“अग्रगामी” शब्दले नयाँ ठाउँमा गएर कुनै कामको सुरुवात गर्ने व्यक्‍तिलाई बुझाउँछ। येशूलाई पनि एक अर्थमा अग्रगामी भन्‍न सकिन्छ। किन? किनभने मानिसहरूको जीवन बचाउने सन्देश सुनाउन र उनीहरूले उद्धार पाउने बाटो खोल्न येशूलाई स्वर्गबाट पृथ्वीमा पठाइयो। (मत्ती २०:२८) ‘चेला बनाउने’ काममा सकेसम्म धेरै समय बिताएर आज येशूका अनुयायीहरूले उहाँको अनुकरण गर्दै छन्‌। (मत्ती २८:१९, २०) यी चेलाहरूमध्ये कोही-कोही अग्रगामीको रूपमा सेवा गर्छन्‌।

अग्रगामी भनेको आफ्नो पूरा समय प्रचारकार्यमा बिताउने व्यक्‍ति हो। यहोवाका साक्षीहरू सबैले सुसमाचार प्रचार गर्छन्‌। तर कोही-कोहीले भने जीवनमा छाँटकाँट गरेर हरेक महिना प्रचारकार्यमा ७० घण्टा बिताउँछन्‌। तिनीहरूलाई नियमित अग्रगामी भनिन्छ। प्रचारकार्यमा धेरै समय बिताउनको लागि तिनीहरू थोरै समय मात्र काम गरे पुग्ने जागिर खान्छन्‌। कोही-कोहीलाई भने राज्य प्रचारकहरूको आवश्‍यकता धेरै भएको ठाउँमा सेवा गर्न विशेष अग्रगामी-को रूपमा नियुक्‍त गरिन्छ। तिनीहरू हरेक महिना १३० घण्टा वा त्योभन्दा धेरै समय प्रचारकार्यमा बिताउँछन्‌। यहोवाले आफ्ना आवश्‍यकता पूरा गरिदिनुहुनेछ भनेर विश्‍वस्त हुँदै तिनीहरू सरल जीवन बिताउँछन्‌। (मत्ती ६:३१-३३; १ तिमोथी ६: ६-८) सबैले प्रचारकार्यमा मात्र आफ्नो पूरा समय बिताउन सक्दैनन्‌। तर परिस्थितिले दिएको बेला तिनीहरू महिनाको ३० वा ५० घण्टा प्रचारकार्यमा बिताउँछन्‌। तिनीहरूलाई सहायक अग्रगामी भनिन्छ।

अग्रगामीहरू परमेश्‍वर र मानिसहरूप्रतिको प्रेमले उत्प्रेरित भएर सेवा गर्छन्‌। येशूले जस्तै आज हामी पनि आफू वरपरका मानिसहरूले परमेश्‍वर र उहाँको उद्देश्‍यबारे जान्‍नु एकदमै जरुरी छ भन्‍ने महसुस गर्छौं। (मर्कूस ६:३४) त्यसैले हामीसँग भएको ज्ञानले तिनीहरूलाई अहिल्यै मदत गर्नुका साथै भविष्यको लागि पक्का आशा पनि दिन्छ। अग्रगामीहरू छिमेकीप्रतिको प्रेमले उत्प्रेरित भई अरूलाई सुसमाचार सुनाउन आफ्नो समय र शक्‍ति खर्च गर्छन्‌। (मत्ती २२:३९; १ थिस्सलोनिकी २:८) यसो गर्दा अग्रगामीहरूको विश्‍वास बलियो हुन्छ, तिनीहरू यहोवासित घनिष्ठ हुन्छन्‌ र अझ आनन्दित हुन सक्छन्‌।—प्रेषित २०:३५.

• अग्रगामी कसलाई भनिन्छ?

• आफ्नो पूरा समय अग्रगामी सेवामा बिताउन कसै-कसैलाई केले उत्प्रेरित गर्छ?