1 Corinthians 10:1-33
10 Shikʼisóó danohłíinii, díí nihił béédahózin doo nisin, jó, éí danihizhéʼé yę́ę tʼáá ałtso kʼos biyaa tázhdínééh nítʼééʼ, áádóó tʼáá ádzíłtso tʼáadoo há nantłʼaígóó tónteel biiʼ chʼízhníná.
2 Áádóó tʼáá átʼé Mózes bikééʼ jookah dooleełgo kʼos bee índa tónteel bee dabiʼdoolzı̨́ı̨́ʼ.
3 Áádóó tʼáá ádzíłtso Diyin God bitsʼą́ą́dóó tʼááłáʼí chʼiyáán dílyinígíí dajííyą́ą́ʼ.
4 Áádóó tʼáá ádzíłtso Diyin God bitsʼą́ą́dóó tʼááłáʼí tó dílyinígíí dajoodlą́ą́ʼ. Jó, tsé dílyinígíí biyiʼdóó tó háálı̨́įgo dajoodlą́ąʼii éí Christ átʼı̨́, éí tʼáá áłahjįʼ hoł hólǫ́ǫ́ nítʼééʼ.
5 Azhą́ ákótʼée nidi kʼasdą́ą́ʼ tʼáá ádzíłtso Diyin God doo bił dahojííshǫǫd da, áko éí halgaigi áhoʼdisdįįdgo tʼáá ákǫ́ǫ́ nihizhdélʼá.
6 Áko díidíígíí bee nihidaʼiisniiʼ biniyé ákódaadzaa, doo yáʼádaatʼéehii yidádanoolníí nítʼééʼ yę́ęgi átʼéego doo ádaniitʼée da doo biniyé.
7 Tʼáadoo edaʼalyaii bichʼįʼ nidahohłáhí. Jó, łaʼ éí edaʼalyaii yichʼįʼ nidahasá; tʼáá Diyin God bizaad bee akʼeʼashchíinii ánínígi átʼéego, Diné dineezbingo daʼííyą́ą́ʼ áádóó daʼoodlą́ą́ʼ índa tsiʼdeeskaigo eʼelyaii yichʼįʼ nidahałáago idaʼniilzhiizh.
8 Łaʼ naʼageh yee tsiʼdadeeskaigo biniinaa tʼáá łaʼa jı̨́ naadįįtáadi mííl yiltʼéego daneezná, áko nihí tʼáadoo naʼageh bee tsiʼndeiikaií doo.
9 Łaʼ Bóhólníihii nayídanitaahgo biniinaa tłʼiish nabistseed, áko nihí tʼáadoo Bóhólníihii nabídaniitaahí doo.
10 Łaʼ saad dahółǫ́ǫgo biniinaa diyingo naalʼaʼí naʼałtseedii nilı̨́įgo ábísdįįd, áko nihí tʼáadoo saad dahonohłóní doo.
11 Jó, díidíígíí tʼáá ałtso diné náádaałaʼ bidaʼílnííh biniyé ádabiʼdoolʼįįd, áádóó nihí bee nidanihidiʼnitin biniyé bee akʼedaʼashchı̨́, háálá nihí díí hoolzhishígíí kʼadę́ę bił niitʼéehii daniidlı̨́.
12 Éí bąą bíniʼdii tʼáá háiida oodlą́ bee sézı̨́ jiniizı̨́ʼígíí ádaa áhojilyą́ą doo, áko doo tʼą́ą́ʼ anízhdootłish da.
13 Bee naʼíhonitaah diné tʼáá ałtso bichʼįʼ ááníiłii tʼéiyá bee naníhodiʼnitaah, nidi Diyin God éí baʼahódlí, áko éí bídanoołʼáanii biláahdi nanihíhodínóotahgi doo yee hasʼą́ą da, nidi naʼíhonitaah tʼáá bił chʼíhonítʼiʼgo nihá íidoolííł, áko bídanoołʼą́ą doo.
14 Éí bąą, ayóóʼánihóshʼníinii, edaʼalyaii bichʼįʼ nahadlá bitsʼánóhjeeh.
15 Diné dahóyáanii bichʼįʼ yátiʼígi átʼéego nihichʼįʼ yáshtiʼ; beiníshtʼínígíí baa nitsídaahkees.
16 Díí doodlı̨́įłii bee akʼihojidlíii Diyin God bichʼįʼ baa ahééh daniidzinii, daʼ éísh doo Christ bidił ałtsʼą́ą́ʼ daʼniilkʼiizgo bee łáʼí daniidlı̨́į da? Bááh nidahiitíhígíí, daʼ éísh doo Christ bitsʼíís ałtsʼą́ą́ʼ daʼniilkʼiizgo bee łáʼí daniidlı̨́į da?
17 Jó, bááh tʼááłáʼí siʼánígíigi átʼéego nihí tʼóó ahoniiʼyói nidi, Christ bee atsʼíís tʼááłáʼíígíí daniidlı̨́, háálá tʼáá áníiltso éí bááh tʼááłáʼíígíí ałtsʼą́ą́ʼ daʼniilkʼiizgo nídeiidı̨́ı̨́h.
18 Ízrel dineʼé baa nijikaígíí baa nitsídaahkees; jó, éí náádahaniihii dajiyánígíí bikááʼdóó nááʼiiniihgi nahadláhígíísh doo ałtsʼą́ą́ʼ daʼjíłkʼiiz da?
19 Ákoshąʼ haʼátʼíí ááhdishní? Daʼ edaʼalyaiísh diyin ádaatʼé? Daʼ bichʼįʼ náádahaniihiísh tʼáá yą́ą́h nilı̨́?
20 Dooda lą́ą! Díí ááhdishní, Diyin God doo dayoodláanii náádayiiłniihígíí éí níłchʼi bidaʼiiníziinii yichʼįʼ náádayiiłniih, Diyin God bichʼįʼ éí dooda. Áko níłchʼi bidaʼiiníziinii tʼáadoo bił ahił danohdlíní doo, nihóshʼní.
21 Bóhólníihii bibee adlání bee daʼohdlą́ągo níłchʼi bidaʼiiníziinii bibee adlání doo bee daʼoohdlą́ą́ʼ átʼée da. Bóhólníihii bidiyingo adą́ daahsą́ągo níłchʼi bidaʼiiníziinii bibikááʼadání bikáaʼgi doo daʼoohsą́ą́ʼ átʼée da.
22 Daʼ ákoósh Bóhólníihii oołchʼı̨́įdgo ííníilzin? Daʼ bíísh biláahgo nihidziil?
Diyin God bee baa haʼniih doo biniyé tʼáá ałtsoní baa nidaahkai
23 Tʼáá ałtsoní bee shá hazʼą́ą nidi doo tʼáá ałtsoní shá yáʼátʼéeh da. Tʼáá ałtsoní bee shá hazʼą́ą nidi doo tʼáá ałtsoní anooséełgo bidziilgo éʼéléeh da.
24 Diné łaʼda tʼáá hó há yáʼátʼéehii tʼéiyá tʼáadoo ádá baa nitsídzíkeesí doo, nidi náánáłaʼ bá yáʼátʼééh dooleełígíí baa nitsídzíkees doo.
25 Tʼáá haʼátʼíhída atsįʼ bá hooghandóó nidahaniihígíí daahsą́. Doo nihidaʼdiiłʼáa da dooleeł biniyé tʼáadoo nidaʼídółkidí.
26 Háálá nahasdzáán éí Bóhólníihii bí, áádóó yee hadítʼéii ałdóʼ tʼáá ałtso bí.
27 Doo oodlání łaʼ ádaʼazįįdjįʼ hágo nihiłníigo, ákǫ́ǫ́ diikah danoozı̨́įʼgo nihiyaa niʼiizką́ągo dadoohsı̨́ı̨́ł. Doo nihidaʼdiiłʼáa da dooleeł biniyé tʼáadoo nidaʼídółkidí.
28 Nidi diné łaʼ ánihiłníigo, Díí eʼelyaii bichʼįʼ nááhaazniiʼii átʼé, éí ákózhdííniidígíí haniinaa, índa doo hoʼdiiłʼáa da dooleełígíí biniyé daohsą́ą́ʼ lágo, [háálá nahasdzáán éí Bóhólníihii bí, áádóó yee hadítʼéii ałdóʼ tʼáá ałtso bí].
29 Jó, ánihidishní, Ni tʼáá ákótʼé nínízin nidi doo ákótʼée da jinízinígíí biniinaa doo dííyı̨́įł da. Łaʼda daatsʼí ádidooniił, Tʼáá shił ákogo haʼátʼéegoshąʼ diné náánáłaʼ biʼdiiłʼáhígíí nashiníłtłʼago bee shaa hwiinítʼı̨́į doo?
30 Diyin God shaa joozbaʼgo bichʼįʼ ahééh nisingo ashą́ągo, haʼátʼéegoshąʼ baa ahééh niizı̨́įʼgo yisháanii biniinaa nichǫ́ʼógo shá haʼdoodzih?
31 Daʼohsą́ągo, daʼohdlą́ągo, haʼátʼíhída baa nidaahkaigo, éí tʼáá ałtso Diyin God bee haa haʼniih doo biniyé baa nidaahkai.
32 Jew dineʼé danilíinii, doodaiiʼ doo Jew dineʼé danilíinii, doodaiiʼ Diyin God dayoodláanii áłah nídaadleehígíí tʼáadoo danółtłʼaaí.
33 Tʼáá ałtsojįʼ diné tʼáá ałtso bił dahonishónígi átʼéii tʼéí baa nidaahkai. Doo tʼáá shí shá yáʼátʼéehii tʼéiyá ádá baa nitséskees da, nidi diné ląʼí bá yáʼátʼéehii bá baa nitséskeesgo, yisdáhidookah biniyé áshtʼı̨́.
