1 Kings 3:1-28
3 Áádóó Sálaman éí Ííjip kéyahdóó aláahgo naatʼáanii Féro iigeh binahjįʼ yił ahaʼdeetʼą́ągo Féro bitsiʼ yił ahaa yítʼáázh, áádóó David bikin haalʼáagi bił ajííʼáazhgo tʼáá hó haghan áádóó Bóhólníihii bikin biiʼ sohodizin índa Jerúsalem kin haalʼáagi ditą́ągo binaa ahééʼítłʼinígíí ájíléhígíí ałtso ájiilaajįʼ ákwii bił haghan.
2 Nidi hodineʼé éí ninádahałaah doo biniyé wódah nahazʼą́ągo ádayiilaadi náádaʼiiłniih nítʼééʼ, háálá íídą́ą́ʼ Bóhólníihii bikin biiʼ sohodizin bee wójíii tʼah doo álnéeh da.
Sálaman éí hódzą́ yíká sodoolzin (2Chr. 1:1-13)
3 Sálaman éí Bóhólníihii ayóóʼáyóʼní; bizhéʼé David yę́ę yee nihwiizʼáanii yikʼehgo yigááł; tʼáá hazhóʼó náájiiłniihígíí áádóó tsin bijeeh dilidgo łikání halchinii éí ninádahałaah doo biniyé wódah nahazʼą́ągo ádayiilaadi nááʼjiiłniih.
4 Áádóó aláahgo naatʼáanii éí Gíbiyan kin haalʼáágóó náádiʼyoołnih yiniyé ííyá, háálá éí ninádahałaah doo biniyé wódah nahazʼą́ągo ádayiilaaígíí aláahgo áhoníłtso; ákweʼé Sálaman éí tʼááłáhídi mííl didlidgo nááhániihii éí bikááʼ nááʼiiniihí yikáaʼjįʼ nááyiisniiʼ.
5 Áko Gíbiyandi Sálaman éí tłʼéeʼgo Bóhólníihii hachʼįʼ yitʼíní íʼdiilyaago baa nijiiyeełgo Diyin God kóshíłní jinízin, Shííníkeedígíí naa dideeshʼááł.
6 Áádóó Sálaman ání, Shizhéʼé David ná naalʼaʼí yę́ę ayóó átʼéego baa aʼáhí nínízingo ninááł yigáałgo tʼáá aaníinii índa tʼáá ákogi átʼéii, áádóó bijéí tʼáá ákwii átʼéego nił yiʼash nítʼééʼ. Áádóó díí ayóó átéego bichʼįʼ náʼáhwiinítʼı̨́ʼí bá íínísin nítʼééʼ, éí biyeʼ łaʼ béíníłtı̨́įgo bibikááʼdóó nahatʼáii yikááʼ dah neezdá, éí díí jı̨́ı̨́góó ákótʼé.
7 Áádóó kʼad, Bóhólníihii shiDiyin God nílíinii, shizhéʼé David yę́ę bitsáskʼehgi ná naalʼaʼí nishłı̨́įgo aláahgo naatʼáanii áshiinilaa; shíyeeʼ áłchíní nahonishłin; chʼíʼiidáahgo doodaiiʼ yah anáʼiidáahgo doo shił bééhózin da.
8 Áádóó ná naalʼaʼí éí nidineʼé nídininilígíí yitahgi naaghá; dineʼé tʼóó ahayóigo doo jóołtaʼ ánéelą́ąʼ da.
9 Éí bąą ná naalʼaʼí nishłíinii shijéí bee akʼidiʼyiishtįįh áshíléehgo nidineʼé bá nihodiyiishʼaah doo, áko yáʼádaatʼéehii índa doo yáʼádaatʼéehii baa ákohiniisįįh doo. Jó, háishąʼ díí nidineʼé tʼáadoo bee néelą́ʼígóó yílʼáhígíí bá nihozhdiyiiʼaahgo bízhneelʼą́?
10 Áko Sálaman díí yiyííkeedígíí Bóhólníihii bąą bił hóózhǫǫd.
11 Áádóó Diyin God áháłní, Jó, díí yíníkeedígíí doo tʼáá ni asʼahgóó hinínáa da doo biniyé yííníkeed da, doodaiiʼ adíítʼįįłígíí doo ádá yííníkeed da, doodaiiʼ niʼanaʼí nidootsiłgo doo yííníkeed da, nidi tʼáá ni ádá bee akʼidiʼdíítı̨́įłii éí tʼáá ákwii ádaatʼéii índa doo yáʼádaatʼéehii baa ákohiniizįįh doo biniyé yííníkeed; éí biniinaa,
12 shoo, tʼáá yíníkeedígíí bikʼehgo íisdzaa; jó, honíyą́ą doo índa tʼáadoo leʼé baa ákonínízin doo biniyé naa diníʼą́; nítséedi tʼáadoo łaʼ ákójítʼéhí da nítʼééʼ, áádóó nikééʼ áhásdįįdóó doo łaʼ nigi átʼéego nazhnitʼáa da doo.
13 Áádóó díí tʼáadoo yííníkeedígíí tʼáá áłah atʼı̨́ índa ił ídlı̨́ éí naa diníʼą́, áko aláahgo naatʼáanii danilíinii bitahgóó doo ni ánítʼéhígi ádaatʼéégóó niʼdííłdįįł.
14 Ádíshníinii bikʼehgo yínáałgo nizhéʼé David hiná yę́ęgi átʼéego bee nihoyíʼáanii índa shibikʼeh óʼooʼníiłii bikʼeh ánítʼéego asʼahgóó hinínáago ándeeshłííł.
15 Áko Sálaman chʼéédzídzid nítʼééʼ; shoo, nidziizyeel lá. Áádóó Jerúsalem kin haalʼáadi jiníyá, áko Bóhólníihii bitsitsʼaaʼ bee ahaʼdeetʼáanii bichʼįʼ nizhníyáago didlidgo nááhániihii náájiisniiʼ, índa hózhǫ́ǫ́jí nááhániihii náájiisniiʼ, áádóó há nidaalʼaʼí tʼáá átʼé bá ádaʼdzíísįįd.
Sálaman éí hóyą́ągo ánihodiiʼaah
16 Nítʼééʼ asdzání nidiltʼéego ałjiłnii nilı̨́įgo aláahgo naatʼáanii yaa níʼáazhgo yidááhdóó yiizįʼ.
17 Áádóó asdzání łaʼ ání, Bóhonishníihii, shí áádóó díí asdzání bił tʼáá łaʼ kin biiʼ nihighango tʼáá ákóneʼ honiidlǫ́ǫgo shí ashéłchı̨́.
18 Áádóó shí ashéłchı̨́ı̨́dóó bikʼijįʼ tááʼ yiską́ągo díí asdzání ałdóʼ ashchı̨́, áko tʼáá áníidlah ákóneʼ nihighan; tʼáá háiida éí doo nihił naháaztą́ą da, nihí tʼéiyá.
19 Áko tłʼéeʼgo díí asdzání beʼawééʼ daaztsą́, háálá bikʼizneeztı̨́ı̨́ lá.
20 Áádóó tłʼéʼííłníiʼgo éí asdzání nídiiʼnaʼgo shiyáázh shíighahdóó néidiiłtı̨́įgo ádíighahgóó niiníłtı̨́ı̨́ lá; shí asdzání ná naalʼaʼí nishłíinii ashhoshgo ájíítʼįįd, áádóó bí beʼawééʼ daaztsánígíí éí shíighahgóó niiníłtı̨́ı̨́ lá.
21 Áádóó abínígo sheʼawééʼ bidiʼyeeshtʼoł biniyé nídiishnaʼ, nítʼééʼ daaztsą́ą́ lá, nidi tʼáá éí abíní hazhóʼó nééłʼı̨́įʼgo, shoo, shiyáázh tʼáá shí shéłchínígíí doo éí átʼı̨́į da.
22 Áádóó asdzání łaʼígíí ání, Dooda, hinánígíí éí shí shiyáázh, áádóó daaztsánígíí éí ni niyáázh nítʼééʼ. Áko bí ání, Dooda, daaztsánígíí yeeʼ ni niyáázh nítʼééʼ, áádóó hinánígíí éí shí shiyáázh. Kótʼéego aláahgo naatʼáanii binááł ałghazhditʼááh.
23 Áko aláahgo naatʼáanii ání, Díí asdzání laʼ kóní, Díí hinánígíí éí shí shiyáázh, áádóó daaztsánígíí éí ni niyáázh nítʼééʼ, áádóó łaʼígíí ání, Dooda, daaztsánígíí éí ni niyáázh nítʼééʼ, áádóó hinánígíí éí shí shiyáázh.
24 Áádóó aláahgo naatʼáanii ání, Aadę́ę́ʼ diltłish shá nídoohtįįh. Áko aláahgo naatʼáanii binááł diltłish nídeidiitą́.
25 Áádóó aláahgo naatʼáanii ání, Awééʼ ałtsʼánółgéeshgo ałnííʼdóó díí asdzání baa nołteeh, áádóó łahjįʼígíí éí łaʼígíí baa nołteeh.
26 Áko awééʼ hinánígíí bimá tʼáá íiyisí baa aʼáhí niizı̨́įʼgo aláahgo naatʼáanii áyidííniid, Bóhonishníihii, tʼáá shǫǫdí, awééʼ hinánígíí tsʼídá doo diyííłhéeł da, nidi tʼóó baa níłteeh. Nidi łaʼígíí ání, Bíniʼ doo shí da doo índa doo ni da doo, nidi tʼóó ałtsʼánółgéésh.
27 Nítʼééʼ aláahgo naatʼáanii haadzíiʼgo ání, Asdzání átsé haadzíʼígíí awééʼ hinánígíí baa nołteeh; sołhéé lágo; jó, bí yimá nilı̨́.
28 Áko Ízrel dineʼé tʼáá átʼé éí aláahgo naatʼáanii á nihodiyiiʼaahgo hazhóʼó á nihodiníʼánígíí yaa dahodiiztsʼą́ąʼgo aláahgo naatʼáanii bił dáálįįd, háálá Diyin God bibee hódzáanii biiʼ hólǫ́ǫgo yee tʼáá ákóneʼ átʼı̨́įgo á nihodiyiiʼaahgo yaa ákodaniizı̨́ı̨́ʼ.
