Go swana le diboka tša phuthego, seboka sa tšhemo le sona ke tokišetšo ya Jehofa yeo e re thušago gore re hlohleletšane leratong le medirong e mebotse. (Heb 10:24, 25) Diboka tšeo di swanetše go tšea metsotso e mehlano go ya go e šupa. Metsotso yeo e akaretša go tsebiša bagoeledi gore ba ya go šoma le mang, seterateng sefe le go rapela. (Ge e ba seboka se se swarwa ka morago ga diboka tša phuthego, gona e swanetše go ba se sekopana le go feta.) Moswari wa seboka sa tšhemo, o swanetše go lokišeletša ntlha yeo e tlago go thuša bao ba tla bego ba eya tšhemong letšatšing leo. Ka mohlala, sebokeng seo se swarwago ka mokibelo, ge e ba bontši bja batho bao ba lego gona ba se ba ka ba kgona go ya tšhemong gare ga beke, gona go ka ba kaone gore go bolelwe ka seo se ka ba thušago go boledišana le batho letšatšing leo. Tše dingwe tša dintlha tšeo go ka bolelwago ka tšona sebokeng seo ke dife?

• Poledišano ya mohlala yeo e lego go Pukwana ya Seboka sa Bophelo bja Rena le Bodiredi bja Bokriste

• Kamoo re ka thomago poledišano ka tiragalo yeo e sa tšwago go direga goba ka seo go bolelwago ka sona ditabeng

• Kamoo re ka tšwetšago poledišano pele le ge motho yo re bolelago le yena a thibela poledišano

• Kamoo re ka arabago motho yoo a sa dumelego gore Modimo o gona, motho yo a dumelago gore dilo di itirile, motho yo a bolelago polelo e nngwe goba motho yo a lego bodumeding bjo bo sa tlwaelegago tšhemong ya gabo rena

• Kamoo re ka dirišago karolo e itšego ya Beibele, jw.org goba JW Library^®

• Kamoo re ka dirišago e nngwe ya dikgatišo tšeo di lego go Teaching Toolbox

• Kamoo re ka tšeago karolo mehuteng e mengwe ya bodiredi bja rena, e bjalo ka go bolela ditaba tše dibotse ka founo, go ngwala mangwalo, go bolela ditaba tše dibotse mafelong a batho bohle, go dira maeto a go boela goba go swara dithuto tša Beibele

• Dikgopotšo ka go dula re šireletšegile, go fetofetoga le maemo, go ba le mekgwa e mebotse, go se fele matla goba taba e nngwe ya go swana le tšona

• Thuto goba bidio yeo e lego poroutšheng ya Ikgafele go Baleng le go Ruteng

• Kamoo re ka kgothatšago le go thuša motho yoo re šomago le yena tšhemo

• Lengwalo leo le sepedišanago le tšhemo goba phihlelo ya tšhemong yeo e kgothatšago