•  Mantšu a go Bula 2

•  Mahumo ao a Lego ka Lentšung la Modimo 3-5

  •  Polelo 3

  •  Matlotlo a ka Beibeleng 4

  •  Mmalo wa Beibele 5

•  Dira Sohle Bodireding 6-14

  •  Go Thoma Poledišano 7

  •  Go Dira Maeto a go Boela 8

  •  Go Dira Barutiwa 9

  •  Go Hlalosa Ditumelo tša Gago 10

  •  Polelo 11

  •  Seo se Tlago go Dirwa 12

  •  Thulaganyo 13

  •  Go Diriša Dibidio le Dikgatišo 14

•  Bophelo bja Bokriste 15-16

  •  Thuto ya Beibele ya Phuthego 16

•  Mantšu a go Phetha 17

•  Go Reta Barutwana le go ba Nea Keletšo 18

•  Nako 19

•  Ketelo ya Molebeledi wa Tikologo 20

•  Beke ya Kopano ya Tikologo Goba ya Selete 21

•  Beke ya Segopotšo 22

•  Molebeledi wa Seboka sa Bophelo le Bodiredi 23

•  Modulasetulo wa Seboka sa Bophelo le Bodiredi 24

•  Moeletši wa ka Thoko 25

•  Diklase tša Tlaleletšo 26

•  Dibidio 27

1. Ditaelo tšeo di lego ka kgatišong ye di tlo thuša bao ba nago le dikabelo sebokeng sa Bophelo bja Rena le Bodiredi bja Bokriste. Pele mogoeledi a ka lokišetša kabelo ya gagwe, o swanetše go bala tlhahlo yeo e lego go Pukwana ya Seboka sa Bophelo le Bodiredi bja Bokriste. Bagoeledi ka moka ba swanetše go kgopelwa gore ba ingwadišetše go nea dipolelo. Ba bangwe bao ba kopanelago le phuthego ka mafolofolo ba ka tšea karolo ge e ba ba dumelelana le dithuto tša Beibele e bile ba phela ka go dumelelana le melao ya motheo ya Bokriste. Molebeledi wa Seboka sa Bophelo le Bodiredi o swanetše go boledišana le motho yo e sego mogoeledi eupša a ka rata go nea dipolelo. Molebeledi wa Seboka sa Bophelo le Bodiredi o tla hlalosetša motho yoo ka dilo tšeo di nyakegago, ke moka a mo tsebiša ge e ba a swanelega. Ge a boledišana le morutwana, motho yo a ithutago Beibele le yena o swanetše go ba gona (goba motswadi wa gagwe yo e lego Hlatse ya Jehofa a be gona). Dilo tšeo ba hlahlobago motho yoo ka tšona di swana le tšeo ba hlahlobago morutwana yo a nyakago go ba mogoeledi yo a sa kolobetšwago—od kgao. 8 ser. 8

2. Motsotso o tee. Beke e nngwe le e nngwe ka morago ga kopelo ya go bula le thapelo, modulasetulo wa Seboka sa Bophelo le Bodiredi o tla dira gore batheetši ba ikwe ba fela pelo ya go tlo ipshina ka lenaneo. Modulasetulo o swanetše go bolela feela dintlha tšeo di tlago go hola phuthego kudu.

 3. Polelo: Metsotso e 10. Sehlogo sa polelo ye le dintlha tša yona tše pedi goba tše tharo tše dikgolo di tšwelela ka go Pukwana ya Seboka sa Bophelo le Bodiredi. Polelo ye e tla abelwa mogolo goba mohlanka wa bodiredi yo a swanelegago. Ge e ba mmalong wa Beibele wa beke le beke go thongwa puku e mpsha ya Beibele, go tla bapalwa bidio yeo e rolago puku yeo ya Beibele. Ngwanabo rena a ka ahlaahla dintlha tše di swanago tšeo di lego bidiong yeo le sehlogong seo. Lega go le bjalo, o swanetše go kgonthišetša gore o hlalosa dintlha ka moka tšeo di lego ka pukwaneng ya seboka. Ge nako e dumela, o swanetše go hlalosa diswantšho ka ge di sepedišana le taba yeo go bolelwago ka yona. A ka diriša dintlha tše di tšwago dikgatišong tše dingwe ge feela di thuša go godiša taba yeo e ahlaahlwago.

 4. Matlotlo a ka Beibeleng: Metsotso e 10. Ye ke karolo ya dipotšišo le dikarabo yeo e se nago matseno goba ditlhaloso tša go phetha. E swanetše go swarwa ke mogolo goba mohlanka wa bodiredi yo a swanelegago. Moswari o swanetše go botšiša batheetši dipotšišo tše pedi tšeo di tšwelelago. Le gona, a ka ikgethela ge e ba ditemana tšeo di bontšhitšwego di swanetše go balwa goba go se balwe. Bao ba kgethwago gore ba arabe ba swanetše go araba ka metsotswana e 30 goba ka tlase ga moo.

 5. Mmalo wa Beibele: Metsotso e 4. Karolo ye e swanetše go dirwa ke morutwana wa monna . Morutwana o swanetše go bala karolo yeo a e abetšwego a sa bolele matseno goba phetho. Modulasetulo wa seboka o tla thabela kudu go thuša barutwana gore ba bale ka mo go nepagetšego, ka kwešišo, ka go thelela, ka go gatelela dintlha tša bohlokwa ka tsela ya maleba, ka go fetofetoša lentšu, ka go khutša mo go swanetšego le go bala ka mokgwa wa tlhago. Ka ge dikarolo tše dingwe tša Mmalo wa Beibele e le tše dikopana gomme tše dingwe e le tše ditelele, molebeledi wa Seboka sa Bophelo le Bodiredi o swanetše go abela barutwana dikabelo tše a naganne ka bokgoni bja yo mongwe le yo mongwe wa bona.

6. Metsotso e 15. Morero wa karolo ye ya seboka ke go nea bohle sebaka sa go itlwaeletša bodiredi le go kaonefatša bokgoni bja go boledišana le bokgoni bja bona bja go bolela ditaba tše dibotse le go ruta. Ge go hlokagala, bagolo ba ka fiwa dikabelo tša barutwana. Morutwana yo mongwe le yo mongwe o swanetše go šomela go ntlha yeo e lego go poroutšha ya Go Bala le go Ruta goba ya Rata Batho yeo e tšwelelago kabelong ya gagwe go Pukwana ya Seboka sa Bophelo le Bodiredi. Ka dinako tše dingwe go ka ba le karolo ya poledišano. Karolo yeo e swanetše go swarwa ke mogolo goba mohlanka wa bodiredi yo a swanelegago.—Go bona gore karolo yeo e lego ya poledišano e swarwa bjang, bala  serapa 15.

 7. Go thoma poledišano: Kabelo ye e ka dirwa ke morutwana wa monna goba wa mosadi. Mothuši e swanetše go ba wa bong bjo bo swanago goba setho sa lapa. Morutwana le mothuši wa gagwe ba ka dula fase goba ba ema.—Go hwetša boitsebišo bjo bo oketšegilego ka seo se tlago go dirwa le thulaganyo ye o ka e dirišago ge o filwe kabelo ye, bona serapa  12 le  13.

 8. Go Dira Maeto a go Boela: Kabelo ye e ka dirwa ke morutwana wa monna goba wa mosadi. Mothuši e swanetše go ba wa bong bjo bo swanago. (km 5/97 letl. 2) Morutwana le mothuši wa gagwe ba ka dula fase goba ba ema. Morutwana o swanetše go bontšha seo se ka bolelwago leetong la go boela.—Go hwetša boitsebišo bjo bo oketšegilego ka seo se tlago go dirwa le thulaganyo ye o ka e dirišago ge o filwe kabelo ye, bona  serapa 12 le  13.

 9. Go Dira Barutiwa: Kabelo ye e ka dirwa ke morutwana wa monna goba wa mosadi. Mothuši e swanetše go ba wa bong bjo bo swanago. (km 5/97 letl. 2) Morutwana le mothuši wa gagwe ba ka dula fase goba ba ema. Karolo ye e swanetše go bontšha thuto ya Beibele yeo e šetšego e tšwela pele. Ga go hlokagale matseno goba phetho ka ntle le ge morutwana a šomela go e nngwe ya dithuto tše. Ga go hlokagale gore bao ba dirago kabelo ye ba balele godimo dikarolo ka moka tšeo ba di abetšwego, eupša ba ka dira seo ge e ba ba rata.

 10. Go Hlalosa Ditumelo tša Gago: Ge e ba karolo ye e le polelo, e swanetše go dirwa ke morutwana wa monna. Ge kabelo ye e le pontšho, e ka dirwa ke morutwana wa monna goba wa mosadi. Mothuši e swanetše go ba wa bong bjo bo swanago goba setho sa lapa. Morutwana o swanetše go fa karabo e kwagalago a diriša kgatišo yeo e bontšhitšwego. Morutwana a ka kgetha go se bolele ka kgatišo yeo e bontšhitšwego.

 11. Polelo: Karolo ye e swanetše go dirwa ke morutwana wa monna, gomme ya newa e le polelo ka phuthegong. Ge e ba polelo ye e theilwe poroutšheng ya Rata Batho, karolong ya ditaba tša tlaleletšo A, morutwana o swanetše go bontšha gore mangwalo ao a ka dirišwa bjang tšhemong. Ka mohlala, a ka hlalosa gore temana yeo e ka dirišwa bjang, e ra gore’ng le gore o ka e diriša bjang go bontšha motho mabaka. Ge polelo ye e theilwe ntlheng ye itšego go poroutšha ya Rata Batho, morutwana o swanetše go bontšha gore ntlha yeo e ka dirišwa bjang tšhemong. A ka kgetha go šomiša mohlala woo o lego go ntlha ya 1 go thuto yeo, goba a ka kgetha go diriša temana yeo e lego go thuto yeo ge e ba go hlokagala.

   12. Seo se Tlago go Dirwa: Dilo tšeo go bolelwago ka tšona serapeng se le go seo se latelago di šoma go kabelo ya “Go Thoma Poledišano” le ya “Go Dira Maeto a go Boela.” Ka ntle le ge go bontšhitšwe, pakane ya morutwana ke gore a botše motho yo a bolelago le yena ka selo se bonolo seo Beibele e se rutago seo se ka kgahlago motho yoo le go dira gore a tle a kgone go boledišana le yena gape nakong e tlago. Morutwana o swanetše go bolela ka taba yeo e amago batho ba tšhemong ya gabo. A ka kgetha go diriša kgatišo goba bidio yeo e lego go Teaching Toolbox. Go e na le gore morutwana a sware kabelo ya gagwe ka hlogo, o swanetše go itlwaetša go ba le bokgoni bja go boledišana le batho, ka go bontšha gore o na le taba le bona le go bolela ka mokgwa wa tlhago.

   13. Dithulaganyo: Morutwana o swanetše go diriša thulaganyo yeo a e abetšwego go ya le ka maemo a tšhemong ya gabo. Ka mohlala:

1.  (1) Ka Ntlo le Ntlo: Thulaganyo ye e akaretša go bolela ditaba tše dibotse ka ntlo le ntlo—e ka ba ka founo, go ngwala mangwalo goba ge o na le motho yoo—goba go boela go motho yo o ilego wa bolela le yena ge o be o dira bodiredi ka ntlo le ntlo.

2.  (2) Go Nea Bohlatse bjo bo sa Rulaganyetšwago: Thulaganyo ye e akaretša go diriša sebaka se sengwe le sengwe go nea bohlatse ge o boledišana le motho. E ka akaretša le go boledišana ka Beibele le batho bao o šomago le bona, o tsenago sekolo le bona, baagišane ba gago, bao o nago le bona ka gare ga senamelwa goba kae le kae mo o lego gona.

3.  (3) Go Nea Bohlatse Mafelong a Batho Bohle: Thulaganyo ye e akaretša go nea bohlatse ka teroli, go founela batho ba dikgwebo, go nea bohlatse seterateng, diphakeng, moo dikoloi di phakago gona goba moo batho ba hwetšagalago gona.

 14. Go Diriša Dibidio le Dikgatišo: Morutwana a ka kgetha go diriša bidio goba kgatišo ge e ba maemo a dumela. Ge e ba kabelo ya morutwana e na le bidio goba morutwana a nyaka go diriša bidio, ba swanetše go boledišana ka yona eupša a se ke a bapala bidio yeo.

15. Ka morago ga kopelo, metsotso e latelago e 15 ya karolo ye e tla ba le karolo e tee goba tše pedi tšeo morero wa tšona e lego go thuša batheetši go phela ka go dumelelana le Lentšu la Modimo. Ka ntle le ge go na le ditaelo tše dingwe, dikarolo tše di ka abelwa bagolo goba bahlanka ba bodiredi bao ba swanelegago, ntle le karolo ya tše di nyakegago tša phuthego ka ge karolo ye e swanetše go dirwa ke bagolo. Ge e ba karolo e itšego e le poledišano, seboledi se ka botšiša dipotšišo tša tlaleletšo. Matseno a gagwe a swanetše go ba a makopana e le gore a kgone go ba le nako ya go gatelela dintlha tše bohlokwa le gore batheetši ba kgone go tšea karolo. Ge e ba polelo ye e na le poledišano, go ka ba kaone gore motho yo ba mmotšišago dipotšišo a arabe a le sethaleng ge e ba go kgonega.

   16. Thuto ya Beibele ya Phuthego: Metsotso e 30. Karolo ye e swanetše go abelwa mogolo yo a swanelegago. (Diphuthego tšeo di nago le bagolo ba sego kae di ka diriša bahlanka ba bodiredi bao ba swanelegago, go ya ka moo go nyakegago.) Sehlopha sa bagolo se swanetše go bona gore ke bomang bao ba swanelegago go swara Thuto ya Beibele ya Phuthego. Bao ba kgethwago ba swanetše go kgona go swara thuto ka tsela e kwagalago e le gore ba se je nako, ba kgone go gatelela mangwalo a bohlokwa le go thuša batheetši ka moka go bona bohlokwa bja dintlha tšeo di ahlaahlwago le go di diriša. Bao ba kgethilwego ba tla holwa ke go bala tlhahlo yeo e bolelago ka go swara karolo yeo e nago le dipotšišo le dikarabo. (w23.04 p. 24, lepokisi). Ge dintlha tša thuto ya bekeng yeo di ahlaahlilwe ka mo go tseneletšego, ga go hlokagale gore moswari wa thuto a tšwele pele ka thuto go no re a e fetše ka metsotso e 30. Ge e ba go kgonega, go swanetše go dirišwe baswari le babadi ba fapafapanego beke e nngwe le e nngwe. Ge e ba modulasetulo wa Seboka sa Bophelo le Bodiredi a laela gore nako ya go swara thuto e fokotšwe, gona moswari wa thuto o tla bona kamoo a ka e fokotšago ka gona. A ka kgetha gore dirapa tše dingwe di se balwe.

17. Metsotso e 3. Modulasetulo wa Seboka sa Bophelo le Bodiredi o tla boeletša dintlha tše bohlokwahlokwa tšeo di ahlaahlilwego sebokeng se. Le gona o swanetše go bolela ka boripana seo re tlago go ithuta sona bekeng e latelago. A ka bolela maina a barutwana ba bekeng e latelago, ge feela nako e dumela. Ka ntle le ge go na le ditaelo tše dingwe, modulasetulo o swanetše go dira ditsebišo le ge e le dife tše di nyakegago le go bala mangwalo ao a swanetšego go balelwa phuthego nakong ya dintlha tša gagwe tša go phetha. Ditsebišo tšeo di tlwaelegilego, tše bjalo ka ditokišetšo tša tšhemo le thulaganyo ya go hlwekiša holo, ga se tša swanela go bolelwa sethaleng eupša di swanetše go pharwa letlapeng la ditsebišo. Ge e ba go ka se be le nako e lekanego ya go dira ditsebišo goba go bala lengwalo le ge e le lefe mantšung a go phetha a modulasetulo, gona modulasetulo o swanetše go kgopela bana babo rena bao ba dirago dikabelo tša karolong ya Bophelo bja Bokriste gore ba fokotše nako ya dikarolo tša bona kamoo go nyakegago. (Bona  dirapa 16 le  19.) Seboka se tla phethwa ka kopelo le thapelo.

18. Ka morago ga kabelo e nngwe le e nngwe ya morutwana, modulasetulo wa Seboka sa Bophelo le Bodiredi o na le mo e ka bago motsotso o tee go reta morutwana le go mo eletša a lebeletše ntlha yeo morutwana a šomelago go yona. . Ge modulasetulo a rola kabelo ya morutwana, a ka se bolele gore morutwana o šomela thutong efe. Lega go le bjalo, ge morutwana a feditše go dira kabelo ya gagwe, le ka morago ga ge modulasetulo a boletše mantšu a swanelago a theto, a ka bolela thuto yeo morutwana a bego a šomela go yona. Ka morago ga moo, o swanetše go bolela lebaka leo morutwana a šomilego gabotse thutong yeo, goba ka lerato a hlalose lebaka leo morutwana a swanetšego go šomela thutong yeo gape le gore a ka dira seo bjang. Le gona modulasetulo a ka bolela ka dilo tše dingwe tša mabapi le kabelo yeo tšeo a bonago di ka thuša morutwana yoo goba batheetši. Morutwana a ka newa keletšo e nngwe yeo e ka mo thušago go šomišwa poroutšha ya Rata Batho, Go Bala le go Ruta goba puku ya Sekolo sa Bodiredi ka morago ga diboka goba ka nako e nngwe, e ka ba e le mabapi le thuto yeo a bego a e abetšwe goba thuto e nngwe.—E le gore o tsebe ka mošomo wa modulasetulo wa Seboka sa Bophelo le Bodiredi le wa moeletši wa ka thoko, bala  dirapa 19,  24 le  25.

19. Ga go karolo yeo e swanetšego go feta nako yeo e e beetšwego, go akaretša le dintlha tša modulasetulo wa Seboka sa Bophelo le Bodiredi. Le ge Pukwana ya Seboka sa Bophelo le Bodiredi e bontšha nako ya karolo e nngwe le e nngwe, e tla ba mo go sa swanelago go telefatša karolo e abetšwego e le feela gore go fihlelelwe nako e beilwego. Ge dikarolo tša seboka di ka ja nako, modulasetulo wa Seboka sa Bophelo le Bodiredi goba moeletši wa ka thoko o swanetše gore a eletše bao ba jelego nako. O swanetše go ba eletša ka thoko. (Bona  dirapa 24 le  25.) Seboka ka moka, go akaretša dikopelo le dithapelo, di swanetše go tšea iri e tee le metsotso e 45.

20. Ge phuthego e etetšwe ke molebeledi wa tikologo, lenaneo le swanetše go swarwa ka tsela yeo go hlalositšwego ka yona ka go Pukwana ya Seboka sa Bophelo le Bodiredi ka ntle le dilo tše di latelago: Thuto ya Beibele ya Phuthego yeo e lego karolong ya Bophelo bja Bokriste e tla tšeelwa legato ke polelo ya tirelo ya metsotso e 30 yeo e tlago go newa ke molebeledi wa tikologo. Pele ga polelo ya tirelo, modulasetulo wa Seboka sa Bophelo le Bodiredi o tla boeletša lenaneo leo le sa tšwago go swarwa, a bolela ka boripana ka lenaneo la beke e latelago, a dira ditsebišo tšeo di hlokagalago le go bala mangwalo ao a swanetšego go balwa, ke moka a rola molebeledi wa tikologo. Ka morago ga polelo ya tirelo, molebeledi wa tikologo o tla phetha seboka ka kopelo yeo a ikgethetšego yona. A ka bitša ngwanabo rena yo mongwe gore a tle a phethe ka thapelo. Nakong ya ketelo ya molebeledi wa tikologo, phuthego ga se ya swanela go ba le diklase tša tlaleletšo. Sehlopha se se kopanelago holong yeo se ka ba le diboka tša sona gaešita le ge molebeledi wa tikologo a etetše phuthego yeo e se hlokometšego. Lega go le bjalo, sehlopha seo se swanetše go boela se kopane le phuthego yeo e se hlokometšego bakeng sa go theetša polelo ya tirelo ya molebeledi wa tikologo.

21. Bekeng yeo phuthego e yago kopanong ya tikologo goba ya selete, go ka se be le diboka tša phuthego. Phuthego e swanetšwe go gopotšwa gore dintlha tšeo di swanetšego go ahlaahlwa dibokeng dibekeng tše bjalo di swanetše go ahlaahlwa ke motho ka noši goba malapa.

22. Ge Segopotšo se ka ba gare ga beke, Seboka sa Bophelo le Bodiredi se ka se be gona bekeng yeo.

23. Mogolo yo a kgethilwego ke sehlopha sa bagolo o tla hlankela e le molebeledi wa Seboka sa Bophelo le Bodiredi. Mošomo wa gagwe ke go kgonthišetša gore seboka se se sepela ka thulaganyo le gore se swarwa ka go dumelelana le ditaelo tše. O swanetše go dirišana kgauswi le moeletši wa ka thoko. Gateetee ge Pukwana ya Seboka sa Bophelo le Bodiredi e eba gona, molebeledi wa Seboka sa Bophelo le Bodiredi o tla aba dikarolo ka moka tša diboka tša gare ga beke tša dikgwedi tše pedi. O aba dikabelo tša barutwana le tšeo e sego tša barutwana. O abela le bana babo rena bao ba dumeletšwego ke sehlopha sa bagolo dikabelo tša go ba badulasetulo. (Bona  dirapa 3-16 le  24) Ge a aba dikabelo tša barutwana, o swanetše go naganišiša ka mengwaga ya morutwana, phihlelo ya gagwe le tokologo ya polelo mabapi le taba yeo go bolelwago ka yona. E bile o swanetše go naganišiša ka dilo tše le ge a aba dikabelo tše dingwe. Dikabelo ka moka di swanetše go ntšhwa mo e ka bago dibeke tše tharo pele ga ge kabelo e ka newa. Go swanetše go dirišwe fomo ya Kabelo ya Seboka sa Bophelo bja Rena le Bodiredi bja Bokriste (S-89) bakeng sa dikabelo tša barutwana. Molebeledi wa Seboka sa Bophelo le Bodiredi o swanetše go kgonthišetša gore kopi ya lenaneo la diboka e beilwe letlapeng la ditsebišo. Sehlopha sa bagolo se ka kgetha mogolo yo mongwe goba mohlanka wa bodiredi gore a thuše Molebeledi wa Seboka sa Bophelo le Bodiredi. Eupša ke bagolo feela bao ba swanetšego go aba dikabelo tšeo e sego tša barutwana.

24. Beke e nngwe le e nngwe, mogolo o tee o tla ba modulasetulo wa Seboka ka moka sa Bophelo le Bodiredi. (Diphuthego tšeo di nago le bagolo ba sego kae di ka diriša bahlanka ba bodiredi bao ba swanelegago, go ya ka moo go nyakegago.) Modulasetulo o swanetše go lokišetša dintlha tša matseno le tša go phetha seboka. E bile o tla rola dikarolo tša seboka ka go latelana ga tšona, le gona go ithekgile ka palo ya bagolo, a ka swara le dikarolo tše dingwe tša seboka. Ditlhaloso tšeo a di neago magareng ga dikarolo tša seboka e swanetše go ba tše dikopana kudu. Sehlopha sa bagolo se tla kgetha gore ke bagolo bafe bao ba swanelegago go ka ba badulasetulo. Bagolo bao ba tla abelwa gore e be badulasetulo nako le nako. Go ithekgile ka maemo a gabo lena, molebeledi wa Seboka sa Bophelo le Bodiredi a ka dirišwa e le modulasetulo gantši go feta bagolo ba bangwe bao ba swanelegago. Ge e ba mogolo a swanelega go swara Thuto ya Beibele ya Phuthego, mohlomongwe a ka swanelega gape e le modulasetulo wa seboka. Lega go le bjalo, gopolang gore go letetšwe gore mogolo yo e lego modulasetulo a rete barutwana, ge go hlokega a nea keletšo e lerato le yeo e tlago go ba thuša. Modulasetulo gape o swanetše go kgonthišetša gore seboka se fela ka nako. (Bona  dirapa 17 le  19.) Ge e ba modulasetulo a rata e bile go na le sekgoba se se lekanego sethaleng, go ka bewa maekrofouno o mongwe gona moo sethaleng gore a šomiše wona ge a rola dipolelo ge ngwanabo rena yo a tlago go nea polelo a ipeakanya maekrofounong wa seboledi. Ka mo go swanago, modulasetulo a ka rata gore a dule tafoleng yeo e lego sethaleng nakong ya kabelo ya Mmalo wa Beibele le nakong ya karolo ya Dira Sohle Bodireding. Se se ka boloka nako.

25. Ge go kgonega, go kaone gore go kgethwe mogolo yo e lego seboledi se se nago le bokgoni go dira kabelo ye. Mošomo wa moeletši wa ka thoko ke go nea keletšo ya ka thoko ge e hlokega, go bagolo le bahlanka ba bodiredi ge ba dirile kabelo le ge e le efe ya go ruta, go akaretša le dikabelo tša Sebokeng sa Bophelo le Bodiredi, dipolelo tša phatlalatša, go swara Thuto ya Morokami goba Thuto ya Beibele ya Phuthego goba go bala dirapa. (Bona  serapa 19.) Ge e ba phuthegong ya gabo lena go na le bagolo ba mmalwa bao e lego diboledi tše di nago le bokgoni le barutiši ba babotse, gona go ka kgethwa o tee gare ga bona gore e be moeletši wa ka thoko ngwaga ka moka, ke moka ngwageng o latelago gwa kgethwa yo mongwe gare ga bona. Ga go hlokagale gore moeletši wa ka thoko a nee keletšo ka morago ga kabelo e nngwe le e nngwe.

26. Diphuthego di ka ba le diklase tša tlaleletšo tša dikabelo tša barutwana go ithekgile ka palo ya barutwana. Klase e nngwe le e nngwe e swanetše go ba le moeletši yo a swanelegago, go kaone gore e be mogolo. Moo go hlokagalago, go ka dirišwa mohlanka wa bodiredi yo a tlogago a swanelega. Sehlopha sa bagolo se swanetše go kgetha gore ke mang yo a ka rwalago boikarabelo bjo le gore na ba ka šiedišana ka kabelo ye. Moeletši o swanetše go latela ditaelo tšeo di lego go  serapa 18. Ge e ba go na le klase ya tlaleletšo, barutwana ba swanetše go kgopelwa go ya klaseng yeo ka morago ga karolo ya Matlotlo a ka Beibeleng yeo e lego karolong ya Mahumo ao a Lego ka Lentšung la Modimo. Ba swanetše go boa ka morago ga karolo ya mafelelo ya morutwana.

27. Go tla dirišwa dibidio tše itšego sebokeng se. Dibidio tša seboka sa gare ga beke di tla hwetšagala lenaneong la JW Library® gomme di ka taoneloutwa didirišweng tše di fapafapanego tša elektroniki.

© 2023 Watch Tower Bible and Tract Society of Pennsylvania

S-38-SE 11/23