1 Chronicles 13:1-14
13 Nítʼééʼ siláo mííl níjaaʼígíí bindanitʼaʼí áádóó siláo neeznádiin níjaaʼígíí bindanitʼaʼí índa aląąjįʼ naazíinii tʼáá ałtso David yinahaʼáii bił baa niyádadzistiʼ.
2 Áádóó David éí Ízrel dineʼé tʼáá ałtso yichʼįʼ haadzíiʼgo ání, Nihił yáʼádaatʼééh ládą́ą́ʼ áádóó nihiBóhólníihii Diyin God íinízin ládą́ą́ʼ, nihikʼisóó danilíinii Ízrel dineʼé bikéyahgi kéédahatʼínígíí áádóó náádaʼiiłniihii índa Líívai dineʼé danilíinii bikin hadaasʼáágóó áádóó binaagóó dahootsooígi tʼáá ałtso bichʼįʼ haneʼ ádadiilníiłgo nihaa hidookahgo bił áłah diidleeł.
3 Haaʼíshąʼ nihiDiyin God bitsitsʼaaʼ dílzinii nihaa nídadiitʼááł, háálá Saul hináádą́ą́ʼ tʼáadoo nidaʼídéelkid da.
4 Áko áłah nilínígíí tʼáá átʼé ádadííniid, Tʼáá ákódadiiʼnííł, háálá diné tʼáá ałtso bił yáʼádaatʼééh.
David éí tsitsʼaaʼ dílzinii néidooʼááł yiniyé ííyá (2Sam. 6:1-11)
5 Áádóó Kírjath-jíyarimdę́ę́ʼ Diyin God bitsitsʼaaʼ dílzinii nídootʼááł biniyé Ííjip kéyah Sháíhar tooh nílínídóó tʼáá Héímath kin haalʼáajįʼ Ízrel dineʼé kéédahatʼínígíí tʼáá ałtso David hágo bidííniidgo áłah ábiilaa.
6 Áko David áádóó Ízrel dineʼé tʼáá ałtso Béíyalahgóó, tʼáá éí Kírjath-jíyarim ałdóʼ hoolyé éí Júdah dineʼé bikéyahgi áhoolyéego ákwii jíkai. Diyingo naalʼaʼí chérabim wolyéii yitaʼgi Bóhólníihii Diyin God hólónígi bitsitsʼaaʼ dílzinii bízhiʼ bee wójíhígíí nídazhdooʼááł biniyé ákǫ́ǫ́ jíkai.
7 Áádóó Abínadab bighandóó Diyin God bitsitsʼaaʼ dílzinii chʼídadzizʼą́. Áko Ázah áádóó Aháíyo wolyéii tsinaabąąs naaldlózígíí tsitsʼaaʼ dílzinii yił chʼíiníłbą́ą́z.
8 Nítʼééʼ David áádóó Ízrel dineʼé tʼáá ałtso dziilí bee dahataałgo tsin tłʼóół naakitsʼáadah bąąh daneelzheeʼgo bee nidaʼaʼnéii áádóó tsin tłʼóół neeznáá bąąh daneelzheeʼgo bee nidaʼaʼnéii áádóó ásaaʼ yilghaałígíí áádóó béésh ahídíʼniłgo diitsʼaʼígíí índa béésh dilní bee íʼdílzoołí yee nidaanéego Diyin God binááł yaa naaskai.
9 Áádóó Káídan bitłʼoh naadą́ą́ʼ haʼínáʼálʼisígi jíkaigo béégashii deezgoʼgo Ázah éí tsitsʼaaʼ dílzinii bichʼįʼ kʼízdeeshchidgo dzisił.
10 Nítʼééʼ Bóhólníihii éí Ázah yichʼįʼ báhóóchįįdgo tsitsʼaaʼ dílzinii dzisiłígíí biniinaa Bóhólníihii binááł dadziztsą́.
11 Áádóó Bóhólníihii éí Ázah tíidiilaaígíí biniinaa David doo hoł hózhǫ́ǫ da, áko díí jı̨́įjįʼ ákwii Píírez-ázah hoolyé.
12 Áko tʼáá éí ooʼááł biyiʼ David éí Diyin God béédzíldzidgo ájíní, Haa lá yitʼéego Diyin God bitsitsʼaaʼ dílzinii shighanjįʼ deeshʼááł?
13 Áko David bikin haalʼá hoolyéegi haghanjįʼ tsitsʼaaʼ dílzinii tʼáadoo názhníʼą́ą da nidi náánáłahdi Gath kin haalʼáádóó diné Óbed-íídam wolyéii bighanjįʼ dadzizʼą́.
14 Áko Óbed-íídam áádóó baʼáłchíní baʼałkʼee Diyin God bitsitsʼaaʼ dílzinii siʼą́ągo tááʼ nídeezid. Áko Bóhólníihii éí Óbed-íídam bighandóó áádóó bee hólónígíí tʼáá ałtso yikʼidzisdliʼ.
