1 Corinthians 15:1-58
15 Kʼad éí shikʼisóó, haneʼ yáʼátʼéehii bee nihił hweeshneʼii deisoohdląądígíí áádóó bee nidasoozínígíí béénihiyiishnííh.
2 Éí bee yisdáhóhkááh, haneʼ yáʼátʼéehii bee nihił hweeshneʼígíí tʼáá dayínóhtąʼ, tʼáá hazhóʼó doo tʼáá aaníí daʼiisoohdląądgóogo éí tʼáadoo nánídlíní da.
3 Háálá alą́ąjįʼ á siʼáanii, tʼáá éí shí shaa deetʼánígíí nihaa náádiníʼą́; jó, éí ádił nidaʼayeelzíiʼii yiniyé Christ daaztsą́, tʼáá Diyin God bizaad bee akʼedaʼashchíinii ánínígíí bikʼehgo,
4 áádóó yóóʼáhoʼdiilyaa, áádóó Diyin God bizaad bee akʼedaʼashchíinii ánínígíí bikʼehgo tágí jı̨́ aleeh góneʼ nááhoʼdiilzá,
5 índa Peter bichʼįʼ yitʼíní ízhʼdiilyaa, áádóó bikʼijįʼ hódahoołʼaahii naakitsʼáadahígíí ałdóʼ bichʼįʼ yitʼíní ízhʼdiilyaa.
6 Áádóó náábíkʼijįʼ hakééʼ tádadookaii ashdladi neeznádiindóó tʼah nówehgo tʼáá łahjįʼ bichʼįʼ yitʼíní ínáázhʼdiilyaa, éí kʼasdą́ą́ʼ tʼáá ałtso kʼad tʼahdii dahiná, nidi łaʼ éí bikééʼ ádahasdįįd.
7 Ákóneʼ James bichʼįʼ yitʼíní ízhʼdiilyaa, nááʼákóneʼ daalʼaadii tʼáá ałtso bichʼįʼ yitʼíní ínáázhʼdiilyaa.
8 Akéeʼdi índa, awééʼ hanoodzáhígíí nahonishłingo, shí ałdóʼ shichʼįʼ yitʼíní ízhʼdiilyaa.
9 Háálá daalʼaadii tsʼídá aʼohgo nilíinii nishłı̨́įgo bee ádaa nitséskees, yilʼaadii bee shiʼdójíii dooleełígíí doo bą́ą́h nishłı̨́į da, háálá Diyin God dayoodláanii áłah nádleehígíí atéshʼı̨́ı̨́ nítʼééʼ.
10 Kʼad áníshtʼéhígíí éí Diyin God shaa joobaʼgo áníshtʼé, áko bibee ajoobaʼ sheidiníʼánígíí doo tʼáá ádzaaí silı̨́įʼ da, háálá daalʼaadii tʼáá ałtso biláahgo nisisʼaʼ, nidi tʼáá shí éí dooda, jó, Diyin God bibee ajoobaʼ shił hólǫ́ǫgo nisisʼaʼ.
11 Áko shí áádóó náádaałaʼ daalʼaadii danilínígíí éí haneʼ tʼááłáʼíígíí baa dahwiilneʼ, áko éí bee nihił dahwiilneʼígíí deisoohdląąd.
Daneeznáanii náádiijeeh
12 Christ daaztsą́ą́dę́ę́ʼ náábiʼdiilzáago baa hóóneʼgo, haʼátʼéegoshąʼ nihitahgóó łaʼ ádaaní, Daneeznáanii doo náádidoojah da?
13 Daneeznáanii doo náádabiʼdiiljeehgóogo Christ ałdóʼ doo náábiʼdiilzáa da doo nítʼééʼ.
14 Áádóó Christ doo náábiʼdiilzáágóogo haneʼ yáʼátʼéehii tʼáadoo biniyéhígóó baa dahwiilneʼ doo nítʼééʼ, índa tʼáadoo biniyéhígóó daʼiisoohdląąd doo nítʼééʼ.
15 Áko ałdóʼ tʼáá ádzaagóó Diyin God baa dahwiilneʼgo nihéédahoozin doo nítʼééʼ, háálá Diyin God éí Christ néidiisá dadiiʼníigo dahwiilneʼ. Jó, daneeznánígíí tʼáá aaníí doo náábiʼdiiljeehgóogo, Diyin God éí Christ doo néidiisáa da doo nítʼééʼ.
16 Háálá daneeznánígíí doo náádabiʼdiiljeehgóogo Christ ałdóʼ doo náábiʼdiilzáa da doo nítʼééʼ.
17 Áádóó Christ doo náábiʼdiilzáágóogo tʼáadoo biniyéhígóó daʼiinohdlą́ągo tʼahdii ádił nidaʼiyohsíih doo nítʼééʼ.
18 Áko Christ dayoodlą́ągo adaʼiishhaazhígíí* ałdóʼ tʼáá ádaasdįįdgi ádaasdįįd doo nítʼééʼ.
19 Díí kʼad iinánígíí tʼéiyá biyiʼ Christ bee nihił chodahooʼı̨́įgo, diné tʼáá ałtso biláahdi hojoobaʼ ádaniitʼé.
20 Nidi tʼáá aaníí Christ daaztsą́ą́dę́ę́ʼ náábiʼdiilzá, daneeznáanii nááhididooljahígíí bitahdę́ę́ʼ tsʼídá áłtsé nááhodiʼdiilzá.
21 Tʼáá diné łaʼ honiinaa aniné hazlı̨́ʼígi átʼéego tʼáá diné łaʼ ałdóʼ hanahjįʼ daneeznáanii náádiijeehii hazlı̨́ı̨́ʼ.
22 Háálá Ádam binahjįʼ diné tʼáá ałtso daninéhígi átʼéego tʼáá ákótʼéego ałdóʼ Christ hanahjįʼ tʼáá ałtso hinááh ánídahodiʼdoolnííł.
23 Nidi tʼáá ałkééʼ hasnilígíí bikʼehgo Christ tsʼídá áłtsé náádiidzáii éí átsé, áadi índa tʼáá bí náánádzáá góneʼ daboodlą́ągo daabíhígíí náábidiʼdooljah.
24 Nidantʼáii áádóó dahwéeʼaahii índa bídahólníihii tʼáá ałtso Christ hakʼeh deesdlı̨́įʼgo ałtso áhásdįįdóó bikʼijįʼ bee hóhólníihgo bił hazʼáanii Diyin God éí aTaaʼ nilíinii baazhdidooʼááł, áadi índa nihodoogááł.
25 Háálá hweʼanaʼí tʼáá ałtso bikʼi jidéesʼeez áhoolaajįʼ* nazhnitʼáa doo.
26 Anaʼí akéeʼdi ádooldįįłii éí aniné.
27 Jó, Diyin God tʼáá ałtsoní Christ yikʼeh dahółʼı̨́į doo biniyé yikʼi déesʼeezgo yee yíhoosnííʼ. Nidi, Tʼáá ałtsoní yee hóhoosnííʼ, haʼníigo, tʼáá ałtsoní nínígíí éí Diyin God doo atahgo ááhyiłníi da. Diyin God yeeʼ Christ tʼáá ałtsoní yee yíhoosnííʼ.
28 Áádóó aYeʼ jílíinii tʼáá ałtsoní bee hóhoʼdoosnííʼdóó bikʼijįʼ haTaaʼ, tʼáá ałtsoní yee hóhoosníʼígíí, nátʼą́ą́ʼ bílákʼee náʼázhdooltı̨́į doo, áko tʼáá ádzíłtso índa tʼáá ałtsoní Diyin God há nilı̨́į doo.
29 Éí doo ákótʼée dago, diné daneeznánígíí bá tó bee dahoʼdilzı̨́hígíishąʼ haʼátʼíí ááhdeiłní? Daneeznáanii doo tʼáá aaníí náábiʼdiiljeehgóogo haʼátʼíí biniyé łaʼ daneeznáanii bá tó bee dahoʼdilzı̨́ı̨́h?*
30 Haʼátʼíísh biniyé ałdóʼ tʼáá ákwíí ahééʼiilkeed bikʼeh nihá nahodítʼéego neiildeeh?
31 Shikʼisóó, Christ Jesus binahjįʼ nihaa jííníshłíigo tʼáá aaníígóó ánihidishní, Tʼáá ákwíí jı̨́ shidiyoołhéełii kǫ́ǫ́ hólǫ́.
32 Éfasasgi nidaaldlooshii báádahadzidii* bił daʼaheeshgą́ʼígi yę́ęgi átʼéego diné shitsʼą́ą́jí danilíinii haneʼ yáʼátʼéehii bee bidááhdóó shidziilgo sézı̨́įgo, tʼáá aaníí daneeznáanii doo náábiʼdiiljeehgóogo haʼátʼíísh bee łaʼishłaa doo? Tʼáá aaníí daneeznáanii doo náábiʼdiiljeehgóogo kóháʼnínígíí bikʼehgo, haaʼíshąʼ daʼiidą́ áádóó daʼiidlą́ą doo, jó, yiską́ągoda dadíníiʼnéełgo daʼátʼé.
33 Tʼááká nihidaʼdódleeh yíilaʼ: doo yáʼátʼéehii bee ahéédaʼdiildahígíí iiná yáʼátʼéehii niyiiłchxǫǫh.
34 Chʼéédanohdzííd! Tʼáá ákogi ádaahnííł; tʼáadoo bąąhági ánáádaahtʼíní, háálá łaʼ Diyin God doo béédahonohsin da. Nihaa yáhóósįįdígíí biniinaa kótʼéego nihichʼįʼ yáshtiʼ.
Daʼaztsą́ą́dę́ę́ʼ atsʼíís náábiʼdiilzáii
35 Nidi diné łaʼ naʼídídóołkiłgo ádidooniił, Haa yitʼéegoshąʼ daneeznáanii náádidooljah? Haʼátʼíí atsʼíís shı̨́įshąʼ bee nináhizhdookah?
36 Diné doo hóyáanii nílíinii! Haʼátʼíhída kʼéédílyéehii bílástsiiʼ łeeh jiʼáahgo daatsaah, áádóó akʼǫ́ǫ́ʼ biyiʼdę́ę́ʼ hináanii hanisééh.
37 Kʼéédídléehii doo tʼáá áłdįįd nidaneesánígíí kʼéididléeh da, nidi tłʼoh naadą́ą́ʼ índa tʼáá haʼátʼíí shı̨́ı̨́ kʼéédílyéhígíí éí bílástsiiʼ tʼéiyá kʼéididlééh.
38 Nidi bílástsiiʼ hadahiniséehgo Diyin God tʼáá bí bił yáʼátʼéhígi átʼéego neiniseʼ, áko kʼeelyéí neiniseʼgo tʼáá daʼníłʼąą ádaatʼéego ádeiileʼ.
39 Jó, atsʼíís danilíinii tʼáá ałʼąą ádaatʼé, diné bitsʼíís tʼáá sahdii átʼé, áádóó naaldlooshii, łóóʼ, áádóó tsídii ałdóʼ bitsʼíís tʼáá sahdii ánáádaatʼé.
40 Yótʼááh hiníláii yee hadadítʼéii índa nahasdzáán yee hadadítʼéii ałdóʼ dahólǫ́, nidi yótʼááh hiníláii dahólónígíí yee ayóó ánóolninii índa nahasdzáán bikáaʼgi dahólónígíí yee ayóó ánóolninii éí doo aheełtʼée da.
41 Jı̨́honaaʼéí yee bitsʼádiʼnílíidii éí tʼáá sahdii átʼé, tłʼéhonaaʼéí bee bitsʼádiʼnídíinii éí tʼáá sahdii ánáánátʼé, índa sǫʼ bee bitsʼádaʼdeezdíinii ałdóʼ tʼáá sahdii ánáádaatʼé; jó, sǫʼ yee ayóó ádanóolninígíí tʼáá daʼníłʼąą ádaatʼé.
42 Daneeznáanii náádiijeehii ałdóʼ tʼáá ákónáánátʼé. Atsʼíís kʼeelyéigi átʼéego łeeh biʼdiltéehii éí diłdziʼ, tʼáá éí náábidiʼdoodláałii éí doo dółdzid átʼée da.
43 Hojoobaʼ átʼéego łeeh biʼdiltééh, nidi ayóó átʼéego ił nilı̨́įgo náábidiʼdoodlááł. Doo bidziilgóó łeeh biʼdiltééh, nidi bidziilii nilı̨́įgo náábidiʼdoodlááł.
44 Tsʼísee kʼehgo atsʼíís nilı̨́įgo łeeh biʼdiltééh, diyin kʼehgo atsʼíís nilı̨́įgo náábiʼdiidlááh. Tsʼísee kʼehgo atsʼíís nilíinii hólǫ́ǫgo, diyin kʼehgo atsʼíís nilíinii ałdóʼ hólǫ́.
45 Jó, Diyin God bizaad bee akʼeʼashchíinii ání, Átsé hastiin Ádam éí bílaʼashdlaʼii nilíinii ályaa; Ádam akéédę́ʼígíí éí níłchʼi, iiná eidiiʼaahii jílı̨́.
46 Áko níłchʼi kʼehgo nilínígíí éí doo átsé da, atsʼíís kʼehgo nilínígíí éí átsé, áádóó índa níłchʼi kʼehgo nilínígíí jiníyá.
47 Átsé hastiin éí łeezh bitsʼą́ą́dóó áhoʼdiilyaa, nááʼákééʼ góneʼígíí éí Bóhólníihii yáʼąąshdę́ę́ʼ jiníyá.
48 Nihokááʼ dineʼé éí tʼáá łeezh bitsʼą́ą́dóó ábiʼdiilyaaígi ádajítʼé, áádóó yáʼąąsh bííʼ dajílíinii éí tʼáá yáʼąąshdę́ę́ʼ jílínígi ádajítʼé.
49 Łeezh bitsʼą́ą́dóó áhoʼdiilyaaígi ádaniitʼéé nítʼéʼígi átʼéego yáʼąąshdę́ę́ʼ jílínígi ádaniitʼée dooleeł.
50 Áko shikʼisóó, kónihidishní: atsʼíís índa dił éí Diyin God bee bóhólníihgo bił hazʼáanii doo bił ałtsʼą́ą́ʼ adzóołkʼiiz átʼée da, índa diłdzidii éí hoolʼáágóó hólóonii doo bił ałtsʼą́ą́ʼ adzóołkʼiiz átʼée da.
51 Jóʼakon, naʼnitin doo bééhózin da yę́ę bee nihił hashneʼ. Doo tʼáá áníiltso dadíníiʼnéeł da, nidi tʼáá áníiltso łahgo ádanihidiʼdoolnííł,
52 béésh łitsoii dilní akéeʼdi ádííniidgo índa jineeskʼołígi átʼéego tsxı̨́įłgo łahgo ádanihidiʼdoolnííł. Háálá béésh łitsoii dilní ádidooniił, áádóó daneeznánígíí doo náádadínóoʼnééłgóó náádidooljah, áádóó nihí łahgo ádanihidiʼdoolnííł.
53 Háálá díí atsʼíís didoołdziłii éí doo diłdzidii nídoodleeł, áádóó díí dadootsaałii éí atsʼíís doo daatsaahii nídoodleeł.
54 Díí didoołdziłii doo diłdzidii násdlı̨́įʼgo, áádóó díí dadootsaałii doo daatsaahii násdlı̨́įʼgo, áadi índa kótʼéego Diyin God bizaad bee akʼeʼashchı̨́ haʼnínígíí bohodoolnííł:
Aniné baa honeeznáago bikʼeh hodeesdlı̨́ı̨́ʼ!
55 Aniné nílíinii, nizǫ́ǫ́zshąʼ éí háájí?Jishchááʼ nílíinii, bee nihikʼeh dídlíiniishąʼ éí háájí?
56 Bąąhági átʼéii éí aniné bizǫ́ǫ́z átʼé, áádóó bąąhági átʼéii bibee adziilii éí bee hazʼáanii átʼé.
57 Nidi haaʼíshąʼ Diyin God bichʼįʼ ahééh daniidzin doo, jó, nihiBóhólníihii Jesus Christ bee nihá akʼeh hodeesdlı̨́ı̨́ʼ!
58 Éí bąągo, shikʼisóó ayóóʼánihóshʼníinii, danołdzilgo, doo nihízhdóyííł átʼéégóó tʼáá áłahjįʼ tʼááłáhígi átʼéego Bóhólníihii bá nidaałʼaʼ, háálá doo tʼáadoo biniyéhígóó Bóhólníihii bá nidaałʼaʼ dago nihił béédahózin.
Footnotes
^ Adaʼiishhaazhígíí, nínígíí éí daneeznánígíí ááhyiłní.
^ Bikʼi jidéesʼeez áhoolaajįʼ, nínígíí éí, Há yikʼeh deesdlı̨́įʼii, níigo ání. Ps. 110:1.
^ Kórinth dineʼé éí ákódaʼałʼı̨́ı̨́ nítʼééʼ ákondi doo łaʼ bee akʼeʼashchínígi da áádóó yiniyé ádaatʼíinii doo bééhózin da.
^ Nidaaldlooshii báádahadzidii éí anaʼí báádahadzidii yił aheełtʼéego yaa yáłtiʼ.
