1 Corinthians 2:1-16
2 Shikʼisóó, Diyin God yee naʼnitinii bee nihił hodeeshnihgo nihaa níyáádą́ą́ʼ saad naachʼąąhii índa saad bee hódzáanii doo bee yáshtiʼgo nihaa níyáa da.
2 Háálá nihitahgóó naasháago Jesus Christ áádóó tʼáá éí tsin ałnáoszid bąąhjįʼ bił oʼoolkaalígíí tʼéiyá baa yáshtiʼ doo niizı̨́ı̨́ʼ.
3 Nihitaasháádą́ą́ʼ doo shidziil da nítʼééʼ, índa shił yéeʼgo shitah hoditłid nítʼééʼ,
4 hódzą́ saad ayóó ánóolninii doo bee yáshtiʼ da nítʼééʼ, nidi Níłchʼi Diyinii binaanish áádóó bibee adziilii ííshjání áshłéehgo hashneʼ nítʼééʼ.
5 Áko Diyin God bibee adziilii bikʼehgo daʼiinohdlą́, diné bibee hódzáanii bikʼehgo éí dooda.
Diyin God biNíłchʼi Diyinii ił ííshjání áyiilaii
6 Nidi hweʼoodląʼ bee nidahizneesáanii tʼéiyá saad bee hódzáanii bee nidahonishtin. Nidi doo díí nihokáaʼgi hódzą́ągo bee hootʼáałii átʼée da; díí hoolzhishígíí biiʼ nidazhnitʼáii* nidi doo há bee hódzáanii átʼée da, háálá éí ázhdoodįįł.
7 Nidi Diyin God bibee hódzáanii doo bééhózin da yę́ę, diné bitsʼąą nanilʼin yę́ę, kʼad baa hashneʼ, éí hódzáanii Diyin God yee ayóó átʼéii bił ałtsʼą́ą́ʼ daʼniilkʼiiz doo biniyé tʼah doo hahalzhíísh yę́ędą́ą́ʼ tʼáá bí yinahazʼą́.
8 Diyin God bibee hódzáanii díí hoolzhishígíí biyiʼ naatʼáanii danilíinii doo łaʼ bił bééhózin da nítʼééʼ. Bił béédahózingo Bóhólníihii ayóó átʼéii doo tsin ałnáoszid bąąhjįʼ yił adaʼaskaal da doo nítʼééʼ.
9 Nidi Diyin God bizaad bee akʼeʼashchíinii ánínígi átʼéego:
Diné tsʼídá doo łaʼ hazhdeelʼįįhii, doo nidi baa hozdiitsʼı̨́įhii,łáʼí nidi doo baa nitsídzíkeesii, éí Diyin God ayóóʼádabóʼníinii yá hashtʼeyiilaa.
10 Nidi nihí éí Diyin God biNíłchʼi Diyinii bee nihił bééhózingo áyiilaa. Háálá Níłchʼi Diyinii tʼáá ałtsoní neiłkaah, Diyin God yinahazʼáanii doo bééhózin da yę́ę nidi bił bééhózin.
11 Háálá diné łaʼda náánáłahjįʼ diné bintsíkees doo hoł bééhózin da, diné biiʼ sizíinii tʼáá bí yee nitsíkeesígíí tʼéiyá bił bééhózin łeh. Tʼáá ákótʼéego Diyin God bintsíkees doo łaʼda hoł bééhózin da, nidi tʼáá hazhóʼó Diyin God biNíłchʼi Diyinii tʼéiyá bił bééhózin.
12 Doo daʼoodlání nitsídaakeesígi átʼéego doo nitsídeiikees da, nidi Diyin God yee nihikʼijisdliʼígíí baa ákodadíníidzįįł biniyé tʼáá bí Níłchʼi Diyinii nihainíłʼaʼ.
13 Áko nihokááʼ dineʼé bibee hódzáanii doo bee naʼniitin da, nidi Níłchʼi Diyinii yínanihiniłtinígíí bee naʼnitin, diyin kʼehgo ádaatʼéii Níłchʼi Diyinii bikʼehgo bínaʼniiltin.
14 Nidi Níłchʼi Diyinii doo hwiiʼ hólóonii éí Diyin God biNíłchʼi Diyinii yee akʼijidlíii doo hwee haleeh da. Éí tʼáá ádzaaí átʼé jinízin, áko doo hoł bééhoozı̨́ı̨́ʼ átʼée da, háálá éí Níłchʼi Diyinii kʼehgo akʼizhdiitą́ągo tʼéiyá tʼáá yíní átʼéii hoł bééhodoozįįł.
15 Níłchʼi Diyinii hwiiʼ hólóonii éí tʼáá ałtsoní hazhóʼó nijiłkaah, nidi hó tʼéí doo łaʼda hwéidoołkah da.
16 Háishąʼ Bóhólníihii bintsíkees hoł bééhózingo, nidízhnóotįįłgo bízhneelʼą́? Nidi nihí éí Christ bintsíkees bee nitsídeiikees.
Footnotes
^ Nidazhnitʼáii, nínígíí éí diné dajílíinii níłchʼi biʼiiníziinii bikʼeh dahojíłʼı̨́įgo bąą haníkááʼ góneʼ nihokááʼ bee bídahólnííh.
