1 Chronicles 9:1-44
9 Áko Ízrel dineʼé tʼáá ádzíłtso ahiiʼ hááʼahijiyoolchíiłii haa dahaneʼgo Ízrel dineʼé áádóó Júdah dineʼé aláahgo binanitʼaʼí binaaltsoos bikʼinídaháasdzo. Ízrel dineʼé áádóó Júdah dineʼé bee hazʼáanii nidayiiztiʼígíí bąą Bábilangóó abidiʼnoolkaad.
2 Ízrel dineʼé bináádaʼiiłniihii áádóó Líívai dineʼé índa níbaal biiʼ hodílzinii yindaalteʼii Néthinim wolyéii bikéyahgi bikin hadaasʼáago bí átsé ákwii ninádahaasná.
3 Áko Júdah dineʼé áádóó Bénjamin dineʼé áádóó Íífreiyim dineʼé índa Manáseh dineʼé łaʼ Jerúsalemgi kéédahatʼı̨́.
4 Amáíhad biyeʼ Yúthai wolyé, Ámrai biyeʼ Amáíhad wolyé, Ímrai biyeʼ Ámrai wolyé éí Júdah biyeʼ Píírez baʼáłchíní náás ahoolchíiłii łaʼ Béínai biyeʼ Ímrai wolyé.
5 Áádóó Sháíloh kin haalʼáádóó dineʼé nilíinii Aséíyah alą́ąjįʼ biʼdizhchínígíí índa biyeʼké
6 áádóó Zíírah biyeʼké łaʼ Jiyúwel wolyéii áádóó bikʼisóó danilíinii éí hastą́ądi neeznádiindóó baʼaan náhástʼédiin ánéelą́ą́ʼ.
7 Bénjamin biyeʼké náás ahoolchíiłii łaʼ Miishálam biyeʼ Séílu wolyé. Séílu biyeʼ Hodaváíyah wolyé. Hodaváíyah biyeʼ Hasiinúwah wolyé.
8 Áádóó Jiiróham biyeʼ Ibnáíyah wolyé índa Ázai biyeʼ Íílah wolyé, Íílah biyeʼ Míkrai wolyé áádóó Shefatáíyah biyeʼ Miishálam wolyé, Miishálam biyeʼ Rúwel wolyé áádóó Rúwel biyeʼ Ibnáíjah wolyé
9 áádóó dabikʼisóó náás daʼahílchíihii bikʼehgo dabiʼdééltaʼgo náhástʼéidi neeznádiindóó baʼaan ashdladiindóó baʼaan hastą́ą́h ánéelą́ą́ʼ. Díí tʼáá ałtso dabizhéʼé yę́ę baʼáłchíní náás ahoolchíiłii yá aląąjįʼ naazíinii danilı̨́.
10 Áádóó díí éí náádaʼiiłniihii danilı̨́ı̨́ nítʼééʼ: Jedéíyah áádóó Jiihóíyarib índa Jéíkin daolyéii
11 áádóó Diyin God bikin biiʼ sohodizin bee bóhólníihii Azaráíyah éí bizhéʼé Hilkáíyah wolyé, Hilkáíyah bizhéʼé Miishálam wolyé, Miishálam bizhéʼé Zéídak wolyé, Zéídak bizhéʼé Miiréíyath wolyé índa Miiréíyath bizhéʼé Aháítab wolyé.
12 Áádóó Adéíyah wolyéii éí bizhéʼé Jiiróham wolyé, Jiiróham bizhéʼé Pásher wolyé, Pásher bizhéʼé Malkáíjah wolyé áádóó Meiyasíyai bizhéʼé Éídiyel wolyé. Éídiyel bizhéʼé Jázerah wolyé, Jázerah bizhéʼé Miishálam wolyé, Miishálam bizhéʼé Miishíliimath wolyé índa Miishíliimath bizhéʼé Ímer wolyé.
13 Dabikʼisóó ałdóʼ éí dabizhéʼé yę́ę baʼáłchíní náás daʼahílchíihii yá aląąjįʼ naazíinii danilı̨́įgo Diyin God bikin biiʼ sohodizingi tʼáá íiyisí yídaneelʼą́ągo chodaoʼínígíí biʼdééltaʼgo tʼááłáhídi mííldóó baʼaan tsostsʼidi neeznádiindóó baʼaan hastą́diin ánéelą́ą́ʼ.
14 Díí Líívai dineʼé danilı̨́: Shiiméíyah wolyéii éí bizhéʼé Háshab wolyé, Háshab bizhéʼé Ázrikam wolyé, Ázrikam bizhéʼé Hashabáíyah wolyé, Hashabáíyah éí Miirárai biyeʼké náás ahoolchíiłii łaʼ nilı̨́
15 áádóó Bakbákar, Hííresh, Géílal índa Máíkah biyeʼ Matanáíyah; Máíkah bizhéʼé Zíkrai wolyé, Zíkrai bizhéʼé Éísaf wolyé
16 áádóó Obadáíyah wolyéii éí bizhéʼé Shiimáíyah wolyé, Shiimáíyah bizhéʼé Géílal wolyé, Géílal bizhéʼé Jedúthan wolyé índa Berakáíyah wolyéii éí bizhéʼé Éísaf wolyé, Éísaf bizhéʼé Elkéínah wolyé; éí Niitófahdóó dineʼé bikin naazhjaaʼígi kééhatʼı̨́ı̨́ nítʼééʼ.
17 Díí éí yah aʼatiingi yaa ádahalyáanii danilı̨́: Shálam, Ákab, Tálman índa Aháíman dabikʼisóó tʼáá bił. Shálam éí alą́ąjįʼ bóhólnííh.
18 Aláahgo naatʼáanii bichʼįʼ haʼaʼaahjigo yah aʼatiinígi yaa ádahalyą́ą́ nítʼééʼ, nidi kʼad Líívai dineʼé kéédahatʼínígi yah adaʼiiztiingi yaa ádahalyą́.
19 Áádóó Shálam wolyéii éí bizhéʼé Kórii wolyé, Kórii bizhéʼé Iibáíyasaf wolyé, Iibáíyasaf bizhéʼé Kórah wolyé áádóó Shálam bikʼisóó éí Kórah dineʼé danilı̨́įgo níbaal biiʼ hodílzinii yiiʼ nidaalnishgo yee bídahólnííh áádóó yah adaʼiiztiinígi yaa ádahalyą́. Dabizhéʼé yę́ę éí Bóhólníihii bidineʼé dah yinééł bee bídahólnííh áádóó Bóhólníihii biníbaal biiʼ hodílzinii yah aʼatiingi yaa ádahalyą́ą́ nítʼééʼ.
20 Áádóó Eliyéízar biyeʼ Fíniyas wolyéii hananitʼaʼí nilı̨́įgo Bóhólníihii bił hólǫ́ǫ́ nítʼééʼ.
21 Miisheliimáíyah biyeʼ Zekaráíyah wolyéii níbaal biiʼ dahozdísinii biiʼ áłah náʼádleehgi yah aʼatiinígi yaa áhályą́ą́ nítʼę́ę́ʼ.
22 Díí yah adaʼaztiinígi yaa ádahalyą́ą doo biniyé nídabidiisdláʼígíí tʼáá ałtsogo naakidi neeznádiindóó baʼaan naakitsʼáadah ánéelą́ą́ʼ. Hakin naazhjaaʼgóó éí dahazhéʼé yę́ę bitsʼą́ą́dóó daʼahijílchíihii házhiʼ naaltsoos bikʼidaasdzoh. David áádóó Sámuel joolyéii áhodoonííł baa hojilneʼii hadaʼahódlíigo hondaanish danilíinii bichʼįʼ nihodeeʼnil.
23 Áko bí áádóó biyeʼké éí Bóhólníihii bikin biiʼ sohodizin tʼáá éí níbaal biiʼ hodílzinii wolyéego yah aʼatiinígi yaa ádahalyáanii danilı̨́.
24 Díí dı̨́ı̨́ʼdę́ęʼgo, haʼaʼaahjigo, eʼeʼaahjigo, náhookǫsjigo índa shádiʼáahjigo yah adaʼaztiinígi yaa ádahalyáanii danilı̨́.
25 Áádóó tsostsʼid néílkáahjįʼ bikʼéí bikin naazhjaaʼdę́ę́ʼ yaa nídaakahgo yíká anájahgo hoolzhish.
26 Háálá díí Líívai dineʼé dı̨́ltʼéhígíí yah adaʼaztiin yaa ádahalyáanii yá aląąjįʼ naazíinii éí Diyin God bikin biiʼ sohodizin biyiʼ nahazʼánígíí áádóó yódí bá dahooghanígíí yaa ádahalyą́.
27 Áádóó Diyin God bikin biiʼ sohodizin binaagóó dazhnijah, háálá baa ádahojilyánígíí bee hódahólnííh, índa abínígo aańdazhditı̨́įhgo bee hódahólnííh.
28 Łaʼ éí tʼáá haʼátʼíhída chodaoʼínígíí yah anáhájáahgo áádóó índa chʼéhéjáahgo nídajóltahgi bee hódahólnííh.
29 Náánáłaʼ éí kin biiʼ sohodizin bibeedí, diyingo chodaoʼíinii tʼáá ałtso áádóó akʼáán áádóó wáin áádóó akʼah áádóó tsin bijeeh łikání halchinii fránkinsens wolyéii índa spáis wolyéii yaa ádahalyą́ą doo biniyé nibiʼdeeʼnil.
30 Náánáłaʼ nááʼiiłniihii biyeʼ danilíinii éí spáis wolyéii akʼah bee alyı̨́įhii ałtah nídeidziʼ.
31 Áádóó Líívai dineʼé łaʼ Matitháíyah wolyéii éí Kórah dineʼé nilíinii Shálam wolyéii alą́ąjįʼ bá hoʼdizhchı̨́. Tʼáá daʼníłtah átʼéego bee anáʼákáhí biiʼ daaztʼéii bee hóhólnííh nítʼééʼ.
32 Náánáłaʼ bikʼéí éí Kóhath dineʼé danilíinii tʼáá hááʼáyı̨́ı̨́h jı̨́ náʼádleeh bikʼeh Diyin God bichʼįʼ bááh nááhániihii hashtʼéédayiilʼįįh nítʼééʼ.
33 Díí éí Líívai dineʼé dabizhéʼé yę́ę baʼáłchíní náás ahoolchíiłii yá aląąjįʼ naazíinii sin yee dahataałii danilı̨́; wóneʼé tʼéí nidaakaigo doo haʼátʼíhída yaa nidaakai da, háálá jı̨́įgoda índa tłʼéeʼgoda tʼéí chodajooʼı̨́.
34 Díí Líívai dineʼé dabizhéʼé yę́ę baʼáłchíní ahiiʼ hááʼahiyoolchíiłgo aląąjįʼ naazíinii Jerúsalemgi kéédahatʼı̨́ı̨́ nítʼééʼ.
Saul bitsʼą́ą́dóó aníchíinii
35 Gíbiyan kin haalʼáadi Gíbiyan dineʼé bizhéʼé Jáíyel kééhatʼı̨́ı̨́ nítʼééʼ. Beʼasdzą́ą́ Méíyakah wolyé.
36 Hayeʼ alą́ąjįʼ há yizhchínígíí Ábdan wolyé áádóó nááʼákééʼ góneʼígíí Zer wolyé. Hayeʼké Kish áádóó Béíyal áádóó Ner áádóó Néídab
37 áádóó Gíídar áádóó Aháíyo áádóó Zekaráíyah índa Míklath daolyé.
38 Míklath éí Shímiyah há yizhchı̨́. Díí ałdóʼ Jerúsalemgi bikʼisóó yił ahíishghahgóó kéédahatʼı̨́.
39 Áádóó Ner éí Kish há yizhchı̨́ áádóó Kish éí Saul há yizhchı̨́ áádóó Saul éí Jánathan áádóó Malkishúwa áádóó Abínadab índa Esh-béíyal há neheezhchı̨́.
40 Áádóó Jánathan éí Mérib-béíyal há yizhchı̨́ índa Mérib-béíyal éí Máíkah há yizhchı̨́.
41 Máíkah biyeʼké Páíthan áádóó Míílek áádóó Taríya índa Éíhaz daolyé.
42 Áádóó Éíhaz éí Jéírah há yizhchı̨́ índa Jéírah éí Álemeth áádóó Azméíveth índa Zímrai há neheezhchı̨́ áádóó Zímrai éí Móza há yizhchı̨́,
43 Móza éí Bíniya há yizhchı̨́, Bíniya biyeʼ Riifáíyah wolyé. Riifáíyah biyeʼ Eliyéísah wolyé. Eliyéísah biyeʼ Éízel wolyé.
44 Éízel biyeʼké hastą́ą́h: Ázrikam, Bókeru, Íshmeiyel, Shíyaráíyah, Obadáíyah índa Héínan daolyé. Díí Éízel biyeʼké danilı̨́.
