1 Kings 15:1-34
15 Áko nítʼééʼ Nííbat biyeʼ Jerobówam aláahgo naatʼáanii nilı̨́įgo tseebíítsʼáadah náhááh binih Abáíjam éí Júdah dineʼé yinanitʼaʼí silı̨́ı̨́ʼ.
2 Tááʼ nááhaijįʼ Jerúsalemgi aláahgo naatʼáanii nilı̨́ı̨́ nítʼééʼ. Bimá Méíyakah wolyéii éí Abíshalam bitsiʼ nilı̨́ı̨́ nítʼééʼ.
3 Áádóó hazhéʼé yę́ę halą́ąjįʼ yee niʼiisííʼ yę́ę tʼáá átʼé bee haʼátʼeʼgo joogááł nítʼééʼ, áko hazhéʼé David yę́ę bijéí yee Bóhólníihii biDiyin God yił tʼáá ákwii átʼé yę́ęgi átʼéego doo joogáał da nítʼééʼ.
4 Azhą́ ákótʼée nidi hayeʼ hakééʼ góneʼ dah yidínóołdaał áádóó Jerúsalem niłdzilgo íidoolííł biniyé David binahjįʼ Bóhólníihii haDiyin God Jerúsalemgi bee adinídíin dooleełii haidiníʼą́,
5 háálá David yę́ę bíiníłką́ą́dę́ę́ʼ Bóhólníihii binááł tʼáá ákogi ájoonííł nítʼééʼ índa yee hachʼįʼ haadzíʼígíí tʼáadoo bitsʼą́ąjigo ádziidzaa da; tʼáá hazhóʼó Het diné łaʼ Yuráíyah bee ádił adzisiih yę́ę tʼéiyá.
6 Áko Abáíjam bíyoołkááłdą́ą́ʼ Riihobówam áádóó Jerobówam tʼáá áłahjįʼ yił anaaʼ hółǫ́ǫ́ nítʼééʼ.
7 Áko Abáíjam yaa naayáhígíí tʼáá átʼé índa íídą́ą́ʼ ádahóótʼįįdígíí éí Júdah dineʼé aláahgo yinanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo. Íídą́ą́ʼ Abáíjam áádóó Jerobówam yił anaaʼ hółǫ́ǫ́ nítʼééʼ.
8 Áádóó Abáíjam éí dabizhéʼé yę́ę adaʼiishxaazhígi átʼéego iʼjííłhaazhgo David yę́ę bikin haalʼáagi yóóʼáhoʼdiilyaa, áko hayeʼ Éísa hatsáskʼehgi aláahgo naatʼáanii náánásdlı̨́ı̨́ʼ.
Éísa nantʼáá nítʼééʼ (2Chr. 14:1-5; 15:16-19)
9 Jerobówam éí Ízrel dineʼé yinantʼáago naadiin náhááh binih Éísa éí Júdah dineʼé yinanitʼaʼí silı̨́ı̨́ʼ.
10 Áádóó dízdiindóó baʼaan tʼááłáʼí nááhaijįʼ Jerúsalemgi aláahgo naatʼáanii nilı̨́ı̨́ nítʼééʼ. Bimá éí Méíyakah wolyéii éí Abíshalam bitsiʼ nilı̨́ı̨́ nítʼééʼ.
11 Bóhólníihii binááł Éísa éí hazhéʼé David yę́ę tʼáá ákogi átʼéego hináá nítʼééʼ yę́ęgi átʼéego jiináá nítʼééʼ.
12 Diné ahaa ninádaaldeehígíí kéyahdóó nahjįʼ hazhnííłkaadgo hazhéʼé éí edaʼalyaii ádayiilaa yę́ę tʼáá átʼé nahjįʼ kójiilaa.
13 Nááʼáłdóʼ hamá Méíyakah asdzą́ą́ naatʼááh nilı̨́įgo éí nidi nahjįʼ hayííłtʼeʼ, háálá asdzání beʼelyaii doo daaldinii áyiilaa, áko éí asdzání beʼelyaii áyiilaaígíí hatsʼą́ą́ʼ Éísa niyiishchǫʼgo Kídran tó nílínígi yidííłid.
14 Nidi ninádahałaah doo biniyé wódah nahazʼą́ągo ádaalyaaígíí éí tʼáadoo nahjįʼ kódaalyaa da; azhą́ ákótʼée nidi Éísa éí Bóhólníihii yichʼįʼ bijéí tʼáá ákogi átʼéego bíiníłką́.
15 Áádóó hazhéʼé yę́ę diyingo neidiyiizʼánígíí índa tʼáá bí ałdóʼ diyingo neidiyiizʼánígíí éí béésh łigaii áádóó óola índa ákóneʼ chodaoʼíinii Bóhólníihii bikin biiʼ sohodizin góneʼ yah ayiizhjaaʼ.
Éísa éí Ben-héídad yił ahaʼdeetʼą́ (2Chr. 16:1-14)
16 Áko Éísa áádóó Ízrel dineʼé aláahgo binanitʼaʼí Béíyasha bíyoołkááłdą́ą́ʼ tʼáá áłahjįʼ yił anaaʼ hółǫ́ǫ́ nítʼééʼ.
17 Áádóó Ízrel dineʼé aláahgo binanitʼaʼí Béíyasha éí Júdah dineʼé yikʼijįʼ nídiibaaʼgo Júdah dineʼé aláahgo binanitʼaʼí Éísa bichʼįʼ doo ałnáʼáhátʼı̨́į da doo biniyé Réímah kin haalʼá áyiilaa.
18 Nítʼééʼ Éísa éí Bóhólníihii bikin góneʼ áádóó aláahgo naatʼáanii bikin góneʼ yódí bá hazʼánígi béésh łigaii áádóó óola niiʼnilígíí ałtso néidiinilgo bá nidaalʼaʼí yílákʼee yíínil, áko aláahgo naatʼáanii Éísa éí Síriya dineʼé aláahgo binanitʼaʼí Hííziyan binálí Tabríman biyeʼ Ben-héídad wolyéii éí Damáskasgi kééhatʼínígíí bichʼįʼ yił ayiisʼaʼgo ání,
19 Shizhéʼé yę́ę áádóó nizhéʼé yę́ę ałhaʼdeetʼą́; nihitaʼgi ałdóʼ tʼáá ákótʼée doo; jó, béésh łigaii áádóó óola aa doolyéełii nichʼįʼ áshłaa; hágoshı̨́ı̨́ Ízrel dineʼé aláahgo binanitʼaʼí Béíyasha shitsʼádoogááł biniyé bił ałhaʼdíínítʼánígíí yóóʼadíʼaah.
20 Aláahgo naatʼáanii Éísa ádííniidígíí Ben-héídad yiʼiilaago siláo dah deínéehii bindanitʼaʼí éí Ízrel bikin hadaasʼáágóó Áíjan áádóó Dan áádóó Éíbel-beth-méíyakah índa Kínerath dahoolyéégóó tʼáá átʼé áádóó Náftalai dineʼé bikéyah tʼáá átʼé yichʼįʼ ayiisʼaʼgo yikʼeh dadeesdlı̨́ı̨́ʼ.
21 Áko nítʼééʼ Béíyasha éidí yaa hodiiztsʼą́ąʼgo Réímah kin haalʼá ánéídléhígíí yikʼi deeyáago Térzah kin haalʼáagi kééhatʼı̨́ı̨́ nítʼééʼ.
22 Áko aláahgo naatʼáanii Éísa éí Júdah dineʼé tʼáadoo łaʼ doodaií tʼáá átʼé bichʼįʼ hadzoodzíiʼgo hágo dabizhdííniid, áádóó kin haalʼá Réímahdóó tsé índa tsin éí Béíyasha yee hałbįʼ nítʼéʼígíí yitsʼą́ą́ʼ adayiizyı̨́įgo éí yee aláahgo naatʼáanii Éísa éí Bénjamin dineʼé bikéyahdi Gííba áádóó Mízpah kin haalʼáago áyiilaa.
23 Áko łahjįʼ Éísa yaa naayáhígíí tʼáá átʼé áádóó ayóó ádaatʼéego yaa naayáhígíí índa kin hadaasʼáago ádayiilaa yę́ę Júdah dineʼé aláahgo yinanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo. Azhą́ ákótʼée nidi haastih silı̨́įʼgo bikeeʼ naałniih bee bąąh dahooʼaʼ.
24 Áádóó Éísa éí dabizhéʼé yę́ę adaʼiishxaazhígi átʼéego iʼjííłhaazhgo hazhéʼé David yę́ę bikin haalʼáagi dahazhéʼé yę́ę bitahgi yóóʼáhoʼdiilyaa, áádóó hayeʼ Jiiháshafat hatsáskʼehgi aláahgo naatʼáanii náánásdlı̨́ı̨́ʼ.
Néídab nantʼáá nítʼééʼ
25 Íídą́ą́ʼ Éísa éí Júdah dineʼé aláahgo yinanitʼaʼí nilı̨́įgo naaki náhááh binih Jerobówam biyeʼ Néídab éí Ízrel dineʼé aláahgo yinanitʼaʼí silı̨́ı̨́ʼ áádóó Ízrel dineʼé binazhnitʼáago naaki nááhai.
26 Áko Bóhólníihii binááł doo yáʼáshónígi ájíítʼįįd; hazhéʼé ádił niʼiisíhígíí bee Ízrel dineʼé ałdóʼ ádił nidaʼiisíihgo áyiilaii jideeskááʼ
27 Áádóó Ísakar dineʼé ahoolchíiłii łaʼ Aháíjah biyeʼ Béíyasha éí Néídab yihodeezʼą́ągo Gíbiithan éí Filístiya dineʼé bikin haalʼáagi yiyiisxı̨́, háálá Néídab áádóó Ízrel dineʼé tʼáá átʼé Gíbiithan yizénáshzhiizh.
28 Éísa éí Júdah dineʼé aláahgo yinanitʼaʼí nilı̨́įgo tááʼ náhááh góneʼ Béíyasha éí Néídab yiyiisxı̨́įgo yitsáskʼeh góneʼ nináánítʼáá nítʼééʼ.
29 Nítʼééʼ Béíyasha nantʼáago Jerobówam baʼáłchíní ahoolchíiłii tʼáá átʼé ałtso neistseed; Bóhólníihii kóníigo bá naalʼaʼí Sháíloh kin haalʼáádóó diné Aháíjah wolyéii yee yichʼįʼ haadzíʼígíí bikʼehgo Jerobówam yitsʼą́ą́dóó danilíinii nabiʼdiztseedjįʼ doo łaʼ chʼééyáa da,
30 háálá Jerobówam ádił niʼiisíihgo yee niʼiisííʼ yę́ę bee Ízrel dineʼé nidaʼiisíihgo ájiilaa; éí biniinaa Bóhólníihii Ízrel biDiyin God bá hojííłchįįd.
31 Áko Néídab yaa naayáhígíí tʼáá átʼé índa íídą́ą́ʼ ádahóótʼįįdígíí éí Ízrel dineʼé aláahgo yinanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
32 Nítʼééʼ Éísa áádóó Ízrel dineʼé aláahgo binanitʼaʼí Béíyasha bíyoołkááłdą́ą́ʼ tʼáá áłahjįʼ yił anaaʼ hółǫ́ǫ́ nítʼééʼ.
Béíyasha nantʼáá nítʼééʼ
33 Áádóó Éísa éí Júdah dineʼé aláahgo yinanitʼaʼí nilı̨́įgo tááʼ náhááh binih Aháíjah biyeʼ Béíyasha éí Térzah kin haalʼáagi Ízrel dineʼé tʼáá átʼé binazhnitʼáago naadiin dı̨́ı̨́ʼ nááhai.
34 Áko Bóhólníihii binááł doo yáʼáshónígi ájíítʼįįd; Jerobówam ádił niʼiisíhígíí bee Ízrel dineʼé ałdóʼ ádił nidaʼiisíihgo áyiilaii jideeskááʼ.
