1 Corinthians 16:1-24
16 Kʼad Diyin God bidiyı̨́ı̨́ʼ yáál bá ahiʼnííłjí baa néiníshtʼı̨́: Galéíshiyagi daʼoodlání áłah nídaadleehii bínabiníłtą́ą́ʼ yę́ęgi átʼéego nihí ałdóʼ ákódaahtʼı̨́į doo.
2 Tʼáá Damı̨́įgo náʼádleeh bikʼeh tʼááłáʼí nootínígo yáál bee nihikʼidahojisdliʼígíí bikʼehgo łaʼ áádoosįįłgo hashtʼeʼnidoohʼááł, áko aadi níyáago doo yáál anáádahidoohnił da.
3 Áko níyáago, aa dasooláhígíí Jerúsalemgóó dazhdoojih biniyé tʼáá háiida hwee lą́ daʼsoohłı̨́ʼígíí naaltsoos bee haa hashneʼgo bił dahodeeshʼaał.
4 Áádóó tʼáá ákónéehee shí ákǫ́ǫ́ hoł deeshkah ládą́ą́ʼ, hániʼdii shił jookah doo.
Paul nahaʼá
5 Masedóniyagóó chʼíníyáago nihaa deeshááł, háálá Masedóniyagóó chʼíníshááh nisin.
6 Áko tʼáá áadi daatsʼí nihił naháshtą́ą dooleeł, nihił daatsʼí shidoohah, áko áádóó tʼáá háajigoda dah náádiishdááh ládą́ą́ʼ shíká adoohjah.
7 Háálá kʼad nihíighahgóó chʼínísháahgo, tʼóó kónígháníjįʼ daʼahiizhdooltséłígíísh biniyé haa jígháah doo nisin. Nidi Bóhólníihii shadiʼníʼą́ą́ ládą́ą́ʼ haada nízahjįʼ nihił naháshtą́ą dooleełgo shił chohooʼı̨́.
8 Nidi Péntekast wolyéhígíí bee bééhániihii bijı̨́ baa hoolzhíísh biná tʼáá kweʼé Éfesasgi sédáa dooleeł.
9 Háálá azhą́ shikʼijįʼ nidaaldzilii tʼóó ahayói nidi Bóhólníihii bá nideeshʼaałígíí idídóołniił biniyé hótsaago shá ąą ályaa.
10 Timothy aadi nihaa níyáago tʼáadoo bił yéʼí kʼé dabidohníigo ádeínóhsin doo, háálá tʼáá shí áshtʼínígi átʼéego bí ałdóʼ Bóhólníihii yá naalnish.
11 Éí bąą nihił danilı̨́įgo tʼáadoo diné łaʼ baa daadlohí doo. Nidi aadóó dah náádiidáahgo bíká adoohjahgo bił hózhǫ́ǫgo dah náádidoodááł, áko shaa nídoodááł, háálá nihikʼisóó danilíinii łaʼ bił nayíníshłí.
12 Nidi Apálas nihikʼis jílíinii, éí ałkʼisóó danilíinii łaʼ bił aadi nihaazhdookah nihóshʼníigo baa náhwiisiskan, nidi kʼad ákǫ́ǫ́ doogáłígíí tʼah doo yee hashtʼeʼnitsíkees da nisin. Nidi há ashja hoodzaago daatsʼí índa akǫ́ǫ́ jidoogááł.
Saad bee naaltsoos niiltʼiʼii
13 Hadaʼísídółʼı̨́ı̨́ʼ, áádóó naʼnitin woodláanii bee nihidziilgo nisoozı̨́, tʼáadoo dasoohtiʼí, danihidziilgo ádaʼdíínółzin.
14 Hániʼdii ádaahníłígíí tʼáá ałtso ayóóʼóʼóʼní bee baa naahkai.
15 Shikʼisóó, kʼad éiyá nánihooshkąąh, Stéfanas bighandóóígíí éí Akéya hoolyéegi tsʼídá átsé daʼoosdląądii daazlı̨́ı̨́ʼ, áko Diyin God bidiyı̨́ı̨́ʼ yindaalʼaʼ dooleełgo ádaa deideestʼą́ągo nihił béédahózin.
16 Diné ákódaatʼéhígíí áádóó tʼáá háiida naanish yee áká anájahgo yił nidaalnishígíí bidaʼołʼı̨́įgo bikééʼ dayínóhkáah dooleeł nihóshʼní.
17 Stéfanas índa Fortunéítas índa Akéyikas yíkaigo baa shił hózhǫ́, háálá nihí doo nidahisoohkai yę́ęgi éí yíkaigo bee yáʼíítʼééh,
18 háálá tʼáá aají nihikʼéédahojííłtaaʼígi átʼéego shí ałdóʼ shikʼéédahojííłtaaʼ. Diné ákódaatʼéii baa ákodanohsin.
19 Éízhagi daʼoodlání áłah nídaadleehígíí kʼé danihiłní. Ákwila áádóó Prisíla índa bighandi daʼoodlání áłah nádleehígíí Bóhólníihii binahjįʼ kʼé danihiłní.
20 Nihikʼis danilíinii tʼáá ałtso kʼé danihiłní.
Ahíláłkʼe dadołniihgo kʼé bééʼahohjih.
21 Shí Paul, kʼé nihidishnínígíí tʼáá shí shílaʼ bee akʼeʼashchí.
22 Tʼáá háiida Bóhólníihii Jesus Christ doo ayóóʼáyóʼníígóó, éí ádooldįįłgo bá haʼdoodzih. NihiBóhólníihii nánídááh.
23 NihiBóhólníihii Jesus Christ bibee ajoobaʼ nihił hólǫ́ǫ doo.
24 Christ Jesus binahjįʼ ayóóʼánihóshʼní. Tʼáá ákótʼée doo.
