1 Chronicles 18:1-17
18 Áko díí bikʼijįʼ David éí Filístiya dineʼé yikʼeh deesdlı̨́įʼgo bee bóhólnííh silı̨́ı̨́ʼ, índa Gath kin haalʼáii áádóó binaagóó kin dah naazhjaaʼígíí Filístiya dineʼé yighaideetʼą́.
2 Áádóó Móʼab dineʼé yikʼeh deesdlı̨́įʼgo éí David yá nidaalʼaʼ daazlı̨́įʼgo yichʼįʼ nidaʼiilé.
3 Yufréítiiz tooh nílínídóó David bee hóhólníihgo ájílééh biniyé joogáałgo Zóbah kéyahdóó Héímath kin haalʼáajįʼ aláahgo naatʼáanii Hadadíízer bikʼeh jideesdlı̨́ı̨́ʼ.
4 Áko David éí bitsindaabąąs bijáád naakiígíí tʼááłáhídi mííl áádóó siláo łı̨́ı̨́ʼ yee nidaabaahígíí tsostsʼidi mííl índa siláo tʼáá niʼ nidaanéhígíí naadiindi mííl yisná. Áádóó łı̨́ı̨́ʼ éí tsindaabąąs bijáád naakiígíí nideiłbąąsígíí tʼáá átʼé bitsátsʼid jiizhgizh, nidi łı̨́ı̨́ʼ neeznádiingo oołbąs bíighahgo áádzísįįd.
5 Nítʼééʼ Damáskasdóó Síriya dineʼé bisiláo éí Zóbah kéyahgi aláahgo naatʼáanii Hadadíízer yíká iijeeh yiniyé yinéełgo David éí Síriya dineʼé bisiláo naadiin naakidi mííl yinéełii neistseed.
6 Áádóó Síriya dineʼé bikéyahgi Damáskas kin haalʼáágóó David hasiláo dah deínéehgo ájiilaa, áádóó Síriya dineʼé éí David yá naalʼaʼí daazlı̨́įʼgo yichʼįʼ nidaʼiiléé nítʼééʼ. Áádóó Bóhólníihii éí David tʼáá hizhdighááhgóó akʼeh hizhdidleehgo áhósin.
7 Áko David éí óola naagé éí Hadadíízer bá nidaalʼaʼí ałtso íísdįįdígíí yílákʼee hayiiznilgo Jerúsalemjįʼ názhníjaaʼ.
8 Áádóó ałdóʼ Hadadíízer bikin haalʼá Tíbhath áádóó Kan hoolyéédóó David éí béésh łitsoii tʼóó ahayóí názhníjaaʼ; Sálaman éí díí béésh łitsoii bee biiʼ táʼádígisí nitsaaígíí áádóó áyah daniiʼáii índa łeetsʼaaʼ ádajiilaa.
9 Nítʼééʼ Héímath kin haalʼáadi aláahgo naatʼáanii Tóyu éí Zóbah kéyahgi aláahgo naatʼáanii Hadadíízer bisiláo tʼáá ájítʼé ałtso David hakʼeh deesdlı̨́įʼgo yaa hodiiztsʼą́ąʼgo
10 Tóyu biyeʼ Hadóram éí aláahgo naatʼáanii David kʼé yididooniił áádóó yáʼátʼéehgi íinidzaa yididooniił biniyé yichʼįʼ ayííłʼaʼ, háálá David éí Hadadíízer yił anaʼahishchı̨́įgo yikʼeh deesdlı̨́ı̨́ʼ; (jó, Hadadíízer éí Tóyu yił anaaʼ ahilʼı̨́ı̨́ nítʼééʼ,) áko haʼátʼíhída óola áádóó béésh łigaii índa béésh łitsoii bee ádaalyaii néiníjaaʼ.
11 Áko díí ałdóʼ tʼáá ałtso tʼáá bił óola índa béésh łigaii éí Íídam dineʼé áádóó Móʼab dineʼé áádóó Áman dineʼé áádóó Filístiya dineʼé índa Ámalek dineʼé bitsʼą́ą́dóó nináyiizhjaaʼígíí aláahgo naatʼáanii David yidíłyingo Bóhólníihii yaa néidiníʼą́.
12 Áádóó ałdóʼ Zerowáíyah biyáázh Abísheiyai wolyéii éí Áshįįh Bił Honítsʼaaʼ góyaa Íídam dineʼé tseebíítsʼáadahdi míilgo neistseed.
13 Áádóó Íídam kéyahgi David hasiláo dah deínéehgo ájiilaa, índa Íídam dineʼé éí David yá naalʼaʼí daazlı̨́ı̨́ʼ. Áko Bóhólníihii éí David tʼáá hizhdighááhgóó akʼeh hizhdidleehgo áhósin.
David yił nidahaʼáhígíí (2Sam. 8:15-18; 20:23-26)
14 Kótʼéego David éí Ízrel dineʼé tʼáá ałtso yinantʼáago doo haa dayitʼéégóó áádóó tʼáá ákogi átʼéego yá hooʼááł nítʼééʼ.
15 Áádóó Zerowáíyah biyáázh Jóʼab éí siláo dah deínéehii yinantʼá, áádóó Aháílad biyeʼ Jiiháshafat éí naatʼáaniishchíín nilı̨́ı̨́ nítʼééʼ,
16 áádóó Aháítab biyeʼ Zéídak índa Abáíyathar biyeʼ Abímelek éí nááʼiiłniihii nilı̨́ı̨́ nítʼééʼ; Shávsha éí naaltsoos ííłʼíní nilı̨́ı̨́ nítʼééʼ,
17 áádóó Jiihóíyada biyeʼ Biinéíyah éí Kéreth dineʼé índa Pííleth dineʼé yinantʼá áádóó David biyeʼké agháago bídahólnííh nítʼééʼ.
