1 Chronicles 16:1-43
16 Áko Diyin God bitsitsʼaaʼ dílzinii nídadzizʼą́ągo David níbaal niiníʼánígíí ałníiʼgi nidadzizʼą́. Áádóó Diyin God bichʼįʼ didlidgo náádahaniihii índa hózhǫ́ǫ́jí náádahaniihii náádayiisniiʼ.
2 Áko David éí didlidgo náádahaniihii áádóó hózhǫ́ǫ́jí náádahaniihii ałtso nááyiisniiʼgo, Bóhólníihii bízhiʼ binahjįʼ Ízrel dineʼé bikʼi sozdoolzingo bikʼijiijisdliʼ.
3 Áádóó Ízrel dineʼé tʼááłáʼí nítínígo diné áádóó sáanii, tʼáá łah dadiltʼéhígo bááh áádóó atsįʼ índa chʼil naʼatłʼoʼii ahídiiłjéeʼii bitaa dzizniiʼ.
4 Nááʼáłdóʼ Líívai dineʼé łaʼ éí Bóhólníihii bitsitsʼaaʼ dílzinii bidááhdóó nidaalʼaʼ doo, Ízrel dineʼé biBóhólníihii Diyin God béédabijiyiiłníih doo, yaa ahééh danízin doo áádóó yaa dahaniih doo biniyé nizhnínil.
5 Éísaf aląąjįʼ sizı̨́, áádóó akééʼdóó naazínígíí Zekaráíyah, Jiiháíyel, Shiimíramath, Jáíyel, Matitháíyah, Iiláíyab, Biinéíyah, Óbed-íídam índa Jáíyel daolyé, éí tsin tłʼóół neeznáá bąąh daneelzheeʼgo bee nidaʼaʼnéii áádóó tsin tłʼóół naakitsʼáadah bąąh daneelzheeʼgo bee nidaʼaʼnéii yee ninádaaʼneeh doo, áádóó Éísaf éí béésh ahídíʼniłgo diitsʼaʼígíí jidiiłtsʼaʼ doo,
6 Biinéíyah áádóó Jahéíziyel nááʼiiłniihii nilíinii éí tsitsʼaaʼ dílzinii Diyin God bibee ahaʼdeetʼáanii biiʼ sinilii bidááhdóó tʼáá áłahjįʼ béésh dilní bee íʼdílzoołí yee anídíʼniihgo hoolzhish doo.
David ahééh hasinjí biyiin (Ps. 105:1-15; 96:1-13; 106:47,48)
7 Áko éí bijı̨́ David éí Éísaf áádóó bikʼisóó danilíinii díí sin bee Bóhólníihii bichʼįʼ ahééh daznízingo dahojitaał dooígíí yee nihoníʼą́.
8 Haaʼíshąʼ Bóhólníihii bichʼįʼ ahééh danohsin!Bízhiʼ dayínóhshíigo bichʼįʼ sodadołzin!Diné bitahgóó yaa naagháhígíí baa dahołneʼ!
9 Bichʼįʼ dahohtaał! Baa dahohniihgo bichʼįʼ dahohtaał!Binaanish ayóó ádaatʼéii tʼáá ałtso baa dahołneʼ!
10 Bízhiʼ diyinii baa nihił dahózhǫ́ǫ leʼ!Bóhólníihii há deidéezʼı̨́įʼii bijéí bił nidahoozhǫǫh leʼ!
11 Bóhólníihii índa bibee adziil há dasídóoʼı̨́ı̨́ʼ!Bóhólníihii tʼáá áłahjįʼ hádaahtʼı̨́!
12 Binaanish ayóó ádaatʼéii áádóó álílee yaa naayáii índa ánihwiiʼaahgo ainítʼı̨́ı̨́ nítʼéʼígíí béédaałniih!
13 Haaʼíshąʼ Ízrel éí Bóhólníihii yá naalʼaʼí nilíinii bitsʼą́ą́dóó yichíiłii danohłíinii, Jéíkab badaʼáłchíní nídiiʼnilii danohłíinii, béédaałniih!
14 Éí Bóhólníihii nihiDiyin God nilı̨́.Nahasdzáán bikááʼgóó tʼáá níłtéél nítʼééʼ ánihwiiʼaah.
15 Bibee ahaʼdeetʼáanii hoolʼáágóó béédaałniih,índa saad yee haadzíiʼii miildi ałkʼi náʼoochííłgóó béédaałniih doo.
16 Éí Éíbraham yił ahaʼdeetʼáanii áádóó Áízak yichʼįʼ ádee hadoodzíiʼii,
17 éí bee hazʼáanii dooleeł biniyé bohoníłdzilgo Jéíkab baa deetʼą́,áko hoolʼáágóó bee ahaʼdeetʼáanii átʼéego Ízrel baa deetʼą́.
18 Kóníigo haadzííʼ, Kéínan kéyah nihá bitsʼáníʼą́ągo nihííʼ dooleeł biniyé nihaa dideeshʼááł.
19 Diné tʼáá díkwíí nółtʼéhí, tʼáá aaníí tʼáá díkwíí nółtʼéhígoéí kéyahdi ayóní danohłı̨́įgo tádooná.
20 Ałʼąą dineʼé łaʼałyóí baa níjíʼnéehgo ałʼąą dineʼé bee bídahólníihgo bił dah nahazʼą́ą́góó tázhdííná.
21 Diné doo łaʼ atíbidoolííłgóó yichʼą́ą́h déesniiʼ nítʼééʼ;tʼáá aaníí bidineʼé yiniinaa aláahgo naatʼáanii danilíinii yichʼahashkéé nítʼééʼ,
22 kóníigo, Akʼah bikʼi yadahiiziidgo deísı̨́įʼii shíhígíí tʼáadoo baa nídaahtʼíní!Shá dahalneʼii atídaohłééh lágo!
23 Nahasdzáán nidahoneesʼą́ą́dę́ę́ʼ diné danohłíinii, tʼáá ánółtso Bóhólníihii bichʼįʼ dahohtaał;bitsʼą́ą́dóó bee yisdáʼiildéehii tʼáá ákwíí jı̨́ baa chʼídahoyohʼaah.
24 Yee ayóó átʼéii ałʼąą dineʼé bitahgóó baa dahołneʼ;tʼóó bikʼee ayóogo ááníiłii ałʼąą dineʼé tʼáá ałtso bitahgóó baa dahołneʼ!
25 Háálá Bóhólníihii ayóó átʼé áádóó tʼáá íiyisí baa haʼniihgo yą́ą́h nilı̨́;diyin dabidiʼníinii tʼáá ałtso biláahgo dólzin.
26 Háálá ałʼąą dineʼé bidiyin dabidiʼníinii tʼáá ałtso tʼóó eʼelyaii ádaatʼé,nidi Bóhólníihii éí yótʼááh hiníláii áyiilaa.
27 Ił ídlı̨́ áádóó ayóó éʼétʼé bináhaazlá.Bisodizin bá hooghan biiʼ dziil índa ił hózhóonii hólǫ́.
28 Ałʼąą dineʼé danohłíinii, nihił dah nahazʼą́ą́dę́ę́ʼ tʼáá ánółtso Bóhólníihii baa dahohniih;Bóhólníihii yee ayóó átʼéii índa bee adziil bee hólónígíí bee baa dahohniih!
29 Bóhólníihii bízhiʼ éí ayóó átʼéii yą́ą́h nilíinii bee baa dahohniih!Náádahidoołnihii deínóhjáahgo bidááhdę́ę́ʼ nihohkááh.Nihił dahodiyingo dahodíínóhsingo Bóhólníihii bichʼįʼ nidahohłá!
30 Nahasdzáán nidahoneesʼą́ą́dę́ę́ʼ diné danohłíinii tʼáá ánółtso, hatsʼąą dasoohtiʼgo dahodíínóhsin.Nahasdzáán tsʼídá doo nahjįʼ kódoolnííłgóó bohoníłdzilgo niiníʼą́.
31 Yótʼááh dahiníláii bił dahózhǫ́ǫ leʼ índa nahasdzáán bił nihoozhǫǫh leʼ;ałʼąą dineʼé bitahgóó kódahaʼníi leʼ, Bóhólníihii éí nantʼá.
32 Tónteel áádóó biiʼ dahólóonii ayóó íitsʼaʼ leʼ.Dáʼákʼeh áádóó bikááʼ hólóonii tʼáá ałtso hániʼdii bił nidahoozhǫǫh leʼ.
33 Áko índa tsin deílʼáhígíí tʼáá ałtso bił dahózhǫ́ǫgo Bóhólníihii yichʼįʼ dahataał doo,háálá nahasdzáán yaa nídóotʼįįł yiniyé yíghááh.
34 Haaʼíshąʼ Bóhólníihii bichʼįʼ ahééh danohsin, háálá yáʼátʼéehii nilı̨́.Bóhólníihii aa aʼááh nízingo ahóyéelʼá.
35 Kónáádadohní, Diyin God yisdánihiníiłii nílíinii, yisdánihínííł;áłah ánihílééh áádóó ałʼąą dineʼé bitsʼą́ąjįʼ yisdánihínííł,áko nízhiʼ diyinii bee danííníijíigo nichʼįʼ ahééh daniidzin dooáádóó nihił dahózhǫ́ǫgo naa dahwiiʼniih doo.
36 Ízrel dineʼé biBóhólníihii Diyin God baa haʼniihgo hoolʼáágóó ahóyéelʼáa doo.
Áko diné tʼáá ałtso ádadííniid, Tʼáá ákótʼée leʼ, áádóó Bóhólníihii yaa dahaznih.
Líívai dineʼé éí tsitsʼaaʼ dílzinii yaa ádahalyą́ biniyé niiʼnil
37 Áko David éí tsitsʼaaʼ dílzinii Bóhólníihii bibee ahaʼdeetʼáanii biiʼ sinilii bidáahgi tʼáá áłahjįʼ Éísaf áádóó bikʼisóó danilíinii nidaalʼaʼgo tʼáá ákwíí jı̨́ nidaalnishgo hoolzhish doo biniyé nizhnínil.
38 Áádóó Óbed-íídam índa hastą́diindóó baʼaan tseebíigo bikʼisóó danilíinii, áádóó Jedúthan biyeʼ Óbed-íídam ałdóʼ índa Hósah wolyéii yah aʼatiingi yaa áhályání nilı̨́.
39 Áádóó nááʼiiłniihii Zéídak índa bikʼisóó náádaʼiiłniihii éí Gíbiyangi wódahgo hazʼánídi Bóhólníihii biníbaal biiʼ hodílzinii bidáahgi nidaalʼaʼ doo biniyé nizhnínilgo
40 Bóhólníihii bibee hazʼáanii biiʼ tʼáá ałtso bee akʼedaʼashchíinii bikʼehgo tʼáá áłahjįʼ abínígo áádóó eʼeʼáahgo didlidgo nááhániihii biniyé bikááʼ nááʼiiniihí bikáaʼjįʼ didlidgo nááhániihii Bóhólníihii bichʼįʼ náádajiiłniihgo hoolzhish doo biniyé Ízrel dineʼé bichʼįʼ bee hadzoodzííʼ.
41 Hííman áádóó Jedúthan índa diné dayééjiʼgo náhaasdláʼígíí tʼáá bił Bóhólníihii bichʼįʼ ahééh daznízin doo biniyé nihoʼdeeʼnil, háálá Bóhólníihii aa aʼááh nízingo ahóyéelʼá.
42 Hííman áádóó Jedúthan éí béésh dilní bee íʼdílzoołí áádóó béésh ahídíʼniłgo diitsʼaʼígíí yee ninádaaʼneeh doo biniyé índa dilní ałʼąą ádaatʼéii Diyin God bee baa haʼniihígíí yaa áhályą́. Jedúthan biyeʼké éí yah aʼatiin yaa ádahalyą́.
43 Nítʼééʼ diné tʼáá ałtso tʼááłáʼí nítínígo tʼáá bí dabighangóó anídahaaskai. Áádóó David bighandóóígíí yikʼizhdoodliił yiniyé anáádzá.
