1 Corinthians 12:1-31
12 Shikʼisóó, kʼad éiyá Níłchʼi Diyinii aidiiʼaahii nihił béédahózin doo nihóshʼní.
2 Tʼah doo oodlání daahłeeh yę́ędą́ą́ʼ yóóʼadanihiʼdiitʼéeshgo edaʼalyaii doo yáłtiʼii bichʼįʼ nidahohłáá nítʼéeʼgo nihił béédahózin.
3 Éí bąą díí baa ákodanohsin doo nihóshʼní, diné łaʼda Diyin God biNíłchʼi Diyinii yee yáłtiʼgo, Jesus wódziihii nilı̨́, doo didooniił da, nidi diné łaʼda Níłchʼi Diyinii bee yájíłtiʼgo tʼéiyá, Jesus éí Bóhólníihii nilı̨́, jididooniił.
4 Níłchʼi Diyinii aidiiʼaahii tʼáá daʼníłʼąą átʼéego daʼoodlání yeidiiʼaah, nidi Níłchʼi Diyinii éí tʼááłáʼí.
5 Tʼáá daʼníłʼąą átʼéego bee Bóhólníihii bá nidajilʼaʼ, nidi Bóhólníihii éí tʼááłáʼí.
6 Áádóó tʼáá daʼníłʼąą átʼéego bee nidajilnish, nidi Diyin God tʼááłáʼíígíí tʼáá ádzíłtso tʼáá ałtsoní hwee łaʼyoolííł.
7 Tʼááłáʼí jinítínígo Níłchʼi Diyinii aidiyiiʼaahii oodlání danilíinii tʼáá ałtso bá chodayoołʼı̨́į doo biniyé haidiyiiʼaah.
8 Níłchʼi Diyinii hódzą́ągo saad bee yátiʼ łaʼ haidiyiiʼaah, náánáłaʼ éí ił ééhózingo saad bee yátiʼ haidiyiiʼaah,
9 náánáłaʼ éí oodlą́ bee aʼódlí tʼáá éí Níłchʼi Diyinii haidiyiiʼaah, náánáłaʼ éí Níłchʼi Diyinii bee hadaałtʼé ánáʼoolníiłii haidiyiiʼaah,
10 náánáłaʼ Diyin God bibee adziilii bee éédahózinii álílee kʼehgo ázhdoolíłígíí haidiyiiʼaah, náánáłaʼ Diyin God bá hojilneʼ doogo haidiyiiʼaah, náánáłaʼ éí níłchʼi danilíinii nijiłkaah bízhneelʼą́ą doogo haidiyiiʼaah, náánáłaʼ éí álílee kʼehgo saad bee yájíłtiʼ doogo haidiyiiʼaah, náánáłaʼ éí saadígíí bee ataʼ hojilneʼgo haidiyiiʼaah,
11 Níłchʼi Diyinii tʼááłáʼíígíí kótʼéego naalnish, tʼáá bí íinízinii bikʼehgo diné tʼááłáʼí jinítínígo haidiyiiʼaahii hataidiʼaʼ.
Atsʼíís tʼááłáʼí nidi bee hadilyaii tʼóó ahayóí
12 Háálá atsʼíís éí tʼááłáʼí, ákondi bee hadilyaii ląʼí bee hadilyaa; bee hadilyaii azhą́ ląʼí nidi éí tʼááłáʼí. Tʼáá ákótʼéego ałdóʼ Christ daboodláanii yił tʼááłáʼí nánídlı̨́.
13 Tʼáá áníiltso, Jew dineʼé índa doo Jew dineʼé daniidlı̨́į da nidi, naalteʼ índa doo naalteʼ daniidlı̨́į da nidi tʼááłáʼí niidlı̨́į dooleełgo Níłchʼi Diyinii tʼááłáʼíígíí bee danihiʼdoolzı̨́ı̨́ʼ, áádóó Níłchʼi Diyinii tʼááłáʼíígíí nihiih dahwiizleʼgo bee dahiniiʼná.
14 Jó, atsʼíís bee hadilyaii doo tʼááłáʼí bee hadilyaa da, nidi ląʼí bee hadilyaa.
15 Akeeʼ nilíinii, Shí doo álaʼ nishłı̨́į dago atsʼíís doo bídííníshtʼiʼ da, dííniid nidi doo atsʼíís tʼáá aʼohgo yídéétʼiʼgo ábíléeh da.
16 Ajaaʼ ałdóʼ, Shí doo anááʼ nishłı̨́į dago atsʼíís doo bídííníshtʼiʼ da, dííniid nidi doo atsʼíís tʼáá aʼohgo yídéétʼiʼgo ábíléeh da.
17 Atsʼíís éí anááʼ tʼéí nilı̨́įgoshąʼ haʼátʼíísh yee adiitsʼaʼ doo? Atsʼíís éí ajaaʼ tʼéí nilı̨́įgoshąʼ haʼátʼíísh yee ałchin doo?
18 Nidi Diyin God tʼáá bí íinízinígíí bikʼehgo atsʼíís yee hadítʼéii tʼááłáʼí níʼánígo atsʼíís yee haidiilaa.
19 Atsʼíís tʼááłáʼíígíí tʼéí bee hadilyaago éí doo atsʼíís átʼée da doo.
20 Jó, atsʼíís bee hadilyaii ląʼí nidi atsʼíís éí tʼááłáʼí.
21 Éí bąą anááʼ éí álaʼ doo kwíididooniił da, Doo chonooshʼı̨́ı̨́ʼ ánítʼée da; nááʼákóneʼ atsiitsʼiin éí akeeʼ doo kwíididooniił da, Doo chonooshʼı̨́ı̨́ʼ ánítʼée da.
22 Dooda shı̨́ı̨́, doo ákótʼée da, háálá nihitsʼíís bee hadadilyaii azhą́ doo hózhǫ́ bidziil da nidi éí tʼáá ákónéehee ádaatʼé,
23 áádóó nihitsʼíís bee hadadilyaii doo hózhǫ́ baa nitsídeiikeesígíí éí agháago nihił danilı̨́, áádóó nihitsʼíís bee hadadilyaii doo ííshjání ájóleʼ ádaatʼéii éí hazhóʼó baa ádahwiilyą́,
24 háálá nihitsʼíís bee hadadilyaii danizhónígíí tʼáadoo aláahgo baa áháyą́ągo baa nitsídeiikeesí doo. Háálá Diyin God nihitsʼíís áyiilaago yee haidiilaii tʼáá aʼohgo baa nitsáhákeesígíí tʼáá íiyisí bił nilı̨́įgo áyósin.
25 Áko nihitsʼíís bee hadadilyaii nizhónígo ahídadínéelnáa doo áádóó ahaa ádahalyą́ągo nidaalnish dooleeł.
26 Atsʼíís bee hadadilyaii łaʼ tiʼhooníihgo tʼáá ałtso yił tiʼhoonííh, doodaiiʼ łaʼ ił nilı̨́įgo tʼáá ałtso bił dahózhǫ́.
27 Jó, nihí Christ bitsʼíís nohłı̨́, áko tʼááłáʼí nootínígo yee hadítʼéii łaʼ danohłı̨́.
28 Áko Diyin God éí daʼoodlání áłah nídaadleehígíí bitahgi łaʼ niinínil, átséhé góneʼ daalʼaadii, naakií góneʼ Diyin God yá dahalneʼii, tááʼ góneʼ nidaʼnitinii, áádóó Diyin God bibee adziilii bee éédahózinii álílee kʼehgo yaa nidaakaii, índa hadaałtʼé ánídaʼoodlíiłii, áádóó áká anídaajahii, áádóó ándahaʼáii, índa álílee kʼehgo yátiʼ yee yádaałtiʼii.
29 Daʼ tʼáásh ałtso daalʼaadii danilı̨́? Daʼ tʼáásh ałtso Diyin God yá dahalneʼii danilı̨́? Daʼ tʼáásh ałtso nidaʼnitinii danilı̨́? Daʼ tʼáásh ałtso Diyin God bibee adziilii bee éédahózinii álílee kʼehgo yaa nidaakaii danilı̨́?
30 Daʼ tʼáásh ałtso hadaałtʼé ánídaʼoodlíiłgo baa dahideestʼą́? Daʼ tʼáásh ałtso álílee kʼehgo yátiʼ yee yádaałtiʼ? Daʼ éísh tʼáá ałtso ataʼ dahalneʼ? Doo lá tʼáá ałtso da ni.
31 Nidi Níłchʼi Diyinii aidiiʼaahii aláahdi ádaatʼéii bídin danohłı̨́į leʼ.
Ayóóʼóʼóʼní
Ákondi agháadi yáʼátʼééhjí honítʼiʼii bee nihił hashneʼ.
