1 Kings 1:1-53
1 Nítʼééʼ aláahgo naatʼáanii David éí hajistih áádóó ląʼí honááhaigo są́ hoʼniiłhı̨́, áko hakʼínídajiłtih nidi ayóogo jidlóóh.
2 Éí bąą há nidaalʼaʼí ádahałní, Bíniʼdii bóhonishníihii aláahgo naatʼáanii chʼikę́ę́h łaʼ ná shóidootʼeeł, áko éí bíniʼ aláahgo naatʼáanii nílíinii ná naalʼaʼ doo áádóó hazhóʼó naa áhályą́ągo niyid binahjįʼ sitı̨́įgo bóhonishníihii aláahgo naatʼáanii éí bee nínáʼiidził doo.
3 Ákohgo Ízrel dineʼé bikéyah hadahwiisdzogóó tʼáá átʼéé nítʼééʼ chʼikę́ę́h ayóó ánóolninii hadazneeztą́ą́ʼ, áko Shúnem hazʼánídóó chʼikę́ę́h Ábishag wolyéego bikʼídazneeztą́ąʼgo aláahgo naatʼáanii bichʼįʼ bił dadziskai.
4 Áko chʼikę́ę́h tʼáá íiyisí nizhóní áádóó aláahgo naatʼáanii hazhóʼó yaa áhályą́ągo yá naalʼaʼ; nidi aláahgo naatʼáanii tʼáadoo hoł ałtʼááʼáazh da.
Adonáíjah tʼáá bí aláahgo naatʼááh íʼdiilyaa
5 Nítʼééʼ Hágith biyáázh Adonáíjah ayóó átʼé íʼdiilyaago ání, Shí aláahgo naatʼáanii deeshłeeł. Áádóó tsindaabąąs bijáád naakiígíí áádóó siláo éí łı̨́ı̨́ʼ yee nidaabaahii índa diné ashdladiingo éí bilą́ąjįʼ naajeeh doo biniyé ádá hashtʼeyiilaa.
6 Hazhéʼé éí, Haʼátʼíísh biniyé kwíínítʼįįd? tsʼídá tʼáadoo hodííniidgóó tʼááłáʼí nidi tʼáadoo yee hainístʼįįd da. Áko ałdóʼ tʼáá íiyisí diné bíiyisii jílı̨́; Ábsalam bikéédę́ę́ʼ hoʼdizhchı̨́.
7 Áádóó Adonáíjah éí Zerowáíyah biyáázh Jóʼab áádóó nááʼiiłniihii Abáíyathar ałdóʼ bił ahił nidahodzisneʼ, áko Adonáíjah bikééʼ nizhníʼáazhgo bíká ahizhnoolchą́ą́ʼ.
8 Nidi nááʼiiłniihii Zéídak áádóó Jiihóíyada biyeʼ Biinéíyah áádóó Diyin God yá halneʼii Néíthan áádóó Shímiyai áádóó Ríyai índa diné dahayóii David yichʼijí danilínígíí éí doo Adonáíjah yichʼijí danilı̨́į da.
9 Áádóó Adonáíjah éí Enrógel hazʼání bíighahgóó Zóhiileth tsé siʼání bíighahgi dibé áádóó béégashii índa béégashii yáázh daneeskʼahii neistseed. Dabikʼisóó tʼáá ałtso aláahgo naatʼáanii biyeʼké danilíinii índa Júdah dineʼé éí aláahgo naatʼáanii yá nidaalʼaʼí danilíinii tʼáá ałtso nidahidookah, yidííniid.
10 Nidi Diyin God yá halneʼii Néíthan áádóó Biinéíyah índa diné dahayóii áádóó bikʼis Sálaman ałdóʼ tʼáadoo yidaʼasniiʼ da.
11 Éí bąą Néíthan éí Sálaman bimá Bath-shííba yichʼįʼ haadzíiʼgo ání, Hágith biyáázh Adonáíjah aláahgo naatʼáanii silı̨́įʼgoósh baa hodisínítsʼą́ą́ʼ, áko David bídahwííníilníihii éí doo bił bééhózin da?
12 Éí bąą tʼáá kʼad, shíniʼdii nánooshkąąh, nanikʼíyáshtiʼ, áko tʼáá ni neʼiinaʼ áádóó niyáázh Sálaman beʼiinaʼ doodzih.
13 Nílááh, aláahgo naatʼáanii David bił yah anináahgo ábidiní, Bóhonishníihii aláahgo naatʼáanii nílíinii, daʼ doósh shí asdzání ná naalʼaʼí nishłı̨́įgo shichʼįʼ bee ádee hadíínídzíiʼgo áshidííníniid da? Niyáázh Sálaman shikééʼ góneʼ nináánítʼáa doo; shibikááʼdóó nahatʼáii yikááʼdóó dah sidáa doo, diníi niʼ. Ákoshąʼ haʼátʼéego Adonáíjah nantʼá?
14 Shoo, aláahgo naatʼáanii tʼah bichʼįʼ yáníłtiʼgo shí ałdóʼ nikééʼ yah adeesháałgo tʼáá aaníígóó hólneʼ nidideeshniił.
15 Áádóó Bath-shííba éí aláahgo naatʼáanii nitéhé góneʼ yah ajííyá, áko aláahgo naatʼáanii yéego haastih; Shúnem hazʼánídóó chʼikę́ę́h Ábishag éí aláahgo naatʼáanii yaa áhályą́.
16 Nítʼééʼ Bath-shííba éí aláahgo naatʼáanii yichʼįʼ yaa ádzaago neeshjoolgo bił yílįįd. Áko aláahgo naatʼáanii ání, Haʼátʼíí lá?
17 Áko ábijiní, Bóhwííníshníihii, Bóhólníihii niDiyin God binahjįʼ asdzání ná naalʼaʼí nishłíinii shichʼįʼ ádee hadíínídzíiʼgo áshidííníniid, Niyáázh Sálaman shikééʼ góneʼ nináánítʼáa doo; shibikááʼdóó nahatʼáii yikááʼdóó dah sidáa doo, diníi niʼ.
18 Jó, kʼad, Adonáíjahda aláahgo naatʼáanii nilı̨́, nidi bóhwííníshníihii aláahgo naatʼáanii nílíinii, éí doo nił bééhózin da;
19 béégashii áádóó béégashii yáázh daneeskʼahígíí índa dibé ałdóʼ tʼóó ahayóí neistseed. Áádóó aláahgo naatʼáanii dabiyeʼké tʼáá ałtso índa nááʼiiłniihii Abáíyathar áádóó siláo yinanitʼaʼí nilíinii Jóʼab ałdóʼ, Nidahidoohkah, yidííniid, nidi ná naalʼaʼí Sálaman éí tʼáadoo yiʼníłniiʼ da.
20 Áko ni bóhonishníihii aláahgo naatʼáanii nílíinii, Ízrel dineʼé tʼáá ałtso nichʼįʼ dadéezʼı̨́ı̨́ʼ, áko bóhonishníihii aláahgo naatʼáanii nílíinii, háí nikééʼdóó bikááʼdóó nahóʼáii yikááʼ dah dínóodaałígíí bee bił hodíílnih.
21 Éí doodago, bóhonishníihii aláahgo naatʼáanii dabizhéʼé yę́ę yitah iidoołhoshgo, áko shí índa shiyáázh Sálaman ałdóʼ anaʼí niidlı̨́įgo nihaa tsóhodookos.
22 Jó, tʼahdii aláahgo naatʼáanii bił ałchʼįʼ yájíłtiʼgo Diyin God yá halneʼii Néíthan ałdóʼ yah ííyá.
23 Áádóó aláahgo naatʼáanii yił dahoolneʼgo ádaaní, Shoo, Diyin God yá halneʼii Néíthan níyá. Áko aláahgo naatʼáanii bił yah ajííyáago niʼjįʼ nitsizhdeelgoʼgo jineeshjool.
24 Áko Néíthan ájíní, Bóhonishníihii aláahgo naatʼáanii nílíinii, daʼ ákoósh ádííníniid? Adonáíjah éí shikéédę́ę́ʼ nináánítʼáa doo; shibikááʼdóó nahatʼáii yikááʼdóó dah sidáa doo.
25 Háálá díí jı̨́ ákóyaa ííyá, áko béégashii áádóó béégashii yáázh daneeskʼahígíí índa dibéda tʼóó ahayóí neistseed, áko aláahgo naatʼáanii biyeʼké tʼáá ałtso áádóó siláo dah deínéehii yinanitʼaʼí danilíinii índa nááʼiiłniihii Abáíyathar ałdóʼ, Nidahidoohkah, yidííniid; jó, binááł daʼayą́ índa daʼadlą́ągo ádaaní, Adonáíjah aláahgo naatʼáanii asʼahgóó hináa leʼ.
26 Nidi shí ná naalʼaʼí nishłíinii áádóó nááʼiiłniihii Zéídak áádóó Jiihóíyada biyeʼ Biinéíyah índa ná naalʼaʼí Sálaman, Nihí ałdóʼ shaa hidoohkah, doo nihizhdííniid da.
27 Bóhonishníihii aláahgo naatʼáanii nílíinii, daʼ díísh ninahatʼaʼ bikʼehgo ádzaa, áko ná naalʼaʼí nishłíinii éí tʼáadoo bee shił hwíínílneʼ da? Háishąʼ bóhonishníihii aláahgo naatʼáanii bikééʼdóó bikááʼdóó nahatʼáii yikááʼdóó dah sidáa doo?
Sálaman éí aláahgo naatʼáanii ábiʼdiilyaa
28 Nítʼééʼ aláahgo naatʼáanii hachʼįʼ haadzíiʼgo ání, Bath-shííba shá hágo bidiní. Áko aláahgo naatʼáanii bichʼįʼ nizhníyáago bidááhdę́ę́ʼ dziizįʼ.
29 Áádóó aláahgo naatʼáanii ádee hadoodzíiʼgo ání, Tsʼídá tʼáá aaníí Bóhólníihii hiná; éí achʼįʼ nahwiiʼná bitsʼą́ąjįʼ shiiʼ sizíinii nááyiisniiʼ;
30 ákótʼéego tsʼídá tʼáá aaníí Bóhólníihii Ízrel dineʼé biDiyin God bee nichʼįʼ ádee hadisdziihgo ádíshní, Niyáázh Sálaman éí shikéédę́ę́ʼ nináánítʼáa doo, índa dah sédáhígi bikááʼdóó nahatʼáii yikááʼdóó dah sidáa doo; kótʼéego lą́ą díí jı̨́ tʼáádóo nídí hwee hadisdziih.
31 Áko Bath-shííba éí niʼjįʼ jineeshjoolgo aláahgo naatʼáanii bichʼįʼ hozdísingo ájíní, Bíniʼdii bóhonishníihii aláahgo naatʼáanii David hináago ahóyéelʼáa leʼ.
32 Áádóó aláahgo naatʼáanii David ání, Nááʼiiłniihii Zéídak áádóó Diyin God yá halneʼii Néíthan índa Jiihóíyada biyeʼ Biinéíyah shá hágo dabidohní. Áko aláahgo naatʼáanii yidááhdę́ę́ʼ niikai.
33 Áko aláahgo naatʼáanii áháłní, Bídahonołníihii bá nidaalʼaʼí bił dohkáahgo shiyeʼ Sálaman tʼáá shí shidzaanézígíí bikááʼ dah dabinoołdáago Gáíhan góyaa bił doohkah,
34 áádóó bíniʼdii nááʼiiłniihii Zéídak áádóó Diyin God yá halneʼii Néíthan éí akʼah hakʼi yeidooziłgo hodoohsįh Ízrel dineʼé aláahgo binanitʼaʼí jidooleeł, áádóó deenástsʼaaʼ bideeʼ bee íʼdílzoołí bee ádadidoohniiłgo, Sálaman aláahgo naatʼáanii asʼahgóó hináa leʼ, dadidoohniił.
35 Áadi índa bikééʼ hadoohkahgo níyáago shibikááʼdóó nahatʼáii yikááʼ dah dínóodaał, háálá hó éí shitsáskʼehdóó aláahgo naatʼáanii náájídlı̨́į doo, índa Ízrel dineʼé áádóó Júdah dineʼé binazhnitʼáa doogo áhooshłaa.
36 Áádóó Jiihóíyada biyeʼ Biinéíyah aláahgo naatʼáanii ánéidooʼniidgo ání, Tʼáá ákótʼée leʼ; bíniʼdii bóhonishníihii aláahgo naatʼáanii biDiyin God ałdóʼ ákódidooniił.
37 Bóhólníihii éí bóhonishníihii aláahgo naatʼáanii yił hólónígi átʼéego Sálaman yił hólǫ́ǫ doo, áádóó tsʼídá aláahgo ayóó átʼéego bibikááʼdóó nahatʼáii yikʼi dah sidáago nantʼáa doo; bóhonishníihii aláahgo naatʼáanii David bibikááʼdóó nahatʼáii yikááʼdóó nantʼáhígi átʼéego.
38 Kótʼéego nááʼiiłniihii Zéídak áádóó Diyin God yá halneʼii Néíthan índa Jiihóíyada biyeʼ Biinéíyah áádóó Kéreth dineʼé áádóó Pííleth dineʼé ákóyaa yíkaigo Sálaman aláahgo naatʼáanii David bidzaanééz yikʼi dah deineesdáago Gáíhanjįʼ yił daaskai.
39 Nítʼééʼ nááʼiiłniihii Zéídak éí níbaal biiʼ hodílzinii biyiʼdę́ę́ʼ adeeʼ bee akʼah nízhdiiką́ągo Sálaman akʼah yikʼi yayiiziidgo bíísı̨́ı̨́ʼ. Áádóó deenástsʼaaʼ bideeʼ bee íʼdílzoołí bee ádazhdííniidgo diné tʼáá átʼé ádaaní, Aláahgo naatʼáanii asʼahgóó hináa leʼ.
40 Áádóó diné tʼáá átʼé hakééʼ haaskai índa tsin bee íʼdílzoołí yee nidaanéego áádóó bił nidahoozhǫǫhgo ayóó átʼéego bił dahózhǫ́; wónáasii hodiitsʼaʼígíí bee niʼ neheldóóh.
41 Áádóó Adonáíjah índa baa haaskaígíí tʼáá ałtso yił kʼadę́ę ałtso daʼayą́ągo daʼdiiztsʼą́ą́ʼ. Áko Jóʼab éí deenástsʼaaʼ bideeʼ bee íʼdílzoołí yidiiztsʼą́ąʼgo ání, Haa lá hóótʼįįdgo díí kin haalʼáádóó ayóó íitsʼaʼgo hahóóʼá?
42 Áko tʼah yájíłtiʼgo, shoo, nááʼiiłniihii Abáíyathar biyeʼ Jánathan yílwod, áádóó Adonáíjah áháłní, Yah aninááh; jó, ni diné hayóii nílı̨́ índa haneʼ yáʼátʼéhígíí bił nináhídááh.
43 Áádóó Jánathan éí Adonáíjah áyidííniid, Nidagaʼ, bídahwííníilníihii aláahgo naatʼáanii David yeeʼ éí Sálaman aláahgo naatʼáanii nilı̨́įgo áyiilaa.
44 Áádóó aláahgo naatʼáanii éí nááʼiiłniihii Zéídak áádóó Diyin God yá halneʼii Néíthan índa Jiihóíyada biyeʼ Biinéíyah áádóó Kéreth dineʼé índa Pííleth dineʼé éí Sálaman wolyéii aláahgo naatʼáanii bidzaanééz yikʼi dah deineesdáago bił yíldloozh,
45 áko nááʼiiłniihii Zéídak índa Diyin God yá halneʼii Néíthan éí Sálaman aláahgo naatʼáanii nilı̨́į doo biniyé Gáíhandi akʼah yikʼi yayiiziidgo bíísı̨́ı̨́ʼ; áádę́ę́ʼ nááʼnéełgo bił nidahoozhǫǫh, éí bąą kin haalʼáagi hahóóʼá. Díí éí hahóółʼáago disínítsʼą́ą́ʼ.
46 Áádóó Sálaman ałdóʼ bee íhólníihgo bił hazʼą́ągi bikááʼdóó nahatʼáii yikááʼ dah neezdá.
47 Áádóó nááʼáłdóʼ aláahgo naatʼáanii bá nidaalʼaʼí éí bídahwííníilníihii aláahgo naatʼáanii David yikʼidazhdoodliił yiniyé yíkaigo ádaaní, Diyin God éí ni nízhiʼ biláahgo Sálaman bízhiʼ ílı̨́įgo íidoolííł, índa bikááʼdóó nahóʼáii biláahgo bí yikááʼdóó nahaʼáii ayóó átʼé íidoolííł. Áádóó aláahgo naatʼáanii bitsáskʼeh yikáaʼjįʼ yaa ádzaago sodoolzin.
48 Áádóó ałdóʼ aláahgo naatʼáanii kóní, Ízrel dineʼé biBóhólníihii Diyin God baa haʼniih leʼ, bí éí díí jı̨́ shibikááʼdóó nahatʼáii yikááʼ łaʼ dah néineesdá; tʼáá shinááʼ bee yiiłtsą́.
49 Áádóó Adonáíjah baa jiiskaígíí tʼáá ádzíłtso nídadzisdzííd, áko nízhdiijéeʼgo tʼááłáʼí jinítínígo anídajiiskai.
50 Áko Adonáíjah éí Sálaman bikʼee hoł yééʼ hazlı̨́įʼgo nízhdiiʼnaʼ áádóó dashdiiyáago bikááʼ nááʼiiniihí adeeʼ bitsʼádaazʼáhígíí łaʼ dzisił.
51 Áko Sálaman bił hóóneʼ, Shoo, Adonáíjah éí aláahgo naatʼáanii Sálaman yinásdzííd; jó, bikááʼ nááʼiiniihí adeeʼ bitsʼádaazʼáhígíí yisiłgo ání, Bíniʼdii aláahgo naatʼáanii Sálaman bá naalʼaʼí diltłish doo yee yidiyoołhééłgóó díí jı̨́ yee shichʼįʼ ádee hadidoodzih.
52 Áádóó Sálaman ání, Diné ílíinii jílı̨́įgo hatsiiʼ tʼááłáʼí nidi doo łaʼ niʼjįʼ nidoodił da, nidi doo yáʼádaashóonii bee hahoʼdeelʼı̨́įʼgo éí dazdootsaał.
53 Áko aláahgo naatʼáanii Sálaman iʼííłʼaʼgo bikááʼ nááʼiiniihí siʼánídę́ę́ʼ Adonáíjah yił haa daaskai. Áko jiníyáago aláahgo naatʼáanii Sálaman bichʼįʼ yaa ádziidzaago hoł yílįįd, áádóó Sálaman hachʼįʼ haadzíiʼgo áháłní, Nílááh, nighangóó nídídááh.
