Barutwana ba Beibele ba swanetše go ba le tumelo e tiilego gore ba kgahliše Modimo. (Heb 11:6) Re ka ba thuša go dira seo ka puku ya Thabela Bophelo go ya go Ile! Puku ye ya go ithuta e na le mangwalo a bohlokwa, ditlhaloso tše di kwagalago, dipotšišo tšeo di thušago motho go nagana, dibidio tšeo di thušago motho go dira diphetogo, le diswantšho tše dibotse. Ge re ka thuša barutwana go ba le dika tše dibotse tša Bokriste le go ba le segwera se se botse le Modimo, re tla ba re aga ka dikago tša go se swe.—1Ko 3:12-15.

Batho ba bangwe ba nagana gore go ka se kgonege gore e be bagwera ba Modimo ka ge ba ka se kgone go mmona. Ka gona, re swanetše go ba thuša go tseba Jehofa le go mo tshepa.

BOGELANG BIDIO YA THUŠA BA BANGWE GO BA LE TUMELO GO JEHOFA, O DIRIŠA PUKU YA “THABELA BOPHELO GO YA GO ILE!” KE MOKA LE ARABENG DIPOTŠIŠO TŠE:

• Re tseba bjang gore kgaetšedi yo o lokišeditše thuto gabotse?

• O dirišitše bjang dipotšišo tša tlaleletšo go thuša morutwana go bolela seo a se naganago le go hlalosa kamoo a kwešišago Jesaya 41:10, 13?

• Morutwana o ile a ikwa bjang ka morago ga go bogela bidio le go bala ditemana tša Beibele.

Batho ba bantši ga ba kwešiše topollo, goba gore ke mpho yeo Jehofa a ba filego yona. (Gal 2:20) Ka baka leo, re swanetše go ba thuša go ba le tumelo sehlabelong sa Jesu sa topollo.

BOGELANG BIDIO YA THUŠA BA BANGWE GO BA LE TUMELO GO JESU, O DIRIŠA PUKU YA “THABELA BOPHELO GO YA GO ILE!” KE MOKA LE ARABENG DIPOTŠIŠO TŠE:

• Re tseba bjang gore ngwanabo rena yo o lokišeditše thuto gabotse?

• O dirišitše bjang karolo ya “Ithute ka mo go Oketšegilego” go thuša morutwana?

• Ke ka bala la’ng thapelo e le bohlokwa go morutwana?