1 Chronicles 19:1-19
19 Kódahóótʼįįdóó bikʼijįʼ Áman dineʼé aláahgo binanitʼaʼí Néíhash wolyéii daaztsą́ągo bitsáskʼehgi biyeʼ aláahgo naatʼáanii náánásdlı̨́ı̨́ʼ.
2 Nítʼééʼ David ání, Néíhash biyeʼ Héínan baa jiideeshbaał, háálá bizhéʼé yę́ę shaa joozbaʼ niʼ. Áádóó David éí Héínan bizhéʼé yę́ę yaa yínííł nilínígi hadabizhdiʼyoołnih biniyé nidaalʼaʼí bichʼįʼ ajiisʼaʼ. Áko David há nidaalʼaʼí éí Áman dineʼé bikéyahdi Héínan hadabizhdiʼyoołnih biniyé baa jíkai.
3 Nidi Áman dineʼé binanitʼaʼí danilíinii Héínan ádeiłní, Daʼ David nizhéʼé yę́ę bił nilı̨́įgo biniinaa hadashiʼdiyoolnih biniyé shichʼįʼ iʼiisʼaʼásh nínízin? Bá nidaalʼaʼí tʼóó hadaʼdoosił áádóó haash yitʼéego nikʼeh hodidoodleeł índa kéyah hadeidoosił yiniyé naalchiʼí danilı̨́įgo yíkai lá!
4 Éí biniinaa Héínan éí David bá nidaalʼaʼí dayiiłtsoodgo bidághaaʼ dayííshééʼ áádóó bitłʼaaʼ bíighahjįʼ biʼééʼ daneelʼą́ągo dayiizhgizhgo yééʼníłniiʼ.
5 Nítʼééʼ diné łaʼ éí diné dabiʼdoolʼaadii ádabiʼdoolʼįįdígíí David yił nídahoolneʼ, áádóó bidááhgóó iʼjííłʼaʼ, háálá éí diné tʼáá íiyisí ádaa yádandzin. Áko aláahgo naatʼáanii ábíłní, Tʼáá Jériko kin haalʼáadi nahísóotą́; nihidághaaʼ nídadínéesą́ągo índa nídoohkah.
6 Áko Áman dineʼé éí David doo bíłdingóó ádaʼdiilyaago yaa ákodaniizı̨́įʼgo Héínan índa Áman dineʼé éí Mesopotéímiya kéyahdę́ę́ʼ áádóó Síriya-méíyakah kéyahdę́ę́ʼ índa Zóbah kéyahdę́ę́ʼ tsindaabąąs bijáád naakiígíí índa łı̨́ı̨́ʼ yee nidaabaahii éí béésh łigaii tálent mííl bíighahgo bideená bíká adoojah biniyé yichʼįʼ adeizhjaaʼ.
7 Áko tádiindóó baʼaan naakidi mííl tsindaabąąs bijáád naakiígíí áádóó Méíyakahdóó aláahgo naatʼáanii índa siláo adeená áká iijeehígíí neheeskaigo Médiiba kin haalʼáhígíí bíighahgi nidahaazná. Áman dineʼé ałdóʼ dabikin hadaasʼáádę́ę́ʼ anaaʼ yiniyé áłah daazlı̨́ı̨́ʼ.
8 Áádóó éí David yaa hodiiztsʼą́ąʼgo Jóʼab índa diné dahayóii dah deínéhígíí ákǫ́ǫ́ ayiisʼaʼ.
9 Áman dineʼé chʼídahaaznáago anaaʼ dahodoołeeł biniyé kin haalʼá yah aʼatiingi ałkééʼ niʼahíʼnil, áádóó aláahgo naatʼáanii danilíinii neheeskaígíí éí halgaidi tʼáá sahdii dah deínééh.
10 Nítʼééʼ Jóʼab éí siláo hadáahgi áádóó bikéédę́ę́ʼ anaʼí hakʼiidoojah yiniyé ałkééʼ danítʼiʼgo baa ákozniizı̨́įʼgo Ízrel dineʼé bisiláo dahayóii łaʼ bitah jiizlááʼ áádóó Síriya dineʼé bisiláo yił ałkʼiidoojah biniyé nizhnínil.
11 Áádóó siláo łahjįʼígíí hakʼis Abísheiyai bichʼįʼ bizhníłniiʼ; éí Áman dineʼé bisiláo yichʼįʼ niʼádeeʼnil.
12 Áádóó Jóʼab áhodííniid, Síriya dineʼé bisiláo shilááh ábóodziil ládą́ą́ʼ shíká adíílwoł, nidi Áman dineʼé bisiláo nilááh ábóodziil ládą́ą́ʼ shí éí níká adeeshwoł.
13 Chánah nílı̨́į leʼ; nihidineʼé bá áádóó nihiDiyin God bííʼ danilı̨́įgo kin hadaasʼáii bá tʼáá nihí diné doo nídanilyéesii daniidlı̨́į doo; hániʼdii Bóhólníihii tʼáá bí bił yáʼátʼéhígi átʼéego íʼdoolííł.
14 Áko Jóʼab áádóó diné yił naakaígíí éí Síriya dineʼé bisiláo bił daʼahizhdoogą́ą́ł biniyé bitʼáahjįʼ ajookai; nítʼééʼ hakʼee yóóʼadahineezhchą́ą́ʼ.
15 Ákohgo Síriya dineʼé bisiláo danéechéehgo Áman dineʼé bisiláo dabiiłtsą́ągo bí ałdóʼ Jóʼab bínaaí Abísheiyai wolyéii yikʼee dah dadíníichą́ąʼgo kin haalʼáajįʼ yah adahineezhchą́ą́ʼ. Nítʼééʼ Jóʼab éí Jerúsalemjįʼ nádzá.
16 Nidi Síriya dineʼé bisiláo éí Ízrel dineʼé bisiláo tsístłʼadabiniłkaadgo yaa ákodaniizı̨́įʼgo Yufréítiiz tooh wónaanídi Síriya kéyahdóó siláo dah deínéehii áłah áyiilaa, áádóó Hadadíízer bisiláo dah deínéehii yinanitʼaʼí Shófak halą́ąjįʼ yigáałgo níná.
17 Áádóó David díí bee hoł hóóneʼgo Ízrel dineʼé bisiláo tʼáá ałtso áłah ájiilaago Jórdan tooh haʼnaa nizhnínáago bikʼi dah jizhjééʼ. Ákohgo Síriya dineʼé bisiláo bichʼįʼ anaaʼ hodoołeeł biniyé David hasiláo ałkééʼ deeztʼiʼgo Síriya dineʼé bisiláo hoł daʼahoogą́ą́ʼ.
18 Nítʼééʼ Síriya dineʼé bisiláo éí Ízrel dineʼé bisiláo yikʼee dah dadíníichą́ą́ʼ, áko Síriya dineʼé bisiláo tsostsʼidi mííl ánéelą́ąʼgo tsindaabąąs bijáád naakiígíí yee nidaabaahii áádóó dízdiindi mííl ánéelą́ąʼgo tʼáá niʼ nidaabaahii éí David nahastseed índa Síriya dineʼé bisiláo dah deínéehii binanitʼaʼí Shófak wolyéii ałdóʼ yiyiisxı̨́.
19 Áádóó Hadadíízer wolyéii bá nidaalʼaʼí éí Ízrel dineʼé bisiláo tsístłʼadabineeskaadgo yaa ákodaniizı̨́įʼgo David yił kʼé nídahasłı̨́ı̨́ʼ, índa tʼóó yá nidaalʼaʼí daazlı̨́ı̨́ʼ áádóó Síriya dineʼé bisiláo doo tʼáá kʼad Áman dineʼé bisiláo yíká ánáánáájéeʼ da.
