1 Chronicles 15:1-29
15 Nítʼééʼ David bikin haalʼáhígi David tʼáá bí ádá kin ádayiilaa, áádóó Diyin God bitsitsʼaaʼ dílzinii yá hashtʼehoolaago níbaal niiníʼą́.
2 Áko David ání, Diyin God bitsitsʼaaʼ dílzinii doo łaʼda neiʼáa da dooleeł, tʼáá hazhóʼó Líívai dineʼé tʼéiyá, háálá éí nideiʼáa doo biniyé Bóhólníihii atah biizlááʼ áádóó yá nidaalʼaʼgo ahoolʼáa doo.
3 Áádóó Jerúsalemgi Ízrel dineʼé dajílíinii tʼáá ádzíłtso David áłah áhoolaa, éí Bóhólníihii bitsitsʼaaʼ dílzinii nídazhdooʼááł biniyé ákwii yá hashtʼehoolaa.
4 Áko David éí Éran dineʼé áádóó Líívai dineʼé áłah áyiilaa.
5 Kóhath dineʼé łaʼ Yúriyel aląąjįʼ sizíinii áádóó bikʼisóó danilíinii neeznádiindóó baʼaan naadiin ánéelą́ą́ʼ.
6 Miirárai dineʼé łaʼ Aséíyah aląąjįʼ sizíinii áádóó bikʼisóó danilíinii naakidi neeznádiindóó baʼaan naadiin ánéelą́ą́ʼ.
7 Gérshan dineʼé łaʼ, Jówel aląąjįʼ sizíinii áádóó bikʼisóó danilíinii neeznádiindóó baʼaan tádiin ánéelą́ą́ʼ.
8 Iilízafan dineʼé łaʼ Shiiméíyah aląąjįʼ sizíinii áádóó bikʼisóó danilíinii naakidi neeznádiin ánéelą́ą́ʼ.
9 Hííbran dineʼé łaʼ Iiláíyel aląąjįʼ sizíinii áádóó bikʼisóó danilíinii tseebídiin ánéelą́ą́ʼ.
10 Azáíyel dineʼé łaʼ Amínadab aląąjįʼ sizíinii áádóó bikʼisóó danilíinii neeznádiindóó baʼaan naakitsʼáadah ánéelą́ą́ʼ.
11 Nítʼééʼ David éí Zéídak áádóó Abáíyathar nááʼiiłniihii nilíinii índa Líívai dineʼé danilíinii éí Yúriyel, Aséíyah, Jówel, Shiiméíyah áádóó Iiláíyel índa Amínadab daolyéego hágo dabizhdííniid,
12 áádóó ábijiní, Nihí Líívai dineʼé dabizhéʼé yę́ę baʼáłchíní náás ahoolchíiłii yá aląąjįʼ naazíinii danohłı̨́. Ízrel dineʼé biBóhólníihii Diyin God bitsitsʼaaʼ dílzinii bá hashtʼehooshłaajįʼ nídadoohʼááł biniyé nihí áádóó danihikʼisóó bił tʼáá nihí diyingo ídaʼdołnééh.
13 Jó, átsédą́ą́ʼ doo ákódaʼoohłaagóó biniinaa Diyin God atínihiilaa, háálá Bóhólníihii yee hasʼáanii tʼáadoo bikʼehgo nidahosiidláaʼ da.
14 Áko náádaʼiiłniihii áádóó Líívai dineʼé dajílíinii éí Ízrel dineʼé biBóhólníihii Diyin God bitsitsʼaaʼ dílzinii nídazhdooʼááł biniyé tʼáá hó diyingo ídazhʼdiilyaa.
15 Áko Líívai dineʼé éí Bóhólníihii bizaad kʼehgo Mózes yee haadzíʼígi átʼéego Diyin God bitsitsʼaaʼ dílzinii bąąh tsin níyizí níʼáhígíí hawostisjįʼ haʼnaa naníʼáago bee nídadzizʼą́.
16 Áko David éí Líívai dineʼé yá aląąjįʼ naazíinii ábijiní, Nihí nihikʼisóó łaʼ sin yee dahataałii nidahidoohniłgo sin yee nidaanéii, tsin tłʼóół neeznáá bąąh daneelzheeʼgo bee nidaʼaʼnéii, tsin tłʼóół naakitsʼáadah bąąh daneelzheeʼgo bee nidaʼaʼnéii índa béésh ahídíʼniłgo ayóóʼátʼéego diitsʼaʼígíí yee nidaanéego bił dahózhǫ́ǫgo yéego dahataał doo.
17 Áádóó Líívai dineʼé éí Jówel biyeʼ Hííman nídeidiiłtı̨́ áádóó bikʼisóó danilíinii ałdóʼ łaʼ nideiznil índa Berekáíyah biyeʼ Éísaf wolyéii ałdóʼ áádóó Miirárai biyeʼké índa bikʼisóó danilíinii áádóó Koshéíyah biyeʼ Ííthan wolyéii ałdóʼ,
18 áádóó bikʼisóó danilíinii bikééʼdóó naazínígíí éí Zekaráíyah, Ben, Jeiyéíziyel, Shiimíramath, Jiiháíyel, Ánai, Iiláíyab, Biinéíyah, Méíyasíyah, Matitháíyah, Iilífeleh índa Mikníyah áádóó chʼéʼétiin yaa áhályání Óbed-íídam áádóó Jáíyel daolyé.
19 Áádóó dahataałígíí éí Hííman, Éísaf áádóó Ííthan daolyé; éí béésh łitsoii ahídíʼniłgo diitsʼaʼígíí nídazdiiłtsʼı̨́įh doo biniyé nihoʼdeeʼnil,
20 áádóó Zekaráíyah, Éíziyel áádóó Shiimíramath, Jiiháíyel, Ánai, Iiláíyab áádóó Méíyasíyah índa Biinéíyah éí tsin tłʼóół neeznáá bąąh daneelzheeʼgo bee nidaʼaʼnéii chánahgo diitsʼaʼígíí bee ninádajiʼneeh,
21 Matitháíyah, Iilífeleh, Mikníyah, Óbed-íídam, Jáíyel índa Azazáíyah éí tsin tłʼóół naakitsʼáadah bąąh daneelzheeʼgo bee nidaʼaʼnéii wóyahgo diitsʼaʼígíí yee ninádaaʼneeh.
22 Líívai dineʼé nilíinii Kenanáíyah wolyéii sin yee nidaanéhígíí áádóó dahataałígíí binanitʼaʼí jílı̨́įgo sin baa niʼjiʼeesh, háálá éí ayóo yiyiichįįh.
23 Berakáíyah áádóó Elkéínah éí tsitsʼaaʼ dílzinii bichʼįʼ yah aʼatiinígi yaa áhályání nilı̨́.
24 Shebanáíyah, Jáshafat, Niithániyel, Amaséíyai, Zekaráíyah, Biinéíyah índa Eliyíízer daolyé; nááʼiiłniihii danilı̨́įgo éí Diyin God bitsitsʼaaʼ dílzinii bilą́ąjįʼ béésh dilní bee íʼdílzoołí yee ninádaaʼneeh. Áádóó Óbed-íídam índa Jiiháíyah éí tsitsʼaaʼ dílzinii bichʼįʼ yah aʼatiinígi ałdóʼ yaa áhályání nilı̨́.
25 Ákohgo David áádóó Ízrel dineʼé yá aląąjįʼ naazíinii índa siláo miilgo binanitʼaʼí danilíinii éí tsitsʼaaʼ dílzinii Bóhólníihii bibee ahaʼdeetʼáanii biiʼ sinilii Óbed-íídam bighandóó chʼídeizʼą́ągo bił dahózhǫ́ǫgo nídeíʼaah.
26 Nítʼééʼ Líívai dineʼé éí tsitsʼaaʼ dílzinii Bóhólníihii bibee ahaʼdeetʼáanii biiʼ sinilii nídeíʼaahgo Diyin God bíká eelwod; éí bąą dóola tsostsʼidgo áádóó deenástsʼaaʼ tsostsʼidgo náádayiisniiʼ.
27 David biʼéénééz éí áłtsʼóózígo yisdizígíí bee naʼatʼą́hí łigaii ditsʼidgo ályaii yiiʼ sitı̨́; Líívai dineʼé tʼáá ałtso tsitsʼaaʼ dílzinii nideiʼáhígíí ałdóʼ, áádóó dahataałígíí índa Kenanáíyah éí sin yee dahataałgo yaa naʼaʼeeshii ałdóʼ éí biʼééʼ, áádóó David éí íífad wolyéii naʼatʼą́hí łigaii ditsʼidígíí bee ályaii ałdóʼ yiiʼ sitı̨́.
28 Ákótʼéego Ízrel dineʼé tʼáá ałtso tsitsʼaaʼ dílzinii Bóhólníihii bibee ahaʼdeetʼáanii biiʼ sinilii deíʼaahgo bił dahózhǫ́ǫgo háádadilwosh. Deenástsʼaaʼ bideeʼ bee íʼdílzoołí áádóó béésh dilní bee íʼdílzoołí áádóó béésh ahídíʼniłgo diitsʼaʼígíí áádóó tsin tłʼóół neeznáá bąąh daneelzheeʼgo bee nidaʼaʼnéii índa tsin tłʼóół naakitsʼáadah bąąh daneelzheeʼgo bee nidaʼaʼnéii yee nidaanéego hahóółʼá.
29 Nítʼééʼ David bikin haalʼáajįʼ tsitsʼaaʼ dílzinii Bóhólníihii bibee ahaʼdeetʼáanii biiʼ sinilii nídajíʼaahgo Saul yę́ę bitsiʼ Máíkal wolyéii tsésǫʼdóó déezʼı̨́įʼgo aláahgo naatʼáanii David éí alzhishgo áádóó bił hózhǫ́ǫgo dilwoshgo yiyiiłtsą́ągo yiʼı̨́įgo tsídeezkééz.
