1 Chronicles 24:1-31
24 Áko Éran biyeʼké kótʼéego ałtsʼábiʼdeeʼnil. Éran biyeʼké Néídab, Abáíhu, Eliyéízar áádóó Íthamar daolyé.
2 Nidi Néídab áádóó Abáíhu baʼáłchíní ádingo bizhéʼé tʼáá yítséedi neezná; éí bąą Eliyéízar áádóó Íthamar tʼéiyá nááʼiiłniihii nilı̨́.
3 Áádóó David hániikʼehgo Eliyéízar baʼáłchíní ahoolchíiłii łaʼ Zéídak wolyéii índa Íthamar baʼáłchíní ahoolchíiłii łaʼ Ahímelek wolyéii nááʼiiłniihii nilı̨́įgo binaanish dadooleełii bikʼehgo nidajilʼaʼ doo biniyé nihonínil.
4 Áko Íthamar baʼáłchíní ahoolchíiłii bitahdóó aláahgo bídahólníhígíí biláahgo Eliyéízar baʼáłchíní ahoolchíiłii bitahdóó aláahgo bídahólníihii alááh ánéelą́ą́ʼ, áádóó kótʼéego ałtsʼáhoʼdeeʼnil. Dabizhéʼé yę́ę baʼáłchíní náás ahoolchíiłii bikʼehgo Eliyéízar biyeʼké bitahdóó hastą́ʼáadah yiltʼéego aláahgo bídahólnííh áádóó Íthamar biyeʼké bitahdóó tseebíltʼéego aláahgo bídahólnííh.
5 Áádóó yááʼiiltʼeʼ bikʼehgo tʼáá aheełtʼéego ałtsʼáhoʼdeeʼnil, áko hodiyingo hazʼánígíí bee hódahólnííh áádóó Diyin God yá nidaalʼaʼí bee hódahólnííh; éí Eliyéízar biyeʼké bitahdóó áádóó Íthamar biyeʼké bitahdóó dajílı̨́.
6 Áádóó aláahgo naatʼáanii áádóó naatʼáanii danilíinii, áádóó Zéídak nááʼiiłniihii nilíinii, áádóó Abáíyathar biyeʼ Ahímelek wolyéii áádóó náádaʼiiłniihii índa Líívai dineʼé dabizhéʼé yę́ę baʼáłchíní náás ahoolchíiłii binanitʼaʼí nilíinii dabinááł Líívai dineʼé Niithániyel biyeʼ Shiiméíyah wolyéii naaltsoos ííłʼíní nilı̨́įgo naaltsoos yikááʼ akʼeʼashchı̨́; alą́ąjįʼ bídahólníihii éí Eliyéízar baʼáłchíní náás ahoolchíiłii bitahdóó łaʼ nídiiltı̨́, áádóó Íthamar baʼáłchíní náás ahoolchíiłii bitahdóó ałdóʼ łaʼ nídiiltı̨́.
7 Áłtsé yááʼiiltʼeʼígíí Jiihóíyarib bichʼijí niʼníkę́ę́z. Naaki góneʼ Jedéíyah bichʼijí niʼníkę́ę́z,
8 tááʼ góneʼ Héírim bichʼijí niʼníkę́ę́z, dı̨́ı̨́ʼ góneʼ Siyórim bichʼijí niʼníkę́ę́z,
9 ashdlaʼ góneʼ Malkáíyah bichʼijí niʼníkę́ę́z, hastą́ą́h góneʼ Míjamin bichʼijí niʼníkę́ę́z,
10 tsostsʼid góneʼ Hákaz bichʼijí niʼníkę́ę́z, tseebíí góneʼ Abáíjah bichʼijí niʼníkę́ę́z,
11 náhástʼéí góneʼ Jéshuwa bichʼijí niʼníkę́ę́z, neeznáá góneʼ Shekanáíyah bichʼijí niʼníkę́ę́z,
12 łaʼtsʼáadah góneʼ Iiláíyashib bichʼijí niʼníkę́ę́z, naakitsʼáadah góneʼ Jéíkim bichʼijí niʼníkę́ę́z,
13 tááʼtsʼáadah góneʼ Háppah bichʼijí niʼníkę́ę́z, dı̨́ı̨́ʼtsʼáadah góneʼ Jiishébiyab bichʼijí niʼníkę́ę́z,
14 ashdlaʼáadah góneʼ Bílgah bichʼijí niʼníkę́ę́z, hastą́ʼáadah góneʼ Ímer bichʼijí niʼníkę́ę́z,
15 tsostsʼidtsʼáadah góneʼ Híízer bichʼijí niʼníkę́ę́z, tseebíítsʼáadah góneʼ Áfsiiz bichʼijí niʼníkę́ę́z,
16 náhástʼéítsʼáadah góneʼ Pethaháíyah bichʼijí niʼníkę́ę́z, naadiin góneʼ Jiihéziikel bichʼijí niʼníkę́ę́z,
17 naadiin łaʼ góneʼ Jéíkin bichʼijí niʼníkę́ę́z, naadiin naaki góneʼ Géímal bichʼijí niʼníkę́ę́z,
18 naadiin tááʼ góneʼ Diiléíyah bichʼijí niʼníkę́ę́z, naadiin dı̨́ı̨́ʼ góneʼ Meiyazáíyah bichʼijí niʼníkę́ę́z.
19 Díí éí kótʼéego Bóhólníihii bikin biiʼ sohodizin góneʼ binaanish dadooleełii biniyé ałkééʼ nihoʼdeeʼnil. Ízrel dineʼé biBóhólníihii Diyin God éí Éran hazhéʼé nilíinii bichʼįʼ yee haadzíiʼii bikʼehgo dajíkáah dooleeł.
20 Áádóó díí Líívai dineʼé łaʼígíí éí biyeʼké ádaatʼı̨́. Ámram biyeʼké bitahdóó Shiibúwel wolyé; Shiibúwel biyeʼké bitahdóó Jedíyah wolyé.
21 Riihabáíyah biyeʼké bitahdóó Aisháíyah alą́ąjįʼ sizı̨́.
22 Ízxar biyeʼké bitahdóó Shiilómith wolyé; Shiilómith biyeʼké bitahdóó Jéíhath wolyé.
23 Hííbran biyeʼké bitahdóó Jiiráíyah alą́ąjįʼ naaghá, Amaráíyah naaki góneʼ naaghá, Jahéíziyel tááʼ góneʼ naaghá, Jékamiyam dı̨́ı̨́ʼ góneʼ naaghá.
24 Áádóó Azáíyel biyeʼké bitahdóó Máíkah wolyé; Máíkah biyeʼké bitahdóó Shéímer wolyé.
25 Máíkah bikʼis Aisháíyah wolyéii biyeʼké bitahdóó Zekaráíyah wolyé.
26 Miirárai biyeʼké Málai áádóó Múshai wolyé. Jeiyazáíyah biyeʼké bitahdóó Bííno wolyé.
27 Miirárai dineʼé, Jeiyazáíyah nilíinii biyeʼké Bííno, Shóham, Záker índa Íbrai daolyé.
28 Málai biyeʼ Eliyéízar wolyéii biyeʼké doo łaʼ hólǫ́ǫ da.
29 Kish bił áhootʼéii, Kish biyeʼ Jíírahmíyel wolyé.
30 Múshai biyeʼké ałdóʼ Málai, Ííder índa Jériimath daolyé. Díí éí Líívai dineʼé biyeʼké dabizhéʼé yę́ę bitsʼą́ą́dóó náás oochíiłii bikʼehgo bízhiʼ ałkééʼ niiʼnil.
31 Aláahgo naatʼáanii David áádóó Zéídak áádóó Ahímelek índa náádaʼiiłniihii áádóó Líívai dineʼé dabizhéʼé yę́ę aląąjįʼ naazíinii danilı̨́įgo dabinááł daʼazhéʼé yę́ę aląąjįʼ naazíinii danilı̨́įgo éí dabitsilíké Éran biyeʼké danilı̨́įgo yááʼiiltʼeʼ yaa naaskaígíigi átʼéego baa nidziskai.
