1 Kings 17:1-24
17 Nítʼééʼ Gíliyad kéyahgi kéédahatʼíinii łaʼ Tíshbeh diné nilı̨́įgo Iiláíjah éí Éíhab ííłní, Bóhólníihii Ízrel biDiyin God bidááhdóó sézínígíí tsʼídá tʼáá aaníí hiná; ákótʼéego tsʼídá tʼáá aaníí díí deíhááh góneʼ dahtooʼ doo náhádleeh da doo índa doo nahałtin da doo, nidi ádíshnínígíí bikʼehgo tʼéiyá.
2 Áko Bóhólníihii hachʼįʼ haadzíiʼgo ání,
3 Dah diináahgo Jórdan tooh nílínígíí haʼaʼaahjígo Kíírith tó nílínígíí bíighahgi nídidíítʼı̨́ı̨́ł.
4 Ííshją́ą́ kótʼée doo, éí tó nílínígíí nidlą́ą doo, áádóó gáagii éí ákweʼé nadaʼałtsoʼ doogo bee bichʼįʼ haasdzííʼ.
5 Áko Bóhólníihii hachʼįʼ yee haadzíʼígíí bikʼehgo dashdiiyá, áko dashdiiyáago Jórdan toohdóó haʼaʼaahjigo Kíírith tó nílínígíí bíighahgi dzizdáá nítʼééʼ.
6 Áádóó gáagii éí abínígo bááh áádóó atsįʼ haa nídeiłtsah, índa eʼeʼáahgo bááh áádóó atsįʼ haa nídeiłtsah, áko éí tó nílínígíí níjídlı̨́ı̨́h.
7 Nítʼééʼ wónáásdóó éí tó nílı̨́ nítʼééʼ yę́ęgi náhooltsaii, háálá éí kéyahgi doo nahałtin da.
Iiláíjah áádóó Zárefathdóó asdzání bąąh áhásdįįdii
8 Áádóó Bóhólníihii hachʼįʼ haadzíiʼgo ání,
9 Nídiidáahgo Sáídan bikin haalʼá Zárefath hoolyéejįʼ dínááh; ákweʼé kééhótʼı̨́į doo; jó, ákwii asdzání bąąh áhásdįįdii léiʼ naa áhályą́ą doogo bee bichʼįʼ haasdzííʼ.
10 Áko nízhdiiʼnaʼgo Zárefathgóó dashdiiyá. Nítʼééʼ kin haalʼá bidáńʼdítı̨́įhgi jiníyáago; jó, ákweʼé asdzání bąąh áhásdįįdii léiʼ chizh náyiilááh, áádóó bichʼįʼ ázhdííniidgo ábijiní, Nánooshkąąh, ásaaʼ bee tó áłchʼı̨́ı̨́dígo shá nídiikaahgo deeshdlı̨́ı̨́ł.
11 Áádóó yíká dah diilwodgo bikééʼ ázhdííniidgo ábijiní, Nánooshkąąh, łeesʼáán áłtsʼíísígo ałdóʼ łaʼ shá nídííʼááł.
12 Nítʼééʼ ání, Tsʼídá tʼáá aaníí Bóhólníihii niDiyin God hiná; ákótʼéego tsʼídá tʼáá aaníí łeesʼáán shee ádin, nidi akʼáán yílá bee haajaaʼ bíighahgo tʼéiyá tóshjeeh yázhí biiʼ, akʼah ałdóʼ áłchʼı̨́ı̨́dí tóshjeeh yázhí biiʼ; jó, chizh naakigo náháshłááh, áko yah adeesháałgo łeesʼáán ádeeshłííł; shiyáázh áádóó shí éí diidı̨́įłgo áádóó díníiʼnééł.
13 Áko Iiláíjah áhodííniid, Tʼáadoo nił yéʼí; nílááh, tʼáá ádííníniidígi ánínééh, nidi shí áłtsé łeesʼáán áłtsʼíísígo shá ádíílíiłgo shaa dííʼááł, áko índa niyáázh bił átsą́ ádiʼdoołnííł.
14 Háálá Bóhólníihii Ízrel biDiyin God kóní, Bóhólníihii éí nihokááʼgóó nahałtingo ánáyiidlaajįʼ tóshjeeh yázhí biiʼ akʼáán doo ádoodįįł da, tóshjeeh yázhí biiʼ akʼah nidi doo ádoodįįł da.
15 Áádóó dashdiiyáago Iiláíjah tʼáá ádííniidígíí bikʼehgo ádziidzaa, áko hó áádóó Iiláíjah índa haghangi nídaʼjidı̨́įhgo ląʼí yiską́.
16 Áko Bóhólníihii éí Iiláíjah yichʼįʼ yee haadzíʼígíí bikʼehgo tóshjeeh yázhí biiʼ akʼáán tʼáadoo ásdįįd da, akʼah nidi tʼáadoo biʼoh silı̨́įʼ da.
17 Nítʼééʼ kódahóótʼįįdóó asdzání bighangi biyáázh bitah honiigai, áko bitah honiigaígíí yéego ádzaago doo nídídzih da silı̨́ı̨́ʼ.
18 Áko Iiláíjah ábijiní, Diyin God bitsʼą́ą́dóó diné nílíinii, haashąʼ nideeshłííł? Daʼ tʼóósh ádił niʼiiyésííʼ yę́ę béédeeshnihgo índa shiyáázh diyííłhéełgo biniyé shéíníyá?
19 Áko Iiláíjah áháłní, Niyáázh shaa níłteeh. Áádóó ádíjóltąʼdóó néidiiłtı̨́įgo wódahdi jinitéhí góde hadzistı̨́įgo hatsáskʼeh bikááʼ nizhníłtı̨́.
20 Áádóó Bóhólníihii bichʼįʼ ázhdííniidgo ájíní, Bóhólníihii shiDiyin God nílíinii, daʼ asdzání bąąh áhásdįįdii baa ałkʼee sédáhígíísh ałdóʼ doo yáʼátʼéhígi ádíílíiłgo biyáázh síníłhı̨́?
21 Áko ashkii bikáaʼjįʼ tséʼyaa názhnítéehgo táadi azlı̨́įʼgo Bóhólníihii bichʼįʼ ázhdííniidgo ájíní, Bóhólníihii shiDiyin God, nánooshkąąh, díí ashkii biiʼ sizíinii biih nídoodáałgo bee baʼdiʼníʼaah.
22 Nítʼééʼ Bóhólníihii éí Iiláíjah biinééʼ yidiiztsʼą́ąʼgo ashkii biiʼ sizíinii biih náádzáago hinááh násdlı̨́ı̨́ʼ.
23 Áádóó Iiláíjah éí ashkii néidiiłtı̨́įgo jinitéhídę́ę́ʼ bidáájííłtı̨́įgo wóneʼé bimá baazhníłtı̨́, áko Iiláíjah ání, Shoo, niyáázh hiná.
24 Nítʼééʼ asdzání éí Iiláíjah ííłní, Kʼad díí lą́ą bee Diyin God bííʼ nílı̨́įgo áádóó Bóhólníihii bizaad bee yáníłtiʼígíí éí tʼáá aaníinii átʼéego shił bééhoozin.
