1 Kings 21:1-29
21 Kódahóótʼįįdóó bikʼijįʼ Jézriyel kin haalʼáádóó diné nilíinii Néíbath éí Jézriyelgi Samériya kéyahdóó aláahgo naatʼáanii Éíhab bikin bíighahgóó hachʼil naʼatłʼoʼii yílʼá.
2 Áko Éíhab éí Néíbath yichʼįʼ haadzíiʼgo ání, Chʼil daadáanii kʼéédíshdléeh doo biniyé nichʼil naʼatłʼoʼii yílʼáhígíí shaa diníʼaah, háálá éí shighanjįʼ tʼáá áyídí; chʼil naʼaʼtłʼoʼii kʼéédílyééh bá yáʼáhootʼéhígi bideená naa hodideeshʼááł; éí doodaiiʼ, nił yáʼátʼééh ládą́ą́ʼ tʼáá béeso bą́ą́h ílı̨́ı̨́ góneʼ bikʼé naa deeshnił.
3 Áádóó Néíbath éí Éíhab ííłní, Dooda lą́ą, dashizhéʼé yę́ę daabííʼ nítʼéʼígíí doo naa dideeshʼáał da. Bóhólníihii dooda shóʼní.
4 Jézriyeldóó diné nilíinii Néíbath hachʼįʼ yee haadzííʼ, Dashizhéʼé yę́ę daabííʼ nítʼéʼígíí doo naa dideeshʼáał da, hodííniidii bikʼee Éíhab bíniʼ siʼą́ągo doo bił haldingóó bikin góneʼ yah anáádzá. Áko Éíhab bitsáskʼeh yikááʼ neeztı̨́įgo níwehjigo náshjizhgo doo tʼáá kʼad ííyą́ąʼ da.
5 Nidi hweʼasdzą́ą́ Jézebel haa níyáago áháłní, Haʼátʼíísh bąąh níniʼgo doo íyą́ą da?
6 Áko beʼasdzą́ą́ ííłní, Jézriyeldóó diné nilíinii Néíbath bichʼįʼ haasdzíiʼgo ábidishní, Nichʼil naʼatłʼoʼii yílʼáhígíí béeso bideená shaa diníʼaah; doodaiiʼ, nił yáʼátʼééh ládą́ą́ʼ chʼil naʼaʼtłʼoʼii yílʼáhígíí náánáłaʼ bideená naa dideeshʼááł; nítʼééʼ haadzíiʼgo ání, Shichʼil naʼatłʼoʼii yílʼáhígíí doo naa dideeshʼáał da, shidííniid.
7 Nítʼééʼ hweʼasdzą́ą́ Jézebel áhodííniid, Kʼad Ízrel dineʼé bibee óhólníihii binanítʼá; nídiidáahgo íyą́, índa nijéí bił hózhǫ́ǫ leʼ; shí Jézriyeldóó diné nilíinii Néíbath bichʼil naʼatłʼoʼii yílʼáhígíí naa dideeshʼááł.
8 Áko nítʼééʼ Jézebel éí naaltsoos Éíhab bízhiʼ dabikáaʼgo índa biyoostsah bee bikʼi nidaʼiistʼą́ągo áádóó tʼáá éí bee bidádaʼdeeshjéeʼgo hastóí aląąjįʼ naazíinii índa aghá dahideezíinii kin haalʼáagi Néíbath yił kéédahatʼínígíí yichʼįʼ ádayiilaa.
9 Nítʼééʼ naaltsoos ádayiilaaígíí éí biiʼ kóníigo dabikááʼ, Doo adánígíí daołʼaah, áádóó Néíbath éí diné bitahgi alą́ąjįʼ dah bidínóołdaał,
10 áádóó diné doo yáʼáshóonii naakigo bidááhdóó dah bidínóołkeeł, éí hakʼijįʼ nahodoolnih kóníigo, Diyin God áádóó aláahgo naatʼáanii baaʼihgo bá háínídzííʼ yididooniił. Áádóó tłʼóóʼgóó chʼídadoołtéełgo bił nidazdoołniił.
11 Áko hastóí aląąjįʼ naazíinii índa aghá dahideezíinii hakin haalʼáagi kéédahatʼínígíí éí naaltsoos biiʼ akʼeʼashchı̨́įgo Jézebel hachʼįʼ ádayiilaaígíí bikʼehgo ádadziidzaa.
12 Áádóó doo adą́ą da daaníigo yee dahoołʼaʼgo Néíbath éí diné bitahdóó alą́ąjįʼ dah deineesdá.
13 Nítʼééʼ ákwii diné doo yáʼáshóonii naaki yah ííʼáázh, éí hadááhdę́ę́ʼ dah neezkéego hakʼijįʼ nahasneʼ; tʼáá Néíbath bikʼijįʼ diné tʼáá dabinááł kóníigo, Néíbath éí Diyin God áádóó aláahgo naatʼáanii baaʼihgo yá haadzííʼ. Nítʼééʼ kin haalʼáádóó chʼídahastı̨́įgo hoł nidadzisneʼ.
14 Áko nítʼééʼ Jézebel yichʼįʼ adaʼasʼaʼgo ádaaní, Néíbath yę́ę bił nidzílneʼ.
15 Kódahóótʼįįdgo Jézebel éí Néíbath yę́ę bił nidzílneʼígíí yaa hodiiztsʼą́ąʼgo Éíhab ííłní, Nídiidááh, Jézriyeldóó diné nilíinii Néíbath yę́ę bichʼil naʼatłʼoʼii yílʼáhígíí éí béeso bikʼé baa níníiłgo doo íinízin da yę́ę ádaa dinítʼaah; jó, Néíbath éí doo hináa da, nidi daaztsą́.
16 Ákótʼéego Éíhab éí Néíbath daaztsánígíí yaa hodiiztsʼą́ąʼgo, nídiiʼnaʼgo Jézriyeldóó diné nilíinii Néíbath yę́ę bichʼil naʼatłʼoʼii yílʼáhígíí ádeididootʼááł biniyé ákóyaa níyá.
17 Áádóó Bóhólníihii éí Tíshbeh diné nilíinii Iiláíjah yichʼįʼ haadzíiʼgo ání,
18 Nídiidáahgo, Ízrel dineʼé yá aláahgo naatʼáanii Éíhab bidááh díínááł biniyé Samériya góyaa dínááh; éí áadi naaghá; jó, Néíbath yę́ę bichʼil naʼatłʼoʼii yílʼáhígíí ádeididootʼááł biniyé ákóyaa ííyá.
19 Áko bichʼįʼ hadíídzihgo kóbididííniił, Bóhólníihii kóní, Daʼ asíníłhı̨́įgoósh, áádóó ałdóʼ nídiʼnilá? Áádóó bichʼįʼ hadíídzihgo kóbididííniił, Bóhólníihii kóní, Łééchąąʼí éí Néíbath yę́ę bidił dayííłchʼalígi ákweʼé łééchąąʼí tʼáá ni nidił deidoołchʼał.
20 Nítʼééʼ Éíhab éí Iiláíjah ííłní, Shiʼanaʼí nílíinii, daʼ shikʼííníyáásh? Áko bichʼįʼ hadzoodzííʼ, Nikʼíníyáá lą́ą, háálá Bóhólníihii binááł tʼáá ni doo yáʼáshóonii bindíílnishgo nináʼádíínítʼą́.
21 Jó, doo yáʼáshóonii nikʼijįʼ kódeeshłííł áádóó nitsʼą́ą́dóó diné deíchíhígíí tʼáá éí Ízrel kéyahdóó diné daadziihígíí ałtso Éíhab bitsʼą́ą́dóó áhodeeshdįįł,
22 áádóó Nííbat biyeʼ Jerobówam índa Aháíjah biyeʼ Béíyasha badaʼáłchíní náás ahoolchíiłii áshłaaígi átʼéego naʼáłchíní náás ahoolchíiłii ákótʼéego ádeeshłííł, háálá bee áhodoolchįįłii bee shá hwííníłchįįdgo Ízrel dineʼé ádił nidaʼiisíihgo íinilaa.
23 Áádóó Bóhólníihii ałdóʼ Jézebel yaa haadzíiʼgo ání, Jézriyel kin haalʼáii binaa ahééʼítłʼin bíighahgi łééchąąʼí éí Jézebel deidoolghał.
24 Tʼáá háiida Éíhab bitsʼą́ą́dóó dahodzizlı̨́ʼígíí kin haalʼáagi dazhninéhígíí łééchąąʼí dahodoolghał, índa tʼáá háiida dadzígaidi dadziztsánígíí naatʼagii dahodooyı̨́ı̨́ł.
25 Nidi Éíhab hweʼasdzą́ą́ Jézebel hodiyiisnáaʼgo Bóhólníihii binááł doo yáʼáshóonii binizhdoolnishgo biniyé nináʼázhdeetʼánígíí éí diné doo łaʼ ákótʼée da nítʼééʼ.
26 Áko Bóhólníihii éí Ízrel dineʼé bitsʼą́ą́dóó Ámor dineʼé chʼíininíłkaadígíí éí yaa naaskaii tʼáá átʼé bikʼehgo bidaʼalyaii bichʼįʼ nahojiłáago bee tʼáá íiyisí doo yildinii baa nijiyá.
27 Nítʼééʼ Éíhab díí saad yidiiztsʼą́ąʼgo biʼééʼ ákʼiniyiisdláadgo tłʼoh yishbizh ákʼíístiʼgo tʼáadoo ayání tłʼoh yishbizh yiiʼ sitı̨́, áádóó doo haʼatahaa nijigháá nítʼééʼ.
28 Áko Bóhólníihii éí Tíshbeh diné nilíinii Iiláíjah yichʼįʼ haadzíiʼgo ání,
29 Shoo, Éíhab shinááł ayáhígo íʼdiilyaaígíísh yiniłtsą́? Shinááł ayáhígo ázhdiilyaaígíí biniinaa hwíyoołkááł biyiʼ doo yáʼáshóonii doo hakʼijįʼ biʼdeeshnih da, nidi hayeʼ bíyoołkááł biyiʼ doo yáʼáshóonii haʼáłchíní náás ahoolchíłígíí bikʼijįʼ biʼdeeshnih.
