1 Kings 22:1-53
22 Áko Síriya dineʼé áádóó Ízrel dineʼé bitaʼgi doo anaaʼ hólǫ́ǫ́góó tááʼ nááhai.
2 Nítʼééʼ tááʼ náhááh binih Júdah dineʼé yá aláahgo naatʼáanii Jiiháshafat éí Ízrel dineʼé yá aláahgo naatʼáanii yichʼįʼ níyá.
3 Áádóó Ízrel dineʼé yá aláahgo naatʼáanii bá nidaalʼaʼí ííłní, Gíliyad kéyahdi Réímath kin haalʼáhígíí éí nihígo tʼóó ádahodíníilzééʼ, doo nidi Síriya dineʼé yá aláahgo naatʼáanii bighadadiniitʼaah da. Daʼ éísh nihił béédahózin?
4 Áko Jiiháshafat ííłní, Réímath-gíliyad kin haalʼáágóó anaaʼ biniyé daatsʼí shił dííʼash? Áádóó Jiiháshafat éí Ízrel dineʼé yá aláahgo naatʼáanii ííłní, Shí tʼáá nigi áníshtʼé; shidineʼé éí nidineʼégi ádaatʼé; dashilı̨́ı̨́ʼ ninilı̨́ʼígi ádaatʼé.
5 Áádóó Jiiháshafat éí Ízrel dineʼé aláahgo binanitʼaʼí ííłní, Nánooshkąąh, áłtsé díí jı̨́ Bóhólníihii bínabídíłkid.
6 Nítʼééʼ Ízrel dineʼé aláahgo binanitʼaʼí éí náásgóó áhodooníłígíí yaa dahalneʼii dı̨́įdi neeznádiingo diné áłah áyiilaago ííłní, Réímath-gíliyad daatsʼí bichʼįʼ dishbááh, doodaiiʼ ááhodeeshtʼįįł daatsʼí? Áko ádaaní, Ákóde dínááh, háálá Bóhólníihii éí aláahgo naatʼáanii yeididooʼááł.
7 Áko Jiiháshafat ání, Díí kǫ́ǫ́ dahalneʼígíísh binaashiijí Bóhólníihii yá halneʼii nabídídíilkiłígíí doo łaʼ naagháa da?
8 Áádóó Ízrel dineʼé aláahgo binanitʼaʼí éí Jiiháshafat ííłní, Diné łaʼ tʼah yidziih, éí Ímlah biyeʼ Maikéíyah; éí shı̨́ı̨́ hwee Bóhólníihii nabídídíilkił, nidi éí jooshłá, háálá yáʼátʼéehii doo shídéétʼiʼgóó tʼéí shaa halneʼ, nidi doo yáʼáshóonii tʼéiyá yee shaa halneʼ. Nítʼééʼ Jiiháshafat ání, Aláahgo naatʼáanii nílíinii, tʼáadoo ádíníní.
9 Nítʼééʼ Ízrel dineʼé yá aláahgo naatʼáanii éí siláo binanitʼaʼí łaʼ hágo yidííniidgo ííłní, Tsxı̨́įłgo, Ímlah biyeʼ Maikéíyah kweʼé bił nánítʼaash.
10 Áko Ízrel dineʼé aláahgo binanitʼaʼí índa Júdah dineʼé aláahgo binanitʼaʼí Jiiháshafat éí biʼéénééz yiih yíʼáazhgo Samériya kin haalʼá bidáńʼdítı̨́įhgi tʼáá bíniʼ hazʼą́ą́ léiʼgi tʼáá ałʼąą bibikááʼdóó nahatʼáii yikááʼ dah siké, áko náás áhodooníiłii yaa dahalneʼii tʼáá ałtso hadááhdóó dahoolneʼ.
11 Áádóó Kiinéíyanah biyeʼ Zedekáíyah éí béésh yee adeeʼ áyiilaago ání, Bóhólníihii kóní, Díí bee Síriya dineʼé ałtso asíníłdįįdjįʼ bighá daʼdííshish.
12 Nítʼééʼ dahalneʼii tʼáá ałtso tʼáá ákótʼéego náás áhodoonííł yaa dahoolneʼgo ádaaní, Nílááh, Réímath-gíliyad góde dínáahgo łaʼ nilééh, háálá Bóhólníihii éí aláahgo naatʼáanii yílákʼeididooʼááł.
13 Áko haneʼ bił eelʼaʼgo Maikéíyah hágo bidiní biʼdooʼniidígíí hachʼįʼ haadzíiʼgo ání, Jó, kʼad dahalneʼii tʼáá łaʼ saad yáʼátʼéehii yee aláahgo naatʼáanii yichʼįʼ hadaasdzííʼ; bíniʼdii nizaad tʼáá éí dabizaadígi átʼée doo; yáʼátʼéehii tʼéiyá bee hadíídzihgo baa nánooshkąąh.
14 Nidi Maikéíyah ání, Tsʼídá tʼáá aaníí Bóhólníihii hiná; ákótʼéego tsʼídá tʼáá aaníí Bóhólníihii yee shichʼįʼ haadzíʼígíí tʼéí bee hadeesdzih.
15 Kótʼéego aláahgo naatʼáanii baazhníyá. Áko aláahgo naatʼáanii áháłní, Maikéíyah nílíinii, Réímath-gíliyadgóó daatsʼí dadiibah, doodaiiʼ daatsʼí áádahodiitʼįįł? Áko ábijiní, Nílááh, łaʼ daałééh, háálá Bóhólníihii éí aláahgo naatʼáanii yílákʼeididooʼááł.
16 Nítʼééʼ aláahgo naatʼáanii áháłní, Haa lá néelą́ąʼdi bee nichʼįʼ háádeesdzih? Shą́ą́ʼ, tʼáadoo haʼátʼíhída bee shił hólneʼí, nidi Bóhólníihii bízhiʼ tʼéí bee tʼáá aaníinii bee shił hólneʼ, nidishníi niʼ.
17 Áádóó ání, Dibé yaa áhályáanii ádin nahalingo Ízrel dineʼé ałtso wókʼą́ą́góó taozhjéeʼgo yiiłtsą́, áko Bóhólníihii ání, Díí yídahółníihii ádin; bíniʼ diné tʼáá ałtso bił dahodéezyéelgo dabighangóó anáhákáah leʼ.
18 Áko Ízrel dineʼé aláahgo binanitʼaʼí éí Jiiháshafat ííłní, Daʼ doósh nił hweeshneʼ da; eii yáʼátʼéehii doo yee shá haadziih da, nidi doo yáʼáshóonii tʼéiyá?
19 Nítʼééʼ Maikéíyah ání, Éí bąą Bóhólníihii ánínígíí diitsʼı̨́ı̨́h; Bóhólníihii bibikááʼdóó nahatʼáii yikááʼ dah sidáago yáʼąąshdi dah deínéehii tʼáá átʼé binishʼnáájí áádóó binishtłʼají bíighah naazı̨́įgo yiiłtsą́.
20 Áádóó Bóhólníihii ání, Háishąʼ Éíhab yíniʼ yáʼáhodoolíiłgo Réímath-gíliyadgóó doogááł, áko bikʼeh hodidoodleeł? Áádóó łaʼ kótʼéego ní, náánáłaʼ kótʼéego náádíʼní.
21 Nítʼééʼ níłchʼi léiʼ chʼíníyáago Bóhólníihii yidááhdóó yiizįʼgo ání, Shí lá bíniʼ áhodeeshłíił ni.
22 Áko Bóhólníihii ábíłní, Haʼátʼíishąʼ bee dooleeł? Áko ání, Ákǫ́ǫ́ deeshááł, áádóó bá dahalneʼii tʼáá ałtso dabizééʼ góneʼ níłchʼi biyoochʼíidii nishłı̨́į doo. Áko ání, Ni lą́ą bíniʼ áhodíílíiłgo akʼeh didíídleeł; nílááh, dínáahgo ákónínééh.
23 Éí bąą kʼad, Bóhólníihii éí níłchʼi biyoochʼíidii díí ná dahalneʼii tʼáá ałtso dabizééʼ góneʼ ayiisʼaʼ; jó, Bóhólníihii doo yáʼáshóonii yee ná haadzííʼ.
24 Nidi Kiinéíyanah biyeʼ Zedekáíyah áyídíjįʼ niníyáago Maikéíyah biniitsįʼ néidííkaadgo ání, Shitsʼą́ą́dóó lá háajigo Bóhólníihii biNíłchʼi dahodiileʼgo nichʼįʼ haadzííʼ?
25 Áádóó Maikéíyah ání, Jó, náwóneʼí góneʼ nídidíítʼı̨́ı̨́ł biniyé ííníyáago éí bijı̨́ yidííłtsééł.
26 Áko Ízrel dineʼé aláahgo binanitʼaʼí ání, Maikéíyah daosiłgo kin haalʼáádóó naatʼáanii Éíman áádóó aláahgo naatʼáanii biyeʼ Jóʼash bichʼįʼ bił dadohkááh;
27 ábidohní, Aláahgo naatʼáanii kóní, Hodiiyeelgo nánísdzáajįʼ díí diné awáalyaadi yah adaałtʼeʼgo tʼáá achʼįʼ nahwiiʼnánígo bááh éí tó bił banídaʼołtsoʼ.
28 Áko Maikéíyah ání, Hodiiyeelgo néínídzáá ládą́ą́ʼ Bóhólníihii doo shee haadzíiʼ da doo. Áádóó ání, Dineʼé nohłíinii, łáʼí nootínígo daʼíísółtsʼą́ą́ʼ.
29 Kótʼéego Ízrel dineʼé yá aláahgo naatʼáanii índa Júdah dineʼé aláahgo binanitʼaʼí Jiiháshafat éí Réímath-gíliyad góde ííná.
30 Áko Ízrel dineʼé aláahgo binanitʼaʼí éí Jiiháshafat ííłní, Łahgo áneeshningo adiʼdeeshníiłgo atah deeshbah, nidi ni éí niʼéénééz biih ninááh. Áádóó Ízrel dineʼé aláahgo binanitʼaʼí łahgo ánoolningo íʼdiilyaago atah ííbaaʼ.
31 Nidi Síriya dineʼé aláahgo binanitʼaʼí éí tádiindóó baʼaan naaki siláo binanitʼaʼí danilíinii éí hatsindaabąąs bijáád naakiígíí bee bídahólníihii yichʼįʼ haadzíiʼgo ání, Ádaałtsʼísígíí, doodaiiʼ ayóó ádaatʼéhígíí tʼáadoo bił daʼahohgání, nidi Ízrel dineʼé yá aláahgo naatʼáanii tʼéiyá.
32 Nítʼééʼ tsindaabąąs bijáád naakiígíí bindanitʼaʼí éí Jiiháshafat dayiiłtsą́ągo ádaaní, Tʼáá aaníí Ízrel dineʼé yá aláahgo naatʼáanii átʼı̨́. Áko yił daʼahidoogą́ą́ł biniyé naanáskaigo Jiiháshafat hadoolghaazh.
33 Áko nítʼééʼ tsindaabąąs bijáád naakiígíí bindanitʼaʼí doo Ízrel dineʼé aláahgo binanitʼaʼí átʼı̨́į dago yaa ákodaniizı̨́įʼgo baa daʼígháhígíí tʼóó tʼą́ą́ʼ hanáákai.
34 Nítʼééʼ diné léiʼ tʼóó dzólníí góneʼ beʼełtı̨́ı̨́ʼ yił kʼídeeshchidgo Ízrel dineʼé aláahgo binanitʼaʼí bibéésh ééʼ ahidadiiʼá bitaʼ góneʼ yiskah; éí bąą Éíhab hatsinaabąąs bijáád naakiígíí neiloʼígíí ábijiní, Hashiʼdoolkʼehéii; naaʼíʼíléehgo nahjįʼ shił haʼíłbąąs.
35 Íídą́ą́ʼ éí bijı̨́ tʼóó yówehda ałkʼi jiijééʼ, áko aláahgo naatʼáanii bitsinaabąąs bijáád naakiígíí biyiʼdóó Síriya dineʼé bichʼįʼgo de ádahojósin, áádóó iʼííʼą́ągo dadziztsą́, índa hahoʼdoolkʼeh yę́ędę́ę́ʼ tsinaabąąs bijáád naakiígíí biiʼjįʼ dił háálı̨́.
36 Áko iʼííʼą́ągo siláo dah deínéehii bitahgóó haneʼ dideezdláadgo áháʼní, Diné tʼáá ałtso danihikin hadaasʼáágóó índa danihikéyahgóó nídadohkááh.
37 Ákohgo aláahgo naatʼáanii daaztsą́ągo Samériya kin haalʼáagi nábiʼdeeltı̨́, áádóó Samériyagi aláahgo naatʼáanii yóóʼádayiilaa.
38 Áko Samériya tó sikánígi tʼáá éí ałjiłnii yiiʼ ninádaabeehígi tsinaabąąs bijáád naakiígíí táádeizgiz; éí Bóhólníihii tʼáá yee haadzíʼígíí bikʼehgo łééchąąʼí hadił dayííłchʼal.
39 Kʼad łahjįʼ Éíhab ádzaaígíí índa yaa naayáhígíí tʼáá átʼé áádóó áívori wolyéii yee kin áyiilaii, índa kin hadaasʼáago tʼáá átʼé ádayiilaii éí Ízrel dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
40 Kótʼéego Éíhab éí dabizhéʼé yę́ę daʼiiłhaazhígi átʼéego iʼííłhaazh, áko hayeʼ Eihazáíyah hatsáskʼehgi aláahgo naatʼáanii náánásdlı̨́ı̨́ʼ.
Jiiháshafat nantʼáá nítʼééʼ (2Chr. 20:31-37)
41 Áko Éíhab éí Ízrel dineʼé yá aláahgo naatʼáanii nilı̨́įgo dı̨́ı̨́ʼ náhááh binih Éísa biyeʼ Jiiháshafat Júdah dineʼé yinanitʼaʼí silı̨́ı̨́ʼ.
42 Jiiháshafat éí tádiindóó baʼaan ashdlaʼ binááhaigo aláahgo naatʼáanii silı̨́ı̨́ʼ, áádóó Jerúsalem kin haalʼáagi nantʼáago naadiin ashdlaʼ nááhai. Bimá éí Sháílhai bitsiʼ Azúbah wolyé.
43 Áko Éísa hazhéʼé yę́ę yaa naayáhígíí tʼáá átʼé yikʼehgo jiníyá; Bóhólníihii binááł tʼáá ákogi ádaatʼéii yaa naayáhígíí tʼáadoo bitsʼázhníyáa da; azhą́ ákótʼée nidi ninádahałaah doo biniyé wódah nahazʼą́ągo ádaalyaaígíí tʼáadoo nahjįʼ ályaa da; jó, diné tʼahdii ninádahałaah doo biniyé wódah nahazʼą́ągo ádayiilaadi tsin bijeeh dilidgo łikání halchinii nínáádayiilnih.
44 Áádóó Jiiháshafat éí Ízrel dineʼé yá aláahgo naatʼáanii yił kʼé ahidooʼniid.
45 Kʼad łahjįʼ Jiiháshafat ádzaaígíí áádóó yee ayóó átʼéego áátʼįįdígíí índa haash yitʼéego naazbaaʼígíí éí Júdah dineʼé yá aláahgo naatʼáanii danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
46 Áádóó hazhéʼé Éísa yę́ę bíyoołkááł yę́ędą́ą́ʼ diné ahaa ninádaaldeehii daadziihígíí éí kéyahdóó nahjįʼ kóyiilaa.
47 Íídą́ą́ʼ Íídam kéyahgi aláahgo naatʼáanii doo hólǫ́ǫ da, nidi łaʼ nibiʼdeeltíinii aláahgo naatʼáanii nilı̨́.
48 Jiiháshafat éí Ófer kéyahgóó óola bíká dazhdoołʼoł biniyé Társhishdóó tsinaaʼeeł álʼínígi átʼéego ádajiilaa, nidi tʼáadoo ákǫ́ǫ́ dah dazhdiiłʼéel da, háálá tʼáá Ííziyan-gííber kin haalʼá binaashiidi tsinaaʼeeł hatsʼą́ą́ʼ nidahaastǫʼ.
49 Nítʼééʼ Éíhab yę́ę biyeʼ Eihazáíyah éí Jiiháshafat ííłní, Bíniʼdii shá nidaalʼaʼí éí ná nidaalʼaʼí yił tsinaaʼeeł yee dookah. Nidi Jiiháshafat doo íinízin da.
50 Áádóó Jiiháshafat éí dabizhéʼé yę́ę daʼiiłhaazhígi átʼéego iʼííłhaazhgo hazhéʼé David yę́ę bikin haalʼáagi dahazhéʼé yę́ę yóóʼádaalyaa yę́ęgi yóóʼáhoʼdiilyaa, áko hayeʼ Jiihóram hatsáskʼeh góneʼ aláahgo naatʼáanii náánásdlı̨́ı̨́ʼ.
Eihazáíyah éí Ízrel kéyahgi nantʼáá nítʼééʼ
51 Áádóó Jiiháshafat éí Júdah dineʼé yá aláahgo naatʼáanii nilı̨́įgo tsostsʼidtsʼáadah náhááh binih Éíhab biyeʼ Eihazáíyah Samériya kin haalʼáagi Ízrel dineʼé yinanitʼaʼí silı̨́ı̨́ʼ áádóó yinantʼáago naaki nááhai.
52 Eihazáíyah éí Bóhólníihii binááł doo yáʼáshóonii baa nijiyá, índa hazhéʼé áádóó hamá bikʼehgo jiníyá, áádóó Nííbat biyeʼ Jerobówam éí Ízrel dineʼé nidaʼiisíihgo áyiilaaígíí bikʼehgo jiníyá,
53 háálá Béíyal bá nijilʼaʼ áádóó bichʼįʼ nahojiłá; hazhéʼé áátʼįįdígíí tʼáá átʼé bikʼehgo éí bee Bóhólníihii Ízrel biDiyin God bá hojííłchįįd.
