1 Chronicles 17:1-27
17 Nítʼééʼ David hakin biiʼ dzizdáago Diyin God yá halneʼii Néíthan wolyéii ábijiní, Shoo, dilkʼis bee kin ályaago biiʼ shighan, nidi tsitsʼaaʼ dílzinii Bóhólníihii bibee ahaʼdeetʼáanii biiʼ sinilii tʼahdii níbaal biiʼ siʼą́.
2 Áko Néíthan éí David ííłní, Baa nitsíníkeesígíí tʼáá ałtso ánílééh, háálá Diyin God nił hólǫ́.
3 Kódzaadóó bikʼijįʼ tłʼéeʼgo Néíthan éí Diyin God hachʼįʼ haadzíiʼgo kóní,
4 Nílááh, shá naalʼaʼí David kóbidiníigo bił hólneʼ, Bóhólníihii áníłní, Kin biiʼ shighan dooleełígíí doo shá ádíílíił da,
5 háálá Ízrel dineʼé háíʼeezhdóó wóshdę́ę́ʼ díí jı̨́įjįʼ doo kin biiʼ kééhashtʼı̨́į da; tʼóó níbaal dílzinii naatʼáágóó kééhashtʼı̨́įgo hoolzhish.
6 Ízrel dineʼé tʼáá bił tádíshkááhgóó, Ízrel dineʼé yá nidahodiiʼaahii éí shidineʼé shá badaʼołtsoʼ bidííniidígíí, Haash yitʼéego dilkʼis bee kin ályaii doo shá ádaohłéeh da, tʼáadoo łaʼ kóbidííniidí da.
7 Éí bąą kʼad, shá naalʼaʼí David ábididííniił, Tʼáá ałtsoní bee Bóhólníihii áníłní, Shidineʼé Ízrel binanitʼaʼí nílı̨́į doo biniyé dibé bighandóó índa dibé bikééʼ nanináádóó nándiiłtı̨́.
8 Áádóó tʼáá nanináágóó nił honishłǫ́ǫ́ nítʼééʼ, índa ninááł niʼanaʼí ałtso ásíłdįįd, áádóó nahasdzáán bikáaʼgi diné ayóó ádaatʼéii dabiʼdójíhígi átʼéego niʼdójíigo ániishłaa.
9 Áádóó Ízrel shidineʼé danilíinii kéyah bá náhodideeshʼáałgo ákwii kéédahojitʼı̨́į doo áádóó kʼihodideeshłééł áádóó doo nahjįʼ kónáádabidiʼdoolníił da, índa diné doo yáʼáshóonii anaʼdandzinii hakʼi naazhjééʼ yę́ęgi átʼéego doo łaʼ hakʼi nináádoojah da,
10 Ízrel shidineʼé danilíinii bá nidahodiiʼaahii ninínilídóó wóshdę́ę́ʼ tʼóó yichʼįʼ anaʼdandzingo yikʼi ninájah nítʼééʼ. Áádóó niʼanaʼí danilíinii tʼáá ałtso bikʼidiyaa nílı̨́įgo ándeeshłííł. Áádóó ałdóʼ nił hashneʼ, Bóhólníihii éí naʼáłchíní náás ahoolchíiłgo íidoolííł.
11 Kóhodoonííł, neʼiinaʼ nidootʼih beiníłką́ągo danizází bichʼįʼ nídíídleełgo bił honílǫ́ǫ doo, índa niyeʼké náás ahoolchíłígíí bitahdóó łaʼ aláahgo bee bóhólníihgo bił hazʼáanii bohoníłdzilgo ádeeshłííł.
12 Éí kin shá íidoolííł, áádóó bibikááʼdóó nahatʼáii ahóyéelʼáágóó bidziilgo ádeeshłííł.
13 Bizhéʼé nishłı̨́į doo áádóó shiyeʼ nilı̨́į doo, áádóó Saul éí ninááł nahjįʼ kóshłaa; éí sheʼajoobaʼ bitsʼą́ąjįʼ kwíishłaa yę́ęgi átʼéego niyeʼ éí doo bitsʼą́ąjįʼ kódeeshłíił da.
14 Nidi shikin áádóó bee shóhólníihgo bił hazʼáanii éí bidziilgo ádeeshłííł. Bibikááʼdóó nahatʼáii éí ahóyéelʼáágóó bidziilgo ádoolnííł.
15 Díí saadígíí tʼáá ałtso bikʼehgo áádóó ił áhoodzaaígíí tʼáá ałtso bikʼehgo Néíthan éí David bichʼįʼ hadzoodzííʼ.
David ahééh nízingo sodoolzin
16 Áádóó aláahgo naatʼáanii David éí Bóhólníihii hólónígi jineezdáago ájíní, Bóhólníihii Diyin God nílíinii, haʼátʼíísh nishłı̨́? Shaʼałkʼeedóoshąʼ haʼátʼíí daniidlı̨́įgo kónízahjįʼ shił nííníʼáázh?
17 Diyin God nílíinii, dííyeeʼ nináałgo tʼįįhdígoígíí átʼé, áádóó ałdóʼ ná naalʼaʼí baʼáłchíní náás ahoolchíiłii náasdi átʼée dooleełígíí bee bá háínídzííʼ, índa diné aláahdi baa nitsídahakeesii dabiʼdójíhígi átʼéego shaa nitsíníkees, Bóhólníihii Diyin God nílíinii.
18 David ná naalʼaʼí nił nilínígíí biniinaa haʼátʼíísh ałdóʼ náándidooʼniił? Háálá ná naalʼaʼí bééhonísin.
19 Bóhólníihii nílíinii, ná naalʼaʼí bá nijéí bee baa ákonínízinii bikʼehgo díí ayóó ádaatʼéii áálíłígíí tʼáá ałtso ayóó ádaatʼéego baa dahaneʼ.
20 Bóhólníihii nílíinii, tʼáá ałtsoní baa dahaneʼii bikʼehgo dasidiitsʼą́ąʼgo tʼáadoo łaʼ nigi átʼéhí da, áádóó tʼáá ni tʼéiyá Diyin God nílı̨́.
21 Áádóó nahasdzáán bikáaʼgi dadineʼé doo łaʼ nidineʼé Ízrelgi ádaatʼée da; éí Diyin God bidineʼé dooleeł biniyé ádá yikʼé nináʼídláago Ííjip kéyahdę́ę́ʼ nidineʼé nááhíníłniiʼii binááł anaʼí chʼínííníłkaad, áko éí bee ayóó átʼéego índa ił ídlı̨́įgo ił sínílįįd?
22 Háálá nidineʼé Ízrel hoolʼáágóó nííʼ danilı̨́įgo íinilaa, áádóó ni, Bóhólníihii nílíinii, biDiyin God sínílı̨́ı̨́ʼ.
23 Éí bąą kʼad, Bóhólníihii nílíinii, ná naalʼaʼí áádóó baʼáłchíní náás ahoolchíiłii bídéétʼiʼgo háínídzíiʼii hoolʼáágóó bidziilgo ánílééh, áádóó tʼáá bee háínídzíʼígíí ánílééh.
24 Bíniʼdii chánahgo nízhiʼ ayóó átʼéego baa haʼniihgo ahoolʼáa leʼ kóháʼníigo, Tʼáá ałtsoní bee Bóhólníihii éí Ízrel dineʼé biDiyin God nilı̨́; tʼáá éí Diyin God baa áhályáanii nilı̨́. Ná naalʼaʼí David baʼáłchíní náás ahoolchíiłii ninááł dabidziil leʼ.
25 Háálá ni, shiDiyin God nílíinii, ná naalʼaʼí baʼáłchíní náás ahoolchíiłii bee bił hwíínílneʼ. Éí bąą ná naalʼaʼí díí yaa ákoniizı̨́įʼgo nichʼįʼ sodoolzin.
26 Áko kʼad Bóhólníihii, ni éí Diyin God nílı̨́, áádóó ná naalʼaʼí díí yáʼátʼéehii bee bá nihwííníʼą́.
27 Éí bąą kʼad, bíniʼ nił hóshǫ́ǫgo ná naalʼaʼí baʼáłchíní náás ahoolchíiłii bikʼizhdíídliił, áko ninááł naaldeehgo ahóyéelʼáa doo; jó, Bóhólníihii nílíinii, bikʼidahojidlíigo ahóyéelʼáa doo.
