1 Chronicles 11:1-47
11 Nítʼééʼ Ízrel dineʼé tʼáá ałtso Hííbran kin haalʼáadi David yaa áłah silı̨́įʼgo ádaaní, Shoo, nitsʼin índa nitsʼíís daniidlı̨́įgo nikʼéí niidlı̨́.
2 Hoolzhiizhdę́ę́ʼ Saul aláahgo nihinanitʼaʼí nilı̨́ yę́ędą́ą́ʼ ni lą́ą Ízrel dineʼé niidlíinii dah nihidiniʼeezh áádóó yah anánihííníʼeezh. Bóhólníihii nihiDiyin God ándííniid, Shidineʼé Ízrel baʼíłtsoʼ doo índa Ízrel dineʼé aláahgo binanitʼaʼí nílı̨́į doo.
3 Éí bąą Ízrel dineʼé hastóí aląąjįʼ naazíinii tʼáá ałtso Hííbrandi aláahgo naatʼáanii yaa haaskai áádóó Hííbrandi Bóhólníihii binááł David yił ahaʼdadeestʼą́, áko Sámuel éí Bóhólníihii bizaad bee hadzoodzíiʼii bikʼehgo David éí Ízrel dineʼé aláahgo yinanitʼaʼí dooleełgo akʼah yikʼi yadayiiziid.
David éí Záíyan yisná (2Sam. 5:6-10)
4 Áko David áádóó Ízrel dineʼé tʼáá ałtso Jerúsalemgóó yíkai; ákwii kéyahgi Jííbas dineʼé kéédahatʼı̨́įgo biniinaa Jííbas hoolyéé nítʼééʼ.
5 Áádóó Jííbasgi kéédahatʼínígíí David ádeiłní, Doo kojįʼ díínáał da. Ákótʼée nidi David éí Záíyangi ayóó átʼéego adziil bił nahazhódę́ę yisná; éí David bikin haalʼá hoosyeʼ.
6 Áádóó David ádííniid, Tʼáá háiida Jííbas dineʼé átsé atíyiilaaígíí éí naatʼáanii áádóó siláo binanitʼaʼí jílı̨́į doo. Nítʼééʼ Zerowáíyah biyáázh Jóʼab alą́ąjįʼ heedzáago naatʼáanii silı̨́ı̨́ʼ.
7 Áko David éí adziil bił nahazhóódgóó kééhatʼı̨́ı̨́ nítʼééʼ; éí bąą David bikin haalʼá hoosyeʼ.
8 Áádóó binaagóó tʼáá Míllodóó wóshdę́ę́ʼ kin haalʼáago áyiilaa. Áko kin haalʼáhígíí łahjįʼ Jóʼab hashtʼéédayiidlaa.
9 Áko David éí ayóó átʼé áádóó ayóó átʼéii yileeł, háálá tʼáá ałtsoní bee Bóhólníihii bił hólǫ́.
David bisiláo dahayóii (2Sam. 23:8-39)
10 Díí David hasiláo dahayóii honanitʼaʼí danilíinii bee hóhólníihgo hoł hazʼáanii chánah ádahósingo Ízrel dineʼé tʼáá ałtso aláahgo binanitʼaʼí dzizlı̨́įʼgo Bóhólníihii bizaad kʼehgo Ízrel bídéétʼiʼgo ádahoolaa.
11 Kótʼéego David éí siláo dahayóii neiʼeesh nítʼééʼ: Hákmonai biyeʼ Jashóbiyam wolyéii siláo binanitʼaʼí danilíinii yinanitʼaʼí nilı̨́, éí łah bitsiidétáán tʼéí yee anaʼí táadi neeznádiingo ałtso neistseed.
12 Áádóó hakéédę́ę́ʼ éí Ahówah dineʼé nilíinii Dódo biyeʼ Eliyéízar wolyéii éí diné táltʼéego dahayóii łaʼ nilı̨́.
13 Éí Pas-dámim nahósʼaʼgi tłʼoh naadą́ą́ʼ bideeʼí yílʼáá léiʼgi Eliyéízar éí David yił naaʼaashgo ákwii Filístiya dineʼé bisiláo hakʼiidoojah yiniyé ahííkai; Filístiya dineʼé bisiláo bitsʼąą diné yóóʼadazhneezhchą́ą́ʼ.
14 Áko tʼáá tłʼoh naadą́ą́ʼ bideeʼí bitahgi jíiskéego nidziisdzííʼ áádóó Filístiya dineʼé bisiláo nidzistseed. Kótʼéego Bóhólníihii ayóó átʼéego yisdáhóónil.
15 Nítʼééʼ tádiin siláo binanitʼaʼí danilíinii bitahdóó tájíltʼéego David bił ahizhdidookah biniyé Adálam tséʼáángóó jíkai, áko Réfeiyim honítsʼaaʼgi Filístiya dineʼé bisiláo nidahaaznáá lá.
16 Áádóó bidziilgo hazʼą́ągi David nijighá, áádóó Béthlehemgi Filístiya dineʼé bisiláo dah yinééł.
17 Łah David tʼáá hó bídin jílíinii bee hajoodzíiʼgo ájíní, Béthlehemgi yah aʼatiinígi tó hahadleehdóó ajódlą́ą́ʼ laanaa nisin!
18 Áádóó tájíltʼéego Filístiya dineʼé bisiláo dah deínéehii bił chʼízhníjéeʼgo Béthlehemgi yah aʼatiinígi tó hahadleehdóó tó nídazhdiiką́ągo David baa dadzizką́, nidi David tó tʼáadoo yoodlą́ą́ʼgóó Bóhólníihii tʼóó yichʼįʼ yayiiziid,
19 áádóó ání, Kódeeshníłígíí shiDiyin God tsʼídá doo yee shá hasʼą́ą da. Díí diné beʼiinaʼ ninádeideezʼą́ągo dabidił átʼé. Éí bąą tó tʼáadoo yoodlą́ąʼ da. Díí diné tsʼídá aláahgo dabidziilii táltʼéego kódaadzaa.
20 Jóʼab bikʼis Abísheiyai wolyéii táʼá góneʼ tsʼídá aláahgo bidziilgo bóhólnííh. Éí bitsiidétáán bee anaʼí táadi neeznádiingo neistseed, díí tájíltʼéhígíí łaʼ kótʼéego házhiʼ bééhoʼdílzin silı̨́ı̨́ʼ.
21 Áko tájíltʼéhígíí hó éí nidiltʼéhígíí biláahgo aghá hoʼdoolʼáago binanitʼaʼí áhoʼdiilyaa, nidi átsé táltʼéhígíí doo éí jílı̨́į da.
22 Kábziyeldóó Jiihóíyada biyeʼ Biinéíyah wolyéii, diné doo nánílyéesii ląʼígóó áátʼįįdii nilíinii éí Móʼab diné nizhdiltʼéego náshdóítsoh bitsiijįʼ ditłʼoii nahojílinii neistseed, áádóó níchíilgo aʼáán góyaa náshdóítsoh bitsiijįʼ ditłʼooígíí yiyiisxı̨́.
23 Áádóó Ííjip dineʼé ayóoda áníłnéezgo tsostsʼidóó ałnííʼ ké silá áníłtso, áko bitsiidétáán éí daʼatłʼóii biʼáah sitáangi áníldíilgo neitin; ákótʼée nidi ákǫ́ǫ́ gish yinítą́ągo áádóó bitsiidétáán bílákʼee hajiyííłhango tʼáá bí bitsiidétáán bee jiisxı̨́.
24 Díí Jiihóíyada biyeʼ Biinéíyah wolyéii yaa naayá, áko tájíltʼéhígíí łaʼ kótʼéego bízhiʼ bééhoʼdílzin silı̨́ı̨́ʼ.
25 Jó, tádiinígíí bitahdóó ił jílı̨́, nidi átsé táltʼéhígíí doo éí jílı̨́į da, áko David bisiláo binanitʼaʼí jílı̨́įgo áhoolaa.
26 Áádóó ałdóʼ siláo danilíinii bitahdóó diné doo nídanilyéesii danilínígíí éí díí: Jóʼab bikʼis Éísahel wolyéii áádóó Béthlehem hoolyéédóó Dódo biyeʼ Elhéínan wolyéii,
27 Héírad dineʼé Shámmath wolyéii, Pélon hoolyéédóó Híílez wolyéii,
28 Tekówa kin haalʼáádóó Íkesh biyeʼ Áíra wolyéii, Ánathath kin haalʼáádóó Éíbiyíízer wolyéii,
29 Húshai dineʼé Síbiikai wolyéii, áádóó Ahówah dineʼé Áíleiyai wolyéii,
30 Niitófah kin shijaaʼdóó Maharéíyai wolyéii, Niitófahdóó Béíyanah biyeʼ Hííled wolyéii,
31 Bénjamin dineʼé bikin haalʼáii Gíbiyah hoolyéédóó Ráíbai biyeʼ Ítheiyai wolyéii, Pírathan kin shijaaʼdóó Biinéíyah wolyéii,
32 Géíyash yílkʼidgi tó danílínídóó Hórai wolyéii, Árabah honoojíídóó Éíbiyel wolyéii,
33 Bahúrim hoolyéédóó Azméíveth wolyéii, Sheiyálbim kin shijaaʼdóó Iiláíyaba wolyéii,
34 Gízan hoolyéédóó Héíshem biyeʼké, Héírar hoolyéédóó Shéígii biyeʼ Jánathan wolyéii,
35 Héírardóó Séíkar biyeʼ Eiháíyam wolyéii, Er biyeʼ Iiláífal wolyéii,
36 Miikííra hoolyéédóó Híífer wolyéii, Pélon hoolyéédóó Aháíjah wolyéii,
37 Dził Kármeldóó Híízro wolyéii, Ézbeiyai biyeʼ Néíyarai wolyéii,
38 Néíthan bikʼis Jówel wolyéii, Hágeri biyeʼ Míbhar wolyéii,
39 Áman dineʼé Zíílek wolyéii, Biyérath kin shijaaʼdóó Néíharai wolyéii; éí Zerowáíyah biyáázh Jóʼab yá bee naʼabaahí neijaah nítʼééʼ,
40 Íthra dineʼé Áíra índa Géíreb wolyéii,
41 Het dineʼé Yuráíyah wolyéii, Áhlai biyeʼ Zéíbad wolyéii,
42 Rúben dineʼé Sháíza biyeʼ Ádina wolyéii; éí Rúben dineʼé bisiláo binanitʼaʼí nilíinii tádiingo yił naakai,
43 Méíyakah biyeʼ Héínan wolyéii áádóó Míthnai dineʼé Jáshafat wolyéii,
44 Áshterath kin haalʼáádóó Azáíyah wolyéii, Aróʼer kin shijaaʼdóó dineʼé Hóthan biyeʼké Shéíma áádóó Jáíyel wolyéii,
45 Shímrai biyeʼ Jedáíyeiyel wolyéii áádóó bikʼis Táíza dineʼé Jóha wolyéii,
46 Méíhava dineʼé Iiláíyel wolyéii áádóó Elnéíyam biyeʼké Jéribai áádóó Joshaváíyah wolyéii áádóó Móʼab dineʼé Íthmah wolyéii,
47 Iiláíyel wolyéii, áádóó Óbed wolyéii índa Mezóba hoolyéédóó Jéísiyel wolyéii. Díí tʼáá ałtso siláo danilı̨́.
