1 Kings 19:1-21
19 Áko Éíhab éí Iiláíjah yaa naayáhígíí tʼáá átʼé áádóó Béíyal yá dahalneʼii tʼáá ałtso diltłish yee neistseedígíí Jézebel yił hoolneʼ.
2 Nítʼééʼ Jézebel haneʼ yił naalʼaʼígíí łaʼ Iiláíjah yichʼįʼ ayííłʼaʼgo ání, Yiską́ągo kóhoodzaago diné nisíníłtseed yę́ęgi átʼéego doo ákóniishłaa ládą́ą́ʼ shí ałdóʼ tʼah yówehgo shidiyin danilíinii ákódashidoolííł.
3 Áko éí baa ákozniizı̨́įʼgo nízhdiiʼnaʼgo hweʼiinaʼ bąąh hą́ą́sniizı̨́įʼgo Júdah dineʼé bikéyah Bíyer-shííbagóó jiníyá; ákwii há naalʼaʼí nizhníłtı̨́.
4 Áádóó hó éí honoojíígóó łaʼa jı̨́ oodááł bíighahjįʼ nizhníyáago gad biyaagi dzineezdá, áko dazdootsaałígíí ádá jííkeedgo ájíní, Kʼadí, shiBóhólníihii nílíinii, sheʼiinaʼ náádiidlé, háálá dashizhéʼé yę́ę doo bitisdi áníshtʼée da.
5 Kótʼéego gad biyaagi jineeztı̨́įgo ajiiłhaazh, shoo, diyingo naalʼaʼí hodeelchidgo áháłní, Nídiidáahgo íyą́.
6 Áko jideezghal nítʼééʼ, shoo, tsííd bikáaʼgi łeesʼáán sitʼéé lá, áádóó jinéesʼání bíighahgi tóshjeeh yázhí bee tó siʼą́. Áko ajííyą́ą́dóó tó joodlą́ąʼgo názneeztı̨́.
7 Diyingo naalʼaʼí naakidi haa náánádzáá góneʼ hodeelchidgo ání, Nídiidáahgo íyą́, háálá ayóó ánízáágóó díníyá.
8 Áádóó nízhdiiʼnaʼgo ajííyą́ą́ʼ áádóó tó joodlą́ąʼgo Diyin God biDził Hórebgóó dízdiin jı̨́ áádóó dízdiin tłʼééʼ éí chʼiyánígíí bee hadziilgo jiníyá.
9 Áádóó tséʼáán léiʼgi jiníyáago ákwii hwiiską́, nítʼééʼ jó, Bóhólníihii hachʼįʼ haadzíiʼgo áháłní, Iiláíjah kweʼé lá haʼátʼíí baa naniná?
10 Áko ájíní, Tʼáá ałtsoní bee Bóhólníihii Diyin God bá haleego ásdzaa. Jó, Ízrel dineʼé nibee ahaʼdeetʼą́ yóóʼadeideezʼą́; nibikááʼ náádaʼiiniihí dayiistłʼííd, áádóó ná dahalneʼii diltłish yee nideistseed, áko shí, tʼáá shí tʼéiyá, chʼééyá, áko kʼad dashidiyoołhééł biniyé hadashintá.
11 Nítʼééʼ Diyin God áháłní, Nílááh, chʼínínáahgo Bóhólníihii binááł dził bikááʼdóó dah yiizįįh. Áko shoo, Bóhólníihii kǫ́ǫ́ chʼíníyá, nítʼééʼ ayóó átʼéego bidziilgo deeyolgo daadził nidahastǫʼ índa Bóhólníihii binááł tsé dadíízéí, nidi Bóhólníihii éí níyol doo yee honíleʼ da, áádóó ííyoldóó bikʼijįʼ niʼ nahaasnááʼ, nidi Bóhólníihii niʼ hideesnáʼígíí doo yee honíleʼ da,
12 áádóó niʼ hideesnááʼdóó bikʼijįʼ éí kǫʼ hadíínáád, nidi Bóhólníihii éí kǫʼ doo yee honíleʼ da, áádóó kǫʼ hadíínáádóó bikʼijįʼ éí tʼįįhdígo iinééʼ diistsʼą́ą́ʼ.
13 Kótʼéego Iiláíjah éí yidiiztsʼą́ąʼgo biʼéétsoh biniiʼ yikʼíístiʼgo chʼíníyáago tséʼáán bichʼéʼédą́ąʼgi jiizįʼ. Jó, iinééʼ dzidiiztsʼą́ąʼgo áháłní, Iiláíjah kweʼé lá haʼátʼíí baa naniná?
14 Áko ájíní, Tʼáá ałtsoní bee Bóhólníihii Diyin God bá haleego ásdzaa. Jó, Ízrel dineʼé nibee ahaʼdeetʼą́ yóóʼadeideezʼą́; nibikááʼ náádaʼiiniihí dayiistłʼííd, áádóó ná dahalneʼii diltłish yee nideistseed, áko shí, tʼáá shí tʼéiyá, chʼééyá, áko kʼad dashidiyoołhééł biniyé hadashintá.
15 Áádóó Bóhólníihii áháłní, Nílááh, Damáskas honoojítahjigo nídídááh; áadi yíníyáago Házeiyel éí Síriya dineʼé yá aláahgo naatʼáanii nilı̨́į doo biniyé akʼah bikʼi yeidííziłgo bidíísı̨́h;
16 Nímshai biyeʼ Jííhu éí Ízrel dineʼé yá aláahgo naatʼáanii nilı̨́į doo biniyé akʼah bikʼi yeidííziłgo bidíísı̨́h índa Éíbel-miihólahdóó Shéífat biyeʼ Iiláísha éí nitsáskʼeh góneʼ Diyin God yá halneʼ doo biniyé akʼah bikʼi yeidííziłgo bidíísı̨́h.
17 Áko baa hoolzhiizhgo kótʼée doo; diné tʼáá háiida Házeiyel bidiltłish yiyaa haalwodígíí éí Jííhu hodiyoołhééł, áádóó diné tʼáá háiida Jííhu bidiltłish yiyaa haalwodígíí éí Iiláísha hodiyoołhééł.
18 Tʼahdii Ízrel dineʼé bitahgi tsostsʼidi míilgo tʼah baa áháshyą́; éí tʼáá ałtso tʼah doo Béíyal yichʼįʼ nitsidadigeeh da; tʼáá ałtso tʼah doo nidi dayiitsʼǫs da.
Iiláísha bíká áhodooʼniid
19 Áádóó Iiláíjah dashdiiyáago Shéífat biyeʼ Iiláísha bikʼízhníyá; éí hadáahgi naakitsʼáadah yiltʼéego béégashii yee nidahwiiłdlaad lá; Iiláísha éí naakitsʼáadah góneʼ hoołdlałgo Iiláíjah hwíighah dah diiyáago biʼéétsoh hakʼijįʼ iiyííłhan.
20 Áádóó béégashii tʼáá ákǫ́ǫgo Iiláíjah yikééʼ nídiilwodgo ání, Tʼáá shǫǫdí, shíniʼdii shizhéʼé áádóó shimá deestsʼǫs, áko índa nikééʼ yisháał doo. Áko ábijiní, Nílááh, tʼą́ą́ʼ nídídááh, haashąʼ niishłaa?
21 Áko bitsʼą́ą́ʼ tʼą́ą́ʼ dah nízhdiidzáago béégashii nízhdiiʼeezhgo nidzistseed, áko bee nihwiildlaadí bee bitsįʼ jishbéezhgo diné bazhníłtsoodgo dayííyą́ą́ʼ. Áádóó nízhdiiʼnaʼgo Iiláíjah bikééʼ dashdiiyáago bá nidzisʼaʼ.
