1 John 1:1-10
1 Iiná saad jílíinii éí tʼáá hodeeyáádę́ę́ʼ hojílǫ́, éí dahosidiitsʼą́ą́ʼ índa tʼáá nihí nihinááʼ bee dahoníilʼı̨́ı̨́ʼ áádóó hódadeelniiʼ.
2 Éí iiná jílínígíí yitʼíní ízhʼdiilyaago dahoníilʼı̨́ı̨́ʼ, áko éí bee haa nidahwiilneʼ, índa iiná doo ninítʼiʼii jílı̨́įgo aTaaʼ bił hojílónígíí nihichʼįʼ ííshjání ízhʼdiilyaago hwee nihił nidahwiilneʼ.
3 Tsʼídá tʼáá aaníí Diyin God aTaaʼ áádóó biYeʼ Jesus Christ bił ahił daniidlı̨́. Nihí ałdóʼ ahidiníłnáago nihił ahił daniidlı̨́į doo biniyé dahoníilʼı̨́ʼígíí áádóó dahosidiitsʼą́ʼígíí bee nihił dahwiilneʼ.
4 Tʼáá yíní átʼéegi nihił dahózhǫ́ǫ doo biniyé nihichʼįʼ naaltsoos ádeiilnééh.
Diyin God adinídíín jílı̨́
5 Áko Diyin God biYeʼ bitsʼą́ą́dę́ę́ʼ haneʼ dasidiitsʼą́ʼígíí áádóó bee nihił dahwiilneʼígíí éí kótʼé: Diyin God adinídíín jílı̨́, áko chahałheeł tsʼídá doo bił ahízhdéétʼiʼ da.
6 Bił ahił daniidlı̨́, dadiiʼníi nidi, chahałheeł biyiʼ dayíníikáahgo danihiyoochʼííd, áádóó tʼáá aaníinii doo bikʼehgo dahiniiʼnáa da.
7 Nidi tʼáá adinídíín biyiʼ hojílónígi átʼéego adinídíín biyiʼ dayíníikáahgo, ahidiníłnáago ahił daniidlı̨́, áko haYeʼ Jesus Christ tʼáá bí bidił yee nihibąąhági átʼéii tʼáá átʼé ałtso nihąąh tánéigis.
8 Bąąhági átʼéii nihiiʼ ádin dadiiʼníigo ádindaʼiidloʼ, áko tʼáá aaníinii doo nihiiʼ dahólǫ́ǫ da.
9 Bąąhági ádeiitʼínígíí bee ádaa dahwiilneʼgo, hó haʼahódlíii índa tsʼídá tʼáá ákogi ááníiłii jílı̨́įgo nihibąąhági ádaatʼéii ałtso nihá yóóʼazhdidooʼááł, áádóó doo tʼáá ákogi ádeiitʼįįdii ałtso nihąąh táázhdoogis.
10 Doo bąąhági áshtʼı̨́į da, dadiiʼníigo Diyin God biyoochʼíidii nilı̨́įgo ádeíníilzin. Áádóó bizaadígíí nihiiʼ ádin.
