Re na le tokelo yeo batho ba bangwe ba se nago yona. Ka ge re le Bakriste bao ba ineetšego le go kolobetšwa, re dula re nyaka go dira gore segwera sa rena le Jehofa e be se sebotse. O re gogetše go yena a diriša Morwa wa gagwe. (Joh 6:44) Le gona o theetša dithapelo tša rena.—Ps 34:15.

Re ka dira’ng gore re šireletše segwera sa rena se sebotse le Modimo? Ga se ra swanela go dira dilo tše mpe tšeo Baisiraele ba ilego ba di dira. Kapejana ka morago ga gore ba dire kgwerano le Jehofa, ba ile ba dira modimo wa seswantšho wa namane ke moka ba thoma go rapela medimo ya diswantšho. (Ek 32:7, 8; 1Ko 10:7, 11, 14) Re ka ipotšiša gore: ‘Ke arabela bjang ge ke lekega go dira selo se itšego se se fošagetšego? Na ditiro tša ka di bontšha gore ke tšeela godimo segwera sa ka le Jehofa?’ Ge re rata Tatago rena wa legodimong ka dipelo tša rena ka moka, seo se tlo re thuša gore re se ke ra dira dilo tšeo a di hloilego.—Ps 97:10.

BOGELANG BIDIO YEO E REGO, ŠIRELETŠA SEGWERA SA GAGO LE JEHOFA (KOL 3:5), KE MOKA LE ARABENG DIPOTŠIŠO TŠE DI LATELAGO:

• Go duma tša ba bangwe ke eng?

• Ke ka baka la’ng re sa swanela go ba le megabaru le go rapela medimo ya diswantšho?

• Bootswa bo swana bjang le go rapela medimo ya diswantšho?

• Ke ka baka la’ng bana babo rena, kudukudu bao ba nago le maikarabelo ka mokgatlong, ba swanetše go hlokomela dinyakwa tša balekane ba bona?