1 Corinthians 5:1-13
5 Nihitahgóó naʼageh bee tsiʼnaʼaldeehgo baa dahaneʼ lá, doo daʼoodlání bitahgóó nidi doo ákódahooníił da; jó, diné łaʼ hazhéʼé beʼasdzą́ą́ hweʼasdzą́ą́ ájiilaa haʼní.
2 Ákondi éí bee niheʼádadílááh! Bąąh danihíniʼgo yáʼátʼéeh doo nítʼééʼ, jó, diné aghahojíltínígíí nihitahdóó atsʼáhodiʼdooltʼeeł.
3 Háálá shí doo aadi naasháa da nidi, hóónááł nahalingo baa nitsískees, áko diné aghahojíltíinii ájíítʼįįdígíí tʼáá íídą́ą́ʼ bee haa nísístʼįįd.
4 NihiBóhólníihii Jesus Christ bízhiʼ binahjįʼ haa nísístʼįįd. Áko áłah soolı̨́įʼgi nihitah honishłǫ́ nahalingo nihiBóhólníihii Jesus Christ bibee adziilii nihił hólǫ́ǫgo,
5 éí diné bitsʼíís bichʼįʼ nahodiyooʼnaał biniyé Séítan baa dahodidoohʼááł, áko Bóhólníihii Jesus beiníłką́ądi hwiiʼ sizíinii doodzih.
6 Bee ádaa dahohʼniihígíí éí doo beełtʼée da! Daʼ doósh nihił béédahózin da, dííkʼǫsh áłchʼı̨́ı̨́dígo taosʼniiʼ tʼáá átʼé yiniisoł?
7 Dííkʼǫsh éí bąąhági átʼéii nahalin, áko éí nahjįʼ kódaahłééh, áko taosʼniiʼ ániidíii dííkʼǫsh tʼáágédígíí nidahonohłingo bąąhági átʼéii nihitah ádin dooleeł. Háálá Christ atisʼadeesdzáago bee bééhániihgo dibé yázhí nááhániihii nihá nilı̨́įgo nááhaazniiʼ.
8 Éí bąą haaʼíshąʼ bááh dííkʼǫsh tʼáá shiidą́ąʼdii bił ályaii tʼáadoo bił anídaʼiilzįįhgo ninádahwiidlaahí, háálá dííkʼǫsh tʼáá shiidą́ąʼdiígíí éí áká naatʼá áádóó doo yáʼáshóonii yaa halneʼ, nidi dííkʼǫsh tʼáágééd bááh ályaii éí tʼáádóo nídí áádóó tʼáá aaníinii yaa halneʼ, áko éigi átʼéego ninádahwiidlaah doo.
9 Naʼageh yee tsiʼnidaakaii tʼáadoo bił ałtaołdeehí, nihidishníigo nihichʼįʼ naaltsoos íishłaa niʼ.
10 Ákondi doo daʼoodlání naʼageh yee tsiʼnaaldeehii, doodaiiʼ adádanoolníinii, doodaiiʼ tʼáá ádzaagóó nidahagizii, doodaiiʼ eʼelyaii yichʼįʼ nidahałáii doo bił ałtaołdeeh da dooleełígíí doo ááhdishníi da, háálá nihokááʼdóó hahidoohkahgo doo bohónéedzą́ą da.
11 Nidi kʼad nihichʼįʼ bee akʼeʼnáʼáshchíigo ááhdishníinii éí tʼáá háiida akʼis jílı̨́įgo oodlání bee hoʼdééjiʼii naʼageh bee tsiʼnjigháago hwééhoozinii éí tʼáadoo hoł ałtaołdeehí doo, adázhnoolníinii, doodaiiʼ eʼelyaii bichʼįʼ nahojiłáii, doodaiiʼ ajódziihii, doodaiiʼ ajidláanii, doodaiiʼ tʼáá ádzaagóó nahodzigizii ałdóʼ dooda. Ákódaatʼínígíí nidi tʼáadoo bił daʼohsání.
12 Shíshąʼ haʼátʼíí biniyé doo oodlání danilíinii beiníshtʼı̨́į dooleeł? Nihíyeeʼ oodlání danilíinii baa nídaahtʼı̨́.
13 Diyin God éí doo oodlání danilíinii yeinítʼı̨́. Áko nihitahdóó diné bąąhági ájítʼínígíí nahjįʼ háádahodoołtʼeeł.
