E se kgale, Jehofa a ka se sa kgotlelela dilo tšeo di diregago mo lefaseng. Bodumedi bja maaka bo tlo fedišwa, ditšhaba tšeo di ipopilego ngatana e tee di tla hlasela batho ba Modimo, le gona Jehofa o tlo fediša ba babe ka ntwa ya Haramagedone. Bakriste ba fela pelo ya go bona ge dilo tše tše bohlokwa le tše di kgahlišago di direga.

Ke nnete gore ga re tsebe dilo ka moka tšeo di tlago go direga nakong ya masetlapelo a magolo. Ka mohlala, ga re tsebe gore a tlo thoma neng. Ga re tsebe gore mebušo ya dipolotiki e tla fa mabaka afe a go hlasela bodumedi. Ga re tsebe gore batho ba Modimo ba tla hlaselwa nako e kaaka’ng, le gore ba tla hlaselwa bjang. E bile ga re tsebe ka go lebanya seo Jehofa a tlago go se diriša go fediša ba babe nakong ya ntwa ya Haramagedone.

Lega go le bjalo, Beibele e re thuša go tseba dilo tšeo re di hlokago gore re kgone go ba le sebete le kholofelo ka dilo tšeo di tlago go direga. Ka mohlala, re a tseba gore re phela mafelelong a ‘mehla ya bofelo.’ (2Ti 3:1) Re a tseba gore go hlaselwa ga bodumedi go tla “fokotšwa” e le gore bodumedi bja therešo bo se ke bja fedišwa. (Mat 24:22) Re a tseba gore Jehofa o tla phološa batho ba gagwe. (2Pe 2:9) E bile re a tseba gore yo Jehofa a mo kgethilego go fediša ba babe le go phološa lešaba le legolo ka ntwa ya Haramagedone, o lokile e bile o na le matla.—Kut 19:11, 15, 16.

Dilo tšeo di tlago go direga, di tlo dira gore batho ba ‘idibale ka baka la poifo.’ Lega go le bjalo, ge re ka bala le go naganišiša ka ditsela tšeo Jehofa a ilego a phološa batho ba gagwe nakong e fetilego, le go naganišiša ka seo a šetšego a re boditše sona ka bokamoso, re ka kgona go ‘inamologa le go emišetša dihlogo tša [rena] godimo’ ka gobane phološo ya rena e batametše.—Lu 21:26, 28.