1 Chronicles 21:1-30
21 Nítʼééʼ níłchʼi bidaʼiiníziinii binanitʼaʼí Séítan wolyéii Ízrel dineʼé yikʼijįʼ nídiidzáago David yíniʼ áhoolaago Ízrel dineʼé yídóoltah jiniizı̨́ı̨́ʼ.
2 Áádóó David éí Jóʼab índa diné yinanitʼaʼí danilíinii ííłní, Bíyer-shííba kin haalʼáádóó Dan kin hanáánáálʼáajįʼ Ízrel dineʼé kéédahatʼínígíí nílááh deínółtaʼ, áádóó ánéelą́ʼígíí bee shił nídahodoołnihgo shił bééhózin doo.
3 Áko Jóʼab haadzíiʼgo ání, Bóhólníihii éí bidineʼé ánéelą́ʼígíí neeznádiindi ánánéelą́ąʼgo íidoolííł. Shinanitʼaʼí, aláahgo naatʼáanii nílíinii, éí tʼáá ałtso shinanitʼaʼí yá nidaalʼaʼ; shinanitʼaʼí nílíinii, haʼátʼíísh biniyé díí yíníkeed? Haʼátʼíí biniyé Ízrel dineʼé doo ákǫ́ǫ́ ádaanííłgóó ádíílííł?
4 Azhą́ ákótʼée nidi aláahgo naatʼáanii haadzíiʼgo Jóʼab yighaʼdeetʼą́. Éí bąą Jóʼab dah diiyáago Ízrel dineʼé tʼáá ałtso bitahgóó tádííyáago Jerúsalemgi nádzá.
5 Áádóó Jóʼab éí diné ánéelą́ʼígíí naaltsoos bikáaʼgo David yeiníłtsooz. Áko Ízrel dineʼé diltłish nideijaahígíí éí tʼááłáhídi mííltsohdóó baʼaan tʼááłáhídi neeznádiindi mííl ánéelą́ą́ʼ. Áádóó Júdah dineʼé diltłish nideijaahígíí dı̨́įdi neeznádiindóó baʼaan tsostsʼidiindi mííl ánéelą́ą́ʼ.
6 Nidi Líívai dineʼé áádóó Bénjamin dineʼé éí tʼáadoo atah jííłtaʼ da, háálá aláahgo naatʼáanii haadzíiʼii hoł tʼóó baaʼih.
7 Áko díí Diyin God doo bił hóshǫ́ǫ́góó biniinaa Ízrel dineʼé atíyiilaa.
8 Áádóó David éí Diyin God ííłní, Tʼáá íiyisí ayóó átʼéego ádił asísiih, nidi kʼad ná naalʼaʼí nishłíinii nánooshkąąh, ádił asísiihígíí shá yóóʼadíʼaah; jó, tʼáá íiyisí doo áháshyą́ą́góó íítʼįįd.
9 Nítʼééʼ Bóhólníihii éí David yá náásgóó halneʼii Géed wolyéii yichʼįʼ haadzíiʼgo ání,
10 Nílááh, kódíníigo David bił hólneʼ, Bóhólníihii kóní, Táaʼgo hazʼą́ nichʼįʼ nídíínil; éí ándeeshłíłígíí biniyé tʼááłáʼígo nididííʼááł.
11 Nítʼééʼ Géed éí David yaa níyáago ííłní, Bóhólníihii kóní, Háí ádaa dinítʼaah,
12 hodichingo tááʼ nídoohah, éí doodaiiʼ tááʼ nídeezidgo niʼanaʼí bidiltłish yee nídaznéełhaałgo nikʼeh dadidoodleełgo ádanihidoołdįįł, éí doodaiiʼ tááʼ yiską́ąjįʼ kéyahgi Bóhólníihii bidiltłish bee nahałniihgo Ízrel dineʼé bił hazʼą́ągi tʼáá átʼéé nítʼééʼ Bóhólníihii bidiyingo naalʼaʼí áhodoołdįįł. Éí bąą kʼad, háí ádaa didíítʼáałgo nashiłʼaʼii bił náhodeeshnih.
13 Áádóó David éí Géed áyidííniid, Shí tʼáá íiyisí tsístłʼasíyá; bíniʼdii Bóhólníihii bílákʼeeshtłíísh, háálá tsʼídá tʼáá íiyisí bibeeʼaa aʼááh hasin hólǫ́. Diné éí doo łaʼ bílákʼeejįʼ niʼádidideeshtʼáał da.
14 Áko Bóhólníihii éí Ízrel dineʼé bikʼijįʼ naałniih yiníłniiʼgo Ízrel diné tsostsʼidiindi mííl ánéelą́ąʼgo íísdįįd.
15 Áádóó Bóhólníihii éí diyingo naalʼaʼí íʼdoołdįįł biniyé Jerúsalemgóó ayííłʼaʼ. Kʼadę́ę íʼniiłdįįdgo Bóhólníihii dééʼı̨́įʼgo doo yáʼátʼéhígi áhoodzaaígíí yąąh bíniʼgo diyingo naalʼaʼí íʼoołdįįłígíí ííłní, Kʼad bíighah, niʼ kónínééh. Áádóó diyingo naalʼaʼí éí Jííbas dineʼé nilíinii Órnan wolyéii habiʼínáʼálʼisí yíighahgi yiizįʼ.
16 Nítʼééʼ David hajííghalgo nahasdzáán áádóó yádiłhił bitaʼgi diyingo naalʼaʼí sizı̨́; Jerúsalem bikʼijigo diltłish yił dah doolnihgo dziiłtsą́. Áko David áádóó hastóí aląąjįʼ naazíinii tłʼoh yishbizh yiiʼ naazhjéeʼgo tséʼyaa daneeshjool.
17 Áádóó David éí Diyin God ííłní, Tʼáá shí diné yídóoltahgo bee haasdzííʼ, áádóó shí tʼéí ádił asísiihgo tsʼídá doo yáʼáshónígi íítʼįįd, nidi díí dibé tʼáadoo ádaadzaaí da. Bóhólníihii shiDiyin God nílíinii, shí áádóó shizhéʼé bighandóóígíí atínihílééh, nidi nidineʼé éí bíniʼdii naałniih doo baa doołnih da.
18 Nítʼééʼ Bóhólníihii bidiyingo naalʼaʼí éí Géed joolyéii David bichʼįʼ kójíníigo hazdoodzihgo yee haadzííʼ, David dah didoogáałgo Jííbas dineʼé nilíinii Órnan wolyéii habiʼínáʼálʼisígi Bóhólníihii bichʼįʼ náázhdiʼyoołnih biniyé bikááʼ nááʼiiniihí ázhdoolííł.
19 Áádóó Géed éí Bóhólníihii bízhiʼ bee David bichʼįʼ hadzoodzíiʼii bikʼehgo David dah diiyá.
20 Áko Órnan tʼą́ą́ʼ nídéétʼı̨́įʼgo diyingo naalʼaʼí yiyiiłtsą́ągo biyeʼké dı̨́ltʼéego yił nídadeestʼı̨́ı̨́ʼ. Órnan éí tłʼoh naadą́ą́ʼ hayíʼéłʼéés.
21 Áádóó David éí Órnan yichʼįʼ yigáałgo Órnan hajííghal, áko David jiiłtsą́ áádóó haʼínáʼálʼisídóó chʼízhníyáago David bichʼįʼ tséʼyaa nitsizhdinígoʼ.
22 Áádóó David éí Órnan ííłní, Díí haʼínáʼálʼisígi shaa hodiníʼaah; ákwii Bóhólníihii bichʼįʼ náádiʼyeeshnih biniyé bikááʼ nááʼiiniihí ádeeshłííł; tʼáá bą́ą́h ílínígíí bíighahgo bikʼé nichʼįʼ nideeshłééł, áko naałniih bitsʼąą diné baa jéʼahónáa doo.
23 Nítʼééʼ Órnan éí David áyidííniid, Tʼáá ni náhodiiʼaah, áádóó shinanitʼaʼí aláahgo naatʼáanii bił yáʼátʼéehgo yiníłʼíinii bíniʼdii íílééh. Shoo, didlidgo nááhidoonih biniyé béégashii naa nishteeh, áádóó chizh biniyé tsin bee haʼínáʼálʼisí naa nishnííł, áádóó akʼáán nááhidoonih biniyé tłʼoh naadą́ą́ʼ naa deeshjih; tʼáá ałtso naa deeshnił.
24 Aláahgo naatʼáanii David éí Órnan ííłní, Dooda, tʼáá aaníí naa nahashniihgo tʼáá bą́ą́h ílínígo bikʼé niʼdeeshłééł. Tʼáá nihígíí doo tʼáá kʼad Bóhólníihii bá nídiinil da, áádóó didlidgo nááhániihii tʼáá jííkʼeh doo nááhideeshnih da.
25 Áko David haa hodeetʼánígíí bikʼé óola shékel hastą́ądi neeznádiin dah adiidloh bíighahgo Órnan baazhnínil.
26 Áádóó David éí Bóhólníihii bichʼįʼ náázhdiʼyoołnih biniyé bikááʼ nááʼiiniihí ájiilaa, áádóó didlidgo náádahaniihii índa bee achʼįʼ hózhǫ́ǫ dooleeł biniyé náádahaniihii náájiisniiʼ, áádóó Bóhólníihii bichʼįʼ sozdoolzin, áko didlidgo nááhániihii biniyé bikááʼ nááʼiiniihí bikáaʼjįʼ yáʼąąshdę́ę́ʼ kǫʼ hadadíínáadgo éí bee hasodizin há dííyįįd.
27 Áádóó Bóhólníihii éí diyingo naalʼaʼí bidiltłish iih néidootı̨́įłgo yee haadzííʼ.
Kin biiʼ sohodizin nidootʼáałgi
28 Íídą́ą́ʼ Jííbas dineʼé nilíinii Órnan wolyéii habiʼínáʼálʼisígi Bóhólníihii éí David hasodizin bił yílįįdígíí hoł bééhoozingo ákweʼé David nááʼiiniih baa nijigháá nítʼééʼ.
29 Ákwii hoolzhish yę́ędą́ą́ʼ honoojíidi Mózes éí Bóhólníihii biníbaal biiʼ hodílzinii ájiilaaígíí áádóó bikááʼ nááʼiiniihí Gíbiyan kin haalʼáhídi wókʼą́ągi sinil.
30 Nidi David éí Bóhólníihii nabízhdíłkid doo biniyé bikááʼ nááʼiiniihí bitʼáahjįʼ doo jidigháah da, háálá diyingo naalʼaʼí bidiltłish yinásdzííd.
