Letlakala la mathomong la wepesaete ya rena le na le dihlogo le dibidio tšeo di diretšwego go kgahla batho bao e sego Dihlatse tša Jehofa. (Dit 13:48) Gantši le bolela ka dilo tšeo go bolelwago ka tšona ditabeng, goba tšeo batho ba di naganago le go bolela ka tšona.

O ka diriša bjang letlakala la mathomong la wepesaete ya rena ge o le tšhemong?

• Dula o hlola wepesaete ya rena. Lebelela dihlogo tše di tšwelelago ka tlase ga sehlogo se se rego, “Tše di Lego Gona” gomme o bone kamoo o ka di dirišago go thuša motho yo a thabelago molaetša wa Beibele. Go dula o lebelela dihlogo tšeo di lego gona wepesaeteng go tlo go thuša gore o dule o hwetša dilo tše diswa tšeo o ka bolelago ka tšona tšhemong.

• Diriša dihlogo le dibidio tšeo di tšwelelago letlakaleng la mathomong la wepesaete ya rena go thoma poledišano. Dilo tše di ka go thuša go tseba seo batho ba tšhemong ya geno ba se naganago.

• Bontšha batho letlakala la mathomong la wepesaete ya rena. Ba bontšhe dihlogo tše di tšwelelago ka tlase ga sehlogwana se se rego “Kgetha Taba Yeo e go Kgahlago” ke moka o ba thuše go bona gore ba ka hwetša bjang ditaba tše dingwe wepesaeteng ya rena.

• Ba romele linki. Batho ba bangwe ba tšhaba go boledišana le rena eupša ba ka se be le bothata bja go tsena wepesaeteng ya rena. Ka gona o se ke wa dikadika go romela batho bao ba thabelago molaetša wa rena linki yeo e ba išago letlakaleng la mathomong la wepesaete ya rena, goba yeo e ba išago sehlogong se itšego goba bidiong e itšego yeo e bontšhitšwego moo.