di direga gantši. Ge kotsi ya tlhago e direga, modiro wa tlhakodišo o swanetšwe go rulaganywa gabotse kudu. Ke ka baka leo Sehlopha se Bušago se rulagantšego gore ofising e nngwe le e nngwe ya lekala go be le Lefapha la Tlhakodišo.

Ge bana babo rena bao ba šomago lefapheng leo ba ekwa gore go na le kotsi, ba founela bagolo ba moo ka pelapela gore ba kwe gore bagoeledi ba hloka thušo efe. Ge e ba kotsi yeo e le e kgolo kudu gomme bagoeledi ba moo ba hloka thušo, gona ofisi ya lekala e tla abela bana babo rena bao ba swanelegago gore ba etelele pele modiro wa tlhakodišo. Bana babo rena bao ba ka kgopela baithaopi gore ba thuše goba ba kgopela gore go ntšhiwe meneelo ya dilo tšeo di hlokegago, goba ba rekela bana babo rena dilo tšeo ba di hlokago lefelong lona leo go bilego kotsi.

Go dira dilo ka tsela ye go na le mehola e mentši. Go thuša gore go se ke gwa ba le mošomo go sa hlokagale, go se be le kgakanego, e bile go se ke gwa senywa tšhelete le dilo tše dingwe. Seo se ka direga ge e ba bana babo rena ba sa dirišane le bao ba kgethilwego go etelela pele mošomo wa tlhakodišo.

Bana babo rena bao ba kgethilwego ke lekala, ba tlo kgona go tseba gore go hlokega bokae le gore go hlokega baithaopi ba bakae gore ba kgone go dira mošomo wa tlhakodišo. Le gona ba ka kgona go boledišana le ba mmušo bao gantši ba ka thušago gore modiro wa tlhakodišo o dirwe kapejana. Ka gona go se be le yo a kgoboketšago tšhelete, a romelago dilo tša tlhakodišo goba a yago moo go bilego le kotsi ge e ba a se a kgopelwa go dira bjalo.

Eupša re nyaka go thuša ge go e ba le dikotsi tša tlhago. (Heb 13:16) Re rata bana babo rena! Bjale re ka dira’ng gore re ba thuše? Sa bohlokwa kudu ke gore re rapelele bao ba wetšwego ke kotsi le bao ba šomago ka modiro wa tlhakodišo. E bile re ka ntšha meneelo ya go thekga modiro wa rena wa lefase ka moka. Sehlopha se Bušago se tlo laela diofisi tša makala gore meneelo yeo e ka thuša kae. E bile ge e ba re nyaka go thuša re ka tlatša fomo ya Local Design/Construction Volunteer Application (DC-50).

BOGELANG BIDIO YA MAFULA AO A SENTŠEGO KUDU KUA BRAZIL, KE MOKA LE ARABENG POTŠIŠO YE:

Ke’ng seo se go kgahlilego ka tsela yeo Dihlatse tša Jehofa di ilego tša thušana ka yona kua Brazil ka morago ga gore go be le mafula ka 2020?