1 Corinthians 9:1-27
9 Daʼ doósh Jesus Christ bá yilʼaadii nishłı̨́į da? Daʼ doósh tʼáá aaníí doo shohodiitʼiʼ da? Daʼ doósh tʼáá aaníí Jesus Christ nihiBóhólníihii yiiłtsą́ą da? Daʼ doósh nihí Bóhólníihii bee shinaanish danohłı̨́į da?
2 Łaʼ shı̨́ı̨́ doo yilʼaadii nishłı̨́įgo shaa nitsídaakees da, nidi nihí éí nihichʼįʼ yilʼaadii nishłı̨́įgo shaa nitsídaahkees. Háálá yilʼaadii nishłı̨́įgo Bóhólníihii bá dahinohnánígíí bee shá bee ééhózinii danohłı̨́.
3 Shaa nídaatʼı̨́įgo hadasisidígíí bichʼįʼ bee ákʼihadideesdzihgo ádíshní,
4 Deeshı̨́łígíí índa deeshdlı̨́łígíí shaa doolyéełgo doósh bee shá hazʼą́ą da?
5 Sheʼasdzą́ą́ hólǫ́ǫgo oodlání nilı̨́įgo bił tádíshʼaash dooleełgoósh doo bee shá hazʼą́ą da, tʼáá łaʼ daalʼaadii áádóó Bóhólníihii bikʼisóó danilíinii índa Peterda éí ákódaatʼínígi átʼéego?
6 Daʼ Bárnabas índa shí naanishísh tʼéiyá bee ákʼineiildzil doo?
7 Jó, siláo nilíinii doo tʼáá bí yikʼé asłáago naabaah da. Chʼil naʼatłʼoʼii kʼéididléehii bineestʼąʼ néídı̨́įh łeh. Naʼniłkaadii naʼniłkaadgo yitsʼą́ą́dóó abeʼ yidlą́ą łeh.
8 Díí tʼáá diné ádaatʼínígíí bikʼehgo ádíshní. Daʼ bee hazʼáaniísh ałdóʼ doo tʼáá ákóníi da?
9 Bee hazʼáanii Mózes baa deetʼáanii biyiʼ bee akʼeʼashchı̨́įgo ání, Béégashii éí tłʼoh naadą́ą́ʼ haiłʼéesgo tʼáadoo bíchı̨́ı̨́h bąąh nidaʼsoołʼání. Diyin God daatsʼí béégashii tʼéiyá yaa nitsíkeesgo ádííniid?
10 Éí doodago nihaa nitsíkeesgo daatsʼí ádííniid? Aooʼ, nihá yáʼátʼééh biniyé bee akʼeʼashchı̨́. Jó, dáʼákʼehgi nihwiiłdlaadii nídíʼnóołtʼı̨́įłgo bił chohooʼı̨́įgo yinaalnish dooleeł, áádóó adoołhałii hééł íʼdoolíiłgo bił chohooʼı̨́įgo yinaalnish dooleeł.
11 Diyin God bitsʼą́ą́dóó haneʼ yáʼátʼéehii nihitahgóó baa dahwiilneʼgo nihijéí biyiʼ kʼidadiilyáago, nihí nihee dahólóonii bee nihíká anídoohjahgoósh doo bee nihá hazʼą́ą da?
12 Łaʼ bee bá nahazʼánígíí bikʼehgo bíká anáhjahgo, daʼ nihíísh doo tʼah aláhídi bee nihá hazʼą́ą da?
Tʼáá áko nidi díí kótʼéego bee nihá hazʼáanii tʼáadoo nihitsʼą́ą́ʼ chodeisiilʼįįd da, nidi Christ baa haneʼ yáʼátʼéehii doo dadíníiltłʼah da biniyé tʼáá ałtsoní tʼóó béédaʼiiʼnííh nítʼééʼ.
13 Kin biiʼ sohodizin góneʼ nidaalʼaʼii tʼáá áádóó bichʼiyąʼ nishódayoołtʼeehgo, áádóó ałdóʼ Diyin God bichʼįʼ diné yá náádaʼiiłniihii éí náádahaazniiʼii łahjįʼ bííʼ nidahaleehgo, daʼ éísh doo nihił béédahózin da?
14 Tʼáá ákótʼéego ałdóʼ haneʼ yáʼátʼéehii yaa dahalneʼii éí yaa dahalneʼígíí bitsʼą́ą́dóó adaʼdilnah doogo Bóhólníihii yee nihoníʼą́.
15 Nidi díí kótʼéego bee shá hazʼánígíí doo łaʼ choiséłʼįįd da, doo nidi shá ákódazhdoolííł biniyé bee akʼeʼashchı̨́į da. Háálá bee shaa hodzosdliʼígíí doo nahjįʼ nididootʼááłgóó biniinaa dadeestsaałjígo nidi aláahgo shił tʼáá áko.
16 Haneʼ yáʼátʼéehii baa hashneʼígíí éí binahjįʼ ádaa hashʼniih dooleełii tʼáá shá ádin, háálá tʼáá ákónéehee áshtʼı̨́. Áko haneʼ yáʼátʼéehii doo baa hashneʼgóó dooládóʼ doo hojoobaʼ ájínínígi áníshtʼée da doo!
17 Háálá díidí tʼáá shíniikʼeh baa naasháago bikʼé shichʼįʼ niʼiilyée doo. Nidi doo tʼáá shíniikʼeh baa naasháa dago, jó, haneʼ yáʼátʼéehii baa hashneʼ dooleełígíí bee shaʼahoosdlííʼ.
18 Áko haʼátʼíishąʼ bikʼé shichʼįʼ niʼiilyée doo? Díí lą́ą: haneʼ yáʼátʼéehii baa hashneʼgo tʼáá jííkʼe baa hashneʼ, áko haneʼ yáʼátʼéehii baa hashneʼígíí bikʼé shichʼįʼ azláa dooleełgo bee shá hazʼą́ą nidi tʼáá jííkʼe baa naashá.
19 Azhą́ diné doo łaʼ bá naashʼaʼ da nidi, diné ląʼí Christ deidoodląąłgo bíniʼ bá ádahashłééh biniyé tʼáá ałtso bá naashʼaʼgo íʼdiishyaa.
20 Jew dineʼé éí Christ deidoodląąłgo bíniʼ bá ádahashłééh biniyé tʼáá bígi átʼéego íʼdiishyaa; azhą́ shí bee hazʼáanii Mózes baa deetʼáanii doo yiyaa naatłizhii nishłı̨́į da nidi, éí bee hazʼáanii yiyaa nandeehígíí Christ deidoodląąłgo bíniʼ bá ádahashłééh biniyé tʼáá bígi átʼéego íʼdiishyaa.
21 Doo Jew dineʼé danilíinii éí bee hazʼánígíí doo yiyaa sinilii, Christ deidoodląąłgo bíniʼ bá ádahashłééh biniyé tʼáá bígi átʼéego íʼdiishyaa. Jó, bee hazʼáanii Mózes baa deetʼáanii shee hólǫ́, nidi Christ yee hasʼáanii tʼáá aaníí biyaa naashtłizh.
22 Biʼoodląʼ doo dabidziilígíí Christ yéego dayoodlą́ą doo biniyé bíniʼ bá ádahashłéehgo tʼáá bígi átʼéego doo shidziilgóó íʼdiishyaa. Tʼáá ałtsojįʼ tʼáá ádzíłtso tʼáá haʼátʼéhígoda łaʼ Christ yisdádahodiyoonił biniyé tʼáá hó ádajítʼéhígi átʼéego íʼdiishyaa.
23 Haneʼ yáʼátʼéehii hoł béédahodoozįįł biniyé, áádóó haneʼ yáʼátʼéehii bee akʼihojidlíii hoł ałtsʼą́ą́ʼ daʼniskʼiiz doo biniyé díí tʼáá ałtso baa naashá.
24 Daʼ doósh nihił béédahózin da, ałghadikáahii tʼáá ałtso deiltih, nidi tʼááłáʼí honiłnéehii yoosbáanii bailyééh? Áko wołí bee daołtéehgo woobįįhii deidoołbįįł.
25 Nídeiltihii tʼááłáʼí nítínígo tʼáá ałtsojįʼ ádaa áháyą́ yee nidaʼádínítaah. Éidí woobįįhii ádoodįįłii bee dahodooleeł yiniyé ádaatʼı̨́, nidi nihí woobįįhii hoolʼáágóó hólóonii biniyé ádeiitʼı̨́.
26 Áko doo tʼóó dzólníígóó yishwoł da, áádóó adziistsʼinígíí doo tʼóó dzólníígóó adziistsʼin da.
27 Nidi shitsʼíís doo shikʼeh didlı̨́į da doo biniyé tsʼídá tʼáá íiyisí shikʼeh hółʼı̨́įgo íínísin, áko diné náádaałaʼ haneʼ yáʼátʼéehii bee bił nidahosisneʼdóó bikʼijįʼ doo shidíʼnóodzįįłígíí éí dooda.
