1 Chronicles 12:1-40
12 Díí diné Zíklag kin haalʼáagi David yidiikai; éí Kish biyeʼ Saul wolyéii tʼah bitsʼąą nijigháago, díí diné dahayóii anaaʼgi áká anájahii danilı̨́.
2 Ałtı̨́ı̨́ʼ yee hashtʼeʼádadólzingo bílaʼ tʼáá ałchʼijí chodayoołʼı̨́įgo tsé yee daʼdiłniih áádóó kʼaaʼ yee daʼdiłtʼoh, éí Saul bikʼéí danilíinii Bénjamin dineʼé danilı̨́:
3 Eihaiyíízer aląąjįʼ bóhólnííh silı̨́ı̨́ʼ; Jóʼash akéédę́ę́ʼ bóhólnííh, tʼáá áłah Gíbiyah kin haalʼáádóó Shiiméíyah wolyéii biyeʼké jílı̨́, índa Azméíveth biyeʼké Jííziyel áádóó Píílet wolyéii índa Bérakah áádóó Ánathath hoolyéédóó Jííhu wolyéii,
4 áádóó Gíbiyan kin haalʼáádóó Isméíyah wolyéii; éí diné tádiingo bitahgóó diné hayóii nilı̨́, áádóó tádiingo yilą́ąjįʼ sizíinii nilı̨́, áádóó Jeremáíyah, Jahéíziyel áádóó Johéínan índa Gedíírah kin shijaaʼdóó Józabad wolyéii,
5 Iilózeiyai áádóó Jérimath áádóó Biyaláíyah áádóó Shemaráíyah índa Háruf hoolyéédóó Shefatáíyah wolyéii,
6 Elkéínah áádóó Jiisáíyah índa Azéíriyel, Joyíízer áádóó Kórah dineʼé Jashóbiyam wolyéii
7 áádóó Gíídardóó Jiiróham biyeʼké Joyíílah áádóó Zebadáíyah wolyéii.
8 Áko Géed dineʼé danilíinii łaʼ tʼáá bí David yidiikaigo honoojíidi bidziilgo hazʼánígi diné dahayóii áádóó naʼabaah yídaneelʼáanii éí naagé áádóó tsiidétáán nideijaahii dabiniiʼ náshdóítsoh dabiniiʼígi ádaatʼé áádóó dziłghą́ąʼgi bįįhtsaʼii dadilwoʼiigi átʼéego dadilwoʼ.
9 Alą́ąjįʼígíí Íízer wolyéii, naaki góneʼígíí Obadáíyah wolyéii, tááʼ góneʼígíí Iiláíyab wolyéii,
10 dı̨́ı̨́ʼ góneʼígíí Mishmánah wolyéii, ashdlaʼ góneʼígíí Jeremáíyah wolyéii,
11 hastą́ą́h góneʼígíí Átayai wolyéii áádóó tsostsʼid góneʼígíí Iiláíyel wolyéii,
12 tseebíí góneʼígíí Johéínan wolyéii, náhástʼéí góneʼígíí Elzéíbad wolyéii,
13 Neeznáá góneʼígíí Jeremáíyah wolyéii, łaʼtsʼáadah góneʼígíí Mákbanai wolyéii.
14 Díí éí Géed biyeʼké danilı̨́; siláo dah deínéehii binanitʼaʼí danilı̨́. Aʼohgo doo nánílyéesii łaʼ neeznádiingo siláo yił daʼahóbáahgo yíneelʼą́; aláahgo doo nánílyéesii łaʼ tʼááłáhídi míilgo yíneelʼą́.
15 Áko díí átsé nídízííd binih Jórdan tooh wóʼądaaznaʼgo haʼnaa nijíkai áádóó honítsʼaaʼ góyaa kéédahatʼíinii tʼáá ałtso haʼaʼaahjigo áádóó eʼeʼaahjigo hakʼee yóóʼadahineezhchą́ą́ʼ.
16 Áádóó Bénjamin dineʼé índa Júdah dineʼé łaʼ bidziilgo hazʼánígi David yaa yíkai.
17 Nítʼééʼ David chʼíníyáago hachʼįʼ haadzíiʼgo áháłní, Kʼé dashididoohniiłgo shíká adoohjah biniyé shaa noohkaigo tʼéiyá nihił łaʼí nishłı̨́į doo. Azhą́ doo ákogi átʼéii tʼáadoo íishłaa da nidi shiʼanaʼí bichʼįʼ ninádashidinohʼaah biniyé noohkaigo dashizhéʼé yę́ę biDiyin God nihiidoołtsééł áádóó nihididooteh.
18 Nítʼééʼ Amaséíyai siláo binanitʼaʼí nilíinii Níłchʼi Diyinii bikʼi hooleʼgo ání, David, nííʼ daniidlı̨́; nił dahoniidlǫ́, Jésii biyeʼ nílíinii. Nichʼįʼ hózhǫ́, nichʼįʼ hózhǫ́ǫ leʼ; níká anájahii bichʼįʼ hózhǫ́ǫ leʼ, háálá niDiyin God níká análwoʼ. Áádóó David náhodiinilgo siláo dah deínéehii bindanitʼaʼí dajílı̨́įgo áhoolaa.
19 Nítʼééʼ Filístiya dineʼé bisiláo éí Saul yichʼįʼ anaaʼ dahodoołeeł biniyé David yił yíkaigo tʼáadoo David yíká ííjéeʼ da, háálá Filístiya dineʼé binanitʼaʼí łaʼ haa yádaałtiʼgo tʼóó náádááł dahodííniid, Honanitʼaʼí Saul bichʼijí jidooleełgo nihitsiitsʼiin nahgóó ahizhdooniłgo daʼátʼé, dahóʼní. Áko íídą́ą́ʼ Manáseh dineʼé bisiláo łaʼ David yidiikai.
20 Zíklag kin haalʼáagi jiníyáago díí Manáseh bisiláo míilgo binanitʼaʼí danilíinii hohidiikai: éí Ádnah, Józabad, Jedáíyeiyel, Máíkel áádóó Józabad índa Iiláíhu áádóó Zílthai.
21 Áádóó diné dahayóii doo nídanilyéesii éí siláo dah deínéehii yinanitʼaʼí danilíinii, éí David yíká ííjééʼ.
22 Íídą́ą́ʼ tʼáá ákwíí jı̨́ David yíká áńdaajah biniyé yaa dahakááh; wónáásóó Diyin God yee bóhólníihgo dah deínéhígi átʼéego tʼóó ahayóí silı̨́ı̨́ʼ.
Hííbran kin haalʼáagi David bisiláo dah yinééł
23 Bóhólníihii yee haadzíiʼii bikʼehgo Saul bee bóhólnííh yę́ę David yaa deididooʼááł biniyé díí siláo dah deínéehii bee naʼabaahii nideijaahígíí ákónéelą́ą́ʼ lá:
24 Júdah dineʼé éí naagé índa tsiidétáán nideijaahígíí, éí hastą́ądi mííldóó baʼaan tseebíidi neeznádiin ánéelą́ąʼgo anaaʼ yiniyé hashtʼeʼádadólzin lá.
25 Símiyan dineʼé bitahdóó diné anaaʼ yichʼįʼ dahayóii índa doo nídanilyéesii tsostsʼidi mííldóó baʼaan tʼááłáhídi neeznádiin ánéelą́ą́ʼ.
26 Líívai dineʼé éí dı̨́įdi mííldóó baʼaan hastą́ądi neeznádiin ánéelą́ą́ʼ.
27 Áádóó Éran dineʼé bisiláo táadi mííldóó baʼaan tsostsʼidi neeznádiin ánéelą́ąʼgo Jiihóíyada honanitʼaʼí nilı̨́ı̨́ nítʼééʼ.
28 Zéídak dinééh nilı̨́įgo diné hayóii índa doo nánílyéesii nilı̨́, áádóó hazhéʼé bidineʼé bisiláo binanitʼaʼí naadiin naaki yił yíkai.
29 Áádóó Bénjamin dineʼé éí Saul bikʼéí danilíinii táadi mííl ánéelą́ąʼgo Saul baʼáłchíní bił danilı̨́ı̨́ nítʼéeʼii David yił yíkai.
30 Íífreiyim dineʼé naadiindi mííldóó baʼaan tseebíidi neeznádiin diné dahayóii áádóó doo nídanilyéesii, éí dabizhéʼé yę́ę bidineʼé ayóogo béédahoʼdílzin.
31 Áádóó Manáseh dineʼé ałnííʼdóóígíí tseebíítsʼáadahdi mííl éí David aláahgo naatʼáanii ádeidoolííł biniyé dabiʼdééjiʼgo neheeskai.
32 Ísakar dineʼé éí dahwéelzhíishii yikʼidadiʼyiitįįhii áádóó Ízrel dineʼé ádadooníiłii bił béédahózinii danilínígíí índa bá naazíinii éí naakidi neeznádiin ánéelą́ą́ʼ. Índa bikʼisóó tʼáá ałtso bikʼeh ádaatʼé.
33 Áádóó Zébyulan dineʼé anaaʼ dayiichįįhii áádóó bee naʼabaahii tʼáá ałtso yił hashtʼeʼádadólzinii ashdladiindi mííl ánéelą́ąʼgo ałkééʼ naʼídíʼnil yídahoołʼą́ą́ʼ lá, áádóó doo naaki nilı̨́ı̨́góó nitsídaakeesgo David yíká anájah.
34 Náftalai dineʼé bisiláo binanitʼaʼí tʼááłáhídi mííl ánéelą́ą́ʼ, áádóó naagé índa tsiidétáán nideijaahígíí tʼáá biłgo tádiindóó baʼaan tsostsʼidi mííl ánéelą́ą́ʼ.
35 Áádóó Dan dineʼé anaaʼ dayiichįįhii naadiin tseebíidi mííldóó baʼaan hastą́ądi neeznádiin ánéelą́ą́ʼ.
36 Ásher dineʼé anaaʼ yiniyé hashtʼeʼádadólzinii índa anaaʼ dayiichįįhii dízdiindi mííl ánéelą́ą́ʼ.
37 Áádóó Jórdan tooh wónaanídę́ę́ʼ Rúben dineʼé bisiláo áádóó Géed dineʼé bisiláo índa Manáseh dineʼé ałnííʼdóóígíí bisiláo anaaʼ biniyé bee naʼabaahii ałtah áátʼeełii nideijaahígíí neeznádiindóó baʼaan naadiindi mííl ánéelą́ą́ʼ.
38 Díí diné nidaabaahii tʼáá ałtso ałkééʼ nidaʼádíʼnil yídahoołʼą́ąʼii tʼááłáʼí nitsáhákees bee David éí Ízrel dineʼé aláahgo binanitʼaʼí ádeidoołííł biniyé Hííbran kin haalʼáajįʼ neheeskai. Áádóó Ízrel dineʼé tʼáá ałtso ałdóʼ David aláahgo naatʼáanii ádeidoolíiłgo yee łaʼí danilı̨́įgo tsídadeezkééz.
39 Áádóó dahakʼisóó éí chʼiyáán há hashtʼedayiilaaígíí dajiyą́ągo índa dajidlą́ągo David bił nijikaigo tágí jı̨́ azlı̨́ı̨́ʼ.
40 Áádóó ałdóʼ áhą́dígóó Ísakar dineʼé áádóó Zébyulan dineʼé índa Náftalai dineʼé kéédahatʼíinii éí téliida, ghą́ą́ʼaskʼidiida, dzaanéezda índa béégashiida yee chʼiyáán nidayiizhjaaʼ, áádóó atsįʼ, akʼáán, tsin sikaadii fig bineestʼąʼ ahídadiiljéʼígíí áádóó chʼil naʼatłʼoʼii bineestʼąʼ nááltseii índa wáin áádóó akʼah, béégashii índa dibé ląʼí áłah ádajiilaa, háálá Ízrel dineʼé bitahgi tʼáá íiyisí hoł dahózhǫ́.
