1 Kings 20:1-43
20 Nítʼééʼ Síriya dineʼé yá aláahgo naatʼáanii Ben-héídad éí bisiláo tʼáá átʼé áłah áyiilaa; tádiindóó baʼaan naaki aláahgo naatʼáanii danilíinii bił áádóó łı̨́įʼda índa tsindaabąąs bijáád naakiígíida bee dashdiiná; éí bee Samériya kin haalʼáhígíí yizéénáshzhiizh áádóó yikʼijįʼ anaaʼ dahasłı̨́ı̨́ʼ.
2 Áádóó kintahjįʼ Ízrel dineʼé yá aláahgo naatʼáanii Éíhab bichʼįʼ haneʼ nideiʼáhígíí ayííłʼaʼgo ííłní, Ben-héídad kóní,
3 Nibéésh łigaii áádóó niʼóola éí shí; nedaʼasdzą́ą́ áádóó naʼáłchíní tʼáá íiyisí danizhónígíí ałdóʼ shí.
4 Áko Ízrel dineʼé yá aláahgo naatʼáanii haadzíiʼgo ání, Shinanitʼaʼí, aláahgo naatʼáanii nílíinii, tʼáá ádínínígíí bikʼehgo shí áádóó shee hólónígíí tʼáá ałtso ni.
5 Nítʼééʼ haneʼ nideiʼáhígíí náánákaigo ádaaní, Ben-héídad kótʼéego haadzíiʼgo ání, Nichʼįʼ niséłʼaʼgo ádííniid, Nibéésh łigaii áádóó niʼóola, índa nedaʼasdzą́ą́ áádóó nadaʼáłchínída shaa díínił,
6 ákondi yiską́ągo kweʼé nahalzhiishgo shá nidaalʼaʼí nichʼįʼ deeshʼaałgo nighan góneʼ índa ná nidaalʼaʼí dabighan góneʼ nidaʼdoochʼił, áko kótʼée doo, tʼáá haʼátʼíí shı̨́ı̨́ ílı̨́įgo síníłnilígíí éí nitsʼą́ą́ʼ nídeididooniłgo adeidoojih.
7 Nítʼééʼ Ízrel dineʼé yá aláahgo naatʼáanii éí kéyahdóó hastóí aląąjįʼ naazíinii tʼáá ałtso hágo yidííniidgo ání, Shoo, nídanihooshkąąh, daahʼı̨́įgo díí diné éʼétsʼih yíkantá, háálá shedaʼasdzą́ą́ áádóó shadaʼáłchínída índa shibéésh łigaiida, shiʼóolada yíká shichʼįʼ naʼasʼaʼgo, áko tʼáadoo dooda bidííniid da.
8 Áko hastóí aląąjįʼ naazíinii áádóó diné tʼáá ałtso ádahałní, Tʼáadoo yíísíníłtsʼą́ʼí, doo nidi lą́ adííłeeł da.
9 Éí bąą Ben-héídad bá haneʼ nideiʼáhígíí ábijiní, Shinanitʼaʼí, aláahgo naatʼáanii bił dahołneʼ, Áłtséédą́ą́ʼ ná naalʼaʼí biniyé bichʼįʼ nisíníłʼaʼ yę́ę éí tʼáá átʼé ádeeshnííł, nidi díí éí doo ádeeshníił da. Áko haneʼ nideiʼáhígíí dah nídiikaigo Ben-héídad haneʼ yaa nídeizʼą́.
10 Áádóó Ben-héídad hachʼįʼ anááʼííłʼaʼgo ání, Samériyadóó łeezh yílá hadeezbingo éí diné shikééʼ yikahígíí tʼáá ałtso bá dabíighah ládą́ą́ʼ shí ałdóʼ tʼah yówehgo shidiyin danilíinii ákódashidoolííł.
11 Áko Ízrel dineʼé aláahgo binanitʼaʼí haadzíiʼgo ání, Bił dahołneʼ, Tʼáá háiida béésh ééʼ háidiiʼnilígíí ádaa hasʼnihígi átʼéego éí béésh ééʼ biishdoogáłígíí ádaa hojóʼniih lágo.
12 Nítʼééʼ Ben-héídad chahaʼoh góneʼ aláahgo naatʼáanii danilíinii yił daʼadlą́ągo díí haneʼ yidiiztsʼą́ą́ʼ, áko bá nidaalʼaʼí ííłní, Bichʼįʼ niʼahiʼdoohnííł. Áko kin haalʼá yikʼijįʼ niʼahiʼdeeʼnil.
13 Áádóó shoo, Diyin God yá halneʼii léiʼ Ízrel dineʼé yá aláahgo naatʼáanii Éíhab yaa níyáago ání, Bóhólníihii kóní, Díí tʼóó ahayóí dah oonéłígíísh tʼáá átʼé yiniłtsą́? Jó, díí jı̨́ naa dideeshʼááł, áko shí Bóhólníihii áshtʼı̨́įgo nił bééhodoozįįł.
14 Nítʼééʼ Éíhab ání, Háishąʼ bee? Áko ání, Bóhólníihii kóní, Tʼáá kodóó aláahgo naatʼáanii bitsíłkéí siláo danilíinii lą́ą. Nítʼééʼ ání, Háishąʼ anaaʼ yichʼįʼ adoołʼaał? Áádóó bichʼįʼ háádzoodzíiʼgo ájíní, Ni lą́ą.
15 Nítʼééʼ aláahgo naatʼáanii bitsíłkéí siláo danilíinii jííłtaʼgo naakidi neeznádiindóó baʼaan tádiindóó baʼaan naaki lá, áádóó bikʼijįʼ diné tʼáá ałtso tʼáá Ízrel dineʼé nidi tʼáá ałtso jííłtaʼgo tsostsʼidi míilgo ánéelą́ą́ʼ.
16 Áádóó ałníʼníʼą́ągo chʼékai. Nidi Ben-héídad áádóó aláahgo naatʼáanii tádiindóó baʼaan naaki háká ííjéʼígíí bił chahaʼoh góneʼ daʼjidlą́ągo nídazdíʼnéesdlą́ą́ʼ.
17 Áko aláahgo naatʼáanii bitsíłkéí siláo danilíinii áłtsé chʼékai, áádóó Ben-héídad chʼíʼníłʼaʼ, nítʼééʼ bił dahoolneʼgo ádaaní, Samériya kin haalʼáádę́ę́ʼ diné łaʼ chʼékai.
18 Áádóó ání, Kʼégo yikah ládą́ą́ʼ yah adadoohnił; anaaʼ biniyé yikah ládą́ą́ʼ yah adadoohnił.
19 Kótʼéego díí aláahgo naatʼáanii bitsíłkéí siláo danilíinii áádóó siláo tʼáá bikééʼ yinéełgo kin haalʼáádę́ę́ʼ chʼíníná.
20 Áko tʼáá ałtso tʼáá bí diné nideideezʼánígíí nideistseed, áádóó Síriya dineʼé adahineezhchą́ąʼgo Ízrel dineʼé akééʼ nídiijééʼ nítʼééʼ; Síriya dineʼé yá aláahgo naatʼáanii Ben-héídad éí siláo danilíinii łı̨́ı̨́ʼ yee nidaabaahígíí yił łı̨́ı̨́ʼ ayaa bił háájééʼ.
21 Áádóó Ízrel dineʼé yá aláahgo naatʼáanii chʼíníyáago łı̨́ı̨́ʼ áádóó tsindaabąąs bijáád naakiígíí yee nidaabaahígíí yił ałkʼiijéeʼgo Síriya dineʼé tʼóó ahayóigo nideistseed.
22 Diyin God yá halneʼii éí Ízrel dineʼé yá aláahgo naatʼáanii yaa níyáago ííłní, Nílááh, nidziilgo íʼdílnééh, áádóó hazhóʼó baa nidíínaałígíí hazhóʼó baa nanítá, háálá nááhaigo Síriya dineʼé yá aláahgo naatʼáanii nichʼįʼ nídidoobah.
23 Síriya dineʼé yá aláahgo naatʼáanii bá nidaalʼaʼí ádabiłní, Dawókʼą́ą́góó diyinígíí éí dabidiyin; éí bąą bí danihiláahgo dabidziil, nidi bíniʼdii halgaidi bił ałkʼiidiijah, áko tʼáá aaníí nihí haláahgo danihidziil doo.
24 Áko kódíínííł, Aláahgo naatʼáanii danilíinii bá nahazʼánídóó tʼááłáʼí nítínígo nahjįʼ hahidíínił áádóó dabitsáskʼeh góneʼ siláo binanitʼaʼí danilíinii ahidíínił,
25 áádóó siláo yóóʼíínínil yę́ę bíighahgo ánánéelą́ąʼgo índa łı̨́ı̨́ʼ bikʼeh nánítı̨́įgo tsinaabąąs bijáád naakiígíí bikʼeh náníʼą́ągo ahíidíínił, áko halgaidi bikʼiidiijah; tʼáá aaníí nihí dahaláahgo danihidziil doo. Áko ádaanínígíí bá jidiiztsʼą́ąʼgo biʼjiilaa.
26 Nítʼééʼ nááhaigo Ben-héídad éí Síriya dineʼé ahíyiinilgo Éífek kin haalʼá góde Ízrel dineʼé yikʼiidoojah biniyé haazná.
27 Áko Ízrel dineʼé ahídabidiiʼnilgo bikiin dooleełii bitaa dadeestʼą́ągo yichʼįʼ nídiiʼná; Ízrel dineʼé éí tłʼízí yázhí naakigo ałʼąą dah noolkałígíí nahalingo hanááł niníná, nidi Síriya dineʼé éí kéyah tʼáá átʼéé nítʼééʼ nihinééstʼeʼ.
28 Nítʼééʼ Diyin God bá halneʼii léiʼ níyáago Ízrel dineʼé yá aláahgo naatʼáanii yichʼįʼ haadzíiʼgo ání, Bóhólníihii kóní, Síriya dineʼé ádaaní, Bóhólníihii éí deílkʼidgóó bidiyin jílı̨́, nidi honítsʼaaʼgóó éí doo bidiyin jílı̨́į da, daaní; éí bąą díí ayóó ánéelą́ąʼgo dah oonéłígíí tʼáá átʼé naa dideeshʼááł, áko shí éí Bóhólníihii áshtʼı̨́įgo nił bééhodoozįįł.
29 Áko tsostsʼid yiską́ąjįʼ ahíłnaashiijí nidahaazná. Áádóó tsostsʼid yiską́ągo ałkʼiijéeʼgo Ízrel dineʼé éí Síriya dineʼé tʼáá niʼ naajeehígíí tʼááłáhídi míilgo tʼáá łaʼa jı̨́ nideistseed.
30 Nidi łahjįʼ éí Éífek kin haalʼáágóó adaneezhchą́ą́ʼ; ákwii naadiin tsostsʼidi míilgo diné chʼéékaígíí éí kin haalʼáii ditą́ągo binaa ahééʼítłʼinígíí bikʼiiłdááz. Áko Ben-héídad éí kin haalʼáajįʼ náwóneʼ góneʼ anííchą́ą́ʼ.
31 Áko bá nidaalʼaʼí ádabiłní, Jó kʼad, Ízrel dineʼé yá aláahgo naatʼáanii danilíinii dajoobaʼgo baa dahosidiitsʼą́ą́ʼ; nánooshkąąh, nihíniʼdii tłʼoh yishbizh nihinííʼ gónaa bikʼídadiiltih, índa tłʼóół nihitsiiʼ binídadiiltʼihgo Ízrel dineʼé yá aláahgo naatʼáanii bichʼįʼ diikah; néididoochiłgo daʼátʼé.
32 Kótʼéego tłʼoh yishbizh binííʼ gónaa yikʼídeistiʼ, índa tłʼóół bitsiiʼ yinídeistʼiʼgo Ízrel dineʼé yá aláahgo naatʼáanii yaa yíkaigo ádaaní, Ná naalʼaʼí Ben-héídad kóní, Nánooshkąąh, shíniʼdii hinishná. Áko ájíní, Daʼ tʼahdiísh hiná? Éí lá shikʼis átʼé ni.
33 Ákohgo diné tʼáá haʼátʼéegoda íʼjiilaaígíí bee bééhodoozįįł danízingo tsʼídá hazhóʼó haa háashjééʼ; éí yaa ákodaniizı̨́įʼgo ádaaní, Nikʼis Ben-héídad. Nítʼééʼ ájíní, Nílááh, bił deʼnohkááh. Áádóó Ben-héídad hachʼįʼ niníyáago tsinaabąąs bijáád naakiígíí biih ninááh bizhdííniidgo yiih yíyá.
34 Áko Ben-héídad áháłní, Shizhéʼé éí kin hadaasʼá nizhéʼé yighaiideetʼánígíí naa nídideeshʼáałgo Samériyagi shizhéʼé kintah daʼnítiingo áyiilaaígi átʼéego Damáskasgi kintah daʼnítiingo ádíílííł. Nítʼééʼ Éíhab ání, Díí ahaʼdeetʼą́ bił dah nándideeshʼaał. Kótʼéego bił ahazhdeetʼą́ągo dah náhodiiłʼaʼ.
35 Diyin God yá dahalneʼii bídahoołʼaahígíí łaʼ éí Bóhólníihii bizaad kʼehgo yił kééhatʼíinii ííłní, Nánooshkąąh, náshidiiłhaał. Áko éí diné doo íiniizı̨́įʼ da.
36 Nítʼééʼ ábijiní, Bóhólníihii ánínígíí doo bikʼeh hwííníłʼįįdígíí biniinaa, jó, tʼáá shitsʼą́ąjįʼ dah diniyáhí, náshdóítsoh bitsiijįʼ ditłʼooígíí nidiyoołhééł. Áko bitsʼą́ą́ʼ dashdiiyáago tʼáá áko náshdóítsoh bitsiijįʼ ditłʼooígíí hakʼíníyáago hwiisxı̨́.
37 Nítʼééʼ diné łaʼ bikʼínáádzídzáago ábijiní, Nánooshkąąh, náshidiiłhaał. Áko náhodííłhaalgo éí yee atíhoolaa.
38 Kótʼéego Diyin God yá halneʼii dah diiyáago doo bééhoʼdílzin da doo biniyé bitsiiʼ yikʼídeezdizgo binákʼee naʼníłbaalgo atiingi aláahgo naatʼáanii yibaʼ sidá.
39 Áko aláahgo naatʼáanii kǫ́ǫ́ yigáałgo yéego bichʼįʼ ázhdííniidgo ájíní, Ná naalʼaʼí éí daʼahijigą́ ałnííʼ góneʼ ííyáá nítʼééʼ; shoo, diné léiʼ nahjįʼ hááyáago diné łaʼ yił shaa níʼáazhgo ání, Díí diné baa áhólyą́; tʼáá haa dayitʼéego bóhoohyaʼ ládą́ą́ʼ, éí tʼáá ni bá ninádíítłish, éí doodago béésh łigaii tálent wolyéii ninádíídlééł.
40 Ná naalʼaʼí nishłíinii kǫ́ǫ́ áádóó nahgóó tádíshníishgo háájí shı̨́ı̨́ ííyáá lá. Áádóó Ízrel dineʼé yá aláahgo naatʼáanii áháłní, Ákótʼéego ná nihodootʼááł; tʼáá ni ádá nihwíínítʼą́.
41 Áádóó hatsiiʼ bikʼídeesdizgo hanákʼee naníbaalígíí tsı̨́įłgo denizhníłtsʼǫ́ǫ́d, áko Ízrel dineʼé yá aláahgo naatʼáanii éí Diyin God yá halneʼii ájítʼı̨́ı̨́ lágo hwééhoosįįd.
42 Áko ábijiní, Bóhólníihii kóní, Diné łaʼ ałtso ádííłdįįł nidííniidígíí béédííníchidgo biniinaa beʼiinaʼ bá ninádíítłish, áádóó nidineʼé éí bí bidineʼé yá ninádínóodah.
43 Áádóó Ízrel dineʼé yá aláahgo naatʼáanii éí tʼáá íiyisí bíniʼ yiiʼaʼgo bikʼee doo bił haldingóó Samériyadi bighango ákǫ́ǫ́ anáádzá.
