1 Kings 10:1-29
10 Nítʼééʼ Shííbadóó asdzą́ą́ naatʼááh éí Bóhólníihii bízhiʼ bídéétʼiʼgo Sálaman chʼíhoditʼáhígíí yaa hodiiztsʼą́ąʼgo nantłʼago naʼídíkidii bee hwééhodoozįįł yiniyé níyá.
2 Áko diné ląʼí áádóó spáis wolyéhígíí áádóó óola índa tsé daʼílíinii ghą́ą́ʼaskʼidii bá deiíłjiidgo Jerúsalemjįʼ yił níná, áádóó Sálaman yaa níyáago tʼáá átʼé biyiʼdi yee nitsíkeesígíí yee yił ahił hoolneʼ.
3 Áádóó Sálaman bínabízhdééłkidígíí tʼáá átʼé yee hoł hoolneʼ, áko Sálaman doo łahgo áhádingóó tʼáá bééhózínígo hoł hoolneʼ.
4 Nítʼééʼ Shííbadóó asdzą́ą́ naatʼááh éí Sálaman bibee hódzáanii tʼáá átʼé bił bééhoozingo, áádóó kin áyiilaii ałdóʼ,
5 áádóó bikááʼ adání bikááʼdóó chʼiyáán, índa yił nidahaʼáago bá nidaalʼaʼí dah nídinibįįhígíí, áhą́dígo bá nidaalʼaʼígíí, áádóó dabiʼééʼ, índa bibee adlání yaa ádahalyáanii áádóó Bóhólníihii bikin biiʼ sohodizin bichʼįʼ hááʼádáhígíí dziiłtsą́ągo tʼóó bikʼee hoł ahayóigo tʼáadoo ájóneʼí da.
6 Aláahgo naatʼáanii ábijiní, Baa nanináhígíí índa nibee hódzáanii shikéyahdi bee naa haneʼgo diistsʼaʼ yę́ę tʼáá aaníí lá.
7 Éí haneʼígíí doo yinishdlą́ą da nítʼééʼ, nidi tʼáá shí níyáago nééłʼı̨́įʼgo índa yisisdląąd, tʼáá bighąądígi nidi tʼáadoo bee shił hóóneʼ da lá; nibee hódzáanii índa tʼáá ałtso noosánígo sínítʼįįdígíí bee naa haneʼgo disétsʼą́ʼígíí biláahdigo ádaaníí lá.
8 Diné nidááhdóó naazíinii áádóó ná nidaalʼaʼí nidááhdóó naazı̨́įgo nibee hódzáanii tʼáá áłahjįʼ dayíistsʼą́ąʼii dooládóʼ bił dahózhǫ́ǫ da.
9 Bóhólníihii niDiyin God éí naa bił hózhǫ́ǫgo Ízrel dineʼé bá bikááʼdóó nahatʼáii yikááʼdóó dah nineesdáii baa haʼniih leʼ. Bóhólníihii éí Ízrel dineʼé hoolʼáágóó ayóóʼáyóʼnínígíí biniinaa doo haa dayitʼéégóó índa tʼáá ákogi átʼéego diné bá hóóʼáał doo biniyé aláahgo naatʼáanii ániilaa.
10 Óola neeznádiindóó baʼaan naadiin tálent bíighahgo áádóó spáis wolyéhígíí tʼáá íiyisí tʼóó ahayóigo índa tsé daʼílíinii aláahgo naatʼáanii baazhnínil; díí spáis wolyéhígíí Shííbadóó asdzą́ą́ naatʼááh éí aláahgo naatʼáanii Sálaman yeinínilígíí tʼáadoo ákónéelą́ąʼgo baa náánáʼnil da.
11 Áádóó ałdóʼ Háíram bitsinaaʼeeł bee Óferdę́ę́ʼ óola áádóó tsin álmug bídáátsélígíí tʼóó ahayóí índa tsé daʼílíinii nideizyı̨́.
12 Aláahgo naatʼáanii éí Bóhólníihii bikin biiʼ sohodizin áádóó aláahgo naatʼáanii bighan bíyah daniiʼáhígíí tsin álmug bídáátsélígíí yee áyiilaa; tsin tłʼóół naakitsʼáadah bąąh daneelzheeʼgo bee nidaʼaʼnéii ałdóʼ índa tsin tłʼóół neeznáá bąąh daneelzheeʼgo bee nidaʼaʼnéii éí dahataałígíí yá áyiilaa áádóó éí tsin álmug bídáátsélígíí tʼáadoo nináánágı̨́į da, doodaiiʼ díí jı̨́įjįʼ tʼáadoo náánéiiltsą́ą da.
13 Áádóó aláahgo naatʼáanii Sálaman éí Shííbadóó asdzą́ą́ naatʼááh tʼáá hó yííkeedígíí baazhdiníʼą́ índa aláahgo naatʼáanii Sálaman yistʼįįdii bee ádaʼazįįdii bitahdóó ałdóʼ haidiníʼą́ągo hakéyahgóó há nidaalʼaʼí bił aníjookai.
Sálaman astʼįįd áádóó tʼáá átʼéé nítʼééʼ bééhoʼdílzin (2Chr. 9:13-24)
14 Tʼááłáʼí nááhaijįʼ óola éí hastą́ądi neeznádiindóó baʼaan hastą́diindóó baʼaan hastą́ą́h tálent wolyéhígíí bíighahgo Sálaman baa haasgı̨́,
15 tʼáá náábíláahgo naalyéhé baa nidahaniihígíí áádóó naalyéhé yaa ádahalyáanii, áádóó Aréíbiyadę́ę́ʼ aláahgo naatʼáanii tʼáá ałtso índa kédaayahdóó naatʼáanii danilíinii ałdóʼ óola haa dayiiyeeh.
16 Aláahgo naatʼáanii Sálaman éí naakidi neeznádiin naagé óola tʼáá bízhání yee ádayiilaa; naagé tʼááłáʼí níʼą́ bikʼehgo óola hastą́ądi neeznádiin shékel wolyéhígíí bíighahgo bee ádaalyaa.
17 Índa táadi neeznádiingo naagé óola tʼáá bízhání yee ádayiilaa; tʼááłáʼí níʼą́ bikʼehgo óola mína wolyéii bitisgo dah hidiidlohgo ádayiilaa, áko aláahgo naatʼáanii éí Lébanandi tsintahdę́ę́ʼ daatsinígíí bee kin ályaa wolyéii biyiʼ góneʼ niinínil.
18 Nááʼáłdóʼ aláahgo naatʼáanii yikááʼdóó nantʼáii ayóó ánóolningo áívori* wolyéii yee áyiilaa, áádóó éí óola tʼáá íiyisí yáʼátʼéhígíí yikʼíístiʼ.
19 Bikááʼdóó nahatʼáii éí hastą́ągo dah náhástʼą́ągo ałkʼi hooʼnilí bichʼįʼ haazʼá áádóó bineʼdę́ęʼgo bikáaʼjigo názhahgo deezʼá índa bikʼi dah asdáhí ałtsʼą́ą́hjí níʼáhígíí hólǫ́, éí ałtsʼą́ą́hjí bíighahgi náshdóítsoh bitsiijįʼ daditłʼooígíí bééʼályaago sizı̨́.
20 Náshdóítsoh bitsiijįʼ daditłʼooígíí naakitsʼáadahgo éí naaki nínilgo ałkʼi hooʼnilí ałtsʼą́ą́hjí yikááʼ dah naazı̨́; náánáłaʼ bee óhólníihii bił nahazʼą́ą́góó doo łaʼ ákótʼéego ánáánályaa da.
21 Aláahgo naatʼáanii Sálaman bibee daʼadlánígíí tʼáá átʼé óola bee ádaalyaa, índa Lébanandi tsintahdę́ę́ʼ daatsinígíí bee kin ályaa wolyéii biiʼdóó ásaaʼígíí tʼáá ałtso éí óola tʼáá bízhání bee ádaalyaa. Béésh łigaii éí doo bee łaʼ ályaa da, háálá éí Sálaman bíyoołkááł yę́ędą́ą́ʼ doo daʼílı̨́į da.
22 Háálá aláahgo naatʼáanii bá Társhish kin haalʼáádóó tsinaaʼeeł nahalinígíí éí Háíram bitsinaaʼeeł yił táłkááʼ nidaʼałʼeełgo tááʼ nínáhah bikʼeh óola áádóó béésh łigaii áádóó áívori wolyéii áádóó mągítsoh índa tsídii bitseeʼ naashchʼąąʼígíí pííkak wolyéii Társhishdę́ę́ʼ tsinaaʼeeł nahalinígíí yee ninádayiigééh.
23 Kótʼéego lá aláahgo naatʼáanii Sálaman éí nihokááʼgóó aláahgo naatʼáanii danilíinii tʼáá ałtso yiláahgo jitʼíinii índa bee hódzáanii yistʼįįd.
24 Nihokááʼ dineʼé tʼáá átʼé Sálaman éí Diyin God bee hódzáanii biih yiyííláhígíí bá dideestsʼı̨́ı̨́ł danízin nítʼééʼ.
25 Áko tʼááłáʼí nináháhááh bikʼeh diné tʼááłáʼí nítínígo aa deidooléełii nidayiijááh nítʼééʼ: éí ásaaʼ béésh łigaii bee ádaalyaii áádóó óola bee ádaalyaii áádóó ééʼ ádaatʼéii áádóó naagé índa spáis daolyéhígíí, łı̨́įʼda índa dzaanéezda aa dajiinííł nítʼééʼ.
Sálaman éí łı̨́ı̨́ʼ áádóó tsindaabąąs bijáád naakiígíí yiyoołnih (2Chr. 1:14-17; 9:25-28)
26 Sálaman éí tsindaabąąs bijáád naakiígíí áádóó łı̨́ı̨́ʼ yee nidaabaahii áłah áyiilaa; éí tʼááłáhídi mííldóó baʼaan dı̨́įdi neeznádiin tsindaabąąs bijáád naakiígíí índa naakitsʼáadahdi mííl łı̨́ı̨́ʼ yee nidaabaahii, díí éí bá hashtʼedahodítʼéego kin hadaasʼáágóó niyiiznil áádóó Jerúsalemgi aláahgo naatʼáanii ałdóʼ łaʼ bá niiʼnil.
27 Áádóó aláahgo naatʼáanii éí tsé yílʼáhígíigi átʼéego Jerúsalemgi béésh łigaii bee ádaʼazįįdgo áádóó honítsʼaaʼgi síkamor naazkaadii yílʼáhígíigi átʼéego dilkʼis bee ádaʼazįįdgo áyiilaa.
28 Áko Sálaman éí łı̨́ı̨́ʼ baa neelkaadígíí éí Ííjip kéyahdę́ę́ʼ áádóó Kwéi hoolyéédę́ę́ʼ shóoztʼeʼ; aláahgo naatʼáanii bá nidaʼiiłniihígíí Kwéi hoolyéédę́ę́ʼ łı̨́ı̨́ʼ nideiniiłkaadígíí tʼáá bą́ą́h daʼílínígíí bíighahgo nídayiisniiʼ.*
29 Áko Ííjipdę́ę́ʼ tsinaabąąs bijáád naakiígíí nidahaazniiʼígíí éí tʼááłáʼí níʼánígo hastą́ądi neeznádiin béésh łigaii shékel wolyéii bą́ą́h nidaʼiizlı̨́ı̨́ʼ áádóó łı̨́ı̨́ʼ ałdóʼ tʼááłáʼí nítínígo tʼááłáhídi neeznádiindóó baʼaan ashdladiin bą́ą́h nidaʼiizlı̨́ı̨́ʼ; kótʼéego Het dineʼé aláahgo binanitʼaʼí danilíinii índa Síriya kéyahdóó aláahgo naatʼáanii danilíinii tʼáá ałtso yichʼįʼ nináádayiisniiʼ.
Footnotes
^ Áívori (ivory) jiníigo chı̨́ı̨́h yee adilohii biwózhahí jiníigo óolyé.
^ Kwéi éí Ízrel kéyahdóó náhookǫsjígo kéyah biiʼ hazʼánígi áhoolyé. Kwéi éí naʼatʼą́hí łigaii ditsʼidígíí doo ááhyiłníi da. Deut. 17:16.
