1 Kings 13:1-34
13 Nítʼééʼ shoo, Júdah dineʼé bitahdóó Diyin God yá halneʼii éí Bóhólníihii yee haadzíʼígíí bikʼehgo Bétheljįʼ níyá, áádóó Jerobówam éí łikání halchingo dilidii nááhizhdoołnih biniyé bikááʼ nááʼiiniihí bíighahgi dzizı̨́.
2 Áko bikááʼ nááʼiiniihí éí Bóhólníihii yee haadzíʼígíí bee yéego yikʼijįʼ haadzíiʼgo ání, Bikááʼ nááʼiiniihí, nááʼiiniihí nílíinii, Bóhólníihii kóníłní, Jó, David baʼáłchíní náás ahoolchíiłii bitahdóó awééʼ doochííł; éí Josáíyah bee yídóojiił; éí náádaʼiiłniihii ninádahałaah doo biniyé wódahgo nahazʼą́ągo ádayiilaaígíí nikááʼdóó tsin bijeeh dilidgo łikání halchinii náádayiiłniihígíí nikááʼdóó nááhodiyoołnih áádóó nikáaʼgi diné bitsʼin didoodlił.
3 Áádóó tʼáá éí bijı̨́ bee ééhózinii hachʼįʼ áyiilaa kóníigo, Díí éí bee ééhózinii Bóhólníihii yee haadzíʼígíí átʼé, Jó, bikááʼ nááʼiiniihí ahádooltǫǫłgo bikáaʼgi łeeshchʼiih éí hadadoozhosh.
4 Nítʼééʼ aláahgo naatʼáanii Jerobówam éí Diyin God yá halneʼii Béthelgi bikááʼ nááʼiiniihí yikʼijįʼ haadzíiʼgo yidiiztsʼą́ąʼgo bikááʼ nááʼiiniihí bíighahdóó kʼízhdeeshchidgo ájíní, Daosxił. Áádóó hálaʼ bee bikʼijįʼ kʼízhdeeshchidígíí ahaniníyáago sigan, áko doo tʼą́ą́ʼ anízhdólnííh átʼée da silı̨́ı̨́ʼ.
5 Diyin God yá halneʼii éí Bóhólníihii yee haadzíiʼgo bee ééhózinii áyiilaaígíí bikʼehgo bikááʼ nááʼiiniihí ałdóʼ ahááltǫʼgo łeeshchʼiih hadáázhoozh.
6 Nítʼééʼ aláahgo naatʼáanii éí Diyin God yá halneʼii yichʼįʼ haadzíiʼgo ání, Bóhólníihii niDiyin God kʼad néinikąąhgo shá sodílzin, áko shílaʼ yáʼátʼééh nídoodleeł. Áádóó Diyin God yá halneʼii éí Bóhólníihii náyooskango aláahgo naatʼáanii bílaʼ hadaałtʼé bá ánályaago tʼáá átʼé yę́ęgi átʼé násdlı̨́ı̨́ʼ.
7 Aláahgo naatʼáanii éí Diyin God yá halneʼii ííłní, Tįʼ, shighangóó nídiitʼashgo háádíílyįh áádóó bikʼé nichʼįʼ nidoolyéełii naa deeshłééł.
8 Áádóó Diyin God yá halneʼii éí aláahgo naatʼáanii ííłní, Nighan ałnííʼdóó shaa dííníʼą́ą nidi doo ákǫ́ǫ́ nił deeshʼash da, doo nidi ákwii bááh deeshı̨́įł da, tó nidi doo deeshdlı̨́įł da,
9 háálá Bóhólníihii kótʼéego yee haadzíiʼgo áshidííniid, Bááh doo dííyı̨́įł da, tó ałdóʼ doo díídlı̨́įł da, áádóó yíníyá yę́ędę́ę́ʼ doo tʼáá ákóneʼ tʼą́ą́ʼ nídíídáał da.
10 Áko náánáłahjigo anídzoodzá; Bétheljįʼ jiníyá yę́ędę́ę́ʼ doo tʼáá ákóneʼ tʼą́ą́ʼ nídzídzáa da.
11 Nítʼééʼ Béthelgi Diyin God yá halneʼii haastih léiʼ kééhatʼı̨́ı̨́ lá; éí biyeʼké baa yíkaigo tʼáá éí bijı̨́ Béthelgi Diyin God yá halneʼii yaa naayáhígíí áádóó aláahgo naatʼáanii yichʼįʼ hahaasdzíʼígíí ałdóʼ bizhéʼé yee yił dahoolneʼ.
12 Áádóó bizhéʼé ábíłní, Háajigoshąʼ ííyá? Háálá hayeʼké éí Júdahdę́ę́ʼ Diyin God yá halneʼii níyáhígíí ííyáajigoígíí hadayíísid.
13 Áádóó hayeʼké ábijiní, Télii shá bikʼi dah asohnííł. Áko há yikʼi dah daʼaznilgo hoł dah diildloozhgo
14 Diyin God yá halneʼii bikééʼ dashdiiyáago chéchʼilyaagi sidáago bikʼízhníyá, áko ábizhdííniid, Daʼ niísh Diyin God yá halneʼii Júdahdę́ę́ʼ níyáhígíí ánítʼı̨́? Áko ání, Éí áshtʼı̨́.
15 Nítʼééʼ ánáábizhdooʼniid, Tįʼ, shighangóó nídiitʼashgo bááh dííyı̨́ı̨́ł.
16 Áádóó ájíní, Tʼą́ą́ʼgóó nił nídeeshtʼash doo shá bohónéedzą́ą da, índa doo nidi nił yah adeeshʼash da; kweʼé nahósʼaʼgi doo nidi adiidı̨́įł da, áádóó tó nidi doo diidlı̨́įł da,
17 háálá Bóhólníihii shichʼįʼ haadzíiʼgo ání, Áadi bááh doo dííyı̨́įł da índa tó doo díídlı̨́įł da, áádóó yíníyá yę́ędę́ę́ʼ doo tʼáá ákóneʼ tʼą́ą́ʼ nídíídáał da.
18 Áko áhodííniid, Shí lá ałdóʼ tʼáá nigi átʼéego Diyin God yá halneʼii nishłı̨́ ni; Bóhólníihii haadzíiʼgo diyingo naalʼaʼí shił hoolneʼgo ání, Bááh yidooyı̨́ı̨́ł áádóó tó yidoodlı̨́ı̨́ł biniyé nighandi bił nídíítʼash. Nidi éí honííʼaaʼ.
19 Áko bighangóó tʼą́ą́ʼ bił níjítʼáazhgo bighandi bááh jííyą́ą́ʼ áádóó tó joodlą́ą́ʼ.
20 Nítʼééʼ bikááʼ adání bichʼįʼ dzizkéego Diyin God yá halneʼii hoł nátʼázhígíí éí Bóhólníihii bichʼįʼ haadzííʼ,
21 áádóó Júdahdę́ę́ʼ Diyin God yá halneʼii yichʼįʼ yéego haadzíiʼgo ání, Bóhólníihii kóní, Bóhólníihii ándííniidígíí doo bikʼeh hwííníłʼįįd dago biniinaa Bóhólníihii niDiyin God bikʼehgo ádííníiłgo yee nichʼįʼ haadzíʼígíí tʼáadoo biʼiinilaa dago,
22 nidi Bóhólníihii nichʼįʼ haadzíiʼgo, Kweʼé bááh doo dííyı̨́įł da índa tó doo díídlı̨́įł da, nidííniid yę́ę tʼą́ą́ʼ néínídzáago bááh áádóó tó bił yíníyą́ą́ʼ; éí biniinaa nizhéʼé danilíinii yę́ę bitséníʼootséél góneʼ nitsʼíís doo yóóʼádoolníił da.
23 Nítʼééʼ bááh jííyą́ąʼgo áádóó tó joodlą́ą́ʼdóó bikʼijįʼ Diyin God yá halneʼii tʼą́ą́ʼ bił níjítʼázhígíí bá télii bikʼi dah adziznil.
24 Áádóó dah nídiidzáago náshdóítsoh bitsiijįʼ ditłʼooígíí bidááh níyáago biisxı̨́, áko hatsʼíís atiingóó sitı̨́įgo télii bíighahgóó sizı̨́; náshdóítsoh bitsiijįʼ ditłʼooígíí ałdóʼ atsʼíís yíighahgóó sizı̨́.
25 Diné łaʼ yíighahgóó hidikáahgo, shoo, atsʼíís atiingóó sitı̨́įgo áádóó náshdóítsoh bitsiijįʼ ditłʼooígíí atsʼíís yíighahgóó sizı̨́įgo dayiiłtsą́, áko kin haalʼáadi Diyin God yá halneʼii haastihígíí kééhatʼı̨́įdi yíkaigo yaa dahoolneʼ.
26 Áko nítʼééʼ Diyin God yá halneʼii nátʼą́ą́ʼ hoł nátʼázhígíí yiyííniiʼgo ání, Diyin God yá halneʼii yę́ę Bóhólníihii doo yikʼeh hóółʼįįdígíí átʼı̨́; éí bąą Bóhólníihii tʼáá hachʼįʼ yee haadzíʼígíí bikʼehgo Bóhólníihii éí náshdóítsoh bitsiijįʼ ditłʼooígíí yaa hodiníʼą́ągo nahwiizhnizhgo hwiisxı̨́.
27 Áádóó biyeʼké yichʼįʼ haadzíiʼgo ání, Télii shá bikʼi dah asohnííł. Áko há yikʼi dah daʼaznil.
28 Nítʼééʼ ákǫ́ǫ́ jiníyáago atiingóó atsʼíís sitı̨́įgo áádóó télii índa náshdóítsoh bitsiijįʼ ditłʼooígíí bíighahgóó sizı̨́įgo baazhníyá, áko náshdóítsoh bitsiijįʼ ditłʼooígíí atsʼíís tʼah doo yiyą́ą da lá, télii nidi doo niyiizhnizh da lá.
29 Diyin God yá halneʼii éí Diyin God yá halneʼii yę́ę bitsʼíís néidiiłtı̨́įgo télii yikááʼ dah yistı̨́įgo yee nátʼą́ą́ʼ néiníłtı̨́, áádóó Diyin God yá halneʼii haastihígíí éí haa doocha áádóó yóóʼahodoolííł biniyé kin haalʼáajįʼ nádzá.
30 Áko tʼáá hó hatséníʼootséél góneʼ bitsʼíís yóóʼájiilaago haa dajichago ádajiní, Aháláaneʼ, shikʼis!
31 Áko yóóʼájiilaadóó bikʼijįʼ hayeʼké bichʼįʼ hadzoodzíiʼgo ájíní, Dasétsą́ągo díí Diyin God yá halneʼii tséníʼootséél góneʼ yóóʼályaaígi bitsʼin bíighahgóó shitsʼin yóóʼádadoohłííł,
32 háálá Bóhólníihii yee haadzíʼígíí éí Béthelgi bikááʼ nááʼiiniihí áádóó Samériya kéyahgi kin hadaasʼáágóó ninádahałaah doo biniyé wódah nahazʼą́ągo ádayiilaaígi kin naaznilii yikʼijįʼ haadzíiʼii tʼáá aaníí bohodoolnííł.
33 Ákódahóótʼįįdóó bikʼijįʼ Jerobówam doo yáʼáshǫ́ǫ́góó ááníłígíí doo yitsʼą́ąjįʼ kónéeh da, nidi diné bitahdóó éí ninádahałaah doo biniyé wódah nahazʼą́ągo ádayiilaadi bá náádaʼiiłniihii ánááyooʼnil; tʼáá háiida nááʼiiłniihii nishłı̨́į doo danízinígíí atsʼábiʼdiltééh áádóó ninádahałaah doo biniyé wódah nahazʼą́ągo ádayiilaadi náádaʼiiłniihii atah yileeh.
34 Áko díí Jerobówam baʼáłchíní náás ahoolchíłígíí nihokááʼdóó áhodiʼdooldįįłgo áádóó nahjįʼ kóhodiʼdoolnííł biniyé hakʼijįʼ ádił oodzííʼ silı̨́ı̨́ʼ.
