1 Chronicles 20:1-8
20 Áádóó ałtso yíhaidóó bikʼijįʼ anaaʼ hodoołeeł biniyé aláahgo naatʼáanii chʼídahidookah baa hoolzhiizh, nítʼééʼ Jóʼab dziilí bee siláo chʼíiníʼeezhgo Áman dineʼé bikéyah yiiʼ dahóółchxǫʼgo Rábah kin haalʼáhígíí yizénáshzhiizh. Nidi David éí tʼáá Jerúsalem kin haalʼáadi naaghá. Áko Jóʼab éí Rábah kin haalʼáhígíí baatįįh jííʼeezhgo ałtso ádajisdįįd.
2 Nítʼééʼ Rábah aláahgo binanitʼaʼí binaatʼá chʼah David néidiiʼą́, áko óola tálent dah adiidloh bíighahgo áníłdáás lá, áádóó tsé daʼílíinii bee naashchʼąąʼ, áko éí David hakʼi dazdeezʼą́, áádóó kin haalʼáhídóó naalyeʼé daasnáanii ląʼí chʼíjiizhjaaʼ.
3 Áko diné ákwii kéédahatʼínígíí chʼíiníʼeezhgo tsin bee nehechʼiishí yee nidaʼiichʼiish áádóó bis bee naatseedí índa tsénił yee daʼatseełgo áyiilaa. Nítʼééʼ David éí Áman dineʼé bikin hadaasʼáágóó tʼáá ałtso ákóyiilaa. Áádóó bí índa bidineʼé tʼáá ałtso Jerúsalemgóó anáhaaskai.
David bidiné éí yéʼiitsoh nideistseed (2Sam. 21:18-22)
4 Kódzaago Gíízer kin haalʼáagi Filístiya dineʼé bił ałkʼi jiijééʼ; íídą́ą́ʼ Húshath dineʼé nilíinii Síbiikai wolyéii éí yéʼiitsoh baʼáłchíní ahoolchíiłii łaʼ Sípai wolyéii yiyiisxı̨́, áádóó Filístiya dineʼé bikʼeh dahodeesdlı̨́ı̨́ʼ.
5 Áádóó Filístiya dineʼé bił ałkʼi náájiijéeʼgo Jéíyer biyeʼ Elhéínan wolyéii éí Gath kin haalʼáádóó diné Goláíyath bitsilí Lámai wolyéii yiyiisxı̨́; bitsiidétáán éí áah sitáangi áníldííl.
6 Nítʼééʼ Gath kin haalʼáagi ałkʼi náájiijéeʼgo ákwii diné ayóó áníłnééz léiʼ naaghá; éí bílázhoozh naakitsʼáadah áádóó bikédiníbiní naakitsʼáadah, áko tʼáá ałtsogo naadiin dı̨́ı̨́ʼ; éí ałdóʼ yéʼiitsoh baʼáłchíní ahoolchíiłii łaʼ nilı̨́.
7 Áádóó Ízrel dineʼé nayéʼéʼįįhgo David bikʼis Shímiya biyeʼ Jánathan wolyéii éí hwiisxı̨́.
8 Díí éí Gath kin haalʼáagi yéʼiitsoh bá nidahaazhchı̨́ı̨́ nítʼééʼ; éí David áádóó bá nidaalʼaʼí nidabistseed.
