1 Chronicles 14:1-17
14 Nítʼééʼ Táir kin haalʼáádóó aláahgo naatʼáanii Háíram éí David bichʼįʼ naalʼaʼí ayííłʼaʼ; éí dilkʼistsoh tsin neheeshjííʼ bee David bá kin ádoolnííł biniyé tsé deitłʼinígíí áádóó kin ádeiłʼínígíí yił ayííłʼaʼ.
2 Áko David éí Ízrel dineʼé binanitʼaʼí jílı̨́į dooleełgo Bóhólníihii nihoníłtı̨́įgo baa ákoznízin, háálá bidineʼé Ízrel biniinaa bee hóhólníihgo hoł hazʼáanii ayóó átʼéego hoł hooʼaʼ.
David baʼáłchíní Jerúsalemdi neheezhchínígíí (2Sam. 5:13-16; 1Chr. 3:5-9)
3 Áádóó Jerúsalemgi David éí asdzání łaʼ hweʼasdzą́ą́ ánáádajiidlaa áádóó hayeʼké índa hatsiʼké há neheezhchı̨́.
4 Jerúsalemgi haʼáłchíní nidahaazhchínígíí kódaolyé: Shamúwa, Shóbab, Néíthan índa Sálaman,
5 áádóó Íbhar, Iilíshuwa índa Elpéílet,
6 áádóó Nógah, Níífeg índa Jafáíya,
7 índa Iilíshama, Biyeláíyada áádóó Iilífalet.
David éí Filístiya dineʼé yikʼeh deesdlı̨́ı̨́ʼ (2Sam. 5:17-25)
8 Áko David éí Ízrel dineʼé tʼáá ałtso aláahgo yinanitʼaʼí nilı̨́įgo akʼah bikʼi yaadziidgo bee biʼdoolzı̨́įʼgo Filístiya dineʼé dayííniiʼgo Filístiya dineʼé bisiláo tʼáá ałtso David hadeidínóotaał biniyé ákóde ííná. David haa hodiiztsʼą́ąʼgo hachʼįʼ anaʼniidzı̨́ı̨́ʼ.
9 Áko Réfeiyim honítsʼaaʼgi Filístiya dineʼé nidahaaznáago hachʼįʼ niʼídeeʼnil.
10 Áádóó David éí Diyin God neídééłkidgo ání, Daʼ Filístiya dineʼésh bichʼįʼ anaaʼ hodeeshłeełgo bikʼeh dinishdlı̨́įgo áshidíílííł? Áko Bóhólníihii áháłní, Nílááh, bichʼįʼ anaaʼ hółeehgo bikʼeh dinídlı̨́įgo áńdeeshłííł.
11 Nítʼééʼ Béíyal-piiréízim hoolyéejįʼ jíkaigo ákwii David akʼeh jideesdlı̨́ı̨́ʼ. David ájíní, Diyin God shílaʼ yee naashnishgo shiʼanaʼí danilíinii tó déégizhígi átʼéego bikʼi chʼízhníłhaal; éí bąą ákwii hazʼą́ągi Béíyal-piiréízim hoosyeʼ.*
12 Áádóó ákwii Filístiya dineʼé bidiyin dabidiʼníinii bidaʼalyaii yikʼi dahineezhchą́ąʼgo éí ałtso adahididoolkʼą́ąłgo David yee haadzííʼ.
13 Áko Filístiya dineʼé éí honítsʼaaʼgi diné yikʼijįʼ nináádaazbaaʼ.
14 Éí bąą David éí Diyin God ninááyídééłkid, áádóó Diyin God áháłní, Tʼáadoo bitʼááh náhjahí, nidi nákʼeeʼąądę́ęʼgo tsin naazkaadii múlberri wolyéii yílʼáhídóó baa nihinohkááh.
15 Áádóó siláo yinééł yistsʼą́ąʼgo tsin múlberri yílʼáhígíí bílátahgóó biiʼ hodiistsʼą́ąʼgo bikʼiidoohjah, háálá Diyin God éí Filístiya dineʼé bisiláo yikʼeh didoodleeł biniyé nihilą́ąjįʼ hólǫ́.
16 Áádóó David tʼáá Diyin God yee há haadzíʼígíí bikʼehgo íʼjiilaa, áko Gíbiyan kin haalʼáádóó Gíízer kin haalʼáajįʼ Filístiya dineʼé bisiláo dah deínéehii nidadzistseed.
17 Áko David bee baa haneʼígíí kéyah tʼáá átʼéé nítʼééʼ nideezdláád, áádóó Bóhólníihii éí ałʼąą dineʼé tʼáá ałtso hwéédaaldzidgo áyiilaa.
Footnotes
^ Béíyal-piiréízim jiníigo éí Hííbrew kʼehjígo tó chʼízhníłhaalii bee bóhólníihii jiníigo óolyé.
