1 Chronicles 7:1-40
7 Ísakar biyeʼké dı̨́ltʼé; éí Tóla, Púwa, Jéíshab índa Shímran daolyé.
2 Tóla biyeʼké éí Ázai, Riifáíyah, Jííriyel, Jáhmeiyai, Jíbsam índa Shémuʼel daolyé. Tóla azhéʼé nilíinii baʼáłchíní náás daʼahílchíihii yá aląąjįʼ naazíinii, diné bidziilii áádóó doo nídanilyéesii danilı̨́. David bíyoołkááł yę́ędą́ą́ʼ biʼdééltaʼgo naadiin naakidi mííldóó baʼaan hastą́ądi neeznádiin ánéelą́ą́ʼ.
3 Ázai biyeʼ Izraháíyah wolyé; Izraháíyah biyeʼké Máíkel, Obadáíyah, Jówel índa Aisháíyah daolyé. Díí ashdlaltʼéego aląąjįʼ naazíinii danilı̨́.
4 Dahazhéʼé yę́ę bitsʼą́ą́dóó ahiiʼ hááʼahiyoolchíiłii éí hasiláo hoł dah deínéhígíí tádiindóó baʼaan hastą́ądi mííl ánéelą́ą́ʼ, háálá bidaʼasdzą́ą́ áádóó badaʼáłchíní tʼóó adahayóí nítʼééʼ.
5 Hakʼisóó danilíinii Ísakar baʼáłchíní bitahdóó diné bidziilii áádóó doo nídanilyéesii danilı̨́, éí ahiiʼ hááʼahiyoolchíiłii biʼdééltaʼgo tseebídiindóó baʼaan tsostsʼidi mííl ánéelą́ą́ʼ.
Bénjamin bitsʼą́ą́dóó aníchíinii
6 Bénjamin biyeʼké táltʼé éí Bíílah, Bííker índa Jedáíyeiyel daolyé.
7 Bíílah biyeʼké éí Ézban, Ázai, Azáíyel, Jériimath índa Ir daolyé. Díí ashdlaltʼéego daʼazhéʼé yę́ę baʼáłchíní náás daʼahílchíihii yá aląąjįʼ naazíinii, diné bidziilii áádóó doo nídanilyéesii ahiiʼ hááʼahiyoolchíiłii biʼdééltaʼgo naadiin naakidi mííldóó baʼaan tádiindóó baʼaan dı̨́ı̨́ʼ ánéelą́ą́ʼ.
8 Bííker biyeʼké Ziimáíra, Jóʼash, Eliyíízer, Íílaiyowíínai, Ámrii, Jériimath, Abáíjah, Ánathath índa Álemeth daolyé. Díí tʼáá ałtso Bííker biyeʼké danilı̨́.
9 Dahazhéʼé yę́ę baʼáłchíní náás daʼahílchíihii yá aląąjįʼ naazíinii, diné bidziilii áádóó doo nídanilyéesii ahiiʼ hááʼahiyoolchíiłii biʼdééltaʼgo naadiindi mííldóó baʼaan naakidi neeznádiin ánéelą́ą́ʼ.
10 Jedáíyeiyel biyeʼ éí Bílhan wolyé. Bílhan biyeʼké Jííʼash, Bénjamin, Ííhad, Kiinéíyanah, Zííthan, Társhish índa Ahíshahar daolyé.
11 Díí tʼáá ałtso Jedáíyeiyel biyeʼ bee binálíké ádaatʼı̨́. Dahazhéʼé yę́ę baʼáłchíní náás daʼahílchíihii yá aląąjįʼ naazíinii, diné bidziilii áádóó doo nídanilyéesii anaaʼgóó dadookahgo yídaneelʼánígíí biʼdééltaʼgo tsostsʼidi mííldóó baʼaan naakidi neeznádiin ánéelą́ą́ʼ.
12 Ir biyeʼké Sháppim índa Háppim wolyé; Éíher biyeʼ Húshim wolyé.
Náftalai bitsʼą́ą́dóó aníchíinii
13 Náftalai biyeʼké Jáhziyel, Gúnai, Jíízer índa Shálam daolyé; éí Bílhah binálíké danilı̨́.
Manáseh bitsʼą́ą́dóó aníchíinii
14 Manáseh biyeʼ Ásriyel joolyéii Áram dineʼé łaʼ hazhéʼé beʼasdzą́ą́ yíłʼíní hashchı̨́. Méíkir ałdóʼ yishchı̨́; éí Gíliyad dineʼé yizhéʼé nilı̨́ı̨́ nítʼééʼ.
15 Áádóó Méíkir éí Háppim áádóó Sháppim bilah Méíyakah wolyéego hweʼasdzą́ą doo biniyé nízhdiiłtı̨́. Naaki góneʼ hayeʼ silı̨́ʼígíí Ziilófehad wolyé, áádóó Ziilófehad bitsiʼké tʼéí hólǫ́.
16 Méíkir beʼasdzą́ą́ Méíyakah wolyéii ashkii yishchı̨́įgo Pííresh yee yiyíízhiʼ, áádóó bikʼis Shííresh wolyé. Shííresh biyeʼké Yúlam áádóó Réíkem wolyé.
17 Yúlam biyeʼ Bíídan wolyé. Díí Gíliyad biyeʼké ádaatʼı̨́. Méíkir biyeʼ Gíliyad wolyé áádóó Manáseh biyeʼ Méíkir wolyé.
18 Áádóó Gíliyad bilah Hamolííketh wolyéego éí Áíshad, Éíbiyíízer índa Mahéílah niyiishchı̨́.
19 Shiimáídah biyeʼké éí Aháíyan, Shííkem, Líkhai índa Anáíyam daolyé.
Íífreiyim bitsʼą́ą́dóó aníchíinii
20 Íífreiyim biyeʼ Shuthíílah wolyé, Shuthíílah biyeʼ Bííred wolyé, Bííred biyeʼ Téíhath wolyé, Téíhath biyeʼ Éladah wolyé, Éladah biyeʼ Téíhath wolyé,
21 Téíhath biyeʼ Zéíbad wolyé, Zéíbad biyeʼ Shuthíílah wolyé áádóó Shuthíílah biyeʼké nidiltʼéego Íízer índa Éliyad éí Gathgi nidahaazhchínígíí bibéégashii beezhniʼįįh biniyé ákwii nijiʼaashgo nidahastseed.
22 Nítʼééʼ hazhéʼé Íífreiyim haa yínííł nilı̨́įgo atínídindleehgo ląʼí yiską́, áádóó hakʼisóó hakʼi dahałtaʼ doo biniyé haa haaskai.
23 Áko Íífreiyim beʼasdzą́ą́ yił neezhtéezhgo beʼasdzą́ą́ iʼniiltsąądgo ashkii yishchı̨́ áádóó Biiráíyah yee yiyíízhiʼ,* háálá hakʼéí danilíinii doo yáʼátʼéehii bikʼi hooleʼ.
24 (Hatsiʼ éí Shíírah wolyéii Beth-hóran hoolyéego wódahdi áádóó wóyahdi kin haalʼáhígíí índa Ázzen-shíírah kin haalʼáhígíí áyiilaa.)
25 Áádóó Biiráíyah biyeʼ Ríífah wolyé, Ríífah biyeʼ Rííshef wolyé, Rííshef biyeʼ Tíílah wolyé índa Tíílah biyeʼ Téíhan wolyé,
26 Téíhan biyeʼ Léíyadan wolyé áádóó Léíyadan biyeʼ Amáíhad wolyé índa Amáíhad biyeʼ Iilíshama wolyé
27 áádóó Iilíshama biyeʼ Nan wolyé índa Nan biyeʼ Jáshowa wolyé.
28 Bikédaayah áádóó kéédahatʼínígi éí Béthel hoolyéego kin haalʼá áádóó binaagóó kin naazhjaaʼ nítʼééʼ, áádóó haʼaʼaahjigo Néíyaran hoolyéego kin shijaaʼ áádóó eʼeʼaahjigo Gíízer hoolyéego kin haalʼá áádóó binaagóó kin naazhjaaʼ nítʼééʼ, áádóó Shííkem hoolyéego kin haalʼá áádóó binaagóó kin naazhjaaʼ nítʼééʼ índa Géíza hoolyéego kin haalʼá áádóó binaagóó kin naazhjaaʼ nítʼééʼ.
29 Manáseh dineʼé bikéyah hoodzooígíí bíighahgóó ałdóʼ, Beth-shíyan hoolyéego kin haalʼá áádóó binaagóó kin naazhjaaʼ nítʼééʼ, Téíyanak hoolyéego kin haalʼá áádóó binaagóó kin naazhjaaʼ nítʼééʼ, Megído hoolyéego kin haalʼá áádóó binaagóó kin naazhjaaʼ nítʼééʼ, Dor hoolyéego kin haalʼá índa binaagóó kin naazhjaaʼ nítʼééʼ. Ákǫ́ǫ́ Ízrel biyeʼ Jóseph wolyéii biyeʼké náás daʼahílchíihii kéédahatʼı̨́ı̨́ nítʼééʼ.
Ásher bitsʼą́ą́dóó aníchíinii
30 Ásher biyeʼké Ímnah, Íshowah, Íshowai áádóó Biiráíyah daolyé índa bitsiʼ Síírah wolyé.
31 Biiráíyah biyeʼké éí Hííber índa Málkiyel wolyé. Málkiyel éí Birzéívith yizhéʼé nilı̨́.
32 Hííber éí Jáflet, Shéímer áádóó Hótham há neheezhchı̨́ índa hatsiʼ Shúwa há yizhchı̨́.
33 Jáflet biyeʼké Péísak, Bímhal índa Áshvath daolyé. Díí éí Jáflet baʼáłchíní ádaatʼı̨́.
34 Shéímer biyeʼké Éíhai, Róhgah, Jiihábah índa Áram daolyé.
35 Hakʼis Héílam biyeʼké Zófah, Ímna, Shíílesh índa Éímal daolyé.
36 Zófah biyeʼké Súwah, Hárnefer, Shúwal, Bérai, Ímrah,
37 Bíízer, Had, Shámma, Shílshah, Íthran índa Biyéra daolyé.
38 Jííther biyeʼké Jiifáneh, Píspah índa Éíra daolyé.
39 Álla biyeʼké Éíra, Hániyel índa Riizáíyah daolyé.
40 Díí tʼáá ałtso Ásher baʼáłchíní náás daʼahílchíihii daʼazhéʼé yę́ę baʼáłchíní náás ahoolchíiłii yá aląąjįʼ naazíinii, diné bidziilii áádóó doo nídanilyéésgóó bitahaasdláaʼii danilı̨́ índa naatʼáanii nidaʼaʼeeshii danilı̨́. Éí dabízhiʼ bikʼinídaháasdzoh áádóó anaaʼ biniyé hashtʼeʼádadólzinii biʼdééltaʼgo naadiin hastą́ądi mííl ánéelą́ą́ʼ.
Footnotes
^ Biiráíyah jiníigo éí Hííbrew kʼehjígo achʼįʼ hodiisʼnááʼ jinínígi átʼéego diitsʼaʼ.
