1 Kings 14:1-31
14 Íídą́ą́ʼ Jerobówam biyeʼ Abáíjah bitah honiigai.
2 Áádóó Jerobówam beʼasdzą́ą́ ííłní, Nídiidááh, nánooshkąąh, Jerobówam beʼasdzą́ą́ nílínígíí, doo bee nééhoʼdílzin da dooleeł biniyé łahgo átʼéego íʼdílnééh, áádóó Sháílohgóó dínááh; Diyin God yá halneʼii Aháíjah éí díí dineʼé aláahgo binanitʼaʼí deeshłeełgo yee shił hoolneʼígíí áadi naaghá.
3 Áko bááh neeznáago áádóó bááh dáʼákaʼí łikanii índa tsésʼná bitłʼizh éí tózis biiʼgo bichʼįʼ díjááh, áko nihiyázhí haitʼée dooleełígíí yee nił hodoolnih.
4 Nítʼééʼ Jerobówam beʼasdzą́ą́ ákódzaago nídiiʼnaʼgo Sháílohgóó ííyá, áádóó Aháíjah bighandi jiníyá. Nidi Aháíjah doo ooʼı̨́į da, háálá haastihgo doo ooʼı̨́į da.
5 Íídą́ą́ʼ Bóhólníihii éí Aháíjah ííłní, Jerobówam beʼasdzą́ą́ biyáázh yá tʼáadoo leʼé níídóokił biniyé aadę́ę́ʼ yigááł, háálá biyáázh daatsaah; éí kótʼéego bichʼįʼ hadíídzih, háálá éí yah ííyáago asdzání náánáłaʼ íʼdílʼı̨́į doo.
6 Nítʼééʼ ákódzaago chʼéʼétiindę́ę́ʼ yah ajííyáago Aháíjah hakédil yidiiztsʼą́ą́ʼ, áko ání, Yah aninááh, Jerobówam beʼasdzą́ą́ nílíinii, haʼátʼíí biniyé asdzání náánáłaʼ íʼdílʼı̨́? Jó, haneʼ doo yáʼátʼéehii bił nichʼįʼ shiʼdoolʼaad.
7 Nílááh, Jerobówam bił hólneʼ, Bóhólníihii Ízrel dineʼé biDiyin God kóní, Ízrel shidineʼé bitahdóó ayóó ánítʼéego ániishłaago binanitʼaʼí nílı̨́,
8 áádóó David baʼáłchíní náás ahoolchíiłii bee óhólníihii bighadinishtʼą́ągo naa diníʼą́, nidi shá naalʼaʼí David yę́ę shibikʼeh óʼooʼníiłii yikʼeh hółʼı̨́ı̨́ nítʼééʼ áádóó bijéí tʼáá átʼé yee shikééʼ yigááł nítʼééʼ, índa tʼáá ákwii ádaatʼéii shinááł áyoolííł nítʼééʼ, nidi ni éí tʼáadoo ákwíinidzaa da,
9 nidi tʼáá ałtso nilą́ąjįʼ deíkai yę́ę biláahgo doo yáʼáshǫ́ǫ́góó íínítʼįįd, háálá diyin dabidiʼníinii índa óola doolyı̨́įʼgo beʼelyaii ádeinilaago bee shá hwííníłchįįd áádóó adinínáajigo ashiyíníłhan;
10 éí biniinaa Jerobówam baʼáłchíní náás ahoolchíiłii doo yáʼáshóonii bikʼijįʼ ádeeshłííł, áádóó Jerobówam bitsʼą́ą́dóó dadinéhígíí tʼáá ałtso éí naalteʼ danilíinii índa doo naalteʼ danilíinii ádeeshdįįł áádóó Jerobówam baʼáłchíní náás ahoolchíiłii daadziihígíí diné łaʼ tsʼiilzéí ałtso ádįįhjįʼ yóóʼayiiyéhígi átʼéego yóóʼahodeeshxééł.
11 Tʼáá háiida kin haalʼáagi Jerobówam bitsʼą́ą́dóó dajílíinii dazneeznánígíí éí łééchąąʼí dahodoolghał, áádóó tʼáá háiida níléí tłʼóoʼdi daneeznánígíí éí tsídii nidaatʼaʼii dahodooyı̨́ı̨́ł, jó, Bóhólníihii éí yee haadzííʼ.
12 Éí bąą nídiidáahgo nighangóó nídídááh, áádóó kin haalʼáá góneʼ anéínídzáago niyáázh dadootsaał.
13 Áádóó Ízrel dineʼé tʼáá ałtso yaa yínííł danilı̨́įgo yóóʼádeidoolííł, áko Jerobówam bitsʼą́ą́dóó hazlı̨́įʼii tʼáá bí tʼéiyá yóóʼádoolnííł, háálá Jerobówam baʼáłchíní bitahdóó tʼáá bí tʼéiyá Bóhólníihii éí Ízrel dineʼé biDiyin God bichʼįʼ yáʼátʼéehii biiʼ hólǫ́ǫgo bééhoozin.
14 Nááʼáłdóʼ Bóhólníihii éí Ízrel dineʼé bá aláahgo naatʼáanii łaʼ ádá náánéidiyoosįįł; éí díí jı̨́ Jerobówam baʼáłchíní náás ahoolchíiłii íidoołdįįł. Ákótʼée nidi haʼátʼéegosh ałdóʼ dooleeł?
15 Áádóó kʼad kodóó Bóhólníihii éí lókʼaaʼ tó bighádígi átʼéego Ízrel dineʼé atíhodeeshłííł, índa díí kéyah yáʼáhootʼéehii dabizhéʼé yę́ę yeidiníʼánígíí bitsʼą́ą́dóó Ízrel dineʼé hahodeeshjihgo tooh nílínígíí bilááhgóó tahodínéeshkał, háálá asdzání beʼelyaii ádá ádajiilaaígíí bee Bóhólníihii bá dahojííłchįįd.
16 Áko Jerobówam hó ádił niʼjiisíʼígíí bee Ízrel dineʼé ádił niʼiidzííh biih jíínilgo biniinaa Ízrel dineʼé yóóʼiididooʼááł.
17 Áádóó Jerobówam beʼasdzą́ą́ nídiiʼnaʼgo dah nídiidzáago Térzah kin haalʼáajįʼ nádzá; nítʼééʼ chʼéʼétiinjįʼ nizhníyáago hayáázh daaztsą́.
18 Áko Bóhólníihii bá naalʼaʼí Diyin God yá halneʼii nilíinii Aháíjah binahjįʼ Bóhólníihii haadzíʼígíí bikʼehgo yóóʼádayiilaago Ízrel dineʼé tʼáá ałtso yaa yínííł naaskai.
19 Áko łahjįʼ Jerobówam yaa naayáhígíí, éí naazbaaʼii índa honíʼánígíí éí Ízrel dineʼé aláahgo yinanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
20 Jerobówam nantʼáago naadiin naaki nááhai, áko dahazhéʼé yę́ę adaʼiishxaazhígi átʼéego iʼjííłhaazhgo hayeʼ Néídab hatsáskʼehgi aláahgo naatʼáanii náánásdlı̨́ı̨́ʼ.
Riihobówam nantʼáá nítʼééʼ (2Chr. 12:1-16)
21 Íídą́ą́ʼ Sálaman biyeʼ Riihobówam éí Júdah dineʼé yinantʼá. Riihobówam éí dízdiindóó baʼaan tʼááłáʼí binááhaigo hodeezʼą́ áádóó Ízrel dineʼé tʼáá ałtso bitahdóó Jerúsalem kin haalʼáhígíí éí Bóhólníihii náhodiiʼánígíí bízhiʼ bee wójíi dooleełígi tsostsʼidtsʼáadah nááhaijįʼ nantʼáá nítʼééʼ. Bimá éí Áman dineʼé łaʼ nilı̨́įgo Néíyamah wolyéé nítʼééʼ.
22 Áádóó Bóhólníihii binááł Júdah dineʼé doo yáʼáshóonii baa nidziskaigo dahazhéʼé yaa naaskai yę́ę tʼáá átʼé biláahdi ádił nidaʼjiisíʼígíí bee Bóhólníihii haa łeʼniizı̨́įʼgo bá dahojííłchįįd.
23 Háálá dah daaskʼidgóó tʼáá átʼé áádóó tsin dootłʼizh naazkaadii tʼáá átʼé dabiyaagóó índa ninádahałaah doo biniyé wódah nahazʼą́ągo ádayiilaaígíí áádóó edaʼalyaii índa asdzání beʼelyaii ádá ádayiilaa.
24 Áádóó ákweʼé kéyahgi diné ahaa ninádaaldeehígíí ałdóʼ hólǫ́; éí Bóhólníihii Ízrel dineʼé bitsʼą́ąjigo ałʼąą dineʼé chʼíininíłkaadígíí doo daaldinii yaa naaskai yę́ę tʼáá átʼé yikʼehgo yaa naakai nítʼééʼ.
25 Nítʼééʼ aláahgo naatʼáanii Riihobówam ashdlaʼ náhááh binih Ííjip dineʼé aláahgo binanitʼaʼí Sháíshak éí Jerúsalem yikʼijįʼ nídiibaaʼ.
26 Bóhólníihii bikin biiʼ sohodizindóó índa aláahgo naatʼáanii bighandóó yódí ałtso ayííyı̨́, áko Sálaman éí naagé óola yee ádayiilaaígíí tʼáá átʼé éí Sháíshak ayííyı̨́.
27 Áádóó aláahgo naatʼáanii Riihobówam éí naagé yę́ę bitsáskʼeh góneʼ béésh łitsoii bee naagé ádayiilaago siláo alą́ąjįʼ binanitʼaʼí éí aláahgo naatʼáanii bighan chʼéʼédą́ąʼgi yaa ádahalyánígíí bílákʼe jíínil.
28 Bóhólníihii bikin biiʼ sohodizin góneʼ aláahgo naatʼáanii éí tʼáá yah anádááh bikʼeh aa ádahalyánígíí naagé nínádeidiiʼnił áádóó bighan góneʼ ninádeiʼnił.
29 Áko Riihobówam yaa naayáhígíí tʼáá átʼé índa íídą́ą́ʼ ádahóótʼįįdii éí Júdah dineʼé aláahgo yinanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
30 Áko Riihobówam áádóó Jerobówam bíyoołkááłdą́ą́ʼ tʼáá áłahjįʼ yił anaaʼ hółǫ́ǫ́ nítʼééʼ.
31 Riihobówam éí dabizhéʼé yę́ę yił adaʼiishxaazhgo David yę́ę bikin haalʼáagi dahazhéʼé yę́ę bitahgi yóóʼáhoʼdiilyaa. Hamá éí Áman dineʼé łaʼ nilı̨́įgo Néíyamah wolyé. Áko hayeʼ Abáíjam hatsáskʼehgi aláahgo naatʼáanii náánásdlı̨́ı̨́ʼ.
