1 Corinthians 13:1-13
13 Azhą́ dadineʼé índa diyingo nidaalʼaʼí dabizaad bee yáshtiʼ nidi, bee ayóóʼóʼóʼníinii shiiʼ ádingo tʼóó béésh łitsoii yilghaałgo índa ahídíʼniłgo hahóółʼáago diitsʼaʼígi áníshtʼé.
2 Áádóó azhą́ Diyin God bá hashneʼgo shaa deetʼą́ą nidi, áádóó naʼnitin doo bééhózin da yę́ę índa ił ééhózin tʼáá ałtso bikʼidiʼyiishtįįh nidi, índa doo naaki nilı̨́ı̨́góó sheʼoodląʼ bidziilgo bee dził hideeshnáał nidi, bee ayóóʼóʼóʼníinii shiiʼ ádingo tʼáadoo náníshdlíní da.
3 Áádóó azhą́ shee hólóonii tʼáá átʼé badahojoobáʼíígíí bitaashniih nidi, áádóó ashidiʼdoolkʼą́ąłjįʼ nináʼádinishtʼą́ą nidi, bee ayóóʼóʼóʼníinii shiiʼ ádingo tʼáadoo shá nídoodleełí da.
4 Ayóóʼóʼóʼníinii éí nízaadgóó haʼólní, áádóó joobaʼ; ayóóʼóʼóʼníinii éí doo oołchʼı̨́įd da, doo nidi ádaa haʼniih da, doo ádeidzódlíi da,
5 doo bee ádíláah da, doo tʼáá shí tʼéí nízin da, doo nidi báháchįįh da, doo nidi nichǫ́ʼígíí akʼijįʼ yisʼą́ą da;
6 doo adaaníinii doo yaa bił hózhǫ́ǫ da, nidi tʼáá aaníinii tʼéí yaa bił hózhǫ́.
7 Ayóóʼóʼóʼníinii éí tʼáá ałtsoní yééʼooʼníihgo tʼóó yił átʼé, tʼáá ałtsojįʼ oodlą́, tʼáá ałtsojįʼ bił chohooʼı̨́, tʼáá ałtsoní yichʼįʼ haʼólní.
8 Ayóóʼóʼóʼníinii éí doo nineełnéeh da; Diyin God bá haneʼii dahólǫ́ǫ nidi éí nidahidootʼih; álílee kʼehgo yátiʼ yee yádaałtiʼ nidi éí nidahidootʼih; ił ééhózin hólǫ́ǫ nidi éí doo béédahodoozįįł da.
9 Háálá tʼáá bighąądígi nihił béédahózin, áádóó Diyin God bá haneʼii tʼáá bighąądígi nihił béédahózingo baa dahwiilneʼ.
10 Nidi tʼáadoo anáhóótʼiʼí nihił béédahoozingo, tʼáá bighąądígi nihił béédahózin nítʼééʼ yę́ę bił yóóʼahodoogááł.
11 Áłchíní nishłı̨́ı̨́dą́ą́ʼ áłchínígi átʼéego yáshtiʼ nítʼééʼ, áłchínígi átʼéego akʼidiʼyiishtįįh nítʼééʼ, áłchínígi átʼéego nitséskees nítʼééʼ, nidi nininísą́ągo díí tʼáá ałtso baa dáádíníisą́.
12 Jó, kʼad éiyá biiʼ adéestʼı̨́ı̨́ʼ biiʼ doo hazhóʼó hootʼíinii biiʼ dzidéezʼı̨́ʼígi átʼéego dadíitʼı̨́ı̨́ʼ, nidi áadi índa bił daʼahiníilʼı̨́į doo. Kʼad tʼáá bighąądígi shił ééhózin, nidi áadi índa tʼáá Diyin God shééhósinígi átʼéego shił bééhodoozįįł.
13 Áko oodlą́ áádóó ił chohooʼı̨́ índa ayóóʼóʼóʼní, díí táaʼgo dahólǫ́, nidi aláahdi átʼéii éí ayóóʼóʼóʼní.
