1 Corinthians 11:1-34
11 Shí Christ beʼeshʼínígi átʼéego shidaʼołʼı̨́.
Daʼoodlání áłah daazlı̨́įʼgo asdzání bitsiiʼ bikʼídooltihii
2 Shikʼisóó, tʼáá ałtsojįʼ shéédaałniih áádóó bee nanihinétą́ʼígíí tʼáá bee nihił hweeshneʼígi átʼéego deínóhtąʼígíí bee nihaa hashniih.
3 Nidi díí nihił béédahózin doo nisin, jó, éí diné tʼááłáʼí nítínígo bitsijįʼ sizíinii éí Christ, áádóó asdzání bitsijįʼ sizíinii éí bahastiin, índa Christ bitsijįʼ hólóonii éí Diyin God.
4 Áłah nídaahdleehgo diné tʼááłáʼí jinítínígo hatsiiʼ náʼáztiʼgo sozdilzingo, doodaiiʼ Diyin God bá hojilneʼgo éí Christ hatsijįʼ sizíinii doo hoł nilı̨́į da ájílééh.
5 Nidi asdzání tʼááłáʼí jinítínígo hatsiiʼ doo bikʼéʼéstiʼgóó sozdilzingo, doodaiiʼ Diyin God bá hojilneʼgo éí hatsijįʼ sizíinii doo hoł nilı̨́į da ájílééh; éí hatsiiʼ há yilzhéʼígíí nahalin.
6 Asdzání bitsiiʼ doo yikʼéʼéstiʼgóó bitsiiʼ kʼídoogish. Asdzání bitsiiʼ kʼídoogishgo, doodaiiʼ bitsiiʼ bá doolzhihgo yaa yánízingo, bíniʼdii yikʼíʼdoołtih.
7 Háálá diné éí Diyin God tʼáá bijíłtʼéego áhoʼdiilyaa, índa Diyin God yee hóhółníihii bee dzizíinii bąą hatsiiʼ doo bikʼízhʼdoołtih da, nidi asdzání éí diné bóhojíłníihgo yee ayóó átʼéii ííshją́ą́ ájílééh.
8 Háálá diné éí asdzání doo bitsʼą́ą́dóó ályaa da, nidi asdzání éí diné bitsʼą́ą́dóó ályaa.
9 Jó, diné éí asdzání doo bá ályaa da, nidi asdzání éí diné bá ályaa.
10 Éí bąą asdzání hatsiiʼ bikʼéʼéstiʼgo yáʼátʼééh, éí óhojíłníihgo bee ééhózinii átʼé. Áádóó diyingo naalʼaʼí hoł nilı̨́įgo bee bééhózin.
11 Nidi Bóhólníihii yinahazʼáanii bikʼehgo asdzání éí diné bídin jílı̨́į doo, diné ałdóʼ asdzání bídin jílı̨́į doo,
12 háálá asdzání tʼáá diné bitsʼą́ą́dóó ályaaígi átʼéego diné éí asdzání bitsʼą́ą́dóó nihwiileeh. Nidi tʼáá ałtsoní éí Diyin God bitsʼą́ą́dę́ę́ʼ nidahwiileeh.
13 Tʼáá nihí baa nitsídaahkees; daʼ asdzáníísh bitsiiʼ doo bikʼéʼéstiʼgóó Diyin God yichʼįʼ sodilzingo beełtʼé?
14 Jó, diné bitsiiʼ nineezii baa yáhásin; diné ákódaatʼéego nanihinitin,
15 nidi asdzání bitsiiʼ nineezgo éí bee bił ídlı̨́įgo baa nitsáhákees, háálá hatsiiʼ bikʼéʼéstiʼ doo biniyé áhoʼdiilyaa.
16 Nidi diné łaʼda díí baa saad honishłǫ́ nízingo, nihí nihiʼéʼélʼįʼ náánáłaʼ ádin, áádóó Diyin God dayoodláanii áłah nídaadleehii ałdóʼ tʼáá ákótʼéego deinízin.
Bóhólníihii bidiyingo adą́ nidayiiłchxǫǫh
17 Nidi nááʼákóneʼ bee nihichʼįʼ hanáánásdziihígíí éí doo bee nihaa hashniih da, háálá áłah hohłeehgo yáʼátʼéehgo áłah nohłı̨́į dooleeł yę́ę tʼóó tséʼédinda doo yáʼátʼééhgóó áłah nohłı̨́į łeh.
18 Átséhé góneʼ, daʼoodlání danohłı̨́įgo áłah náhdleehgo ałtsʼą́ąjįʼ nishoojéeʼgo yishniih, áko éí tʼáá bighąądígi wooshdlą́.
19 Jó, nihitahgóó tʼáá aaníí oodlání danilínígíí béédahodoozįįł biniyé ałtsʼáʼáldah hólǫ́ǫ doo.
20 Áłah náhdleehgo daahsánígíí éí doo Bóhólníihii bidiyingo adą́ átʼée da.
21 Háálá daʼadą́ągi tʼááłáʼí nootínígo tʼáá nihí nihichʼiyąʼ átsé daohsı̨́ı̨́h, áko łaʼ tʼáá dichin danilı̨́į łeh, łaʼígíí éí bił dahoniidoh.
22 Haʼátʼíí lá, daʼ danihighan biiʼ daʼdoohsı̨́łígíísh doo nihee dahólǫ́ǫ da? Éí doodago Diyin God dayoodláanii áłah nídaadleehígíísh doo nihił danilı̨́į da, áádóó tʼáadoo bee dahólónígíísh yádadínóozįįłgo ádaahłééh biniyé ádaahtʼı̨́? Haʼátʼíishąʼ nihidideeshniił? Daʼ nihaa hashniihísh dooleeł? Dooda lą́ą, doo nihaa hóshniih átʼée da!
Bóhólníihii bidiyingo adą́ ádadzósingo (Mt. 26:26-29; Mk. 14:22-25; Lk. 22:14-20)
23 Háálá Bóhólníihii yee nashineeztą́ʼígíí éí bee nanihinítą́ą́ʼ: jó, Jesus éí nináhoʼdeetʼą́ągo, tʼáá éí bitłʼééʼ Jesus bááh nízhdiiʼą́
24 áádóó sozdoolzingo Diyin God bichʼįʼ baa ahééh jiniizı̨́įʼgo nidziiztiʼgo ázhdííniid, Díí shitsʼíís nihá atélnéhígíí átʼé. Tʼáá nídaahdı̨́ı̨́h bikʼeh díí bee shéédaałniih dooleeł.
25 Tʼáá ákótʼéego daʼjííyą́ą́ʼdóó bikʼijįʼ doodlı̨́įłii nízhdiiką́ągo ázhdííniid, Díí doodlı̨́įłii shidił binahjįʼ bee ahaʼdeetʼáanii ániidíii átʼé. Tʼáá nídaahdlı̨́ı̨́h bikʼeh díí bee shéédaałniih dooleeł.
26 Háálá díí bááh nídaahdı̨́ı̨́h áádóó díí doodlı̨́įłii nídaahdlı̨́ı̨́h bikʼeh Bóhólníihii daaztsą́ągi baa dahołneʼgo ádaahtʼı̨́. Éí náánádzáajįʼ bidaʼołʼı̨́į doo.
Bóhólníihii bidiyingo adą́ doo dazdísingóó dajiyą́ągo
27 Éí bąą tʼáá háiida Bóhólníihii doo jidísingóó díí bááh jííyą́ʼígíí áádóó díí doodlı̨́įłii joodlą́ʼígíí, éí Bóhólníihii bitsʼíís índa bidił doo hoł nilı̨́ı̨́góó bee hohodiitʼiʼgo átʼé.
28 Áko diné éí haʼázdidoolziłgo índa díí bááh jidooyı̨́ı̨́ł áádóó díí doodlı̨́įłii jidoodlı̨́ı̨́ł.
29 Háálá éí Bóhólníihii bitsʼíís tʼáadoo hazhóʼó bikʼizhdiitįįhí díí bááh jííyą́ʼígíí áádóó doodlı̨́įłii joodlą́ʼígíí éí bee ánihootʼaahjįʼ ádihozhdidooltʼihgo átʼé.
30 Éí biniinaa nihitahgóó ląʼí doo dabidziil da áádóó ka nidaakai, índa łaʼ daneezná.
31 Nidi átsé tʼáá nihí hazhóʼó hadaʼádiilzíidgo Diyin God doo nihaa nídóotʼįįł da.
32 Nihokááʼ dineʼé doo bił nihá nihodiyootʼáał da biniyé Bóhólníihii nihainítʼı̨́įgo tʼáá hashkée nanihinitin.
33 Éí bąą, shikʼisóó, Bóhólníihii bidiyingo adą́ biniyé áłah nídaahdleehgo, ałbaʼ nahísóotą́.
34 Diné łaʼda dichin dzizlı̨́įʼgo hániʼdii hooghandi azhdooyı̨́ı̨́ł, ákótʼéego áłah nídaahdleehgo éí doo łaʼ nihá nihodootʼáał da. Áádóó náánáłaʼ bíndashídóołkidii éí nihaa náánísdzáago índa nihił chʼídadeeshʼaał.
