1 Chronicles 23:1-32
23 Nítʼééʼ David haastihgo áádóó ląʼí binááhaigo biyeʼ Sálaman éí Ízrel dineʼé aláahgo binanitʼaʼí nilı̨́įgo áyiilaa.
Líívai dineʼé áádóó náádaʼiiłniihii ałkééʼ níjaaʼgo bindaanishii
2 Áádóó Ízrel dineʼé bindanitʼaʼí tʼáá ałtso áádóó náádaʼiiłniihii índa Líívai dineʼé tʼáá bił áłah áyiilaa.
3 Áko Líívai dineʼé éí tádiin áádóó dego béédááhaígíí yééltaʼgo tʼáá ałtsogo tádiindóó baʼaan tseebíidi mííl ánéelą́ą́ʼ.
4 Líívai dineʼé naadiin dı̨́įdi mííl ánéelą́ąʼgo Bóhólníihii bikin biiʼ sohodizin bindazhdoolnish biniyé nihoʼdeeʼnil; hastą́ądi mííl ánéelą́ąʼgo bídahólníihii índa ándahwiiʼaahii danilı̨́ı̨́ nítʼééʼ.
5 Áádóó ałdóʼ dı̨́įdi mííl ánéelą́ąʼgo dáńʼdítı̨́hí yaa ádahalyą́, áádóó dı̨́įdi mííl ánéelą́ąʼgo sin yee nidaanéii bee Bóhólníihii baa dahojiniih doo biniyé íishłaaígíí bee nidajinée doo, níigo David haadzííʼ.
6 Áádóó David éí Líívai biyeʼké Gérshan áádóó Kóhath índa Miirárai dajoolyéé nítʼééʼ yę́ę bikʼehgo ałʼąą nihodeeʼnil.
7 Gérshan baʼáłchíní ahoolchíiłii łaʼ Léíyadan índa Shímiyai wolyé.
8 Léíyadan biyeʼké táltʼé: Jiiháíyel alą́ąjįʼ bóhólnííh, łaʼígíí Zíítham índa Jówel wolyé.
9 Shímiyai biyeʼké táltʼé: éí Shiilómith áádóó Héíziyel índa Héíran daolyé. Díí éí Léíyadan baʼáłchíní náás ahoolchíiłii yá aląąjįʼ naazı̨́.
10 Áádóó Shímiyai biyeʼké dı̨́ltʼé: éí Jéíhath áádóó Záízah áádóó Jííʼash índa Biiráíyah daolyé.
11 Jéíhath aláahgo bóhólnííh, áádóó bikééʼ góneʼ éí Záízah, nidi Jííʼash índa Biiráíyah biyeʼké doo ląʼí da; éí bąą tʼáájíłáʼí náás ahijoolchíiłii jilı̨́įgo hoʼdóltaʼ.
12 Kóhath biyeʼké dı̨́ltʼé: éí Ámram áádóó Ízxar áádóó Hííbran índa Azáíyel daolyé.
13 Ámram éí biyeʼké Éran áádóó Mózes wolyé. Áko Éran éí dadílzinii chodaoʼínígíí dílzingo ájósin doo biniyé atsʼáhoʼdeeltı̨́. Hó áádóó hayeʼké díí hondaanishgo ahoolʼáa doo. Bóhólníihii binááł tsin bijeeh dilidgo łikání halchinii náádajiiłniihgo Bóhólníihii bá nidajilʼaʼ doo índa bízhiʼ bee akʼideijidlíigo ahoolʼáa doo.
14 Mózes joolyéii Diyin God bitsʼą́ą́dóó diné jílíinii hayeʼké éí Líívai dineʼé bił hoʼdóltaʼ.
15 Mózes biyeʼké Gérsham áádóó Eliyíízer wolyé.
16 Gérsham biyeʼké bitsʼą́ą́dóó Shiibúwel wolyéii aláahgo bóhólnííh.
17 Áádóó Eliyíízer biyeʼ éí Riihabáíyah wolyéii aláahgo bóhólnííh. Áádóó Eliyíízer biyeʼké doo łaʼ nááhódlǫ́ǫ da, nidi Riihabáíyah biyeʼké tʼóó ahayóí.
18 Ízxar biyeʼké bitsʼą́ą́dóó Shiilómith aláahgo bóhólnííh.
19 Díí Hííbran biyeʼké ádaatʼı̨́. Jiiráíyah wolyéii alą́ąjįʼ bóhólnííh; Amaráíyah akéʼé góneʼ bóhólnííh; Jahéíziyel wolyéii táʼá góneʼ bóhólnííh áádóó Jékamiyam wolyéii dı̨́ʼí góneʼ bóhólnííh.
20 Azáíyel biyeʼké Máíkah alą́ąjįʼ bóhólnííh, áádóó Jiisáíyah éí akéʼé góneʼ bóhólnííh.
21 Miirárai biyeʼké Málai áádóó Múshai wolyé. Málai biyeʼké Eliyéízar áádóó Kish wolyé.
22 Eliyéízar daaztsą́, áko biyeʼké doo hólǫ́ǫ da nítʼééʼ, nidi bitsiʼké tʼéiyá hólǫ́ǫgo hakʼis Kish biyeʼké yił ahá daʼagééh nítʼééʼ.
23 Múshai biyeʼké tááʼ: éí Málai áádóó Ííder índa Jériimath daolyé.
24 Díí éí Líívai biyeʼké danilı̨́įgo dabizhéʼé yę́ę bitsʼą́ą́dóó náás ahoolchííł; dabizhéʼé yę́ę aláahgo bídahólníihii dabízhiʼ bikʼehgo dayééltaʼ; éí naadiindóó dego béédááhaigo Bóhólníihii bikin biiʼ sohodizin góneʼ nidaalnishgo chodaoʼı̨́įgo nidaalʼaʼ.
25 Háálá David ádííniid, Ízrel dineʼé biBóhólníihii Diyin God nilíinii bidineʼé hááʼáyı̨́ı̨́h yeidiníʼą́ągo Jerúsalem kin haalʼáagi kéédahatʼı̨́įgo ahóyéelʼáa doo.
26 Áádóó Líívai dineʼé ałdóʼ níbaal biiʼ hodílzinii índa beedí chodaoʼíinii doo nináádajigée da doo.
27 Áko akéeʼdi saad bee David hadziisdzíʼígíí bikʼehgo Líívai dineʼé naadiindóó dego béédááhaígíí yééltaʼ.
28 Háálá Bóhólníihii bikin biiʼ sohodizingi éí tłʼóoʼdi hazʼánígi áádóó wóneʼé dahooghangi Éran biyeʼké danilíinii nidaalʼaʼ áádóó dadílzinii tʼáá ałtso chin bąąh ádingo óolzingo áádóó Diyin God bikin biiʼ sohodizingi nidaalnish doo biniyé nibiʼdeeʼnil.
29 Diyin God bichʼįʼ bááh nááhániihii ałdóʼ índa chʼiyáán nááhániih biniyé akʼáán dibahí, dííkʼǫsh tʼáágééd bááh ádaalyaii áádóó beedí bee ályaii áádóó tséʼástʼéí ályaii índa tʼáá ałtso ałʼąą áníłtsogo bídaʼnéélʼąądii yindaalnish doo,
30 áádóó abínígo nidzizı̨́įgo Bóhólníihii bichʼįʼ ahééh daznízin áádóó baa dahojiniih índa eʼeʼáahgo ałdóʼ tʼáá ákódajitʼı̨́į doo,
31 áádóó hááʼáyı̨́ı̨́h jı̨́ı̨́ góneʼ áádóó dah néitı̨́ı̨́h góneʼ áádóó dílzingo áłah náʼádleeh néiʼaahgo bee há nihodeetʼánígíí bikʼehgo Bóhólníihii binááł náás dajíłtʼéehgo Bóhólníihii bichʼįʼ didlidgo nááhániihígíí tʼáá ałtso náádajiiłniih doo.
32 Áádóó níbaal biiʼ dahozdísinii áádóó hodiyingo hazʼáanii baa ádahojilyą́ą doo índa Éran hayeʼké bikʼisóó danilíinii éí Bóhólníihii bikingi bá nidajilʼaʼ doo.
