1 Kings 16:1-34
16 Nítʼééʼ Hanéínai biyeʼ Jííhu éí Bóhólníihii bichʼįʼ haadzíiʼgo Béíyasha yikʼijįʼ nilı̨́įgo kóní,
2 Łeeshtahdóó nándiiłtı̨́įgo shidineʼé Ízrel binanitʼaʼí nílı̨́įgo ániishłaago áádóó Jerobówam yaa naayáhígíí dah díníłkáaʼgo shidineʼé Ízrel niʼiidzííh biih yínínilgo ádił nidaʼiisííh bee shá hwííníłchįįdígíí biniinaa,
3 jó, Béíyasha baʼáłchíní náás ahoolchíiłii índa dabikʼéí náás ahoolchíiłii nahjįʼ ádeeshłíiłgo Nííbat biyeʼ Jerobówam baʼáłchíní náás ahoolchíiłii áshłaa yę́ęgi átʼéego naʼáłchíní náás ahoolchíiłii ałdóʼ ákódeeshłííł.
4 Tʼáá háiida kin haalʼáagi Béíyasha bitsʼą́ą́dóó dajílíinii dazneeznánígíí éí łééchąąʼí dahodoolghał áádóó tʼáá háiida níléí tłʼóoʼdi dazneeznánígíí éí tsídii nidaatʼaʼii dahodooyı̨́ı̨́ł.
5 Áko łahjįʼ Béíyasha yaa naayáhígíí áádóó ayóó átʼéego yaa naayáhígíí éí Ízrel dineʼé aláahgo yinanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
6 Ákohgo Béíyasha éí dabizhéʼé yę́ę adaʼiishxaazhígi átʼéego iʼjííłhaazhgo Térzahgi yóóʼáhoʼdiilyaa, áádóó hayeʼ Íílah hatsáskʼehgi aláahgo naatʼáanii náánásdlı̨́ı̨́ʼ.
7 Áádóó ałdóʼ Hanéínai biyeʼ Jííhu éí Diyin God yá halneʼii binahjįʼ Bóhólníihii éí Béíyasha áádóó baʼáłchíní ahoolchíiłii yikʼijįʼ nilı̨́įgo haadzííʼ, háálá Bóhólníihii binááł doo yáʼáshónígi ájíítʼįįdígíí bee Bóhólníihii bá hojííłchįįd; éí Jerobówam baʼáłchíní náás ahoolchíiłii ádáátʼįįdígi átʼéego ádziidzaa índa Néídab jiisxı̨́.
Íílah nantʼáá nítʼééʼ
8 Éísa éí Júdah dineʼé aláahgo yinanitʼaʼí nilı̨́įgo naadiin hastą́ą́h náhááh binih Béíyasha biyeʼ Íílah éí Térzah kin haalʼáagi Ízrel dineʼé yinantʼáago naaki nááhai.
9 Nítʼééʼ Térzahgi nijigháago haghan há yaa áhályáanii Árza bighan góneʼ ajidlą́ągo hoł honiidoigo há naalʼaʼí Zímrai hatsindaabąąs bijáád naakiígíí ałnííʼdóó ánéelą́ąʼgo yinanitʼaʼí nilíinii hakʼijįʼ hodeezʼą́.
10 Áko Zímrai ákóneʼ yah ííyáago hoł dzideesxaalgo hwiisxı̨́; Éísa éí Júdah dineʼé aláahgo yinanitʼaʼí nilı̨́įgo naadiin tsostsʼid náhááh binih Zímrai hatsáskʼehgi aláahgo naatʼáanii náánásdlı̨́ı̨́ʼ.
11 Áko nantʼá silı̨́įʼgo tʼáá áko bikááʼdóó nahatʼáii yikááʼ dah neezdáago Béíyasha baʼáłchíní ałtso neistseed; diné tʼáá ałtso tʼáá ashiikéjįʼ dahakʼéígíí índa dahakʼisóó doo łaʼ chʼééyáa da.
12 Kótʼéego Diyin God yá halneʼii Jííhu binahjįʼ Bóhólníihii éí Béíyasha yikʼijįʼ saad yee haadzíʼígíí bikʼehgo Zímrai éí Béíyasha baʼáłchíní ałtso íísdįįd,
13 háálá Béíyasha índa biyeʼ Íílah ádił niʼiidzííh tʼáá átʼé yee niʼiisíʼígíí áádóó edaʼalyaii daahóhígíí bee Ízrel dineʼé nidaʼiisíihgo ádajiilaaígíí bee Bóhólníihii Ízrel biDiyin God bá dahojííłchįįd.
14 Áko Íílah yaa naayáhígíí tʼáá átʼé índa íídą́ą́ʼ ádahóótʼįįdígíí éí Ízrel dineʼé aláahgo yinanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
Zímrai nantʼáá nítʼééʼ
15 Éísa éí Júdah dineʼé aláahgo yinanitʼaʼí nilı̨́įgo naadiin tsostsʼid náhááh binih Térzahgi Zímrai nantʼáago tsostsʼid yiską́. Áko bidineʼé éí Gíbiithan kin haalʼá Filístiya dineʼé bíhígíí yikʼijįʼ nidahaazná.
16 Nítʼééʼ Zímrai éí aláahgo naatʼáanii yinahazʼą́ągo áádóó yiyiisxı̨́įgo ałdóʼ diné nidahaaznánígíí dayííniiʼ; éí bąą tʼáá éí bijı̨́ nidaʼiiznánígi Ízrel dineʼé tʼáá ałtso siláo dah deínéehii yinanitʼaʼí nilíinii Ámrii éí Ízrel binanitʼaʼí nilı̨́įgo ádayiilaa.
17 Áádóó Ámrii índa Ízrel dineʼé tʼáá ałtso yił Gíbiithandę́ę́ʼ Térzah kin haalʼá góde haaskaigo áádóó yizéénáshzhiizhgo anadayííłʼįįd.
18 Nítʼééʼ Zímrai éí kin haalʼá yisnáago yaa ákoniizı̨́įʼgo aláahgo naatʼáanii bighan náwóneʼé níléí ałníiʼdi hazʼání góneʼ yah ajííyáago ádíkʼijįʼ bohozhdíínilgo dadziztsą́,
19 háálá Bóhólníihii binááł doo yáʼáshóonii baa nijigháago éí bee bąąhági átʼéii bee niʼjiisíihgo Jerobówam jideeskáaʼgo áádóó yee niʼiisíihgo yaa naayáhígíí éí Ízrel dineʼé ádił nidaʼiisíihgo ájiilaa.
20 Áko łahjįʼ Zímrai yaa naayáhígíí áádóó Íílah yikʼijįʼ nilı̨́įgo nahazʼánígíí éí Ízrel dineʼé aláahgo yinanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
Ámrii nantʼáá nítʼééʼ
21 Áko nítʼééʼ Ízrel dineʼé ałtsʼáákai: ałnííʼdóó dineʼé éí Gínath biyeʼ Tíbnai aláahgo naatʼáanii ádeidoolííł biniyé yikééʼ dah diikai; łahjįʼ ałnííʼdóóígíí éí Ámrii yikééʼ dah diikai.
22 Nidi dineʼé Ámrii yikééʼ dah diikaígíí éí Gínath biyeʼ Tíbnai yikééʼ dah diikaígíí yikʼeh dadeesdlı̨́ı̨́ʼ, áko Tíbnai daaztsą́, áádóó Ámrii éí aláahgo naatʼáanii náánásdlı̨́ı̨́ʼ.
23 Éísa éí Júdah dineʼé aláahgo yinanitʼaʼí nilı̨́įgo tádiindóó baʼaan tʼááłáʼí náhááh binih Ámrii éí Ízrel dineʼé aláahgo yinanitʼaʼí náánásdlı̨́ı̨́ʼ áádóó nantʼáago naakitsʼáadah nááhai; Térzah kin haalʼáagi nantʼáago hastą́ą́h nááhai.
24 Áádóó Samériya dah yiskʼidígíí éí béésh łigaii tálent wolyéhígíí naakigo yee Shíímer wolyéii yaa nayiisniiʼgo bighą́ąʼgi kin haalʼá áyiilaa, áko kin haalʼáago áyiilaaígíí bee wójíi dooígíí éí dah yiskʼid Shíímer wolyéii bí nítʼéʼígíí Samériya yee yiyíízhiʼ.
25 Nidi Ámrii éí Bóhólníihii binááł doo yáʼáshóonii baa nijiyá, áádóó halą́ąjįʼ naatʼáanii danilı̨́ı̨́ nítʼéʼígíí éí tʼáá ałtso dabiláhígo ájíítʼįįd.
26 Háálá Nííbat biyeʼ Jerobówam jideeskáaʼgo niʼiisíʼígíí áádóó éí bee Ízrel dineʼé ádił nidaʼiisíihgo ádayiilaa; éí edaʼalyaii daahóhígíí bee Bóhólníihii Ízrel dineʼé biDiyin God yádahóółchįįd.
27 Kʼad łahjįʼ Ámrii yaa naayáhígíí índa yee ayóó átʼéii ííshją́ą́ áyiilaii éí Ízrel dineʼé aláahgo yinanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
28 Áko Ámrii éí dabizhéʼé yę́ę adaʼiishxaazhígi átʼéego iʼjííłhaazhgo Samériyagi yóóʼáhoʼdiilyaa, áádóó hayeʼ Éíhab hatsáskʼehgi aláahgo naatʼáanii náánásdlı̨́ı̨́ʼ.
Éíhab nantʼáá nítʼééʼ
29 Éísa éí Júdah dineʼé aláahgo yinanitʼaʼí nilı̨́įgo tádiindóó baʼaan tseebíí náhááh binih Ámrii biyeʼ Éíhab éí Ízrel dineʼé aláahgo yinanitʼaʼí náánásdlı̨́ı̨́ʼ, áko Ámrii biyeʼ Éíhab Samériyagi Ízrel dineʼé yinantʼáago naadiin naaki nááhai.
30 Áádóó Bóhólníihii binááł Ámrii biyeʼ Éíhab doo yáʼáshóonii baa nijiyá, halą́ąjįʼ naatʼáanii danilı̨́ı̨́ nítʼéʼígíí éí tʼáá ałtso dabiláhígo ájíítʼįįd.
31 Áko nítʼééʼ Nííbat biyeʼ Jerobówam yee ádił niʼiisíʼígíí tʼįįhdígo átʼé nahalingo jideeskáaʼgo Sáídan dineʼé aláahgo binanitʼaʼí Ethbéíyal bitsiʼ Jézebel hweʼasdzą́ą́ ájiilaago Béíyal bá chojooʼı̨́įgo bichʼįʼ nahojiłá.
32 Índa Béíyal bikin Samériyadi ájiilaaígíí biyiʼ góneʼ bikááʼ nááʼiiniihí Béíyal bá ájiilaa.
33 Áádóó Éíhab éí asdzání beʼelyaii áyiilaago halą́ąjįʼ Ízrel dineʼé aláahgo yinanitʼaʼí danilı̨́ı̨́ nítʼéʼígíí tʼáá ałtso tʼah biláhídi átʼéego Éíhab yaa naayáhígíí yee Bóhólníihii Ízrel biDiyin God yáhóółchįįd.
34 Hóyoołkááł yę́ędą́ą́ʼ Bétheldóó diné Háíyel wolyéii Jériko kin haalʼá áyiilaa: Bóhólníihii bizaad Nan biyeʼ Jáshowa yee haadzíʼígíí bikʼehgo Jériko kin bitłʼááh nástłʼin ííléehgo biyeʼ átsé bá yizhchínígíí Abáíram daaztsą́ índa bidáńʼdaditı̨́hígíí áyiilaago biyeʼ akéédę́ʼígíí Síígab daaztsą́.
