1 Chronicles 26:1-32
26 Yah aʼatiin yaa ádahalyą́ą doo biniyé hatah hoolzhishígíí kódaolyé: Kórah dineʼé nilíinii Éísaf biyeʼ Kórii wolyéii biyeʼ Miisheliimáíyah wolyé.
2 Miisheliimáíyah biyeʼké bitahdóó alą́ąjįʼ yizhchínígíí Zekaráíyah wolyé, naaki góneʼ yizhchínígíí Jedáíyeiyel wolyé, táʼá góneʼ yizhchínígíí Zebedáíyah wolyé, dı̨́ʼí góneʼ yizhchínígíí Játhniyel wolyé,
3 ashdlaʼ góneʼ yizhchínígíí Íílam wolyé, hastání góneʼ yizhchínígíí Jiihohéínan wolyé áádóó tsostsʼidí góneʼ yizhchínígíí Íílaiyowíínai wolyé.
4 Áádóó ałdóʼ Óbed-íídam biyeʼké bitahdóó Shiiméíyah wolyéii alą́ąjįʼ yizhchı̨́, akééʼ góneʼ yizhchínígíí Jiihózabad wolyé, táʼá góneʼ yizhchínígíí Jóʼah wolyé, dı̨́ʼí góneʼ yizhchínígíí Séíkar wolyé, ashdlaʼ góneʼ yizhchínígíí Niithániyel wolyé,
5 hastání góneʼ yizhchínígíí Ámiyel wolyé, tsostsʼid góneʼ yizhchínígíí Ísakar wolyé áádóó tseebíí góneʼ yizhchínígíí Piiyólthai wolyé; jó, Diyin God hakʼijisdliʼ.
6 Áádóó ałdóʼ hayeʼ Shiiméíyah wolyéii biyeʼké neheezhchínígíí bizhéʼé yę́ę baʼáłchíní náás daʼahílchíihii yee bídahólnííh, háálá diné dahayóii áádóó doo nídanilyéesii danilı̨́.
7 Shiiméíyah biyeʼké Áthnai, Ríífeiyel, Óbed índa Elzéíbad daolyéii; bikʼis Iiláíhu áádóó Semakáíyah wolyéii diné ayóó ábóodziilii danilı̨́.
8 Díí Óbed-íídam hayeʼké áádóó hayeʼké dabiyeʼké índa dabikʼisóó danilíinii tʼáá ałtso diné dabidziilii áádóó naanish yídaneelʼáanii hastą́diindóó baʼaan naaki ánéelą́ąʼgo Óbed-íídam baʼałkʼeedóó ádaatʼı̨́.
9 Miisheliimáíyah biyeʼké áádóó bikʼisóó danilíinii diné bidziilii danilı̨́įgo tseebíítsʼáadah yiltʼé.
10 Áádóó Miirárai baʼałkʼeedóó Hósah wolyéii biyeʼké hólǫ́. Shímrai aláahgo bóhólnííh. Éí doo átsé yizhchíinii nilı̨́į da, nidi bizhéʼé aláahgo bóhólníihgo ábiilaa.
11 Naaki góneʼ Hilkáíyah bóhólnííh, tááʼ góneʼ Tiibaláíyah bóhólnííh áádóó dı̨́ı̨́ʼ góneʼ Zekaráíyah bóhólnííh. Áko Hósah biyeʼké índa bikʼisóó tʼáá ałtsogo tááʼtsʼáadah yiltʼé.
12 Yah aʼatiin baa ádahojilyáanii díí hatahdóó hatah hoolzhishgo aláahgo bídahólníihii ałkééʼ hasʼnilgo ałkʼisóó dajídlı̨́įgo Bóhólníihii bikin biiʼ sohodizin biyah aʼatiingi hadaʼjisíidgo nidajilnish.
13 Áádóó dabizhéʼé yę́ę baʼałkʼeedóó danilíinii bikʼehgo aʼohgo ádaatʼéii áádóó ayóó ádaatʼéii tʼáá aheełtʼéego tʼáá yah adaʼiiztiinígi łaʼ baa ádahojilyą́ą doo biniyé yááʼiiltʼeʼ yaa naaskai.
14 Áádóó haʼaʼaahjigo biniyé yááʼiiltʼeʼígíí Shelemáíyah bichʼijí niʼníkę́ę́z. Áko biyeʼ Zekaráíyah hóyą́ągo kótʼé nínígíí nilı̨́įgo yááʼiiltʼeʼ yá yaa naaskaigo náhookǫsjigo bá niʼníkę́ę́z.
15 Óbed-íídam éí shádiʼáahjigo bá niʼníkę́ę́z, áádóó kin biiʼ nooh náʼáchíihii yaa ádahalyą́ą dooígíí biyeʼké bichʼijí niʼníkę́ę́z.
16 Sháppim áádóó Hósah éí eʼeʼaahjigo bá niʼníkę́ę́z; yah aʼatiin Sháleketh hoolyéiidóó dego atiiníjįʼ ałkééʼ haʼasíid doo.
17 Haʼaʼaahjigo Líívai dineʼé hastą́ltʼé hadaʼasííd índa náhookǫsjigo dı̨́ltʼé hadaʼasíidgo anáʼátʼááh; shádiʼáahjigo dı̨́ltʼé hadaʼasíidgo anáʼátʼááh áádóó kin biiʼ nooh náʼáchíihii bichʼįʼgo nidiltʼéego áádóó łaʼ nináádíltʼéego hadaʼasííd.
18 Eʼeʼaahjigo yah aʼatiinígíí Párbar hoolyéegi nidiltʼéego haʼasííd áádóó dego atiiníjįʼ dı̨́ltʼé hadaʼasííd.
19 Díí Kórii biyeʼké áádóó Miirárai biyeʼké bitahdóó yah adaʼiiztiin yaa ádahalyą́ą dooígíí bitah hahodiilzhiizhii ádaatʼı̨́.
20 Áádóó Líívai dineʼé bitahdóó Aháíjah éí Diyin God bikin biiʼ sohodizin góneʼ yódí daʼílíinii índa chodaoʼíinii dadílyinii baa áhojilyą́.
21 Gérshan dineʼé biyeʼké bitahdóó Léíyadan biyeʼké łaʼ Jiiháíyelai wolyé. Jiiháíyelai biyeʼké éí azhéʼé aláahgo bídahólníihii danilı̨́.
22 Jiiháíyelai biyeʼké Zíítham áádóó Jówel éí Bóhólníihii bikin biiʼ sohodizin góneʼ yódí daʼílíinii bee bóhólnííh nítʼééʼ.
23 Ámram dineʼé áádóó Ízxar dineʼé áádóó Hííbran kin haalʼáádę́ę́ʼ dineʼé índa Azáíyel dineʼé ałdóʼ nidaalʼaʼ.
24 Mózes biyeʼ Gérsham wolyé. Gérsham biyeʼ Shiibúwel éí yódí daʼílíinii yee bóhólníihii nilı̨́.
25 Eliyíízer bitsʼą́ą́dóó ahidideeshchíinii hakʼisóó danilı̨́. Eliyíízer biyeʼ Riihabáíyah wolyé. Riihabáíyah biyeʼ Jiiséíyah wolyé. Jiiséíyah biyeʼ Jóram wolyé. Jóram biyeʼ Zíkrai wolyé. Zíkrai biyeʼ Shiilómith wolyé.
26 Díí Shiilómith áádóó bikʼisóó danilíinii yódí daʼílíinii diyingo nidadeestʼáanii yaa ádahalyą́. Aláahgo naatʼáanii David áádóó azhéʼé yę́ę aláahgo bídahólníihii áádóó siláo mííl daníjaaʼii áádóó siláo neeznádiin daníjaaʼii índa siláo dah deínéehii bindanitʼaʼí danilíinii yódí daʼílíinii diyingo nidadeestʼáanii Bóhólníihii yaa nídeideezʼą́.
27 Anaaʼ bitsʼą́ą́dóó naalyeʼé daasnáanii éí Bóhólníihii bikin biiʼ sohodizingi chodaoʼı̨́į doo biniyé deidíłyingo Bóhólníihii yaa nídeideezʼą́.
28 Sámuel náásgóó áhodoonííł yaa halneʼii áádóó Kish biyeʼ Saul áádóó Ner biyeʼ Ábner áádóó Zerowáíyah biyáázh Jóʼab índa tʼáá háiida tʼáadoo leʼé diyingo nideideezʼáanii tʼáá ałtso éí Shiilómith áádóó bikʼisóó danilíinii bee bídahólnííh nítʼééʼ.
29 Ízxar dineʼé bitahdóó Kenanáíyah áádóó biyeʼké éí tʼáá sahdii naanish Ízrel dineʼé bitahdi hódahólnííh nítʼééʼ índa ándahozhdiiʼaah nítʼééʼ.
30 Hííbran kin haalʼáádóó dineʼé bitahdóó Hashabáíyah áádóó bikʼisóó éí diné doo nídanilyéesii danilı̨́įgo tʼááłáhídi mííldóó baʼaan tsostsʼidi neeznádiin ánéelą́ą́ʼ. Jórdan tooh nílínídóó eʼeʼaahjigo Bóhólníihii bá Ízrel dineʼé bídahólnííh nítʼééʼ áádóó aláahgo naatʼáanii yá nidaalʼaʼ nítʼééʼ.
31 Hííbran kin haalʼáádóó dineʼé bitahdóó dabizhéʼé yę́ę baʼáłchíní náás daʼahílchíhígíí bikʼehgo Jiiráíyah aláahgo bóhólnííh. David aláahgo naatʼáanii nilı̨́įgo dízdiin náhááh góneʼ Hííbran kin haalʼáádóó dineʼé bitahdóó bíká daʼneestą́ąʼgo Gíliyad kéyahgi Jéízer kin haalʼáhídi diné dahayóii áádóó doo nídanilyéesii bikʼídazneeztą́ą́ʼ.
32 Áádóó bikʼisóó diné doo nídanilyéesii danilı̨́įgo naakidi mííldóó baʼaan tsostsʼidi neeznádiin ánéelą́ą́ʼ. Azhéʼé aláahgo bídahólníihii danilíinii David aláahgo naatʼáanii nilíinii Rúben dineʼé áádóó Géed dineʼé índa Manáseh dineʼé ałnííʼdóóígíí Diyin God bídéétʼiʼii áádóó aláahgo naatʼáanii bídéétʼiʼii bindazhnitʼáago bee hódahólníihgo ádahoolaa.
