1 Corinthians 8:1-13
8 Kʼad éí edaʼalyaii bichʼįʼ chʼiyáán náádahaazniiʼii* beiníshtʼı̨́. Tʼáá áníiltso ił ééhózinii nihee hólǫ́ǫgo béédahoniilzin: ił ééhózinii éí bee ádaa dahojiʼniih, nidi ayóóʼóʼóʼní tʼéí bee daznéeséeh doo.
2 Diné łaʼda shił ééhózin lą́ą jinízinii hoł bééhodoozįįł yę́ę tʼah doo tʼáá yíní átʼéegi hoł bééhoozįįh dago átʼé.
3 Nidi tʼáá háiida Diyin God ayóóʼáyóʼníigo tʼáá éí Diyin God bééhósin.
4 Áko edaʼalyaii bichʼįʼ chʼiyáán náádahaazniiʼii yidą́ą́jí baa náánéiníshtʼı̨́. Edaʼalyaii éí tsʼídá tʼáadoo nilíní da, nidi Diyin God tʼéiyá tʼááłáʼí hólǫ́ǫgo nihił béédahózin.
5 Háálá diné ádeinízingo éí yáʼąąshdi, doodaiiʼ nahasdzáán bikáaʼgi diyin daolyéhígíí tʼóó adahayóí áádóó bídahólníihii dabidiʼnínígíí ałdóʼ tʼóó adahayóí dahólǫ́ danízin.
6 Nidi nihí nihił béédahózingo Diyin God tʼááłáʼí hólǫ́, éí aTaaʼ, tʼáá ałtsoní bitsʼą́ą́dóó hólóonii áádóó tʼáá éí bá dahiniiʼná. Áádóó Bóhólníihii tʼááłáʼí hólǫ́, Jesus Christ wolyéii, éí bee tʼáá ałtsoní dahólǫ́ índa tʼáá éí bee dahiniiʼná.
7 Nidi diné doo tʼáá ałtso éí bił béédahózin da. Łaʼ díí jı̨́įdi edaʼalyaii yídaneesdinígíí biniinaa eʼelyaii bichʼįʼ chʼiyáán nááhaazniiʼii átʼé tʼahdii danízingo deiyą́, áko tʼáá íídą́ą́ʼ doo álʼı̨́į da danízin nidi ádayoolíiłgo bąą tʼą́ą́ʼ anídabiiʼnííł.
8 Nidi chʼiyáán deiidánígíí éí doo Diyin God hólǫ́ǫjįʼ áhánígo yichʼįʼ kóhodoolíił da. Azhą́ chʼiyáán doo deiidą́ą da nidi, doo aʼohgo nihaa nitsíkees da, doodaiiʼ deiidą́ą nidi éí doo tʼah aláhídi ániitʼéego ánihidiʼdoolníił da.
9 Nidi biʼoodląʼ doo dabidziilii doo dadínóołtłʼahígíí bąą nihá ashjadaʼósin nidi bitsʼąą ádaa ádahołyą́.
10 Háálá ni, díí tʼáá ałtso nił bééhózingo, eʼelyaii bichʼįʼ nahadlá bá hazʼą́ą́ góneʼ ííníyą́ąʼgo diné łaʼda biʼoodląʼ tʼah doo yiłdziłígíí niiłtsą́ągo éí edaʼalyaii bichʼįʼ chʼiyáán náádahaazniiʼii yidooyı̨́įłgi bił tʼáá áko ádíílííł.
11 Áko shił ééhózin nínízinígíí bąągo nikʼis biʼoodląʼ doo bidziil daígíí Christ bá daaztsánígíí tʼą́ą́ʼ anídootłish.
12 Áko Christ bee nihikʼisóó danilíinii doo hózhǫ́ bił éédahózinígíí tʼą́ą́ʼ anídínóodahgo ádadoohłííł, áko éí bee bichʼįʼ nidaʼiyohsííh, áádóó Christ ałdóʼ bichʼįʼ nidaʼiyohsííh.
13 Áko edaʼalyaii bichʼįʼ chʼiyáán náádahaazniiʼii yishánígíí biniinaa shikʼis tʼą́ą́ʼ anáátłizhgo tsʼídá yoołkááłgóó éí chʼiyánígíí doo náádeeshdı̨́įł da, áko shikʼis doo shiniinaa tʼą́ą́ʼ anídootłish da.
Footnotes
^ Chʼiyáán edaʼalyaii bichʼįʼ nááhaazʼniiʼ áádóó bikʼijįʼ baa nidahaniih nítʼééʼ, áko daʼoodlánígíí éí chʼiyáán dajiyą́ągo eʼalyaii bichʼįʼ nidahojiłáago haa nitsáhákees nítʼééʼ.
